jeudi 31 décembre 2020

Alakamisy 31 Desambra 2020 - I Jao 5 : 1 - 9

 1Izay rehetra mino fa i Jesoa no Kristy, dia naterak’Andriamanitra; ary izay rehetra tia ilay Andriamanitra niteraka, dia tia izay naterak’Andriamanitra koa. 2Ny ahafantarantsika fa tia ireo zanak’Andriamanitra isika, dia ny fitiavantsika an’Andriamanitra sy ny fanatontosàntsika ireo didiny. 3Eny, ny fitiavana an’Andriamanitra dia ny fitandremantsika ireo didiny; sady tsy mavesatra ireo didiny ireo, 4satria izay rehetra naterak’Andriamanitra dia maharesy izao tontolo izao. Ary ny fitaovam-pandresena izay maharesy izao tontolo izao dia ny finoantsika. 5Iza moa no maharesy izao tontolo izao, afa-tsy izay mino fa i Jesoa no ilay Zanak’Andriamanitra?

Vavolombelona manambara an’i Jesoa Kristy

6I Jesoa Kristy dia Ilay avy tamin’ny alalan’ny rano sy tamin’ny alalan’ny ra. Tsy tamin’ny rano ihany no nahatongavany, fa tamin’ny rano sy ny ra; ary ny Fanahy Masina no vavolombelona manambara izany, satria ny Fanahy Masina no fahamarinana. 7Fa ankehitriny, telo no vavolombelona manambara: 8dia ny Fanahy Masina sy ny rano ary ny ra; sady mifanaraka tsara izy telo. 9Raisintsika ny zavatra ambaran’ny olona; ary lehibe noho izany ny zavatra ambaran’Andriamanitra, satria ny zavatra ambaran’Andriamanitra dia izay efa nambarany momba ny Zanany.

mercredi 30 décembre 2020

Alarobia 30 Desambra 2020 - Isa 11 : 1 - 10

 1Misy rantsana misandrahaka avy amin’ny fototr’i Jisay;

misy solofo mipoitra avy amin’ny fakany.

2Ny Fanahin’ny TOMPO no mitoetra eo aminy,

dia Fanahy manome fahendrena sy fahaiza-manavaka

Fanahy mahay mamolavola sy manatanteraka,

Fanahy ahalalana sy anajana ny TOMPO;

3ary io no hanoro azy ny fanajana ny TOMPO.

Tsy hitsara araka ny ivelany fotsiny izy

na hanapaka araka izay ren’ny sofiny,

4fa hitsara ny malahelo ara-drariny

ary hamoaka didy araka ny hitsiny

ho an’ny mahantra eo amin’ny tany.

Ny teniny no toy ny tsorakazo

hikapohany ny tany

ary ny fofonain’ny vavany

no hamonoany ny olon-dratsy.

5Ny rariny no ho fisikinany

ary ny toetra hentitra no ho fehikibony.

6Koa ny amboadia hiara-mipetraka amin’ny zanak’ondry,

ny leôparda hiara-mandry amin’ny zanak’osy;

ny zanak’omby sy ny liona tanora hiara-mihinana

ka zazalahy kely no hitarika azy.

7Ny ombivavy sy ny orsavavy hiara-miraoka;

ary ny zanak’izy ireo hiara-matory.

Hihinam-bilona toy ny omby ny liona.

8Ny zaza mbola minono

hilalao eo an-davaky ny bibilava;

ary ny zaza misara-nono

hanatsofoka ny tanany

ao an-davaky ny menarana.

9Tsy hisy hanimba na handratra

manerana ny tendrombohitra masina,

satria ny fahalalana ny TOMPO

no hanenika izany tany izany

tahaka ny anaronan’ny rano

ny fanambanin’ny ranomasina.

10Amin’izany andro izany ny solofon’i Jisay

dia hatsangana ho fanevan’ny firenena rehetra;

ka hitady azy ny firenen-kafa,

ary hanjary be voninahitra ny fonenany.

mardi 29 décembre 2020

Talata 29 Desambra 2020 - Rom 11 : 7 - 15

 7Ahoana àry? Tsy nahazo izay nokatsahiny akory ny vahoaka Israely, fa ireo voafidin’Andriamanitra no nahazo izany. Nohamafisina kosa ny fon’ny hafa rehetra, 8araka izay voalazan’ny Soratra Masina hoe: «Nomen’Andriamanitra fanahy mahadonto izy ireo ka ny masony tsy mahita ary ny sofiny tsy mandre mandraka androany.» 9Hoy koa i Davida hoe:

«Ho fandrika sy ho tonta ho azy ireo anie ny sakafony,

ary ho fandavoana sy ho famaizana azy.

