Alatsinainy 30 Desambra 2019 - Fil 4 : 6 - 9

6Aza manahy na inona na inona fa ambarao amin’Andriamanitra isaka izay mivavaka ny zavatra ilainareo, ary angataho amin’ny fo feno fankasitrahana. 7Ary ilay fiadanana avy amin’Andriamanitra sady mihoatra noho ny zavatra rehetra takatry ny fieritreretan’olombelona, dia hiaro ny fonareo sy ny sainareo, satria efa tafaray amin’i Kristy Jesoa ianareo.

8Farany, ry havana, aoka hoheverinareo izay zavatra tsara sy maha te hidera: dia izay rehetra marina, manan-kaja, ara-drariny, madio, mahatehotia ary tsara laza. 9Ataovy izay efa nianaranareo sy noraisinareo tamiko ary izay renareo sy hitanareo nataoko. Dia homba anareo Andriamanitra loharanon’ny fiadanana.

Alahady 29 Desambra 2019 - Jao 14 : 27 - 31

27Fiadanana no avelako ho anareo, ny fiadanako no omeko anareo; tsy mba fiadanana tahaka ny fanomezan’izao tontolo izao no omeko anareo. Aoka izay ny horohoro na ny tahotra ao am-ponareo. 28Efa renareo fa izao no voalazako taminareo: «Handeha Aho, nefa mbola hiverina ho atỳ aminareo.» Raha tia Ahy ianareo, dia ho faly amin’izao andehanako ho any amin’ny Ray izao, satria lehibe noho Izaho ny Ray. 29Niteny taminareo sahady Aho, dieny tsy mbola tonga izany, mba hinoanareo rehefa tonga izany. 30Tsy hilaza zavatra maro aminareo intsony Aho, satria tonga ilay filohan’izao tontolo izao: tsy manam-pahefana amiko velively izy, 31saingy tonga izy mba hahafantaran’izao tontolo izao fa tiako ny Ray, ary araka izay nandidian’ny Ray Ahy no ataoko. Mitsangàna, ndeha isika hiala eto!

Sabotsy 28 Desambra 2019 - Isa 55 : 6 - 13

6Tadiavo ny TOMPO, dieny mbola manaiky ho hita,
antsoy Izy, dieny mbola akaiky anareo.
7Aoka ny olon-dratsy handao ny fanaony,
ary ny mpanao ratsy hahafoy ny heviny.
Aoka hiverina amin’ny TOMPO ireny
fa hamindra fo aminy Izy.
Aoka hiverina amin’Andriamanitsika ireny
fa hihoa-pampana ny famelan-keloka homeny azy.

8Teny hentitry ny TOMPO izao:
«Ny hevitro tsy hevitrareo
ary ny lalanareo tsy mba lalako.
9Tahaka ny haavon’ny lanitra amin’ny tany
no haavon’ny lalako amin’ny lalanareo
sy ny hevitro amin’ny hevitrareo.

10Ny ranonorana sy oram-panala
milatsaka avy any an-danitra
dia tsy miverina any raha tsy efa mahavonto ny tany
sy mahalonaka azy ary mampahavokatra azy
ka mampahazo masomboly hafafy sy hanin-kohanina;
11dia ho tahaka izany koa ny teny aloaky ny vavako:
tsy hiveri-maina foana atỳ amiko izy,
raha tsy efa nahatanteraka izay sitrako
sy nahatratra ny tanjona nanirahako azy.

12Fa amim-pifaliana no hialanareo eto Babilôna
ary amim-piadanana no hampodîna anareo.
Ny tendrombohitra sy ny havoana
dia hihorakora-pifaliana rehefa mandalo ianareo,
ary ny hazo rehetra any an-tsaha hiteha-tanana.
13Ny hazo kipreso no haniry ho solon’ny tsilo,
ary ny rotra no haniry ho solon’ny amiana.
Ho voninahitra ho an’ny TOMPO izany,
ka ho famantarana tsy hokosehina na oviana na oviana
ny amin’izay nataony ho anareo.»

Zoma 27 Desambra 2019 - Efe 2 : 14 - 18

14Satria i Kristy mihitsy no nampihavana antsika roa tonta, ka nahatonga ny Jiosy sy ny hafa firenena ho iray; fa tamin’ny nanoloran’i Kristy ny tenany, dia narodany ny rindrina izay nampisaraka antsika sy nahatonga antsika hifankahala. 15Nofoanan’i Kristy ny lalàna jiosy mbamin’ny didy amam-pitsipiny mba hampiraisany antsika roa tonta amin’ny tenany ka hanaovany antsika ho olom-baovao tokana: toy izany no ahavitan’i Kristy fampihavanana. 16Ny nahafatesany teo amin’ny hazofijaliana dia nanafoana ny fifankahalana, ka nanambatra antsika roa tonta ho tena iray ihany sady nampihavana antsika tamin’Andriamanitra. 17Izany no nahatongavan’i Kristy nitory Vaovao Mahafaly fampihavanana taminareo hafa firenena izay lavitra an’Andriamanitra sy taminay Jiosy izay akaiky Azy. 18Koa dia amin’ny alalan’i Kristy no ahazoantsika roa tonta manatona an’Andriamanitra Ray noho ny asan’ny Fanahy Masina iray ihany.

Alakamisy 26 Desambra 2019 - Lio 2 : 8 - 14

8Tany amin’izany faritany izany, dia nisy mpiandry ondry nitoetra tany an-tsaha niambina ny ondriny nandritra ny alina. 9Nisy anjelin’ny Tompo niseho tampoka taminy; ary nohodidinin’ny voninahitry ny Tompo ireo mpiandry ondry ka raiki-tahotra izaitsizy.

10Fa hoy ilay anjely taminy:
–Aoka izay ny tahotra, fa vaovao mahafaly no entiko ho anareo, dia fifaliana lehibe ho an’ny vahoaka rehetra: 11Mpamonjy no teraka ho anareo anio ao an-tanànan’i Davida, dia i Kristy Tompo. 12Izao no hahafantaranareo Azy: hahita zazakely anankiray voahodidina lamban-jaza sady mandry eo amina fihinanam-bilona ianareo.

13Ary nisy anjely alikisa avy any an-danitra niseho niaraka tamin’ilay anjely teo ka nidera an’Andriamanitra nanao hoe:

14«Voninahitra any amin’ny avo indrindra
ho an’Andriamanitra;
ary fiadanana etỳ an-tany ho an’ny olombelona
fa nanehoany fitia!»

Alarobia 25 Desambra 2019 - Isa 2 : 1 - 4

1Ny toe-javatra hitan’i Isaià, zanakalahin’i Amôtsa, momba ny fanjakan’i Joda sy ny tanànan’i Jerosalema.

2Izao no hiseho amin’ny andro any aoriana:
Ny tendrombohitra misy ny tranon’ny TOMPO
dia hanerinerina ambonin’ny tendrombohitra sisa
ka hasandratra ho avo kokoa noho ireo havoana;
dia hitanjozotra hankany ny firenena rehetra.
3Handeha ho any ny firenena marobe ka hifampitaona hoe:
«Andeha isika hiakatra any an-tendrombohitry ny TOMPO,
ho any an-tranon’ilay Andriamanitr’i Jakôba;
dia hampianariny antsika ny sori-dàlany,
ary harahintsika ny lalana hatorony.»
Fa avy ao Tsiôna no ivoahan’ny fampianarana,
ary avy ao Jerosalema no iavian’ny tenin’ny TOMPO.
4Hitsara ny firenena maro Izy,
ary hampanaiky ny vahoaka rehetra
ka hanefy ny sabany ho angady ireny,
ary hanao ny lefony ho fanetezam-boaloboka
sady tsy hianatra hiady intsony.

Talata 24 Desambra 2019 - Mal 2 : 5 - 8

5Ny fanekempihavanako taminy dia ahazoany fiainana sy fiadanana. Nomeko azy izany mba hanajany Ahy; ka dia nanaja Ahy sy nangovitra teo anatrehan’ny anarako izy. 6Marina ny fampianarana nomeny ary tsy nisy fitaka teo amin’ny molony. Tamim-pahatoniana sy tamim-pahitsiana no niarahany tamiko ka nandreseny lahatra olona marobe hiala amin’ny faharatsiana. 7Fa andraikitry ny mpisorona ny mampianatra ny olona hahalala Ahy Andriamanitra TOMPOn’izao rehetra izao; ny mpisorona no anontaniana ny fitsipika tokony hampiharina, satria mpitondrateniko izy. 8Fa ankehitriny efa nivily lalana ianareo mpisorona, ka nahasolafaka olona maro tamin’ny fampianaranareo. Noravanareo noho izany koa ny fanekempihavanako taminareo, hoy Izaho Tompon’izao rehetra izao.

Alatsinainy 23 Desambra 2019 - Rom 15 : 7 - 13

7Koa mifandraisa tsara ianareo, tahaka ny nandraisan’i Kristy anareo koa ho voninahitr’Andriamanitra. 8Fa izao no ambarako aminareo: Tonga mpanompon’ny Jiosy i Kristy mba hahatanteraka ny fampanantenana natao tamin’ny razan’izy ireo ka anehoana fa azo antoka Andriamanitra. 9Ary izany koa dia mba hahazoan’ny hafa firenena manome voninahitra an’Andriamanitra noho ny famindrampony, araka izay voalazan’ny Soratra Masina hoe:

«Izany no hiderako Anao any amin’ny hafa firenena
sy hihirako ho voninahitry ny anaranao.»
10Ary hoy indray ny Soratra Masina hoe:

«Miaraha miravo amin’ny vahoakan’ny Tompo,
ry hafa firenena!»
11Ary koa hoe: «Derao ny Tompo, ry firenena rehetra;
ankalazao Izy, ry vahoaka rehetra!»

12Ary hoy indray i Isaià hoe:
«Ho avy ilay solofon’i Jisay,
dia ilay hitsangana hifehy ny firenena:
Izy no hitokian’ireo firenena!»

13Ilay Andriamanitra loharanon’ny fanantenana anie hameno fifaliana sy fiadanana tanteraka anareo noho ny finoanareo, mba hampitomboina be dia be ao aminareo ny fanantenana noho ny herin’ny Fanahy Masina!

Alahady 22 Desambra 2019 - Lio 1 : 26 - 38

26Rehefa bevohòka enim-bolana i Elizabeta, dia nirahin’Andriamanitra ny anjely Gabriela ho any amin’ny tanàna anankiray any Galilea atao hoe Nazareta, 27hankao amin’ny tovovavy fofombadin’ny lehilahy atao hoe Jôsefa. Io Jôsefa io dia taranak’i Davida mpanjaka; ary i Maria no anaran’ilay tovovavy. 28Niditra tao an-tranon’i Maria ilay anjely ka nanao taminy hoe:
–Mifalia, ry nohasoavin’ny Tompo! Momba anao hatrany Izy!

29Taitra tokoa i Maria noho izany teny izany, ka nieritreritra izay mety ho hevitr’ilay fiarahabana. 30Ary hoy ny anjely taminy:
–Aoka izay ny tahotra, ry Maria, fa efa nahazo tombon-tsoa tamin’Andriamanitra ianao! 31Hitoe-jaza ianao, ho tera-dahy, ary i Jesoa no hataonao anarany. 32Ho lehibe Izy sady hantsoina hoe Zanaky ny Avo indrindra. Ny Tompo Andriamanitra hahatonga Azy ho mpanjaka handimby an’i Davida razambeny; 33dia hanjaka mandrakizay amin’ny vahoaka Israely Izy ary tsy hanam-pahataperana ny Fanjakàny.

34Fa hoy i Maria tamin’ny anjely:
–Hanao ahoana àry no hahatanterahan’izany, fa izaho manko virijiny?

35Dia novalian’ny anjely hoe:
–Ho tonga eo aminao ny Fanahy Masina, ka ny herin’ny Avo indrindra hanarona anao. Noho izany ilay Masina haterakao dia hantsoina hoe Zanak’Andriamanitra. 36Ary indro i Elizabeta havanao efa mitoe-jaza koa, na iny izy antitra iny aza, ary efa bevohòka enim-bolana izao ilay natao hoe momba. 37Fa tsy misy zavatra tsy ho vitan’Andriamanitra!

38Tamin’izay dia hoy i Maria:
–Intỳ aho mpanompovavin’ny Tompo, aoka anie ho tonga amiko araka ny teninao!

Dia nandao azy ilay anjely.

Sabotsy 21 Desambra 2019 - Jao 16 : 31 - 33

31I Jesoa kosa namaly azy hoe:
–Mino ve ianareo ankehitriny? 32Indro avy ary efa tonga sahady aza ny andro izay hielezanareo samy ho any amin’ny misy anareo avy, ary handaozanareo Ahy ho irery; kanefa tsy irery Aho, fa miaraka amiko ny Ray. 33Izany no voalazako taminareo, dia mba hanananareo fiadanana amin’ny firaisana amiko. Eto amin’izao tontolo izao no ahitanareo fahoriana; nefa mahereza, fa Izaho efa naharesy izao tontolo izao!

Zoma 20 Desambra 2019 - Lio 10 : 1 - 7

1Taorian’izany, dia nifidy 72 lahy hafa indray ny Tompo, ka nirahiny tsiroaroa hialoha Azy any amin’ny tanàna sy ny toerana rehetra mbola halehany.

2Ary hoy Izy taminy:
–Be ny vokatra fa ny mpiasa no vitsy. Angataho àry ny Tompom-bokatra haniraka mpiasa hamory ny vokany. 3Mandehana! Indro irahiko ianareo, mova tsy zanak’ondry eo afovoan’amboadia. 4Aza mitondra kitapom-batsy na kapa, ary aza lany andro miarahaba olona eny an-dalana. 5Izay trano androsoanareo dia voalohany indrindra ilazao hoe: «Ho ato amin’ity trano ity anie ny fiadanana!» 6Raha misy olona tia fiadanana ao, dia hirotsaka aminy ny fiadanana rarînareo; fa raha tsy misy kosa, dia hiverina aminareo ihany izany. 7Mitoera amin’izany trano izany, fa aza mifindrafindra trano; ary hano sy sotroy izay aroson’ny tompon-trano, fa ny mpiasa dia mendrika homena ny karamany.

Alakamisy 19 desambra 2019 - Zak 8 : 16 - 17

16Izao no tsy maintsy hataonareo:
samia milaza ny marina
amin’ny namany avy ianareo;
aoka ho didim-pitsarana ara-drariny
no havoaka eo amin’ny toeram-pitsaranareo
mba hahatonga fiadanana eo aminareo.
17Aza mieritreritra hanisy ratsy ny namana
ary aza mety hianiana lainga,
fa halako ny zavatra rehetra toy ireny.
Izaho TOMPO no manao izany teny hentitra izany.»

Alarobia 18 desambra 2019 - II Tan 14 : 1 - 6

1Nanao izay tsara sy mahitsy eo imason’ny TOMPO Andriamaniny i Asà, 2fa noravany ny alitara aman-toeram-panasinan’ireo firenena vahiny, notorotoroiny ny tsangambaton-tsampy ary nokapainy ny tsatokazo fanajana an’i Aserà. 3Nomeny baiko ny Jodeanina hitady ny TOMPO Andriamanitry ny razany sy hankatò ny lalànany sy ny didiny. 4Noravan’i Asà ny toeram-panasinana sy ny alitara fandoroana vovo-javamanitra teny amin’ny tanàna rehetra manerana an’i Joda; ka nandry feizay ny fanjakana nandritra ny fitondrany. 5Eny, nandry feizay tokoa ny tany fa tsy nisy niady tamin’i Asà nandritra ireo taona ireo, satria ny TOMPO no nanome azy fiadanana ary nanamafy tanàna maro tao Joda ny mpanjaka nandritra izany fotoam-pilaminana izany 6sady niteny tamin’ny Jodeanina hoe:

–Ndeha hohamafisintsika ireto tanàna ireto ka hasiantsika manda manodidina ary koa tilikambo sy vavahady mafy hidy, satria mbola eo ambany fitondrantsika ny tany. Ny TOMPO Andriamanitsika manko no efa notadiavintsika; eny, nitady Azy isika ka nomeny fiadanana amin’ny sisin-tany manodidina.

Talata 17 Desambra 2019 - Jao 20 : 26 - 31

26Nony afaka herinandro, dia vory tao an-trano indray ny mpianatr’i Jesoa; ary tafaraka tamin’ireo koa i Tômà. Voahidy avokoa ny varavarana, kanefa dia tonga i Jesoa nijoro teo afovoan’ny mpianatra ary nanao hoe:
–Ho ao aminareo anie ny fiadanana!

27Avy eo dia hoy Izy tamin’i Tômà:
–Arosoy eto ny rantsan-tananao ka jereo ny tanako roa; arosoy koa ny tananao ka atsofoy eto amin’ny foko; ary aza malain-kino, fa minoa!

28Dia namaly i Tômà ka nanao taminy hoe:
–Tompoko sy Andriamanitro!

29Fa hoy i Jesoa taminy:
–Noho ianao nahita Ahy, dia nino; sambatra kosa izay tsy nahita, nefa nino.

30Maro koa ny famantarana hafa nataon’i Jesoa teo imason’ny mpianany no tsy voasoratra amin’ity boky ity. 31Fa voasoratra ireo famantarana ireo mba hinoanareo fa i Jesoa no ilay Mesia, ilay Zanak’Andriamanitra, ary mba hahavelona aina anareo amin’ny alalany, raha mino Azy ianareo.

Alatsinainy 16 Desambra 2019 - Mpi 6 : 19 - 24

19Dia nandeha i Gidehôna ka namboatra zanak’osy sy mofo tsy misy leviora tamin’ny koba ankevitry ny telopolo kilao. Nataony tao anaty harona ny hena ary nataony tao anaty vilany ny ron-kena, dia nentiny teo ambanin’ny terebinta ka natolony ny Tompo. 20Ary hoy ilay anjelin’Andriamanitra taminy:
–Apetraho eo ambonin’ity harambato ity ny hena sy ny mofo tsy misy leviora ka tondrahy ron-kena.

Dia nataon’i Gidehôna izany. 21Ary naninji-tanana ilay anjelin’ny TOMPO, ka nokasihiny tamin’ny tendron’ilay tehina teny an-tanany ny hena sy ny mofo tsy nisy leviora; dia nivoaka afo ny vatolampy ka nandevona ny hena sy ny mofo. Avy eo ilay anjelin’ny TOMPO dia nanjavona teo imasony. 22Takatr’i Gidehôna tamin’izay fa anjelin’ny TOMPO ilay teo ka hoy izy hoe:
–Lozako, ry Tompo ANDRIANANAHARY ô, fa nahita ny anjelinao nifanatrika tamiko aho.

23Hoy kosa ny TOMPO taminy;
–Fiadanana anie ho aminao; aza matahotra, fa tsy ho faty ianao.

24Ary nanorina alitara ho an’ny TOMPO teo i Gidehôna, ka io toerana io dia nantsoiny hoe «Ny TOMPO manome fiadanana»; ary mandraka androany izany alitara izany dia mbola ao Hôfrà, tanànan’ny tarik’i Abihezera.

Alahady 15 Desambra 2019 - Rom 14 : 19 - 23

19Izay mampitombo ny fiadanana àry no aoka hokatsahintsika, mbamin’izay ifanampiantsika hiorina amin’ny finoana; 20fa aza izay sakafo no handravanao ny asan’Andriamanitra. Eny, madio ka azo hanina avokoa ny zavatra rehetra, nefa kosa ratsy ny mihinan-javatra raha mahasolafaka namana amin’ny ratsy izany. 21Ny tsara dia ny tsy mihinan-kena na misotro divay na mikasika akory izay mahasolafaka ny namanao amin’ny ratsy. 22Tano ho anao eo anatrehan’Andriamanitra izay itokianao ho marina. Sambatra izay tsy melohin’ny eritreriny amin’ny zavatra ankatoaviny. 23Fa izay miahanahana dia melohin’Andriamanitra, raha mihinana, satria tsy vokatry ny finoana no ihinanany. Fa izay rehetra tsy vokatry ny finoana dia fahotana avokoa.

Zoma 13 Desambra 2019 - II Tes 3 : 6 - 16

6Ry havana, mamarafara anareo amin’ny anaran’i Jesoa Kristy Tompontsika izahay: halaviro ny namana kamo, tsy manaraka ny fampianarana efa nampitainay taminy. 7Eny, fantatrareo izay tokony hataonareo hanahafanareo anay. Tsy olona kamo izahay, fony tatỳ aminareo. 8Tsy nihinana ny sakafon’olona maimaimpoana izahay, fa nikely aina sy nisasatra niasa andro aman’alina mba tsy hanahirana na dia iray aminareo aza. 9Izany no nataonay, dia tsy hoe tsy manan-jo handray fanampiana avy aminareo izahay, fa mba hanomezanay ohatra hotahafinareo. 10Eny, fony tany aminareo izahay, dia namepetra anareo hoe: «Raha misy tsy te hiasa, aoka izy tsy hihinana!»
11Izany no lazainay dia satria renay fa misy aminareo kamo tsy miasa fa manao zavatra tsisy antony etsy sy eroa. 12Ny olona toy izany dia feperanay sady ampirisihinay amin’ny anaran’i Jesoa Kristy Tompo mba hiasa amim-pilaminana ka hihinana ny azy ihany.

13Fa ianareo kosa, ry havana, aza ketraka amin’ny fanaovan-tsoa. 14Raha misy olona tsy manaiky ny teny ataonay amin’ny alalan’izao taratasy izao, dia mariho izy ka aza ifampiraharahana mihitsy mba hahamenatra azy; 15kanefa aza raisina ho fahavalo izy fa anaro toy ny mpiray tampo.

16Ny Tompo loharanom-piadanana anie hanome anareo fiadanana mandrakariva amin’ny zavatra rehetra! Homba anareo rehetra anie ny Tompo!

Alakamisy 12 Desambra 2019 - Jer 33 : 1 - 3

1Fa raha mbola voatana teo an-kianjan’ny trano fiambenana i Jeremià, dia nisy indray tenin’ny TOMPO fanindroany taminy nanao hoe:
2«Izao no lazain’ny TOMPO, Ilay manao ny zava-mitranga ka mamolavola azy mba hitantanany azy, dia Ilay antsoina hoe TOMPO: 3Antsoy Aho, dia hamaly anao sady hampianatra anao zava-dehibe izay tsy takatry ny saina sady tsy mbola fantatrao.

Alarobia 11 Desambra 2019 - Lio 11 : 27 - 28

27Nony avy nilaza izany i Jesoa, dia nisy vehivavy anankiray teo afovoan’ny vahoaka nanandra-peo nanao taminy hoe:
–Sambatra izay reny nitondra Anao tao an-kibony sy nampinono Anao!

28Fa hoy i Jesoa:
–Vao mainka sambatra aza ireo mihaino ny tenin’Andriamanitra ka mitandrina azy!

Talata 10 Desambra 2019 - Amo 9 : 11 - 15

11Hoy ny teny hentitry ny TOMPO hoe:
«Ilay tanànan’i Davida izao
dia toy ny tranobongo efa nianjera.
Fa ho avy ny andro izay hananganako indray
izany tanàna izany,
ka hofefeko ireo banga amin’ny màndany
hatsangako ny rava tao aminy,
ary haoriko indray ny tanàna ho tahaka ny taloha.
12Amin’izay no hakan’i Israely
ny tany sisa amin’i Edôma
sy amin’ny firenena hafa rehetra
izay nomarihina ny anarako hananako azy.
Izaho Tompo no hahatanteraka izany.»
13Hoy koa ny teny hentitry ny TOMPO hoe:
«Indro avy ny andro
izay hahavokatra ny vary
ka efa hasaina ny tany vao vita ny fijinjana,
sy hahavokatra ny voaloboka
ka efa hafafy ny voambary
vao vita ny fihosemboaloboka.
Divay no hiboiboika eny an-tendrombohitra
sy hikoriana eny an-tampon-kavoana rehetra.
14Haveriko avy amin’ny fahababoana
ny Israely vahoakako,
ka ireo tanàna efa rava
hatsangany sy honenany indray.
Hamboly voaloboka izy
ka hisotro ny divay avy aminy,
ary hanao zaridaina
ka hihinana ny vokatra avy aminy.
15Hamboleko eo amin’ny tany izany nomeko azy izy,
ka tsy hongotana hiala eo intsony.
Izaho TOMPO Andriamanitrao no efa niteny.»

Alahady 08 Desambra 2019 - Job 36 : 5 -15

5Jereo fa mahery Andriamanitra
kanefa tsy mba manambany olona;
eny, mahery tokoa Izy
ka hentitra amin’ny fanapahan-keviny.
6Tsy mamela ny olon-dratsy ho ela velona Izy
fa manome rariny kosa ny mahantra.
7Miahy ny olo-marina mandrakariva Izy
ka manandratra voninahitra azy
sy mampaharitra azy eo amin’ny fitondrana
toy ny mpanjaka eo amin’ny sezafiandrianany.

8Fa raha olo-marina no voagadra rojo vy
sady voagejam-pahoriana,
9dia ny asany no ambaran’Andriamanitra azy:
manota ireo, satria niavonavona.
10Dia manokatra sofina azy Andriamanitra
mba hihaino ny fananarany
ka mandidy azy hiala amin’ny ratsy.
11Raha mety mihaino an’Andriamanitra izy,
dia amin’ny fahasambarana sy ny hamamiana
no handaniany ny androny sy ny taonany.
12Fa raha tsy mety mihaino kosa izy,
dia ho faty hiharan-tsabatra
noho izy tsy manam-pahalalana akory.
13Fa ny ratsy fanahy dia tezitra aminy
ka tsy mahataraina na dia gadrainy aza.
14Koa dia maty tanora sy ratsy fiafara ireo
toy ny olona iharan’ny fahafaham-baràka.

15Fa ny fahorian’ny ory kosa
no entin’Andriamanitra mamonjy azy,
ary ny loza mianjady aminy no entiny mampianatra azy.

Sabotsy 07 Desambra 2019 - Isa 26 : 11 - 12

11TOMPO ô, manandra-tanana handrahona Ianao
kanefa tsy ahoan’ireo olon-dratsy akory.
Aoka ho menatra izy raha mahita
ny zotomponao hiaro ny vahoakanao;
eny, aoka handevona azy ny afo
izay natokanao ho an’ny fahavalonao!
12TOMPO ô, Ianao no manome anay ny fiadanana
ary Ianao koa no mahatomombana ho anay
ny asa rehetra nataonay.

Zoma 06 Desambra 2019 - Jak 02 : 14 - 20

14Ry havako, inona moa no soa azon’ny olona milaza azy ho manam-pinoana, raha tsy miseho amin’ny asa izany? Mahavonjy azy ve izany finoana izany? 15Raha tàhiny misy havana iray finoana tsy manan-kitafy sady tsy ampy sakafo, 16dia inona moa no soa azonareo milaza aminy hoe: «Veloma finaritra, manaova mafana tsara, manaova voky tsara», raha tsy mba omenareo azy izay ilain’ny tenany? 17Toy izany kosa àry ny finoana: raha misy tsy miseho amin’ny asa, dia maty mihitsy.

18Nefa raha misy manao hoe: «Ny anao finoana, fa ny ahy asa», dia hovaliako hoe: «Asehoy ahy izay finoanao tsy ombàn’asa, fa hasehoko anao amin’ny asa kosa ny finoako.» 19Inoanao ve fa misy Andriamanitra tokana? Tsara ny ataonao. Mba mino izany koa anefa ireo demony ka mangovitra. 20Ry adala, tianao ve ny hahafantatra fa tsy vanona ny finoana tsy ombàn’asa?

Alakamisy 05 Desambra 2019 - Sal 85 : 8 - 13

8TOMPO ô, asehoy anay ny fitiavanao
ka omeo anay ny famonjenao.

9Te hihaino izay lazain’Andriamanitra TOMPO aho.
Fiadanana tokoa no ampanantenainy
ho an’ny vahoakany, dia ireo mpivavaka aminy,
raha tsy miverina amin’ny hadalàny intsony ireo.
10Eny, akaiky an’izay manaja Azy ny famonjeny;
hitoetra eto amin’ity tanintsika ity ny voninahiny.

11Tafahaona ny fitiavana sy ny fahamarinana,
mifanoroka ny rariny sy ny fiadanana.
12Mitrebona avy amin’ny tany ny fahamarinana
ary midina avy any an-danitra ny rariny.
13Ny TOMPO mihitsy no hanome ny zava-tsoa
ka hahavokatra tokoa ny tanintsika;
14ary handeha eo alohany ny rariny
ka hanoritra ny lalan-kodiaviny.

Alarobia 04 Desambra 2019 - Isa 57 : 15 - 21

15Fa ankehitriny ilay Avo manerinerina,
ilay mandrakizay ny fonenany sady masina ny anarany,
dia manao izao teny izao:
«Any amin’ny toerana avo sy masina no onenako,
nefa koa ao amin’ny torotoro fo sy manetry tena
mba hamelombelona ny fanahin’ireo manetry tena
sy hamelombelona ny fon’ireo torotoro fo.
16Fa tsy hanakiana lava Aho na ho tezitra hatrany;
raha tsy izany dia ho faty eo anatrehako
ny fofonaina mbamin’ny mananaina noariko.
17Ny fahadisoan’ny vahoakako no nahatezitra Ahy vetivety.
Noho Izaho tezitra no nikapohako azy
sady tsy netezako hijery azy.
Nefa nikomy hatrany izy
ka nanaraka ny ditran’ny fony,
18ary hitako ny fitondrantenany.
Saingy izao no lazaiko: Hanasitrana ny vahoakako Aho,
ka hitari-dalana sy hampahery azy.
Ary ho an’ireo olony misaona kosa,
19dia horakora-pifaliana no hataoko eo amin’ny molony.
Ka hoy AHO hoe: Fiadanana ho an’izay lavitra,
fiadanana ho an’izay akaiky!
Eny, hanasitrana ny vahoakako Aho.»
20Fa ny olon-dratsy kosa
dia toy ny ranomasina misamboaravoara
sady tsy afaka mitoetra milamina;
fa mamoaka loto sy fotaka ny ranony.
21«Tsy misy fiadanana ho an’ny olon-dratsy,
hoy ilay Andriamanitro.»

Talata 03 Desambra 2019 - Job 22 : 21 - 25

21Ifankazaro sy ihavano re Andriamanitra
dia hiverina aminao ny fahasambarana.
22Mbola raiso ny fampianarana omeny anao
ary alatsaho ao am-ponao ny teniny.
23Miverena am-panetren-tena amin’ilay Tsitoha,
ampanalaviro ny lainao ny tsy fahamarinana.
24Ario amin’ny tany ny vongam-bolamenanao
na avelao eny amin’ny vaton-driaka;
25fa ilay Tsitoha no ho volamenanao
sy ho volafotsy miavosa ho anao.

Alatsinainy 02 Desambra 2019 -Isa 9 : 1 -6

1Ny vahoaka mandeha ao anatin’ny haizina
dia hahita hazavana lehibe;
ary ny olona mipetraka ao amin’ny tany
izay tandindomin’ny fahafatesana
dia hiposahan’ny hazavana.
2Nohamaroinao ny fifaliany
ary nampitomboinao ny firavoravoany.
Miravoravo eo anatrehanao izy
tahaka ny iravoravoana amin’ny fararano
sy anaovana antsoantsom-pifaliana
rehefa injay mizara babo ny olona.
3Fa ny ziogam-pamoretana nanindry ny vahoakanao
ny tsora-kazo nikapohana ny lamosiny,
ny kibay namelezan’ny mpampiasa azy
dia samy hopotehinao avokoa
toy ny tamin’ny andro nampandosiranao ny Midianita.
4Fa ny kiraro rehetra entim-pahavalo
ka mikatrokatroka mampihozongozon-tany
ary ny fitafiana rehetra voahorona mihosin-dra
dia samy hodorana avokoa ho levon’ny afo.
5Satria misy zaza teraka ho antsika,
zazalahy no omena antsika;
eny an-tsorony ny mari-piandrianany,
ary ny anaram-boninahiny dia hatao hoe:
Mpitondra mahay, Andriamanitra mahery,
Ray mandrakizay, Andriana mitondra ny fiadanana.
6Hanao izay hanitarana ny fahefàny izy
ary hampisy fiadanana tsy misy fetra.
Ny sezafiandrianan’i Davida no hipetrahany
ary ny fanjakany no hofeheziny
ka haoriny sy hohamafisiny
amin’ny rariny sy ny hitsiny,
hatramin’izao ka ho mandrakizay.
Izany no hotanterahin’ny TOMPOn’izao rehetra izao,
vokatry ny firedaredam-pitiavany.

Alahady 01 Desambra 2019 - Lio 19 : 37 - 44

37Rehefa nanakaiky an’i Jerosalema Izy ka handray ilay fidinana eo amin’ny tendrombohitra Analanôliva, dia nisy mpianatra marobe indray nientan-kafaliana sady nidera an’Andriamanitra tamin’ny feo mahery, noho ny asa mahagaga rehetra efa hitany; 38hoy ny antsoantsony hoe:

«Hombàm-pitahiana amin’ny anaran’ny Tompo anie
ny Mpanjaka izay avy!
Fiadanana anie any an-danitra,
ary voninahitra anie ho an’Andriamanitra!»

39Nisy kosa Farisianina avy teo anivon’ny vahoaka niteny tamin’i Jesoa hoe:
–Mpampianatra ô, mba teneno ny mpianatrao hangina!