10Ho rakotry ny haizina anie ny masony ka tsy hahita;

ary ho vokoka lalandava anie ny lamosiny!»

11Manontany àry aho hoe: Sao solafaka ny Jiosy, ka lavo tsy ho tafarina intsony? Sanatria izany! Fa ny hadisoan’ny Jiosy no ahazoan’ny hafa firenena ny famonjena mba hahavelom-pialonana ny Jiosy. 12Koa raha ny fahadisoan’ny Jiosy aza tonga harena ara-panahy ho an’izao tontolo izao, ary ny fietreny tonga harena ara-panahy ho an’ny hafa firenena, vao mainka fa ny fiverenany tanteraka amin’ny famonjena!

13Aminareo hafa firenena dia izao kosa no teniko: araka ny maha apôstôlin’ny hafa firenena ahy, dia hajaiko ny asa fanompoana nankinina tamiko; 14sao mba hahavelom-pialonana ireo havako ara-nofo, ka hahavonjeko ny sasany amin’izy ireo. 15Nony nailika ry zareo, dia voavitrana ny fihavanan’izao tontolo izao amin’Andriamanitra. Ka raha voaray indray ry zareo, inona no hitranga? Ny fiainana ho an’ireo efa maty!

lundi 28 décembre 2020

Alatsinainy 28 Desambra 2020 - Mat 4 : 12 - 17

 12Nony ren’i Jesoa fa naiditra am-ponja i Jôhany, dia lasa nankany Galilea Izy. 13Ary nilaozany i Nazareta ka lasa Izy niorim-ponenana tao Kafarnahòma, tanàna amoron’ny farihin’i Galilea, anatin’ny faritanin’i Zebolòna sy i Naftalỳ. 14Ka tanteraka ilay voalazan’ny Tompo tamin’ny alalan’i Isaià mpaminany hoe:

15«Ry tanin’i Zebolòna sy i Naftalỳ,

ry lalana amoron’ny farihy,

ry faritra ampitan’i Jôrdàna,

ry Galilea onenan’ny hafa firenena,

16ny vahoaka izay mihitsoka amin’ny maizina

dia nahita hazavana lehibe,

ary ny olona izay mihitsoka amin’ny toerana alofan’ny fahafatesana

dia niposahan’ny hazavana.»

17Hatramin’izay i Jesoa dia nanomboka nitoriteny ka nanao hoe:

–Ialao ny toe-dratsy, fa efa akaiky ny Fanjakàn’ny lanitra.

dimanche 27 décembre 2020

Alahady 27 Desambra 2020 - Jer 1 : 4 - 10

 4Nisy tenin’ny TOMPO tamiko nanao hoe:

5–Mbola tsy noforoniko

tao an-kibon-dreninao akory ianao

dia efa fantatro,

ary mbola tsy teraka akory ianao

dia efa natokako hanompo Ahy

sy notendreko ho mpaminany

ho an’ny firenena maro.

6Ary namaly aho hoe:

–Indrisy, ry Tompo ANDRIANANAHARY ô,

mbola tanora loatra aho

ka tsy mahay mandahateny.

7Fa hoy ny TOMPO tamiko hoe:

–Aza manao hoe «mbola tanora loatra aho»

fa tsy maintsy handeha

amin’izay rehetra hanirahako anao ianao

ka hilaza aminy

izay rehetra nandidiako anao.

8Aza matahotra azy

fa miaraka anao Aho mba hanafaka anao.

Izany no teny hentitry ny TOMPO tamiko.

9Avy eo IZY dia nandroso ny tanany

ka nanendry ny vavako

ary nilaza tamiko hoe:

–Ianao no hanambara ny teniko.

10Jereo fa omeko fahefana ianao anio

amin’ireo firenena sy fanjakana

mba hanongotra sy hanjera,

hanapotika sy handrava,

ary hanorina sy hamboly.

samedi 26 décembre 2020

Sabotsy 26 Desambra 2020 - Gal 4 : 1 - 7

 1Izao anefa no teniko: raha mbola zaza ny mpandova, dia tsy hafa noho ny mpanompo izy na dia tompon’ny zavatra rehetra aza; 2fa fehezin’izay mpikarakara azy sy ny mpitandrim-pananany izy mandra-pahatongan’ny fetr’andro voatendrin’ny rainy. 3Dia tahaka izany koa isika; fony mbola zaza, dia nandevozin’ireo herin-javatr’izao tontolo izao isika; 4fa rehefa tonga tokoa ny fotoanandro, dia nirahin’Andriamanitra ny Zanany: natera-behivavy io Zanany io ary niaina teo ambany fahefan’ny lalàna jiosy, 5mba hanavotra izay teo ambany fahefan’ny lalàna ary mba handraisantsika ny anjara maha zanak’Andriamanitra.