40Fa novalian’i Jesoa hoe:
–Lazaiko aminareo fa raha mangina ireo, dia ny vato no hiantsoantso!

41Ary nanakaiky an’i Jerosalema hatrany i Jesoa ka nony nahatazana ny tanàna, dia nitomany azy 42sady nanao hoe:
–Raha mba fantatrao amin’ity andro ity manko izay hanananao fiadanana! Nefa indrisy, takona ny masonao izany! 43Fa ho avy aminao ny andro hananganan’ny fahavalonao tovon-tany manodidina anao, ka hanaovany fahirano anao sy hanereny anao hatraiza hatraiza. 44Hofongorana tanteraka ianao sy ny mponina ao anatinao ka tsy havelany hisy vato mifanongoa eo aminao, noho ianao tsy nahalala ny andro notendren’Andriamanitra hamangiana anao!

Sabotsy 30 Novambra 2019 - Eze 14 : 6 - 11

6Noho izany, ambarao amin’ny Israelita fa iza no lazain’ny Tompo ANDRIANANAHARY: ‹Ialao ny toe-dratsy, ilaozy ny sampinareo sy ny fomba rehetra maharikoriko fanaonareo.›

7«Raha misy Israelita na vahiny monina ao Israely miala amiko ka mampiorina ny sampiny ao am-pony sady zavatra mitarika azy amin’ny heloka no apetrany eo anoloany, nefa avy eo izy tonga hila hevitra amin’ny mpaminany mba hahalala ny sitrapoko, dia Izaho TOMPO mihitsy no hamaly izany olona izany. 8Hifanandrina aminy Aho ka hataoko tonga oha-pitenenana izy ary hoesoriko tsy ho eo amin’ny vahoakako. Amin’izay dia hoekenareo fa Izaho no TOMPO.

9«Raha misy mpaminany voataona hamaly araka ny tenany ihany, dia Izaho TOMPO no efa nampanao azy izany; ary hanamparako ny heriko izy ka hoesoriko tsy ho eo amin’i Israely vahoakako. 10Na ny mpaminany na ny olona izay manontany azy dia samy hivesatra heloka mitovy ka samy hilanja ny vokany. 11Amin’izay dia tsy hiala amiko intsony ny Israelita sady tsy handoto ny tenany amin’ny heloka rehetra fanaony intsony; dia ho vahoakako izy ary Izaho ho Andriamaniny. Teny hentitra avy amiko Tompo ANDRIANANAHARY izany.

Zoma 29 Novambra 2019 - Mal 3 : 19 - 24

19Fa hoy Izaho TOMPOn’izao rehetra izao: Indro avy ilay andro ka mandoro tahaka ny fatana mivaivay. Amin’io andro io ny mpirehaka sy ny mpanao ratsy dia hodorana avokoa toy ny vodivary, ka tsy hisy miangana na ny fakany na ny sampany. 20Fa ho an’izay manaja ny anarako, dia izao no teniko: hiseho ny famonjeko toy ny masoandro miposaka manana fanasitranana ao amin’ny tànany. Ho afaka ianareo ka hifalihavanja toy ny zanak’omby mivoaka ny vala. 21Amin’io andro izay hotendreko io, dia hohitsakitsahinareo ny olon-dratsy ka ho toy ny vovoka eo ambany faladianareo, hoy Izaho TOMPOn’izao rehetra izao.»

22«Tsarovy ny lalànan’i Mosesy mpanompoko, dia ny didy amam-pitsipika izay nomeko azy tao Hôreba ho an’ny Israelita rehetra.
23«Fa alohan’ny hiavian’ny andron’ny TOMPO, ilay andro lehibe sady mahatahotra, dia haniraka an’i Elià mpaminany ho aminareo Aho. 24Izy no hampody ny fon’ny ray ho amin’ny zanany ary ny fon’ny zanaka ho amin’ny rainy; amin’izay Aho dia tsy ho avy hamely ny tany amin’ny fandringanana.»

Alakamisy 28 Novambra 2019 - Isa 13 : 6 - 9

6Manaova kiakiakam-pisaonana,
satria akaiky ny andron’ny TOMPO;
toy ny loza tsy hay tohaina no firongany
avy amin’Andriamanitra Tsitoha.
7Noho izany dia hiraviravy tanana ny besinimaro
ary ho ketraka ny fon’ny olona rehetra.
8Ho very hevitra tokoa izy
noho ny fanaintainana sy ny fahoriana mahazo azy
ka hiolanolana toy ny vehivavy hiteraka.
Talanjona izy mifampijery
ka mivaloarika ny tarehiny.

9Indro avy ny andron’ny TOMPO,
andro ombàm-pahatezerana tsy azo ivalozana
sy isehoam-pahavinirana mirehitra,
ka hahatonga izany tany izany ho hay
sady handringanana ny mpanota tsy ho ao intsony.

Alarobia 27 Novambra 2019 - Mat 16 : 24 - 28

24Avy eo dia hoy i Jesoa tamin’ireo mpianany:
–Raha misy te hiara-dia amiko, dia aoka izy handà ny tenany ka hitondra ny hazofijaliany ary hiaraka amiko. 25Fa izay te hamonjy ny ainy no hahavery azy; ary izay hahafoy ny ainy noho ny fitiavany Ahy kosa no hahavonjy azy. 26Fa inona no soa azon’ny olona raha eo am-pelatanany avokoa izao tontolo izao, kanefa ny ainy mitondra faisana? Ary inona no azon’ny olona omena ho takalon’ny ainy? 27Eny, rahatrizay ny Zanak’olona ho avy ombàn’ny voninahitra homen’ny Rainy sady otronin’ireo anjeliny, dia samy hovaliany araka ny nataony avy ny isam-batan’olona. 28Lazaiko marina aminareo fa ny sasany amin’izay manatrika eto dia tsy ho faty raha tsy efa mahita ny Zanak’olona tonga amin’ny maha mpanjaka Azy.

Talata 26 Novambra 2019 - Jer 17 : 10 - 13

10–Izaho TOMPO kosa
dia mahita ny ao am-po
sy mamantatra ny ao an’eritreritra.
Koa araka ny fitondrantenany
sy ny vokatry ny asany avy
no hamaliako ny olona.
11Tahaka ny akoho mikotrika atodin-gana,
toy izany izay manangon-karena tsy ara-drariny:
eo antenatenan’androny izy
no hilaozan’izany hareny izany,
ka ho lasa adala no iafarany.

12Sezafiandrianana be voninahitra
sady miteronterona hatrany am-boalohany
no tempoly masina ho antsika.
13Ry TOMPO fanantenàn’i Israely ô,
ho menatra izay rehetra mandao Anao.
Voasoratra anarana eo am-bovoka
izay nihataka taminao,
noho izy efa nandao Anao,
ry TOMPO loharano velona ô.

Alatsinainy 25 Novambra 2019 - Isa 31 : 1 - 3

1Lozan’izay midina any Ejipta
mba hitady famonjena!
Ny soavaly no ianteherany;
ny kalesy no itokiany
satria maro ireny;
ary ny mpitaingin-tsoavaly no antenainy,
satria mahery tokoa ireny;
fa tsy andrandrainy akory ilay Masin’i Israely
ary tsy anontaniany mihitsy ny TOMPO.
2Izy koa anefa mahay zavatra,
afaka mahatonga loza
ary tsy mitsoaka amin’izay nolazainy.
Eny, ny TOMPO efa nitsangan-kamely
ny antokon’ny olon-dratsy
ary koa ireo mpanao heloka
izay fitadiavam-pamonjena.
3Olombelona ihany ny Ejiptianina
fa tsy Andriamanitra akory;
nofo ihany ny soavaliny fa tsy fanahy;
koa vao maninji-tanana ny TOMPO,
dia ho solafaka izany mpamonjy izany,
hianjera koa ilay natao harovany
ary hiara-devona izy roa tonta.

Alahady 24 Novambra 2019 - Apo 22 : 12 - 14

12«Indro avy faingana Aho, hoy i Jesoa; ary miaraka amiko ny valin’asa, mba hamaliako ny olona rehetra araka izay nataony avy. 13Izaho no Alfa sy Ômega, ny voalohany sy ny farany, ny fiandohana sy ny fiafarana. 14Sambatra izay manasa ny akanjony, mba ho afa-mihinana amin’ny voan’ilay hazo manome fiainana sy ho afa-miditra amin’ny vavahady mankao amin’ilay tanàna.

Sabotsy 23 Novambra 2019 - Sal 37 : 1 - 8

1 Nataon’i Davida.

ALEFA
Aza tezitra amin’ny mpanao ratsy
ary aza mialona ireo mpanao heloka;
2fa toy ny ahitra ireny ka malaky malazo,
toy ny vilo-maitso ka mbola hihamaina.

BETA
3Matokia ny TOMPO, manaova ny tsara,
dia honina amin’ny tany nomeny ianao
ka hiaina amim-pilaminana azo antoka.
4Aoka ny TOMPO no hiravoanao,
dia homeny anao izay irîn’ny fonao!

GIMELA
5Ankino amin’ny TOMPO ny fiainanao,
ka itokio Izy fa hanao izay mahasoa.
6Ny rariny anananao hasehony
ho toy ny mazavatsinanana;
ny zo tandrify anao haharihariny
ho tahaka ny mitataovovonana.

DALETA
7Aoka hitombina tsara eo anatrehan’ny TOMPO
ka hiandry Azy amim-paharetana ianao!
Aza tezitra amin’izay mahomby,
dia amin’ny olona manao fetsifetsy.

HE
8Ialao ny hatezerana, avelao ny havinirana;
aza misafoaka fa loza no hiafaran’izany.

Zoma 22 Novambra 2019 - Jod 14 - 15

14I Henôka, ilay taranaka fahafito nandimby an’i Adama, dia efa naminany koa ny amin’ireo olona ireo, ka nilaza hoe: «Indro tonga ny Tompo, otronin’ny anjely masiny tsy tambo isaina, 15mba hitsara ny olona rehetra; ka hampiaiky ny ratsy fanahy rehetra Izy noho ny asa ratsy rehetra mbamin’ny teny ratsy rehetra nataon’ireo mpanota ratsy fanahy ireo hanoherana ny Tompo.» 16Ireo mpampianatra sandoka ireo dia mpimonomonona sy mpimoimoy lava, sady miaina araka ny filàndratsiny no miavonavom-piteny, ka mandoka olona mba hahazoany tombon-tsoa.

Alakamisy 21 Novambra 2019 - Jos 1 : 1 - 9

1Taorian’ny nahafatesan’i Mosesy mpanompon’ny TOMPO, dia nitenenan’ny TOMPO i Josoa zanakalahin’i Nona sady mpanampy an’i Mosesy nataony hoe:

2–Efa maty i Mosesy mpanompoko; koa mitsangàna ankehitriny ianao sy ireto vahoaka rehetra ireto ka mità ity renirano Jôrdàna ity mba hiditra ao amin’ny tany izay omeko ny Israelita. 3Araka izay efa nampanantenaiko an’i Mosesy, dia omeko anareo ny toerana rehetra hodiavin’ny tongotrareo. 4Ny taninareo dia manomboka eo amin’ny taniefitra any atsimo ka mipaka hatrany amin’ny tendrombohitr’i Libano any avaratra; ary manomboka eo amin’ny ony Eofrata any atsinanana, dia mamakivaky ny tanin’ny Hetita, ka mipaka hatrany amin’ny Ranomasina Mediteranea any andrefana. 5Ry Josoa, tsy misy olona hahatohitra anao mandritra ny androm-piainanao rehetra, fa homba anao Aho tahaka izay efa nombako an’i Mosesy. Tsy hanary anao Aho na handao anao na oviana na oviana. 6Aoka ho sahy sy hahery ianao, fa ianao no hitarika ireto vahoaka ireto handova ny tany izay nianianako tamin’ny razambeny fa homeko azy. 7Eny, aoka ho sahy sy hahery tokoa ianao mba himasoanao ny hanao araka ny lalàna manontolo izay nampitain’i Mosesy mpanompoko taminao. Aza misy anaovana tsirambina mihitsy izany na kely aza, dia hahomby ianao amin’izay rehetra ataonao. 8Aoka ianao hahavatra mamaky ity bokin’ny lalàna ity ary handinika azy andro aman’alina mba himasoanao ny hanao araka izay rehetra voasoratra anatiny. Amin’izay dia ho tontosanao tsara ny fikasanao rehetra ary hahomby ianao. 9Moa tsy efa nandidy anao ve Aho mba ho sahy sy hahery? Koa aza matahotra na mivadi-po fa Izaho TOMPO Andriamanitrao no homba anao amin’izay rehetra alehanao.

Alarobia 20 Novambra 2019 - Mar 13 : 24 - 27

24–Fa amin’ireo andro ireo, raha vao afaka izany fijaliana izany, dia hihamaizina ny masoandro, tsy handefa taratra intsony ny volana, 25hiraraka avy eny amin’ny habakabaka ny kintana ary ho voahozongozona ireo herin’ny habakabaka. 26Amin’izay ny Zanak’olona dia ho hita voahodidin-drahona, sady tamy omban-kery lehibe sy ombam-boninahitra; 27ary dia haniraka ny anjeliny Izy ka hanangona ny olom-boafidiny avy any amin’ny vazantany efatra, manomboka amin’ny faravodilanitra ankilany ka miafara amin’ny faravodilanitra andaniny.

Talata 19 Novambra 2019 - Rom 8 : 18 - 25

18Heveriko fa tsy mendrika hohàrina amin’ny voninahitra izay haseho ao amintsika ny fijaliana amin’izao andro izao. 19Fa tsindrian-daona erỳ ny zavaboaary miandry ny hanehoan’Andriamanitra an’ireo zanany. 20Fa tonga nanaiky ho zavatra tsinontsinona ny zavaboaary, tsy araka ny nahiny anefa, fa noho ilay nampanaiky azy toy izany. Saingy eo ny fanantenana: 21Fa ny zavaboaary koa aza dia hoafahana tsy ho andevon’ny fahasimbana indray andro any ka handray anjara amin’ny fahafahana be voninahitra hananan’ireo zanak’Andriamanitra. 22Saingy fantatsika fa mandraka ankehitriny, ny zavaboaary manontolo dia miara-misento sy mijaly toy ny vehivavy mihetsi-jaza. 23Ary tsy ny zavaboaary ihany; fa isika koa, izay manana ny Fanahy Masina ho santatry ny fanomezan’Andriamanitra, dia misento ao anatintsika ao, miandry ny hanaovan’Andriamanitra antsika ho zanany ka hanavotany tanteraka ny tenantsika. 24Eny, efa voavonjy isika saingy mbola amin’ny fanantenana; ny mahita izay nantenaina dia tsy manantena intsony; satria iza no mbola hanantena izay zavatra efa hitany? 25Fa raha manantena ny tsy hitantsika isika, dia miandry amim-paharetana.

Alatsinainy 18 Novambra 2019 - Sal 91 : 1 - 8

1Izay mipetraka ao amin’ny fialofan’ilay Avo Indrindra
dia mitoetra eo ambany fiarovan’Andriamanitra Tsitoha,
2ka tokony hiteny amin’ny TOMPO izy hoe:
«Ianao no manda fiarovana ho ahy;
Ianao no Andriamanitro ka itokiako.»

3–Ny Tompo mihitsy no hanafaka anao
amin’ny fandrika mivelatra sy areti-mandringana.
4Harovany amin’ny elany ianao;
eo ambany elany no hialofanao
tahaka ny zanak’akoho eo ambany ela-dreniny.
Ny fahamarinany no ampinga fiarovana,
5ka tsy misy zavatra atahoranao akory:
na ny loza mampihorohoro amin’ny alina,
na ny zana-tsipîka manidina amin’ny antoandro,
6na ny areti-mandringana misoko amin’ny haizina,
na ny voina mandripaka amin’ny mitataovovonana.
7Eny, na misy olona arivo aza maty eo akaikinao
ary na iray alina aza miampatra eo ankavananao,
dia tsy hisy loza hihatra aminao akory.
8Ahirato fotsiny ny masonao, dia ho hitanao
ny famalian’Andriamanitra ny olon-dratsy.

Alahady 17 Novambra 2019 - Isa 35 : 3 - 10

3Ampaherezo ny tanana miraviravy
ary hatanjaho ny lohalika malemy.
4Lazao amin’izay kivy hoe:
«Mahereza, aza matahotra;
indro ny Andriamanitrareo
tonga hitondra famaizana
ka hanasazy ny fahavalonareo;
Izy mihitsy no tonga hamonjy anareo.»

5Dia hahiratra ny mason’ny jamba
ary handre ny sofin’ny marenina.
6Hitsambikina toy ny diera ny mandringa,
hiteny an-kafaliana ny lelan’ny moana,
satria hiboiboika any an-taniefitra ny rano
ary hisy ranon-driaka any amin’ny tany ngazana.
7Ny tany karakaina hanjary farihy,
ny tany mangentana hiboiboika loharano.
Ary eo amin’ny toerana famitsahan’ny amboadia
dia hanirian’ny volotara sy ny zozoro.

8Any no hisy arabe voamboatra
hantsoina hoe «lalana voatokana».
Tsy hahazo handalo eo izay maloto
ary tsy hitonantonana eo ny mpanompo sampy;
fa ny Tompo dia hisava izany lalana izany,
ho an’ny vahoakany ihany.
9Tsy hahitana liona io lalana io
sady tsy hiakaran’ny biby masiaka;
tsy hisy ho hita eo ireny
fa izay nafahan’ny Tompo no handeha eo.
10Izany no lalana hiverenan’ireo navotan’ny TOMPO,
ka hahatongavany ao Tsiôna amin’ny fihobiana;
haravoana mandrakizay no ho eny amin’ny endriny,
hafaliana sy haravoana no hanenika azy
fa handositra kosa ny alahelo aman-tsento.

Sabotsy 16 Novambra 2019 - Mik 4 : 11 - 14

11Ary ankehitriny efa nangoniko hamely anareo
ny firenena maro izay miteny hoe:
«Aoka ho afa-baràka i Tsiôna
ary aoka isika hijery ny faharavàny!»
12Kanjo tsy fantatr’ireny ny hevitry ny TOMPO,
tsy takany ny fikasany,
dia ny nanangonany azy tahaka ny amboara
ao am-pamoloana hivelezana azy.
13«Mitsangàna ka miveleza, ry mponina ao Tsiôna.
Fa hataoko mahery ianareo,
toy ny omby misy tandroka vy
sy manan-kitro varahina,
ka hanorotoro firenena maro.
Ary ny harena voaangony ankeriny
dia hatokanareo ho Ahy TOMPO,
Izay tompon’ny tany tontolo.»
14Ankehitriny aloha, asio tombokavatsa ny tenanareo
mba ho mariky ny fisaonana,
ry mponin’i Jerosalema
izay manangona ny andia-miaramilanareo;
fa ataon’ny fahavalo fahirano ianareo,
ary dia hokapohiny amin’ny tsorakazo

Zoma 15 Novambra 2019 - Sal 98 : 4 - 9

4Mihobia ny TOMPO, ry mponin’ny tany tontolo;
ataovy manakoako ny horakora-pifaliana
mbamin’ny feon’ireo zava-maneno.
5Mankalazà ny TOMPO
amim-baliha sy feon-kira;
6Mihobia ilay TOMPO Mpanjaka
amin’ny trompetra sy feon’anjomara.

7Aoka hirohondrohona ny ranomasina
mbamin’izay rehetra ao anatiny
ary aoka hiredona hira ny tany
sy ny mponina ao aminy!
8Aoka hiteha-tanana ny ony
ary aoka ny tendrombohitra hihoby
9mba hitsena ny TOMPO satria tamy Izy:
eny, tamy Izy mba hifehy ny tany;
dia hifehy ny tontolo araka ny rariny Izy
ary hifehy ny firenena araka ny hitsiny.

Alakamisy 14 Novambra 2019 - Eks 12 : 29 - 32

29Nony tamin’ny misasakalina dia namono ny lahimatoa rehetra tao amin’ny tany Ejipta ny TOMPO, nanomboka amin’ny lahimatoan’ny Farao izay nipetraka eo amin’ny sezafiandrianany ka hatramin’ny lahimatoan’ny babo tao an-tranomaizina mbamin’ny voalohan-teraky ny biby fiompy rehetra. 30Tamin’io alina io dia nifoha ny Farao sy ny tandapany ary ny Ejiptianina rehetra fa nisy fidradradradrana mafy nanerana an’i Ejipta, satria ny trano rehetra dia nisy maty avokoa. 31Koa tamin’io alina io ihany dia nampiantso an’i Mosesy sy i Aharôna ny Farao ka nanao taminy hoe:
–Mandehana, mialà eto amin’ny taniko ianareo sy ny Israelita. Mandehana manao fanompoam-pivavahana amin’ny TOMPO araka izay efa nangatahinareo. 32Ento avokoa ny biby fiompinareo araka ny teninareo, ka mandehana any. Ary mba tsofy rano koa aho.

Alarobia 13 Novambra 2019 - Jao 14 : 1 - 7

1Ary hoy i Jesoa tamin’ny mpianany:
–Aoka tsy hangorohoro ny fonareo: minoa an’Andriamanitra ianareo, ary mino Ahy koa. 2Misy fonenana maro ao an-tranon’ny Raiko; raha tsy izany, dia ho nilaza taminareo ve Aho fa handeha hamboatra toerana ho anareo? 3Ary rehefa lasa Aho ka voavoatra ny toerana ho anareo, dia hiverina Aho haka anareo ho eo anilako; ka izay misy Ahy no hisy anareo koa. 4Ary fantatrareo ny lalana ho any amin’izay alehako.

5Dia hoy i Tômà taminy:
–Tsy fantatray izay alehanao, ry Tompo! Ka ahoana no hahafantaranay ny lalana?

6Fa novalian’i Jesoa hoe:
–Izaho no lalana sy fahamarinana ary aina; tsy misy olona mankany amin’ny Ray raha tsy amin’ny alalako. 7Raha mahafantatra Ahy ianareo, dia hahafantatra ny Raiko ihany koa; dieny izao no ahafantaranareo Azy sady efa nahitanareo Azy.

Talata 12 Novambra 2019 - Jer 4 : 13 - 18

13Indro tamy ny fahavalo:
toy ny rahona no iakarany hanafika,
toy ny rambon-danitra no firimorimon’ny kalesiny
ary faingana noho ny voromahery ny soavaliny.
Very isika, fa ringana tanteraka!
(Ny Tompo)
14Diovy hiala amin’ny ratsy ny fonao,
raha te ho afaka ianao, ry Jerosalema.
Mandra-pahoviana ny hevi-dratsy
no hitoetra ao anatinao?
15Henoy ange fa misy siosio avy any Dana,
ary misy vaovao milaza fahoriana
avy amin’ny faritra havoan’i Efraîma.

16Lazaonareo amin’ny mponina rehetra,
ampandrenesonareo i Jerosalema
fa manakaiky azy ny mpanao fahirano,
tonga avy any an-tany lavitra any
ka mihorakoraka hamely ireo tanànan’i Joda.
17Manodidina an’i Jerosalema
tahaka ny olona miandry saha izy.
Vokatry ny fikomianao tamiko izao,
teny hentitry ny TOMPO izany.
18Ny fitondrantenanao sy ny ratsy nataonao
no nahatonga izao taminao, ry Jerosalema.
Hotsaroanao ny ngidin’izao loza izao,
satria mihatra hatrany amin’ny fonao.

Alatsinainy 11 Novambra 2019 - II Mpa 22 : 15 - 20

15dia nasainy miteny amin’ny mpaniraka hoe: 16«Izao no lazain’ny TOMPO Andriamanitr’i Israely: ‹Indro Aho hahatonga loza amin’ity tanàna ity sy ny mponiny, dia araka izay rehetra voalaza ao anatin’ilay boky novakin’ny mpanjakan’i Joda. 17Efa nandao Ahy manko ny mponin’i Jerosalema sady efa nampanetona srona ho an’ny andriamani-kafa, ary nampahatezitra Ahy tamin’ny sampy rehetra nataon’ny tanany. Izany no nirehetan’ny fahatezerako tamin’ity tanàna ity, ka tsy mbola itoniany. 18Fa ny mpanjakan’i Joda, izay naniraka anareo hanatona Ahy TOMPO, dia anambarao fa Izaho TOMPO Andriamanitr’i Israely dia milaza izao: Ny amin’ny teny izay efa renao, 19dia nino anatra ianao ka nanetry tena teo anatrehako, rehefa nihaino izay voalazako momba ny hanjo ity tanàna ity sy ny mponiny, dia ny hanaovana azy ho lao sy ho oha-panozonana; eny, nandriatra fitafiana ianao sady nitomany teo anatrehako, ka dia efa nihaino anao koa Aho; teny hentitra avy amiko TOMPO izany. 20Indro hangoniko any amin’ny razanao ianao ary ho voapetraka am-pasanao hombàm-piadanana, ka tsy hahita maso ny loza rehetra hamelezako an’i Jerosalema.› »

Alahady 10 Novambra 2019 - II Pet 3 : 8 - 13

8Kanefa izao zavatra izao, ry hava-malala, no aoka tsy hohadinoinareo: amin’ny Tompo, ny indray andro dia toy ny arivo taona, ary ny arivo taona dia toy ny indray andro. 9Koa tsy ahemotry ny Tompo araka ny hevitry ny sasany akory ny fampanantenàny: saingy mahari-po aminareo Izy, satria tsy tiany hisy ho very fa mba hiroso hiala amin’ny toe-dratsy avokoa ny olona rehetra. 10Ho avy tahaka ny mpangalatra ny andron’ny Tompo; ary amin’izany dia hirimorimo mafy ka hanjavona ny habakabaka sady ho levon’ny hafanana ireo karazan-javatra ao aminy, ary hodorana avokoa ny tany sy izay taozavatra ao aminy.

11Koa raha ho levona toy izany àry izao rehetra izao, dia ho olona tokony hanao ahoana moa ianareo amin’ny fitondrantena masina sy ny firaiketam-po amin’Andriamanitra? 12Sady andrasanareo no hafainganinareo ny fiavian’ilay andron’Andriamanitra, izay andro hahamay ny habakabaka sy hahalevona azy ary hanempoan’ny hafanana ireo karazan-javatra ao aminy! 13Kanefa isika, araka ny fampanantenàn’Andriamanitra, dia miandry ny habakabaka vaovao sy tany vaovao izay honenan’ny fahamarinana soritan’Andriamanitra.

Sabotsy 09 Novambra 2019 - Jer 31 : 31 - 34

ovao amin’ny vahoakan’i Israely sy ny vahoakan’i Joda. Teny hentitra avy amiko TOMPO izany. 32Kanefa tsy hitovy amin’ilay fanekempihavanana nataoko tamin’ireo razany fony Aho nandray an-tanana hamoaka azy avy tany Ejipta izany. Fa nivadihan’ireo iny, kanefa Izaho no tompony; teny hentitra avy amiko TOMPO izany. 33Fa izao no fanekempihavanana hataoko amin’ny vahoakan’i Israely, aorian’izany andro izany: Hapetrako ao an’eritreriny ny lalànako ary hosoratako ao am-pony, ka ho Andriamaniny Aho ary izy ho vahoakako. Teny hentitra avy amiko TOMPO izany. 34Tsy mila hanatona ny namany na mpiray tampo aminy intsony izy mba hampianatra ireny hahalala Ahy TOMPO; fa hatramin’ny kely indrindra ka hatramin’ny lehibe indrindra dia samy hahalala Ahy avokoa izy rehetra, hoy ny teny hentitra avy amiko TOMPO. Fa havelako ny fahadisoany ary tsy hotsarovako intsony ny helony.»

Zoma 08 Novambra 2019 - Heb 10 : 35 - 39

35Koa aza manary ny fahatokianareo fa misy valisoa lehibe izany. 36Ilainareo tokoa ny faharetana mba hanaovanareo ny sitrapon’Andriamanitra ka hahazoanareo izay ampanantenainy. 37Fa hoy ny Soratra Masina:

«Kely foana sisa
dia ho tonga Ilay tsy maintsy ho avy,
fa tsy hitaredretra.
38Ary ny olo-marina eo imasoko noho ny finoana dia ho velona;
fa raha mihemotra izy, dia tsy sitrako.»

39Isika kosa dia tsy mba naman’izay mihemotra ka ho very fa naman’izay mino ka ho voavonjy.

Alakamisy 07 Novambra 2019 - Rom 13 : 8 - 14

8Aoka tsy hananan’olon-trosa ianareo, afa-tsy momba ny fifankatiavana ihany; fa izay tia namana no mahatanteraka ny lalàna. 9Satria ny hoe «aza maka vadin’olona, aza mamono olona, aza mangalatra, aza mitsiriritra», mbamin’ny didy hafa rehetra, dia samy efa voafintina amin’ilay teny manao hoe: «Tiavo ny namanao tahaka ny itiavanao ny tenanao.» 10Izay tia dia tsy manisy ratsy ny namana; koa izay tia no mahatanteraka ny lalàna.

11Fantatrareo rahateo indrindra koa ny andro diavintsika. Izao no fotoana tokony hifohazanareo amin’ny torimaso; satria ankehitriny antomotra antsika kokoa ny famonjena, fa tsy tahaka ny tamin’ny andro vao ninoantsika. 12Madiva ho lasa ny alina, ary mby akaiky ny andro. Ialao àry ny asa fanao amin’ny maizina, ka itafio ny fiadiana fampiasa amin’ny mazava. 13Aoka isika hahay hitondra tena tsara toy ny amin’ny antoandro, ka hifady ny fanaranam-po sy ny fidorohana, ny fijangajangana sy ny fihetsika tsy maotina, ny adiady sy ny fifampialonana. 14Fa itafio ny fiadian’i Jesoa Kristy Tompo, ka aza mety hotarihin’ny maha olona mpanota ho amin’ny filàndratsy.

Alarobia 06 Novambra 2019 - Mar 14 : 60 - 64

y nanontany an’i Jesoa hoe:
–Tsy mamaly akory ve Ianao? Inona no iampangan’ireo Anao?
61Fa nangina i Jesoa ary tsy namaly akory. Dia nanontany Azy indray ny mpisorombe nanao hoe:
–Ianao ve no Kristy, Zanak’ilay Andriamanitra ankalazaintsika lalandava?

62Ka novalian’i Jesoa hoe:
–Izaho no Izy, ary «ho hitanareo ny Zanak’olona mipetraka eo ankavanan’ilay Andriamanitra mahery» ary koa «tamy eo amin’ny rahon’ny habakabaka.»

63Tamin’izay ny mpisorombe dia nandriatra ny fitafiany sady niteny hoe:
–Inona indray no ilàntsika vavolombelona hiampanga? 64Renareo teo ny fanevatevàny an’Andriamanitra, ka ahoana ianareo amin’izany?
Dia samy nanameloka an’i Jesoa izy rehetra ka nilaza fa mendrika Azy ny ho faty.

Talata 05 Novambra 2019 - Fil 1 : 27 - 30

27Izao ihany: manàna fitondrantena mendrika ny Vaovao Mahafaly momba an’i Kristy. Ka amin’izany, tonga moa aho, dia hahita anareo; tsy tonga kosa, dia handre ny aminareo: ka ho fantatro fa miorina tsara amin’ny firaisam-panahy ianareo, sady miray fo miara-miezaka hampandroso ny finoana vokatry ny Vaovao Mahafaly. 28Aoka tsy ho azon’ireo mpanohitra ampitahorina ianareo na amin’inona na amin’inona: mariky ny fahaverezana izany ho azy; fa ho anareo kosa mariky ny famonjena, dia famonjena avy amin’Andriamanitra. 29Eny, tombon-tsoa nomena anareo ny hanompoanareo an’i Kristy, ka tsy hoe ny hino Azy ihany fa ny hiaritra fijaliana koa noho ny aminy: 30dia ny miatrika ady mitovy amin’izay hitanareo natrehiko fahiny sady renareo fa mbola atrehiko ankehitriny.

Alatsinainy 04 Novambra 2019 - Isa 40 : 27 - 31

27Ry vahoaka Israely, firenen’i Jakôba,
nahoana ianao no miteny sy manamafy hoe:
«Tsy hitan’ny Tompo akory izay mahazo ahy,
lalovan’Andriamanitra fotsiny ny zoko?»
28Tsy fantatrao sady tsy efa renao va
fa ny TOMPO dia Andriamanitra mandrakizay?
Izy no namorona ny tany manontolo.
Tsy mba reraka Izy na sasatra,
ary tsy misy fetra ny fahalalàny.
29Manome hery ny reraka Izy
ary manatanjaka ny malemy.
30Ny tanora aza dia mihareraka sy mety sasatra,
ny mahery tompon-daka aza dia mety ho solafaka.
31Fa izay matoky ny TOMPO kosa
dia hahazo hery vaovao hatrany,
ka hisidina ambony toy ny voromahery.
Hihazakazaka izy nefa tsy ho sasatra,
handeha izy nefa tsy ho reraka.

Zoma 01 Novambra 2019 - Sal 70 : 1 - 5

1 Tao amin’ny tahirin-kiran’ny filohan’antoko-mpihira. Salamo nataon’i Davida, hitaomana an’Andriamanitra hahatsiaro azy.

2Andriamanitra ô, aoka ho sitrakao ny hanafaka ahy;
TOMPO ô, faingàna re hamonjy ahy!
3Ho menatra sy hangaihay anie
izay olona mitady hahafaty ahy;
hihemotra sy ho afa-baràka anie
izay olona maniry loza ho ahy!
4Aoka hiverina ilalana ho safotry ny henatra
ireo mpanakora ahy hoe: «Akorinao izay!»
5Izay rehetra mitady Anao kosa anie
hifaly sy hiravo amin’ny nataonao;
ary izay olona mpitia Anao Mpamonjy anie
hivolan-dava hoe: «Lehibe tokoa Andriamanitra!»