6Ary ny maha zanaka anareo, dia ny nanirahan’Andriamanitra ho ao am-pontsika ny Fanahin’ny Zanany miantso hoe: «Raiko ô!» 7Hany ka tsy mpanompo intsony ianao, fa zanaka; ary raha zanaka ianao, dia mpandova koa noho ny ataon’Andriamanitra.

vendredi 25 décembre 2020

Zoma 25 Desambra 2020 - Mat 2 : 6 - 12

 6«Ary ianao, ry Betlehema, tanin’i Joda, tsy ianao tsy akory no kely indrindra amin’ireo tanàna malazan’i Jodea; fa avy aminao no hipoiran’ilay filoha izay ho mpiandry an’i Israely vahoakako.»

7Tamin’izay dia nampiantsoin’i Herôda mangingina ireto olon-kendry ka nofotopotoriny tsara taminy ilay fotoana nisehoan’ny kintana; 8izay vao nalefany ho any Betlehema sady nataony hoe:

–Ndeha àry ka fotopotory tsara ny amin’ilay zaza; rehefa hitanareo dia ilazao aho, fa te hankany koa aho hiankohoka eo anatrehany.

9-10Nony avy nandre ny tenin’ny mpanjaka ireo olon-kendry, dia niainga. Ary indro tazany indray ilay kintana hitany fony niposaka, hany ka faly dia faly aoka izany ry zareo. Nialoha lalana azy ireo hatrany ilay kintana ary tsy nijanona raha tsy efa teo ambonin’ny toerana nisy ny zaza. 11Niditra tao an-trano ireo olon-kendry ka nahita ny zaza teny amin’i Maria reniny ary niankohoka teo anatrehan’ilay zaza ho fanajana azy. Rehefa izany, nanokatra ny vata fasiany rakitra ireto mpamangy ary nanolotra fanatitra ho azy: dia volamena sy ditin-kazo manitra ary miora. 12Ary notoroan’Andriamanitra hevitra tamin’ny nofy izy ireo tsy hiverina any amin’i Herôda, ka dia lalan-kafa no nizorany hody any amin’ny tany fonenany.

jeudi 24 décembre 2020

Alakamisy 24 Desambra 2020 - Sal 2 : 7 - 12

 7–Aoka hambarako, hoy ilay mpanjaka,

ny didy navoakan’ny TOMPO;

fa hoy Izy tamiko: «Ianao no zanako;

Rainao niteraka anao Aho manomboka anio.

8Koa angataho amiko ny firenena rehetra,

dia homeko ho fanananao ireny

hatrany amin’ny faravazan-tany,

9ary hofehezinao amin’ny tehim-by

ka ho azonao potehina toa vilany tany.»

10Koa misehoa ho hendry, ianareo mpanjaka;

ary minoa anatra, ry mpitsara ny tany.

11-12Tompoy amin-tahotra ny TOMPO

ary ekeo amin-kovitra ny fahefàny,

fandrao hirehitra tampoka ny hatezerany

ka ho fatin’ny fikasanareo ianareo.

Sambatra izay rehetra mialoka aminy.

mercredi 23 décembre 2020

Alarobia 23 Desambra 2020 - Efe 1 : 1 - 4

 1Avy amiko Paoly ity taratasy ity, dia izaho apôstôlin’i Kristy Jesoa noho ny sitrapon’Andriamanitra.

Mamangy anareo atỳ Efeso aho, dia ianareo vahoakan’Andriamanitra sady mpino tafaray amin’i Kristy Jesoa. 2Ho aminareo anie ny fahasoavana sy ny fiadanana avy amin’Andriamanitra Raintsika sy i Jesoa Kristy Tompo!

3Hankalazaina anie ilay Andriamanitra sady Rain’i Jesoa Kristy Tompontsika! Fa nitahy antsika Andriamanitra tamin’ny fitahiana rehetra araka ny Fanahy Masina ka nataony miray amin’i Kristy isika sady tonga mponina any an-danitra. 4Tsy mbola nahary ny tontolo Izy, dia efa nifidy antsika hiray amin’i Kristy; ka ho masina sady tsy hisy tsiny eo anatrehan’Andriamanitra isika. Noho ny fitiavany antsika,

mardi 22 décembre 2020

Talata 22 Desambra 2020 - Heb 1 : 8 - 12

 8Fa ny amin’ilay Zanaka kosa dia hoy Izy hoe:

«Ny sezafiandriananao, Andriamanitra ô,

dia maharitra mandrakizay mandrakizay;

araka ny hitsiny no itondranao ny Fanjakànao.