Alakamisy 31 Oktobra 2019 - Amo 3 : 1 - 8

1Ry taranak’i Israely, dia ianareo ankohonana rehetra izay nampiakarin’ny TOMPO avy tany Ejipta, henoy izao teny nambarany momba anareo izao:

2«Amin’ny fianakaviana rehetra eto ambonin’ny tany,
dia ianareo ihany no nofidiko sy nokarakaraiko;
noho izany, dia hampamoahako anareo
ny fahadisoana rehetra nataonareo.»

3Hiara-dalana ve ny olon-droa,
raha tsy efa nifanaiky?
4Hanerona ao anaty ala ve ny liona,
raha tsy mahita remby?
Hanerongerona ao an-davany ve ny liona tanora,
raha tsy misy zavatra azony?
5Voan’ny fandrika amin’ny tany ve ny vorona,
raha tsy nisy sakafo nisarika azy?
Mikatona ve ny fandrika-harato
raha tsy mahazo zavatra?
6Tsofina ao an-tanàna ve ny trompetra,
ka tsy hisahotaka ny vahoaka?
Misy loza ve ao an-tanàna,
raha tsy ny TOMPO no nanao azy?
7Satria tsy manao zavatra ny Tompo ANDRIANANAHARY,
raha tsy efa mampahafantatra ny fikasany
amin’ireo mpaminany mpanompony.
8Ny liona no nierona,
ka iza no tsy hatahotra?
Ny Tompo ANDRIANANAHARY no niteny,
ka iza no tsy hampita ny hafatra ampitondrainy?

Alarobia 30 Oktobra 2019 - Lio 7 : 11 - 17

11Taorian’izany i Jesoa dia nankany amin’ny tanàna atao hoe Naîna ary notronin’ireo mpianany sy vahoaka maro. 12Rehefa tonga teo akaikin’ny vavahadin’ny tanàna Izy, dia tojo olona handevina fatin-jazalahy anankiray; ramatoa reniny tsy nanana afa-tsy iny sady efa mpitondratena, koa olona marobe avy ao an-tanàna no niaraka taminy. 13Vao nahita an-dravehivavy ny Tompo, dia onena azy ka nanao taminy hoe:
–Aoka izay ny ranomasonao, ramatoa!

14Dia nanatona Izy ary nanendry ny tranovorona, ka nijanona ny mpilanja. Ary hoy i Jesoa hoe:
–Ry zatovo, Izaho mandidy anao, mifohaza!

15Dia indro ny maty fa niarina sy nanomboka niteny ary natolotr’i Jesoa an-dreniny. 16Raiki-tahotra ny olona rehetra sady nanome voninahitra an’Andriamanitra hoe:
–Mpaminany lehibe no efa najoron’Andriamanitra eto anivontsika!

Ary koa hoe:
–Efa namangy ny vahoakany Andriamanitra!

17Dia niely eran’i Jodea manontolo mbamin’ny faritany manodidina rehetra ny lazan’i Jesoa.

Talata 29 Oktobra 2019 - Jao 2 : 18 - 22

18Tamin’izay dia niteny tamin’i Jesoa ny manampahefana jiosy nanao hoe:
–Inona no famantarana asehonao aminay ho porofon’ny fahefana anaovanao an’izao?

19Fa novalian’i Jesoa hoe:
–Ravao ity tempoly ity ary ao anatin’ny telo andro dia hajoroko indray!

20Ka hoy ry zareo:
–46 taona izao no nanaovana ity tempoly ity, ka Ianao ve no hahatafajoro azy ao anatin’ny telo andro?

21Ny tempoly nolazain’i Jesoa anefa dia ny tenany. 22Koa rehefa nitsangana velona avy tany amin’ny maty i Jesoa, dia tsaroan’ny mpianany fa voalazany izany; ka ninoan’izy ireo ny Soratra Masina sy ny teny voalazan’i Jesoa.

Alatsinainy 28 Oktobra 2019 - Amo 7 : 10 - 17

10Ary i Amatsià, mpisorona tao Betela, dia naniraka hilaza amin’i Jerôbohama mpanjakan’i Israely hoe: «I Hamôsa efa nikotrika fikomiana taminao teo anivon’ny vahoakan’i Israely; tsy zakan’ny tany intsony ireo kabariny rehetra. 11Fa izao manko no voalazan’i Hamôsa: Ho fatin’ny sabatra i Jerôbohama ary ny vahoakan’i Israely dia ho entina ho babo lavitra ny taniny.»
12Dia hoy i Amatsià tamin’i Hamôsa: «Ry mpahazo fahitana, mandehana mandositra any amin’ny tanin’i Joda ianao, ka any no ijoroy ny maha-mpaminany anao; dia ry zareo no hanome anao ny mofo hohaninao. 13Fa aza maminany eto Betela intsony, fa toeram-pivavahana najoron’ny mpanjaka sady lapan’andriamanjaka no eto.»

14Dia namaly an’i Amatsià i Hamôsa nanao hoe:
–Tsy mba mpaminany na anisan’ny tarika mpaminany aho taloha fa mpiandry biby fiompy sady mpanindrona voan’aviavy. 15Saingy nalain’ny TOMPO teo am-piandrasana biby fiompy aho ka nitenenany hoe: «Mandehana ianao ka mijoroa ho mpaminany amin’ny Israely vahoakako.» 16Koa ankehitriny, henoy ny tenin’ny TOMPO. Ianao manao amiko hoe: «Aza maminany ny hamelezana an’i Israely ary aza manambara ny hamelezana ny taranak’i Itsehàka»; 17noho izany, ry Amatsià, dia izao no lazain’ny TOMPO:

Hijangajanga ao an-tanàna ny vadinao;
ireo zanakao lahy sy vavy
dia haringana amin’ny sabatra;
ny taninao dia hozarazaraina amin’ny tady
sy homena olon-kafa;
ianao dia ho faty any amin’ny tany fanompoan-tsampy
ary ny taranak’i Israely dia ho lasan-ko babo
lavitry ny taniny.»

Alahady 27 Oktobra 2019 - Asa 2 : 14 - 21

14Fa nitsangana i Petera, niaraka tamin’ny apôstôly 11 lahy, ka nanandra-peo nandahatra tamin’ny vahoaka hoe:
–Ry Jiosy mbamy ianareo rehetra tafatoetra eto Jerosalema, izao no aoka ho fantatrareo, ka henoy tsara ny teniko. 15Tsy mamo velively araka ny fieritreretanareo akory ireo olona ireo, satria vao amin’ny sivy maraina izao. 16Fa izay mitranga eto izao dia fahatanterahan’ilay voalazan’Andriamanitra tamin’ny alalan’i Joela mpaminany hoe:

17«Izao no ho tonga amin’ny andro farany, hoy Andriamanitra:
Handrotsahako ny Fanahiko ny olombelona rehetra;
hilaza hafatra avy amiko
ny zanakareo lahy aman-janakareo vavy,
hisehoam-pahitana ny tanoranareo,
ary hahazo tsindrimandry ny zokiolonareo.
18Eny, amin’izany andro izany, dia samy handrotsahako ny Fanahiko
ireo mpanompoko na lahy na vavy
ka hilaza hafatra avy amiko izy rehetra.
19Hampisehoako zava-mahatalanjona eny amin’ny habakabaka ambony
ary famantarana etỳ amin’ny tany ambany:
hisy ra sy afo ary zavon-tsetroka,
20hiova ho haizina ny masoandro
ary ny volana ho tonga mena tahaka ny ra
alohan’ny higadonan’ny andro hiavian’ny Tompo,
dia ilay andro lehibe sy mamirapiratra.
21Ary izay rehetra hiantso ny anaran’ny Tompo dia ho voavonjy!»

Sabotsy 26 Oktobra 2019 - Jer 14 : 15 - 22

15Koa Izaho TOMPO no milaza ny amin’ireo mpaminany ireo hoe: Tsy naniraka azy Aho nefa nihambo haminany amin’ny anarako izy fa tsy hisy ady na mosary na areti-mandringana eto amin’ity tany ity. Koa ny ady sy mosary tokoa no handringana azy hatramin’ny farany. 16Ary ny vahoaka izay naminaniany koa dia hitsitra eny an-dalamben’i Jerosalema noho ny ady sy ny mosary ka tsy hisy handevina ireo olona ireo, na ny vadiny na ny zanany lahy na ny zanany vavy. Izany no hanatsingerenako aminy ihany ny ratsy nataony.

17Izao kosa no teny holazainao aminy:
Ny masoko anie hijononoka ranomaso
andro aman’alina tsy an-kiato,
satria goavana ny fahavoazan’ny vahoakako
ary mafy dia mafy tokoa ny ratra nahazo azy.
18Raha mivoaka eny an-tsaha aho,
dia ireo matin-tsabatra no hitako;
raha miditra an-tanàna aho,
dia ireo matin’ny mosary no hitako.
Ny mpaminany sy ny mpisorona
dia mivezivezy eo amin’ny tany,
fa tsy mahalala na inona na inona.
(Ny vahoaka)
19Tompo ô, efa narianao tokoa ve i Joda?
Efa naharikoriko Anao ve i Tsiôna?
Nahoana no mikapoka mafy anay Ianao
ka tsy misy mahasitrana anay?
Nanantena fiadanana izahay
kanjo tsy nisy soa akory,
ary niandrandra fotoam-pahasitranana
kanjo indro zava-mahatahotra.
20TOMPO ô, ekenay ny faharatsianay
sy ny fahadisoan’ny razanay
fa efa nanota taminao izahay.
21Noho ny lazanao, dia aza hamavoina izahay
ary noho ny sezafiandriananao be voninahitra
dia aza atao tsinontsinona izahay.
Tsarovy ka aza itsoahanao
ny fanekempihavanana nataonao taminay.
22Moa misy mahalatsaka orana ve
ny sampin’ireo firenen-kafa?
Moa ny lanitra va mampirotsaka oram-baratra
fa tsy Ianao, ry TOMPO Andriamanitray?
Koa mitoky aminao izahay
satria Ianao no manao ireo rehetra ireo.

Zoma 25 Oktobra 2019 - Joe 3 : 1 - 5

1Dia hoy ny TOMPO hoe:
«Rehefa afaka izany
dia handatsaka ny Fanahiko
amin’ny olombelona rehetra Aho,
ka haminany ny zanakalahinareo
mbamin’ny zanakavavinareo,
hanonofy ny lahiantitrareo
ary hisehoam-pahitana ny tanoranareo.
2Na dia ny mpanompolahy
sy ny mpanompovavy aza
dia handatsahako ny Fanahiko
amin’izany andro izany.
3Hampiseho zava-mahagaga
eny amin’ny lanitra
sy etỳ amin’ny tany Aho,
dia ra sy afo ary setroka mitambolina.
4Ho maizina ny masoandro
ary ho mena toy ny ra ny volana
mialoha ny hiavian’ny andron’ny TOMPO
izay andro lehibe sady mahatahotra.
5Ary na iza na iza hiantso
ny anaran’ny TOMPO
dia ho voavonjy.
Fa eo an-tendrombohitra Tsiôna sy ao Jerosalema
dia hisy sisa afaka, araka ny voalazan’ny TOMPO.
Ary izay antsoin’ny TOMPO
dia ho isan’ny afa-mandositra.

Alakamisy 24 Oktobra 2019 - Mat 7 : 21 - 23

21–Tsy izay rehetra manao amiko hoe: «Tompo ô! Tompo ô!», no hiditra any amin’ny Fanjakàn’ny lanitra, fa izay manao ny sitrapon’ny Raiko Izay any an-danitra. 22Amin’izany andro izany, dia maro no hanao amiko hoe: «Tompo ô, Tompo ô, tsy efa nilaza hafatra tamin’ny anaranao ve izahay? tsy efa nandroaka demony tamin’ny anaranao ve izahay? tsy efa nanao asa mahagaga maro tamin’ny anaranao ve izahay?» 23Ary amin’izay no hanambarako aminy hoe: «Tsy fantatro na oviana na oviana ianareo; mialà amiko, ianareo mpanao ratsy!»

Alarobia 23 Oktobra 2019 - I Pet 1 : 6 - 12

6Izany koa no iravoravoanareo na dia mbola tsy maintsy hampahorîna vetivety amin’ny fitsapana samy hafa aza ianareo. 7Ny volamena dia sedraina amin’ny alalan’ny afo na dia zavatra mety simba aza; ary ny finoanareo, izay sarobidy lavitra noho ny volamena, dia sedraina amin’ny alalan’ireny fitsapana ireny ka ho hita fa hahazoan’Andriamanitra dera sy voninahitra ary haja izany, amin’ny andro hisehoan’i Jesoa Kristy. 8Manam-pitiavana an’i Jesoa Kristy ianareo, na dia tsy nahita Azy aza; mino Azy ianareo, na dia tsy mahita Azy aza ankehitriny: izany no iravoravoanareo amin’ny hafaliana tsy hay lazaina sady be voninahitra, 9satria azonareo ilay zava-kendren’ny finoanareo, dia ny famonjena ny fanahinareo.

10Ny amin’izany famonjena izany dia nanaovan’ireo mpaminany famotopotorana sy fikarohana fatratra, satria ireo no efa nilaza mialoha ny fahasoavana voatendrin’Andriamanitra ho anareo. 11Nokarohin’ny mpaminany tokoa izay vaninandro sy toe-javatra notondroin’ny Fanahin’i Kristy; fa tao anatin’izy ireo ny Fanahin’i Kristy ka nanambara mialoha ny fijaliana hanjo an’i Kristy sy ny voninahitra hanaraka izany. 12Nasehon’Andriamanitra tamin’ireo mpaminany fa ny zavatra nomena horaharahainy dia tsy natao ho azy ireo fa natao ho anareo; ary izany zavatra izany dia nampandrenesina anareo ankehitriny, tamin’ny alalan’ireo olona izay nombàn’ny Fanahy Masina nirahina avy tany an-danitra ka nitory ny Vaovao Mahafaly taminareo. Eny, izany zavatra izany aza dia irîn’ireo anjely hodinihina.

Talata 22 Oktobra 2019 - Mpi 4 : 4 - 16

4Tamin’izany fotoana izany dia i Debôrà, mpaminanivavy vadin’i Lapidôta, no mpitsara nitondra an’i Israely. 5Ny sezam-pitsarana nipetrahan’i Debôrà dia teo ambany hazo rofia, izay nantsoina tatỳ aoriana hoe «Hazo Rofian’i Debôrà», teo anelanelan’i Ramà sy i Betela, any amin’ny faritra be tendrombohitra any Efraîma. Niakatra tany ny Israelita rehefa hotsaraina. 6Indray andro i Debôrà dia nampiantso an’i Baràka zanakalahin’i Abinôhama; nampiantsoiny avy any Kedesa any amin’ny faritra naftalîta izy ka nilazany hoe:
–Izao no andidian’ny TOMPO Andriamanitr’i Israely anao: Mandehana maka vatan-dehilahy andiany folo avy amin’ny fokon’i Naftalỳ sy i Zebolòna, ka tariho any an-tendrombohitra Tabôra. 7Fa hoentaniko i Siserà lehiben’ny tafik’i Jabîna ho tonga eo amoron’ny renirano Kisôna mba hanafika anao miaraka amin’ny kalesiny sy ny andian-tafiny; dia hatolotro eo an-tananao izy.

8Fa namaly an’i Debôrà i Baràka nanao hoe:
–Raha handeha hiaraka amiko ianao, dia handeha aho; fa raha tsy handeha hiaraka amiko kosa ianao, dia tsy handeha aho.

9Ka hoy i Debôrà taminy:
–Handeha hiaraka aminao aho, saingy tsy hisy voninahitra ho anao izao dia halehanao izao, satria ho eo an-tanam-behivavy no hanoloran’ny TOMPO an’i Siserà.

Dia nandeha ho any Kedesa niaraka tamin’i Baràka i Debôrà. 10Nangonin’i Baràka tao ny vatan-dehilahy zebolonîta sy naftalita. Andiany folo no nanaraka azy teny an-tendrombohitra Tabôra, ary niakatra niaraka taminy koa i Debôrà. 11Tao akaikin’i Kedesa no nisy an’i Hebera lehilahy kenita. Noho izy tafasaraka tamin’ireo Kenita hafa taranak’i Hôbaba zaodahin’i Mosesy, dia nanorin-day teo akaikin’ny terebintan’i Tsahananîma izy.

12Dia notantaraina tamin’i Siserà fa niakatra any an-tendrombohitra Tabôra i Baràka, zanakalahin’i Abinôhama. 13Koa novoriny tao Harôseta-Gôima ny kalesiny vy sivinjato sy ny miaramilany rehetra; dia avy teo izy no nankany amin’ny renirano Kisôna.

14Ary hoy i Debôrà tamin’i Baràka:
–Andao amin’izay fa anio no hanoloran’ny TOMPO an’i Siserà eo an-tananao. Ny TOMPO mihitsy no mandeha eo alohanao!

Dia nidina avy teo an-tendrombohitra Tabôra i Baràka narahin’ireo vatan-dehilahiny nisy andiany folo. 15Tamin’izay no nataon’ny TOMPO nifanaritaka teo anoloany kosa i Siserà sy ny kalesiny mbamin’ny miaramilany rehetra. Niala tamin’ny kalesiny mihitsy aza i Siserà ka nandositra an-tongotra. 16Nanenjika ireo kalesy sy ny andian-tafiky ny fahavalony hatrany Harôseta-Gôima i Baràka; dia naringany tamin’ny sabatra avokoa ny miaramilan’i Siserà ka tsy nisy niangana na iray aza.

Alatsinainy 21 Oktobra 2019 - Jer 31 : 1 - 6

1«Rehefa tonga izany fotoana izany, hoy ny teny hentitry ny TOMPO, dia ho Andriamanitry ny foko israelita rehetra Aho, ary izy ho vahoakako.»

2Izao no lazain’ny TOMPO:
«Tany an-taniefitra no nanehoako hatsaram-po
ny vahoaka sisa tsy matin’ny fandringanana.
Hizotra milamina amin’izay i Israely.

3Hoy izy hoe:
‹Avy lavitra ny TOMPO no tonga niseho tamiko.›
ka hoy ny navaliko azy:
‹Fitiavana mandrakizay no itiavako anao
ka famindrampo no itaomako anao hanatona Ahy.
4Haoriko indray ianao, ry Israely mamiko,
ka ho voaorina;
hiravahanao indray ny ampongatapakao
hanentananao ireo mpandihy mitotorebika.
5Hambolenao voaloboka indray
eny amin’ny havoanan’i Samaria
ka ireo mpamboly no hioty
ny vokatry ny famboleny.
6Fa ho avy indray ny andro
izay hiantsoan’ireo mpiambina
eny an-tendrombohitr’i Efraîma hoe:
Andeha isika hiakatra any Tsiôna
ho eo anilan’ny TOMPO Andriamanitsika!› »

Alahady 20 Oktobra 2019 - I Kor 12 : 4 - 11

4Voazarazara ho samy hafa ny fanomezam-pahasoavana, nefa ny Fanahy Masina dia iray ihany. 5Voazarazara ho samy hafa ny fanompoana, nefa ny Tompo dia iray ihany. 6Voazarazara ho samy hafa ny asa, nefa Andriamanitra dia iray ihany, loharano ipoiran’ny asa rehetra ao amin’ny olona rehetra. 7Samy omena fanomezana maneho ny Fanahy Masina ny olona tsirairay ho fanasoavana ny daholobe. 8Ny anankiray dia omen’ny Fanahy teny feno fahendrena; ary ny anankiray omen’izany Fanahy izany teny feno fahalalana. 9Ny anankiray omen’izany Fanahy izany finoana; ary ny anankiray omen’izany Fanahy izany fanomezam-pahasoavana hanasitrana marary. 10Ny anankiray, hanao asa mahagaga; ny anankiray, hilaza hafatra avy amin’Andriamanitra; ny anankiray, hahay manavaka ny Fanahy Masina sy ny fanahy manodoka; ny anankiray, hiteny amin’ny fiteny samy hafa tsy fantatra; ary ny anankiray, hanazava ny fiteny tsy fantatra. 11Izany Fanahy iray izany ihany no loharano ipoiran’ireo fanomezana rehetra ireo, ka mizarazara azy, araka izay sitrapony, amin’ny olona tsirairay.

Sabotsy 19 Oktobra 2019 - Jao 9 : 8 - 17

8Tamin’izay ireo mpiara-monina aminy sy ireo olona nahita fa mpangataka izy taloha, dia nanao hoe:
–Tsy ity ve ilay nipetraka nangataka?

Ka hoy ny sasany:
–Izy io!

9Fa hoy ny sasany:
–Tsia, fa olona mitovy aminy!

Ralehilahy kosa nilaza hoe:
–Izaho mihitsy ity!

10Dia hoy ny olona taminy:
–Fomba ahoana àry no nahiratan’ny masonao?

11Fa novaliany hoe:
–Ilay Lehilahy atao hoe Jesoa no nanao feta sy nanosotra ny masoko, dia nanao tamiko hoe: «Ndeha ianao mankany amin’ny dobo Silôà, dia misasà maso.» Koa lasa nankany aho, dia nisasa maso ary nahiratra.

12Dia hoy ny olona taminy:
–Aiza moa izany Lehilahy izay?

Fa novaliany hoe:
–Tsy fantatro!

13Dia nentin’ny olona tany amin’ny Farisianina ilay jamba taloha. 14Andro sabata no nanaovan’i Jesoa ny feta sy nampahiratany maso azy; 15koa ireo Farisianina indray no nanontany ilay jamba taloha ny amin’ny fomba nahiratany, ary izao no navaliny:
–Nasiany feta ny masoko, dia nisasa maso aho ka nahiratra!

16Tamin’izay ny sasany tamin’ireo Farisianina dia nanao hoe:
–Tsy avy amin’Andriamanitra izany Lehilahy izany, satria tsy mitandrina ny fepetra momba ny sabata!

Ny sasany kosa nanao hoe:
–Fomba ahoana moa no ahafahan’olona mpanota manao famantarana toy ireny?

Dia nisara-tsaina ry zareo. 17Ary hoy indray ireto Farisianina tamin’ilay jamba:
–Ianao kosa, ahoana no mba ilazanao Azy, raha nampahiratra ny masonao Izy?

Ka novaliany hoe:
–Mpaminany Izy.

Zoma 18 Oktobra 2019 - I Sam 19 : 19 - 24

19Nisy nanambara tamin’i Saoly fa ao Naiôta akaikin’i Ramà i Davida. 20Dia naniraka olona indray i Saoly hisambotra an’i Davida. Rehefa hitan’izy ireo anefa ny andiana mpaminany izay tarihin’i Samoela fa tsindrian-daona maminany, dia nohetsehin’ny Fanahin’Andriamanitra ireto irak’i Saoly, ka nanomboka naminany koa. 21Raha vao ren’i Saoly izany vaovao izany, dia naniraka olon-kafa izy, nefa tsindrian-daona naminany ihany koa izy ireo. Naniraka andiany fahatelo indray i Saoly, ary dia mbola toy ny teo aloha ihany no niseho. 22Farany dia izy tenany mihitsy no nankany Ramà. Rehefa tonga teo amin’ny lavaka lehibe famorian-drano akaikin’i Sekò izy, dia nanontany hoe:
–Aiza moa i Samoela sy i Davida?

Ka hoy ny navalin’ny olona azy hoe:
–Any Naiôta, akaikin’i Ramà.

23Dia lasa nankany Naiôta akaikin’i Ramà i Saoly. Teny an-dalana dia tonga taminy ny Fanahin’Andriamanitra, ka tsindrian-daona naminany mandra-pahatongany tany Naiôta izy. 24Nanala ny fitafiany tahaka ireo hafa izy, dia mba naminany teo anatrehan’i Samoela ihany koa, ary nidaboka tamin’ny tany sady nitanjaka iny andro sy alina manontolo izy. Izany no nanaovan’ny olona hoe: «Mba tonga anisan’ny mpaminany koa ve i Saoly?»

Alakamisy 17 Oktobra 2019 - Mat 11 : 1 - 10

1Nony vitan’i Jesoa ny hafatrafatra ho an’ireo mpianany 12 lahy, dia niala teo Izy hampianatra sy hitoriteny any amin’ny tanànan-dry zareo Jiosy.
Irak’i Jôhany Mpanao batisa tany amin’i Jesoa

2Ren’i Jôhany Mpanao batisa tao am-ponja ny asa nataon’i Jesoa, ka nisy nirahin’i Jôhany ny mpianany 3hanontany azy hoe:
–Ianao ve no Ilay ho avy sa olon-kafa no mbola tokony handrasanay?

4Dia hoy i Jesoa namaly ireto iraka:
–Ndeha ambarao an’i Jôhany ny zavatra hitanareo sy renareo: 5mahiratra ny jamba, mandeha tsara ny mandringa, madio ny marary hoditra, mandre ny marenina, atsangana ho velona ny maty, itoriana ny Vaovao Mahafaly ny mahantra. 6Koa sambatra izay tsy voasakana hino Ahy!

7Nony lasa ireto iraka, dia niteny momba an’i Jôhany tamin’ny vahoaka i Jesoa nanao hoe:
–Hizaha inona no nalehanareo tany an-taniefitra? Volotara hetsiketsehin-drivotra ve? Tsia! 8Fa hizaha inona àry no nalehanareo tany? Olona marevaka fitafiana ve? Izay marevaka fitafiana dia any amin’ny lapan’ny mpanjaka! 9Koa hizaha inona àry no nalehanareo tany? Mpaminany ve? Izany tokoa, hoy Aho aminareo, ary mihoatra noho ny mpaminany aza. 10Fa i Jôhany no ilay voalazan’ny Soratra Masina hoe:

«Indro alefako hialoha Anao ny irako,
hoy Andriamanitra,
mba hamboatra ny lalan-kalehanao!»

Alarobia 16 Oktobra 2019 - Apo 11 : 1 - 6

1Ary nomena volotara tahaka ny tehina fandrefesana aho, dia nilazana hoe:
–Mitsangàna, ka refeso ny tempolin’Andriamanitra sy ny alitara ary isao izay mivavaka ao. 2Ny kianjan’ny tempoly, ilay eo ivelany, dia avelao ihany fa aza refesina; satria nomena ny hafa firenena izany, ka hanitsakitsaka ny tanàna masina izy ireo mandritra ny 42 volana. 3Ary homeko hery ny vavolombelona roa mpanambara Ahy, ka hitondra ny hafatro mandritra ny 1 260 andro sady hitafy gony.

4Ireo vavolombelona roa ireo no fototr’ôliva anankiroa sy fitoeranjiro anankiroa, izay mijoro eo anatrehan’ilay Tompon’ny tany. 5Ka raha misy mitady hanisy ratsy azy ireo, dia misy afo mivoaka avy ao am-bavany handevona ny fahavalony; ary tsy maintsy hovonoina ho faty toy izany izay mitady hanisy ratsy azy ireo. 6Ireo no manam-pahefana hanidy ny lanitra, mba tsy hilatsahan’ny ranonorana mandritra ny andro hampitany ny hafatr’Andriamanitra; sady manam-pahefana amin’ny rano, ka mahova azy ho ra; ary manam-pahefana hamely ny tany amin’ny loza rehetra isaky ny te hanao izany.

Talata 15 Oktobra 2019 - Jer 26 : 8 - 17

 8Koa rehefa tapitra voalazan’i Jeremià ny teny rehetra izay nasain’ny TOMPO nambarany tamin’ny besinimaro teo, dia nosamborin’izy rehetra i Jeremià ka nataony hoe:
–Mendrika ho faty ianao. 9Ahoana no ahasahianao milaza amin’ny anaran’ny TOMPO fa horavana tahaka ny tao Silao ity trano ity, ary ho simba sady tsy hisy mponina ity tanàna ity?
Tamin’izay dia nitangorona hamely an’i Jeremià izay rehetra teo an-kianjan’ny tranon’ny TOMPO.
10Nony ren’ireo mpitondran’i Joda ny zava-nitranga, dia niakatra avy tao an-dapan’ny mpanjaka hankao an-tranon’ny TOMPO izy, ka nipetraka hitsara teo anoloan’ny vavahady vaovao amin’ny tranon’ny TOMPO.

11Dia hoy ireo mpisorona ama-mpaminany tamin’ny mpitondran’i Joda ary koa tamin’ny vahoaka rehetra teo:
–Mendrika ho faty io lehilahy io, satria naminany ny hamelezana ity tanàna ity izy, ary ny sofinareo mihitsy no efa nandre.

12Fa namaly ny mpitondra sy ny vahoaka rehetra teo i Jeremià ka nanao hoe:
–Ny TOMPO no naniraka ahy hanambara ny hamelezana ity trano ity sy ity tanàna ity araka izay efa renareo teo. 13Koa ankehitriny hatsarao ny fitondrantenanareo sy ny fomba fanaonareo; henoy izay lazain’ny TOMPO Andriamanitrareo, dia tsy hampiharin’ny TOMPO ilay loza efa nolazainy hamelezana anareo. 14Ary raha ny tenako dia indro eo am-pelatananareo; ka ataovy amiko izay heverinareo ho tsara sy mahitsy. 15Saingy izao, raha hamono ahy ho faty ianareo, dia fantaro fa mamono ny tsy manan-tsiny ka hibaby ny vokatr’izany ianareo sy ny mponina rehetra amin’ity tanàna ity; satria ny TOMPO tokoa no naniraka ahy hankatỳ aminareo hanambara ireo teny rehetra ireo mba ho renareo.

16Tamin’izay dia hoy ireo mpitondra sy ny vahoaka rehetra tamin’ny mpisorona sy ny mpaminany hoe:
–Tsy mendrika ho faty ity lehilahy ity fa tamin’ny anaran’ny TOMPO Andriamanitsika no nitenenany tamintsika.

Zoma 11 Oktobra 2019 - I Kor 14 : 1 - 6

1Iezaho hatrany izay hananana ny fitiavana; nefa irio fatratra koa ny fanomezam-pahasoavana avy amin’ny Fanahy Masina, indrindra fa ny milaza hafatra avy amin’Andriamanitra. 2Izay miteny amin’ny fiteny tsy fantatra dia tsy miteny miantefa amin’ny olona fa miantefa amin’Andriamanitra, satria tsy azon’olona izay teneniny fa herin’ny Fanahy Masina no anambaràny zava-miafina; 3fa izay milaza hafatra avy amin’Andriamanitra kosa dia miteny miantefa amin’ny olona mba hampandroso azy ireo amin’ny finoana ary koa hankahery sy hampionona azy ireo. 4Izay miteny amin’ny fiteny tsy fantatra dia ny tenany fotsiny no ampandrosoiny amin’ny finoana; fa izay milaza hafatra avy amin’Andriamanitra kosa dia ny fiangonana no ampandrosoiny amin’ny finoana.

5Satriko ny samy hitenenanareo rehetra amin’ny fiteny tsy fantatra, nefa aleoko ny hilazanareo hafatra avy amin’Andriamanitra. Fa izay milaza hafatra avy amin’Andriamanitra dia ambony kokoa noho izay miteny amin’ny fiteny tsy fantatra, raha tsy hoe misy olona afaka manazava izay lazainy mba hampandroso ny mpiangona amin’ny finoana. 6Koa manontany anareo aho, ry havako: raha mankatỳ aminareo aho ka fiteny tsy fantatra no itenenako aminareo, moa hahasoa anareo ve aho? Tsy hahasoa anareo aho raha tsy fanambarana, na teny feno fahalalana, na hafatra avy amin’Andriamanitra, na fampianarana no itenenako aminareo.

Alakamisy 10 Oktobra 2019 - Lio 24 : 17 - 27

17Dia hoy i Jesoa taminy:
–Inona izao iadianareo hevitra etỳ an-dalana izao?

Dia niato kely izy roa lahy sady maloka endrika erỳ. 18Ary namaly Azy ny anankiray atao hoe Kleôpasy ka nanao hoe:
–Ianao irery ve no vahiny mandalo eto Jerosalema tsy mahalala ny zava-nitranga tao, tato ho ato?

19Dia hoy i Jesoa taminy:
–Zavatra inona moa izany?

Ka novalian’izy roa lahy hoe:
–Ny amin’i Jesoa avy any Nazareta, Izay mpaminany mahery tamin’ny asany sy tamin’ny teniny teo anatrehan’Andriamanitra sy ny vahoaka manontolo; 20kanjo natolotry ny lohandoha-mpisorona sy ny manampahefana eto amintsika mba hohelohina ho faty ary nasainy nohomboana tamin’ny hazofijaliana. 21Nanantena izahay fa Izy no Ilay hanavotra an’i Israely, ary tsy izany ihany fa androany izao no andro fahatelo hatramin’ny nitrangan’izany. 22Nisy ihany anefa vehivavy sasany namanay nahasanganehana anay fatratra: tany amin’ny fasana vao maraina be ry zareo, 23saingy tsy nahita ny vatan’i Jesoa, ary niverina nitantara taminay fa nisehoan’ny anjely anankiroa, ka ireo anjely, hono, nilaza fa velona Izy. 24Dia nisy tamin’ny lehilahy namanay mba nankany amin’ny fasana ka nahita araka ny filazan’ireo vehivavy, fa Izy tsy hitany.