9Tia rariny Ianao fa hàlanao kosa ny ratsy;

noho izany Andriamanitra, ilay Andriamanitrao, dia

nifidy sy nanokana Anao fa tsy ireo namanao,

ka nampidina diloilom-pifaliana teo an-dohanao.»

10Ary hoy koa Andriamanitra hoe:

«Ianao, Tompo ô, no nanorina ny tany tamin’ny voalohany;

ary ny lanitra dia asan’ny tananao.

11Ireo ho levona, fa Ianao kosa maharitra.

Ny tany sy ny lanitra dia ho tonta toy ny fitafiana

12sy havalonao toy ny lamba,

ka hovana toy ny fitafiana.

Ianao kosa dia mbola Ianao ihany,

ary tsy manam-pahataperana ny fiainanao.»

lundi 21 décembre 2020

Alatsinainy 21 Desambra 2020 - Heb 3 : 1 - 6

 1Koa amin’izany, ry havana, efa voatokana ho an’Andriamanitra ianareo sady efa voaantsony hiombon’anjara amin’ny fiainana any an-danitra, ka diniho i Jesoa ilay irak’Andriamanitra sady Mpisorombe antoky ny finoana izay ekentsika. 2Fa i Jesoa dia nahatoky an’Andriamanitra teo amin’ny andraikitra nanendreny Azy, nahatoky tahaka an’i Mosesy izay voalazan’ny Soratra Masina hoe: «Nahatoky tao amin’ny tranon’Andriamanitra manontolo izy.» 3Nefa mendri-boninahitra kokoa noho i Mosesy i Jesoa, satria ny mpanao trano dia mahazo haja bebe kokoa noho ny trano nataony. 4Ny trano rehetra manko dia nisy mpanao azy, fa Andriamanitra kosa no nanao ny zavatra rehetra. 5Ary i Mosesy dia nahatoky tao amin’ny tranon’Andriamanitra manontolo, araka ny maha mpanompo azy, ka natao hanambara ny zavatra izay holazain’Andriamanitra amin’ny ho avy. 6Fa i Kristy kosa dia nahatoky araka ny maha Zanaka Azy, ka mifehy ny tranon’Andriamanitra; ary dia isika izany tranon’Andriamanitra izany, raha mitana ny fahasahiana sy ny fanantenana ireharehantsika.

dimanche 20 décembre 2020

Alahady 20 Desambra 2020 - Mat 1 : 18 - 25

 18Toy izao no nahaterahan’i Jesoa Kristy. Efa fofombadin’i Jôsefa i Maria renin’i Jesoa tamin’izay; raha mbola tsy niray trano anefa izy roa dia hita fa nitoe-jaza i Maria noho ny asan’ny Fanahy Masina. 19Olo-marina i Jôsefa vadiny, ka tsy te hanala baràka azy, fa nikasa hametraka azy mangingina. 20Raha mbola nieritreritra izany izy, dia nisehoan’anjelin’ny Tompo tamin’ny nofy ka nilazany hoe:

–Ry Jôsefa taranak’i Davida ô, aza matahotra ny hampakatra an’i Maria vadinao! Noho ny asan’ny Fanahy Masina tokoa no nampitoe-jaza azy. 21Ary ho tera-dahy izy ka i Jesoa no anarana hiantsoanao ny zaza: fa io zaza io no hamonjy ny vahoakany ho afaka amin’ny fahotany.

22Izany rehetra izany no tonga dia mba ho tanteraka ilay voalazan’ny Tompo tamin’ny alalan’ny mpaminany hoe:

23«Indro hitoe-jaza ny virijiny ka ho tera-dahy;
ary ny anarana hiantsoana ny zaza dia Himanoela,»

(izany hoe «miaraka amintsika Andriamanitra»).