25Dia hoy i Jesoa tamin’izy roa lahy:
–Olona votsa saina ianareo ary ela vao mino izay rehetra voalazan’ny mpaminany! 26Moa tsy tokony ho niaritra izany ve ny Mesia, alohan’ny hidirany any amin’ny voninahiny?

27Dia nohazavain’i Jesoa tamin’ireto mpianatra ny momba Azy ao amin’ny Soratra Masina manontolo, nanomboka tamin’ny bokin’i Mosesy ka nitohy tamin’ny bokin’ny mpaminany rehetra.

Alarobia 09 Oktobra 2019 - II Tan 25 : 6 - 16

6Teo koa ny lehilahy maherifo israelita nisy antokony zato nokaramain’ity mpanjaka volafotsy telo taonina 7Kanefa nisy lehilahy olon’Andriamanitra tonga tao amin’i Amatsià ka nanao hoe:
–Ry andriamanjaka, aza avela hanaraka anao hiantafika ny miaramila israelita, satria tsy miaraka amin’ireo rehetra taranak’i Efraîma ireo ny TOMPO. 8Fa raha miara-manainga aminy ihany ianao, na dia hahery mikatroka an’ady toy inona aza, dia hataon’Andriamanitra lavo eo anoloan’ny fahavalonao; Andriamanitra manko no hany mahay mampandresy na mampahalavo.

9Hoy kosa i Amatsià tamin’ilay olon’Andriamanitra:
–Ka hatao ahoana ny amin’ny volafotsy telo taonina izay nomeko ny miaramila israelita?

Dia novaliany hoe:
–Ny TOMPO dia mahay manome anao mihoatra lavitra noho izany.

10Ary navahan’i Amatsià ny miaramila efraimita tonga teo aminy mba halefa hody indray; ka sady lasa nody ireo no nirehi-pahatezerana mafy dia mafy tokoa tamin’ny fanjakàn’i Joda.
11Nanana herimpo i Amatsià, ka nitarika ny tafiny hankao amin’ny Lohasahan-tsira, ary nahafaty antokony folo tamin’ny Edômita taranak’i Sehîra. 12Ary ny antokony folo sisa kosa dia nataon’ny Jodeanina sambo-belona, dia nentiny teo antampon’ny hantsam-bato ary navariny teo, ka montsamontsana izy rehetra.

13Fa ny miaramila efraimita, izay nalefan’i Amatsià hody mba tsy hiara-miantafika aminy, dia niriotra namely ireo tanàna jodeanina nanomboka teo Migrôna ka nipaka hatrany Bety-Hôrôna ary nahafaty olona telo arivo sady nitondra babo betsaka.

14Nony niverina avy nanafika ny Edômita i Amatsià, dia nitondra ny sarivongan’ny andriamanitr’ireo taranak’i Sehîra ireo ka nanangana azy ho andriamaniny; ary niankohoka teo anatrehany izy hitsaoka azy sady nanolotra sorona taminy. 15Dia nirehi-pahatezerana tamin’i Amatsià ny TOMPO, ka naniraka mpaminany anankiray ho any aminy hanontany azy hoe:
–Nahoana ianao no mivavaka amin’ny andriamanitr’ireo hafa firenena, dia andriamanitra izay tsy naharo ny olony tamin’ny tananao akory aza?

16Fa rehefa nitenenan’ity mpaminany izany izy, dia namaly hoe:
–Moa ve nisy nanendry anao ho mpanolotsaina ny mpanjaka? Aoka itsỳ, fandrao asian’ny olona eo ianao!

Dia niato kely ilay mpaminany, vao nanohy hoe:
–Fantatro fa nanapa-kevitra hahafaty anao Andriamanitra, satria nanao izany ianao ka tsy nihaino ny anatro.

Talata 08 Oktobra 2019 - Lio 7 : 36 - 50

36Nisy Farisianina nanasa an’i Jesoa hiara-misakafo aminy, koa nandroso tao aminy Izy ary naka toerana. 37Nisy kosa vehivavy anankiray malaza ho mpanota tao an-tanàna. Vao nahalala ravehivavy fa hoe misakafo ao amin’ilay Farisianina i Jesoa, dia naka ilomanitra eran’ny tavoahangy alabasitra; 38ka indro izy nankeo ivohon’i Jesoa ary nitomany dia nitomany teo an-tongony. Kotsan’ny ranomaso ny tongotr’i Jesoa ka nofaohin-dravehivavy tamin’ny volon-dohany, norokorohany tamim-pitiavana ary nohosorany an’ilay ilomanitra. 39Raha nahita izany ilay Farisianina nampiantrano an’i Jesoa, dia nanao anakampo hoe: «Raha mpaminany tokoa ity, dia ho nahafantatra izay tena toetran’io vehivavy mikasikasika Azy io fa hoe mpanota.»

40Ary i Jesoa niteny taminy hoe:
–Simôna ô, misy zavatra tiako holazaina aminao!

Dia hoy i Simôna hoe:
–Lazao àry hoe, ry Mpampianatra!

41Ka hoy i Jesoa taminy:
–Nisy, hono, olona roa nitrosa vola tamin’izay mpampisambo-bola izay; ny iray nitrosa denàry dimanjato, ny iray denàry dimampolo. 42Samy tsy nanan-kandoavana anefa izy roa lahy ka dia nafoin’ny mpampisambotra ny trosa rehetra rehetra. Iza amin’izy roa lahy, hoy ianao, no ho tia azy kokoa?

43Dia novalian’i Simôna hoe:
–Ataoko fa ilay namoizany be.

Ka hoy i Jesoa taminy:
–Marina ny hevitrao!

44Dia nitodika nijery an-dravehivavy Izy sady nanao tamin’i Simôna hoe:
–Hitanao ve ity vehivavy ity? Niditra ny tranonao Aho: ianao tsy nanome rano Ahy hanasako tongotra; izy kosa ny ranomasony no nanondrahany ny tongotro ary ny volon-dohany no namaohany azy. 45Ianao tsy nanoroka Ahy; izy kosa, hatrizay nidirany, tsy nitsahatra nanorokoroka ny tongotro. 46Ianao tsy nanosotra diloilo ny lohako; izy kosa nanosotra ilomanitra ny tongotro. 47Koa izao no teniko aminao: Voavela ny heloka be nataony, noho izy be fitiavana; fa izay amelana kely no kely fitiavana.

48Hoy kosa i Jesoa tamin-dravehivavy:
–Voavela ny helokao!

49Ireo niara-nisakafo tamin’i Jesoa dia nanao anakampo hoe: «Iza moa ity no mamela heloka?» 50Fa hoy indray i Jesoa tamin-dravehivavy:
–Ny finoanao no nahavonjy anao! Ndeha àry ka veloma finaritra!

Alatsinainy 07 Oktobra 2019 - Eze 11 : 1 - 12

1Ary ningain’ny Fanahin’ny Tompo aho ka nentiny hankeo amin’ilay vavahady atsinanana amin’ny tranon’ny TOMPO. Tazako teo anilan’ny fidirana ny lehilahy 25 ka anisan’ireny ireo roalahy lehiben’ny vahoaka, dia i Jazanià zanakalahin’i Hazora, sy i Pelatià zanakalahin’i Benaià. 2Ary hoy ny Fanahy tamiko: «Ry ilay taranak’olombelona, ireo no lehilahy manomana asa ratsy sy manolo-tsaina mandoza eto Jerosalema. 3Lazainy hoe: ‹Tsy hanorenana trano intsony eto ao anatin’ny fotoana elaela! Fa ho toy ny vilany ity tanàna ity ary isika no ho hena tahirizina ao anatiny.› 4Koa ianao, ry ilay taranak’olombelona, ijoroy ny maha-mpaminany anao, eny, ijoroy ny maha-mpaminany anao mba hanohitra azy.».

5Dia nilatsaka tamiko ny Fanahin’ny TOMPO ka nandidy ahy hanambara hoe: «Izao no lazain’ny TOMPO: Fantatro izay teneninareo, ry olon’i Israely, fantatro ny eritreritra tonga ao an-tsainareo! 6Efa nahafaty olona maro teto amin’ity tanàna ity ianareo; ary namenoanareo ny lalambe ny fatiny. 7Koa hoy Izaho Tompo ANDRIANANAHARY aminareo: toy ny vilany ity tanàna ity, ary ny hena dia ireo efa novonoinareo ho faty teo anivony. Ianareo kosa anefa dia horoahiko tao. 8Matahotra ny ady ve ianareo? Raha izany, dia halefako aminareo ny ady. Teny hentitra avy amiko Tompo ANDRIANANAHARY izany! 9Horoahiko hiala amin’ity tanàna ity ianareo, ka hatolotro ho eo an-tanàn’ny firenen-kafa; ary hotanterahiko ny didim-pitsarako ny aminareo. 10Hampihariko aminareo ny fitsarako ato anatin’ny faritr’i Israely, ka hovonoiko ho faty amin’ny ady ianareo. Amin’izay dia hoekenareo fa Izaho no TOMPO. 11Tsy ho toy ny vilany ho anareo ity tanàna ity ary tsy ho toy ny hena tahirizina ao anatiny ianareo; fa hampihariko aminareo ny fitsarako ato anatin’ny faritr’i Israely. 12Amin’izay dia hoekenareo fa Izaho no TOMPO Izay tsy nankatoavinareo lalàna sy tsy narahinareo fitsipika, satria nanaraka ny fomban’ireo firenena nanodidina ianareo.»

Alahady 06 Oktobra 2019 - Nom 11 : 23 - 27

23Fa hoy ny TOMPO tamin’i Mosesy:
–Ary ny heriko, moa mba misy fetrany va? Ho hitanao izao ankehitriny izao na ho tanteraka aminao ny teniko na tsia.

24Nisinda kely i Mosesy ka nilaza ny tenin’ny TOMPO tamin’ny vahoaka. Nangoniny avy eo ireo fitopolo lahy tamin’ny loholom-bahoaka, dia napetrany nanodidina ny Tranolay fihaonana. 25Ary nidina teo amin’ny rahona ny TOMPO ka niresaka tamin’i Mosesy. Nangalany ny fanahy tamin’i Mosesy ka nanomezany ho an’ny loholona fitopolo lahy. Ary raha vao nipetraka tamin’izy ireo ny fanahy, dia nanomboka naminany izy ireo, nefa tsy notohizany izany.

26Fa nisy olona anankiroa nijanona tao an-toby, i Eldada no anaran’ny iray ary i Medada kosa ny iray; anisan’ny loholona fitopolo lahy izy ireo, nefa tsy mba lasa nankany amin’ny Tranolay. Nahazo ny fanahy koa izy ireo ary dia naminany tao an-toby. 27Nihazakazaka nampandre an’i Mosesy ny tovolahy iray ka nanao hoe:
–Maminany ao an-toby i Eldada sy i Medada.

Sabotsy 05 Oktobra 2019 - Jer 7 : 21 - 28

21Izao no lazain’ny TOMPOn’izao rehetra izao sady Andriamanitr’i Israely: Ny henan’ny sorona dorana manontolo dia ampio ny henan’ny sorom-pihavanana nataonareo, ka mahereza mihinan-kena. 22Fa raha nitondra ny razanareo niala tany Ejipta Aho, dia tsy nilaza taminy akory na nangataka azy hanao sorona dorana manontolo na sorom-pihavanana. 23Fa izao kosa no nandidiako azy: Henoy izay lazaiko, dia ho Andriamanitrareo Aho ary ianareo ho vahoakako. Araho ny lalàna izay nandidiako anareo, dia hahita soa ianareo. 24Kanjo tsy nihaino sady tsy niraharaha Ahy izy fa nanaraka ny heviny araka ny ditran’ny fony. Tsy nitodika tamiko izy fa niamboho Ahy. 25Hatry ny nialan’ny razanareo tany Ejipta ka mandraka androany, dia tsy nitsahatra Aho naniraka ny mpaminany mpanompoko rehetra tany aminareo isan’andro tsy tapaka. 26Nefa tsy nihaino Ahy ianareo sady tsy niraharaha Ahy fa nanamafy hatoka sy nanao ratsy mihoatra noho ny razanareo aza.

27Ary ianao, ry Jeremià, na dia hilaza izany teny rehetra izany aminy aza, dia tsy hihaino anao izy; ary na dia hampita ny antsoko aminy aza ianao, dia tsy hamaly anao akory izy. 28Koa ambarao aminy hoe: «Ianareo no firenena tsy mba mihaino ny feon’ny TOMPO Andriamaniny sady tsy mety mandray anatra. Efa very teo aminareo ny toetra mahatoky ary efa niala teo am-bavanareo izany.»

Zoma 04 Oktobra 2019 - Jak 5 : 7 - 11

7Koa mahareta tsara àry, ry havana, mandra-piavin’ny Tompo. Jereo ny mpamboly miandry amim-paharetana izay vokatra sarobidy havoakan’ny tany, ka maharitra mandra-pahazony ny oram-pararano sy ny oran-dohataona. 8Mahareta koa ianareo; aoka ho feno herimpo, fa efa mby akaiky ny fiavian’ny Tompo. 9Aza mifampimonomonona ianareo, ry havana, mba tsy hanamelohan’Andriamanitra anareo. Indro ny mpitsara efa mijoro eo am-baravarana. 10Ry havana, aoka ireo mpaminany izay niteny tamin’ny anaran’ny Tompo no hataonareo filamatry ny fifandeferana sy faharetana. 11Indro ataontsika hoe sambatra izay manam-paharetana. Efa renareo ny faharetan’i Jôba, ary fantatrareo izay nataon’ny Tompo ho azy tamin’ny farany, satria be fiantra sy be indrafo ny Tompo.

Alakamisy 03 Oktobra 2019 - II Tan 18 : 1 - 17

1Nanan-karena sy voninahitra be i Jôsafata; ary ny zanany lahy dia nampanambadiany ny zanakavavin’i Ahaba mpanjakan’i Israely. 2Taona vitsivitsy taorian’izany, dia nidina nankany amin’i Ahaba tany Samaria i Jôsafata; ary namonoan’i Ahaba ondry aman’osy sy omby betsaka izy sy ireo olona nanaraka azy. Avy eo dia notaomin’i Ahaba hanafika an’i Ramôta-Gilehada i Jôsafata

3ka nanontaniany hoe:
–Mba hiaraka amiko hanafika an’i Ramôta-Gilehada ve ianao?

Dia novaliany hoe:
–Eny, fa tahaka ny tenanao ihany aho, ka ny tafiko dia tafikao; koa hiaraka hiantafika aminao izahay.

4Mbola niteny tamin’ny mpanjakan’i Israely indray i Jôsafata ka nanao hoe:
–Mba anontanio aloha ny tenin’ny TOMPO.

5ary novorin’ny mpanjakan’i Israely ny mpaminaniny efajato lahy ka nanontaniany hoe:
–Handeha hanafika an’i Ramôta-Gilehada ve isika, sa hijanona ihany aho?

Dia novalian’ireo hoe:
–Mandehana, ry andriamanjaka, fa hatolotr’Andriamanitra eo an-tananao ny tanàna.

6Ary hoy kosa i Jôsafata:
–Moa tsy misy mpaminanin’ny TOMPO koa ve eto mba hanontaniantsika?

7Dia novalian’ny mpanjakan’i Israely hoe:
–Mbola misy lehilahy iray ahazoantsika manontany ny TOMPO ao; saingy halako izy, satria tsy mbola naminany soa ho ahy fa loza mandrakariva. Mikaià, zanakalahin’i Jimlà, no anarany.

Ka hoy i Jôsafata:
–Aza dia miteny toy izany re ianao, ry mpanjaka!

8Tamin’izay dia niantso tandapa anankiray ny mpanjakan’i Israely, ka nandidy azy haka faingana an’i Mikaià zanakalahin’i Jimlà.

9Ary ny mpanjakan’i Israely sy ny mpanjakan’i Joda dia samy nipetraka teo amin’ny sezafiandrianany sy efa niakanjo ny fanamiany avy, teo amin’ilay kianja manoloana ny vavahadin’i Samaria, nandritra ny naminanian’ireo mpaminany rehetra ireo. 10Fa i Tsedekià, zanakalahin’i Kenahanà, dia namboatra tandro-by ka niteny hoe:
–Izao no lazain’ny TOMPO: «Ireto tandroka ireto no hanotoanao ny tafika sirianina mandra-paharingany.»

11Dia nilaza hafatra toy izany avokoa ny mpaminany rehetra teo ka nanao hoe:
–Tafiho i Ramôta-Gilehada fa ho resinao, ry mpanjaka! Eny, hatolotry ny TOMPO eo an-tananao io tanàna io.


12Ilay iraka izay nandeha naka an’i Mikaià kosa dia niteny taminy hoe:
–Indro efa iray teny avokoa izao ireo mpaminany, ka milaza soa ho an’ny mpanjaka; enga anie ny teninao mba ho tahaka ny azy, ka hilaza soa ihany koa!

13Fa hoy i Mikaià hoe:
–Velona ny TOMPO, ka mianiana aho fa izay lazain’Andriamanitra ihany no hambarako.

14Rehefa tonga teo anatrehan’ny mpanjaka izy, dia nanontaniany hoe:
–Ry Mikaià, handeha hanafika an’i Ramôta-Gilehada ve izahay, sa hijanona ihany aho?

Ka hoy ny navaliny azy:
–Mandehana fa handresy ianareo, ary hatolotry ny Tompo eo an-tananareo io tanàna io.

15Fa hoy indray ny mpanjaka taminy:
–Impiry moa no hampianianako anao mba tsy hilaza amiko afa-tsy ny marina ihany amin’ny anaran’ny TOMPO?

16Dia hoy ny navalin’i Mikaià:
–Hitako fa ny tafik’i Israely manontolo dia niely teny an-tendrombohitra toy ny ondry tsy misy mpiandry. Ary ny TOMPO niteny hoe: «Tsy mana-mpifehy intsony ireo miaramila ireo, ka aoka izy samy hody soa aman-tsara any an-tranony avy!»

17Dia hoy ny mpanjakan’i Israely tamin’i Jôsafata:
–Tsy efa voalazako taminao va fa tsy mba mety maminany soa ho ahy izy, fa loza ihany?

Alarobia 02 Oktobra 2019 - Jer 23 : 25 - 29

25Izaho Tompo efa nandre izay nolazain’ireo mpaminany mihambo miteny amin’ny anarako kanefa milaza lainga manao hoe: «Nanonofy aho, eny, nanonofy aho.» 26Mandra-pahoviana no ho toy izany? Fa inona no ao an-tsain’ireny mpaminany ireny, rehefa milaza lainga izy na milaza hevi-dravina ihany? 27Nony mifampitantara nofy izy, dia tsy mikendry afa-tsy ny hanadinoan’ny vahoakako Ahy, tahaka ny nanadinoan’ny razany Ahy ka nanompoany an’i Bahala. 28Raha misy mpaminany manonofy, dia aoka izy hilaza ny nofiny! Fa raha mitondra hafatra avy amiko izy, dia aoka hanambara marina ny teniko!

Aoka tsy hafangaro ny mololo sy ny vary
hoy ny teny hentitra avy amiko TOMPO.
29ny teniko dia toy ny afo mandoro,
ary toy ny kanonta manorotoro vatolampy,
hoy ny teny hentitra avy amiko TOMPO.

Talata 01 Oktobra 2019 - I Sam 10 : 1 - 10

1Dia nandray tavoahangy kely feno diloilo i Samoela ka nandraraka izany teo an-dohan’i Saoly. Ary nanoroka an’i Saoly izy sady nanao hoe:

–Ny TOMPO mihitsy no nanokana anao ho filohan’ilay vahoakany. 2Anio, rehefa tafasaraka isika, dia hihaona amin’ny lehilahy anankiroa ianao, eo akaikin’ny fasan’i Rahely ao Tselitsà amin’ny faritanin’i Benjamîna; ary izy ireo hiteny aminao hoe: «Efa hita ireo borikivavy izay notadiavinao; ary ankehitriny dia tsy ny borikiny intsony no mampanahy ny rainao, fa ianareo indray. Koa dia nanontany ny amin’izay tokony hataony hahitany an-janany izy.» 3Hanohy ny lalanao ianao ka ho tonga eo akaikin’ny hazo ôakan’i Tabôra, ary hahita lehilahy telo ho any amin’Andriamanitra any Betela: ny voalohany mitondra zanak’osy telo, ny faharoa mofo telo ary ny fahatelo siny hoditra feno divay. 4Hiarahaba anao izy ireo ary hanome mofo roa izay horaisinao amim-panajana. 5Rehefa izany dia ho tonga ao Gibehà-Elôhima misy andia-miaramila filistinina ianao. Rehefa tonga ao an-tanàna ianao, dia hifanena amin’ny andiana mpaminany izay midina avy eny amin’ny Toeramasina, ka ialohavan’ny mpitendry lokanga sy valiha ny mpively amponga tapaka ary ny mpitsoka sodina. Efa tsindrian-daona haminany avokoa izy ireo. 6Hilatsaka aminao ny Fanahin’ny TOMPO, ka haminany miaraka amin’izy ireo ianao ary ho tonga olom-baovao. 7Rehefa tanteraka aminao ireo famantarana ireo, dia ho fantatrao fa Andriamanitra tokoa no momba anao koa ataovy izay fantatrao fa mety. 8Tsy maintsy midina mialoha ahy any Gilgàla anefa ianao, ka ho tratrako tsy ho ela, any ny hanatrarako mba hanolotra sorona dorana manontolo sy sorom-pihavanana. Fito andro no hiandrasanao ahy ao; ka rehefa tonga aho, dia hambarako anao izay tokony hataonao.

9Raha vao nihodina i Saoly ka dify an’i Samoela, dia novan’Andriamanitra fo, ary tanteraka taminy androtrizay ihany ireo zavatra rehetra voalazan’i Samoela. 10Koa rehefa tonga tany Gibehà i Saoly sy ny mpanompony, dia indreo andiana mpaminany nifanena taminy; dia nilatsahan’ny Fanahin’Andriamanitra i Saoly, ary niara-naminany tamin’izy ireo.

Alatsinainy 30 Septambra 2019 - Eze 20 : 39 - 44

 39Ary ny aminareo Israelita kosa dia izao no lazain’ny Tompo ANDRIANANAHARY: ‹Samia miroso manompo ny sampiny avy ianareo! Nefa any aoriana any dia hankatò Ahy mihitsy ianareo, ary tsy hanimbazimba ny anarako masina intsony amin’ny fanolorana fanatitra ho an’ny sampinareo. 40Fa teny hentitra avy amiko Tompo ANDRIANANAHARY izao: ny Israelita rehetra eo amin’ny tany dia hanao fanompoam-pivavahana Amiko eo an-tendrombohitra voatokana ho Ahy, dia ilay tendrombohitra avo any Israely. Eo no handraisako tsara anareo sy hiangaviako hitondranareo izay rehetra voatokanareo ho Ahy, dia ny fanomezana sy fanatitra amin’izay tsara indrindra anananareo. 41Miaraka amin’ny sorona manetona hanitra ankasitrahiko no handraisako tsara anareo, rehefa havoakako avy eo anivon’ny firenen-kafa ianareo sy hovoriko avy any amin’ny tany izay nampielezako anareo. Ka ny hataoko aminareo no hanehoako ny maha Andriamanitra Masina Ahy eo imason’ny firenen-kafa. 42Amin’izay dia hoekenareo fa Izaho no TOMPO, rehefa tafaveriko ao amin’ny tanin’i Israely izay nianianako homeko ny razanareo. 43Ao ianareo no hisaintsaina ny fitondrantenanareo tamin’ny lasa sy ireo asa nampahaloto anareo. Haharikoriko anareo ny tenanareo noho ny ratsy rehetra efa nataonareo. 44Tsy araka ny toe-dratsinareo sy ny asa tsy mendrika nataonareo no havaliko anareo, ry Israelita, fa mba ho fitandroako ny lazako. Amin’izay dia hoekenareo fa Izaho no TOMPO. Teny hentitra avy amiko Tompo ANDRIANANAHARY izany.»

Alahady 29 Septambra 2019 - Heb 12 : 25 - 29

25Mitandrema àry! Aza manentsin-tadîny amin’izay miteny aminareo. Fa raha tsy afa-nandositra ireo nanentsin-tadîny tamin’ilay nilaza hafatr’Andriamanitra taminy teto an-tany, mainka fa isika raha miala amin’Ilay miteny amintsika avy any an-danitra. 26Ny feony dia nanozongozona ny tany fahizay; ankehitriny kosa dia mbola mampanantena antsika Izy manao he: «Hohozongozoniko indray mandeha koa, tsy ny tany ihany, fa ny habakabaka koa.» 27Ny hoe «indray mandeha koa» dia manambara fa hohozongozonina sady hovana ny zavaboaary, mba haharetan’izay zavatra tsy azo hozongozonina.

28Aoka àry isika hahay misaotra an’Andriamanitra noho isika mandray Fanjakana tsy azo hozongozonina. Izany fahaiza-misaotra Azy izany dia aoka hasehontsika amin’ny fanompoana sitrak’Andriamanitra, fanompoana ombàm-panajana sy fahatahorana; 29fa ilay Andriamanitsika dia afo mandevona

Sabotsy 28 Septambra 2019 - Jao 15 : 1 - 8

1–Izaho no tena voaloboka; ary ny Raiko no mpamboly. 2Ny sampana rehetra izay tafaray amiko nefa tsy mamokatra dia esorin’ny Raiko; ary ny sampana rehetra izay mamokatra kosa, dioviny mba hamokatra bebe kokoa. 3Madio izao ianareo noho ny teny izay nolazaiko taminareo. 4Aoka hiray amiko hatrany ianareo toy ny iraisako aminareo. Ny sampana tsy afa-mamokatra ho azy raha tsy miray amin’ny voaloboka hatrany; dia toy izany koa ianareo: tsy afa-mamokatra, raha tsy miray amiko hatrany. 5Izaho no voaloboka; ianareo no sampana. Izay miray amiko hatrany, toy ny iraisako aminy, no mamokatra be; satria raha misaraka amiko ianareo, dia tsy afa-manao na inona na inona. 6Raha misy olona tsy miray amiko hatrany, dia ariana any ivelany tahaka ny sampana izy, ka mihamaina; ary angonina ireo sampana maina ka atsipy ao anaty afo, dia may. 7Raha miray amiko hatrany ianareo ka mitoetra ao anatinareo ny teniko, dia angataho izay zavatra tianareo na inona na inona, fa ho tonga aminareo izany. 8Ny ahazoan’ny Raiko voninahitra, dia ianareo mamokatra be sady tonga mpianatro.

Zoma 27 Septambra 2019 - II Kor 8 : 1 - 5

1Tianay hampahafantarina anareo, ry havana, ny fahasoavana nomen’Andriamanitra tao amin’ireo Fiangonana any Masedônia. 2Voasedra mafy tamin’ny fahoriana nahazo azy ny mpino, kanefa lehibe tokoa ny hafaliany ary nahafoy mihitsy izy ireo tamin’ny famoriam-bola, na dia tena mahantra aza. 3Vavolombelona nahita aho fa nanome araka izay zakany ry zareo, eny mihoatra noho izay zakany aza; nahim-pony 4no niangaviany mafy taminay mba hahazo tombon-tsoa handray anjara amin’ny fanasoavana ny vahoakan’Andriamanitra any Jodea. 5Nanao mihoatra noho izay nantenainay izy ireo, fa nanolo-tena ho an’ny Tompo aloha, ary ho anay koa noho ny sitrapon’Andriamanitra.

Alakamisy 26 Septambra 2019 - Jao 15 : 1 - 8

1–Izaho no tena voaloboka; ary ny Raiko no mpamboly. 2Ny sampana rehetra izay tafaray amiko nefa tsy mamokatra dia esorin’ny Raiko; ary ny sampana rehetra izay mamokatra kosa, dioviny mba hamokatra bebe kokoa. 3Madio izao ianareo noho ny teny izay nolazaiko taminareo. 4Aoka hiray amiko hatrany ianareo toy ny iraisako aminareo. Ny sampana tsy afa-mamokatra ho azy raha tsy miray amin’ny voaloboka hatrany; dia toy izany koa ianareo: tsy afa-mamokatra, raha tsy miray amiko hatrany. 5Izaho no voaloboka; ianareo no sampana. Izay miray amiko hatrany, toy ny iraisako aminy, no mamokatra be; satria raha misaraka amiko ianareo, dia tsy afa-manao na inona na inona. 6Raha misy olona tsy miray amiko hatrany, dia ariana any ivelany tahaka ny sampana izy, ka mihamaina; ary angonina ireo sampana maina ka atsipy ao anaty afo, dia may. 7Raha miray amiko hatrany ianareo ka mitoetra ao anatinareo ny teniko, dia angataho izay zavatra tianareo na inona na inona, fa ho tonga aminareo izany. 8Ny ahazoan’ny Raiko voninahitra, dia ianareo mamokatra be sady tonga mpianatro.

Alarobia 25 Septambra 2019 - I Kor 6 : 1 - 11

1Raha misy aminareo manana fifanolanana amin’ny havana kristianina, ahoana no dia ahasahiany mangataka fitsarana amin’ny olona tsy mpino fa tsy amin’ny vahoakan’Andriamanitra? 2Sa tsy fantatrareo ve fa ny vahoakan’Andriamanitra no hitsara izao tontolo izao? Ka raha izao tontolo izao aza hotsarainareo, dia tsy mendrika anareo ve ny fitsarana izay raharaha madinika indrindra. 3Tsy fantatrareo ve fa hitsara anjely aza isika? Mainka fa izay raharaha momba izao fiainana izao! 4Koa raha zavatra momba izao fiainana izao no ilanareo fitsarana, dia olona ivelan’ny Fiangonana ve no tendrenareo ho mpitsara? 5Hampahamenatra anareo no itenenako izany. Hay ve tsy misy olon-kendry na dia anankiray aza eo aminareo mba afaka handamina ny fifanolanan’ny samy kristianina? 6Sady kristianina ve dia hanana ady amina kristianina ary izay indray tsaraina eo anatrehan’ny tsy mpino?

7Efa tena mikorosy fahana ianareo matoa misy fifanolanana samy ianareo. Tsy aleonareo ve mizaka ny tsy rariny? Tsy aleonareo ve miaritra ny fanambakana? 8Kanefa dia ianareo indray no manao ny tsy rariny sy manambaka, ary dia ny havanareo iray finoana ihany no anaovanareo izany. 9Tsy fantatrareo ve fa tsy hanana anjara amin’ny Fanjakàn’Andriamanitra ny mpanao ratsy. Aza mety hofitahina ianareo! Fa na ny mpijangajanga, na ny mpanompo sampy, na ny mpaka vadin’olona, na ny maloto fihetsika, na ny mpifampila samy lehilahy, 10na ny mpangalatra, na ny mpitia harena, na ny mpidoroka, na ny mpanendrikendrika, na ny mpanao an-keriny, dia samy tsy hanana anjara amin’ny Fanjakàn’Andriamanitra. 11Tahaka izany taloha ny sasany taminareo; saingy efa voasasa ho afaka tamin’ny fahotana ianareo, efa voatokana ho an’Andriamanitra ary efa nekeny ho marina tamin’ny anaran’i Jesoa Kristy Tompo sy tamin’ny Fanahin’ilay Andriamanitsika.

Talata 24 Septambra 2019 - I Tan 28 : 9 - 10

9«Ianao kosa, ry Salômôna zanako, fantaro ilay Andriamanitra notompoin’ny rainao, ka manompoa Azy amin’ny fo manontolo sy amin’ny fanahy mazoto; fa ny TOMPO dia mpandinika ny fon’ny olona rehetra ary mpahafantatra ny fieritreretana rehetra. Raha mitady Azy ianao, dia hahita Azy; fa raha mandao Azy kosa ianao, dia hariany mandrakizay. 10Indro efa nofidin’ny TOMPO ianao izao mba hanorina tempoly ho Toeramasiny; dia mahereza ka mahefà.»

Alatsinainy 23 Septambra 2019 - Sal 99 : 1 - 9

1Ny TOMPO no mpanjaka,
hany ka mangovitra ireo vahoaka.
Ambony kerobima ny sezafiandrianany,
hany ka mihorohoro ny tany.
2Lehibe ao Tsiôna ny TOMPO,
avo ambonin’ny firenena rehetra Izy.
3Aoka ireo hidera ny anaranao
izay lehibe sy mampitolagaga,
satria masina tokoa Ianao!
4Ry mpanjaka mahery sy tia rariny ô,
Ianao no nampiorina ny hitsiny
sady niantoka ny rariny sy ny fitsarana
teo amin’ny taranak’i Jakôba.

5Asandrato ny TOMPO Andriamanitsika;
Izy no masina ka iankohofy
eo anoloan’ny fitoeran-tongony.

6I Mosesy sy i Aharôna tamin’ireo mpisorony
ary i Samoela tamin’ireo mpivavaka aminy
dia samy niantso vonjy taminy ka novaliany.
7Tao anaty andry rahona ny Tompo
no niteny tamin’ny vahoakany;
dia nankatoavin’ireo ny baikony
mbamin’ny fitsipika nomeny azy.

8TOMPO Andriamanitray ô,
Ianao mihitsy no mamaly azy;
fa Andriamanitra nahari-po taminy Ianao,
nefa kosa nanafay azy noho ny ratsy nataony.

9Asandrato ny TOMPO Andriamanitsika;
eny, masina ny TOMPO Andriamanitsika
ka iankohofy eo an-tendrombohiny masina.