24Vao nifoha maraina i Jôsefa dia nanatontosa izay nandidian’ilay anjelin’ny Tompo azy, ka nampakatra an’i Maria vadiny. 25Tsy niray tamin’i Maria i Jôsefa mandra-pahatera-dahy an’i Maria; ary i Jesoa no anarana niantsoan’i Jôsefa ny zaza.

samedi 19 décembre 2020

Sabotsy 19 Desambra 2020 - I Jao 4 : 1 - 3

 1Ry hava-malala, aza mino izay rehetra milaza hoe manana ny Fanahy Masina, fa zahao toetra ireo hahafantarana raha toa ny Fanahy Masina avy amin’Andriamanitra no manentana azy; satria maro ny mpaminany sandoka eran’izao tontolo izao. 2Izao no ahafantaranareo ny Fanahin’Andriamanitra: ny olona rehetra manaiky fa efa tonga olombelona tokoa i Jesoa Kristy, dia manana ny Fanahy avy amin’Andriamanitra; 3ny olona rehetra tsy manaiky an’i Jesoa araka izany, dia tsy manana ny Fanahy avy amin’Andriamanitra: ny fanahy ananany dia ny fanahin’ilay antikristy, izay renareo fa ho avy ary efa eo amin’izao tontolo izao sahady aza ankehitriny.

vendredi 18 décembre 2020

Zoma 18 Desambra 2020 - II Tim 3 : 14 - 17

 14Ianao kosa, mahareta tsara amin’izay nianaranao sy nekenao tokoa; satria fantatrao ireo olona nampianatra anao izany. 15Hatramin’ny fahazazànao no efa nahalalanao ny Soratra Masina izay manome fahendrena anao hahazoanao famonjena, noho ny finoanao an’i Kristy Jesoa. 16Ny Soratra Masina rehetra dia nomen’ny tsindrimandrin’Andriamanitra sady mahasoa hampianarana ny marina, hendresen-dahatra, hanitsiana ny diso, hanabeazana ho tia rariny, 17mba hahatonga ny olon’Andriamanitra ho tsara ofana sy ary fitaovana hanao asa soa isan-karazany.

jeudi 17 décembre 2020

Alakamisy 17 Desambra 2020 - Jao 12 : 20 - 36

 20Nisy Grika vitsivitsy anisan’izay niakatra tao Jerosalema hivavaka mandritra ny fankalazana. 21Nohatonin’ireo i Filipo, izay avy any Betsaidà tanànan’i Galilea, ka nanaovany fangatahana hoe:

–Mba te hahita an’i Jesoa izahay, tompoko!

22Dia lasa i Filipo nilaza tamin’i Andrea; ary i Andrea sy i Filipo no lasa nilaza tamin’i Jesoa. 23Dia hoy i Jesoa tamin’izy roa lahy:

–Tonga ny fotoanandro hanomezam-boninahitra ny Zanak’olona. 24Lazaiko marina dia marina aminareo fa raha tsy maty ny voam-bary latsaka ao amin’ny tany, dia mitoetra irery; raha maty kosa izy, dia mahavokatra be. 25Izay mandala ny ainy no hahavery azy; fa izay tsy mandala ny ainy eto amin’izao tontolo izao no hitahiry azy ho aina maharitra mandrakizay. 26Raha misy olona manompo Ahy, dia aoka izy hanaraka Ahy; ary izay itoerako, dia ao koa no hitoeran’ny mpanompoko. Raha misy olona manompo Ahy, dia homen’ny Raiko voninahitra izy.

27–Ankehitriny, mangorohoro ny fanahiko, ka inona re no holazaiko? Hoe: Ray ô, vonjeo Aho ho afaka amin’izao ora fijaliana izao? Kanefa ny handalo amin’izao ora fijaliana izao indrindra no nahatongavako. 28Ray ô, omeo voninahitra ny anaranao!

Tamin’izay dia nisy feo avy tany an-danitra nanao hoe:

–Efa nomeko voninahitra ny anarako ary mbola homeko voninahitra indray.

29Ny vahoaka izay teo ka nahare, dia nanao hoe:

–Kotro-baratra izany!

Fa hoy ny sasany:

–Anjely no niteny taminy!

30I Jesoa kosa nilaza hoe:

–Tsy ho Ahy no nahatongavan’izany feo izany fa ho anareo. 31Ankehitriny no hanamelohana an’izao tontolo izao; ankehitriny no handroahana ny filohan’izao tontolo izao. 32Ary Izaho, rehefa voasandratra avy eo amin’ny tany, dia hitaona ny olona rehetra hanatona Ahy.

33Ny nolazain’i Jesoa tamin’izany dia ny karazam-pahafatesana efa hihatra aminy. 34Ka hoy ny vahoaka namaly Azy:

–Efa renay tamin’ny bokin’ny lalàna fa maharitra mandrakizay ny Mesia; ka ahoana no ilazanao hoe: tsy maintsy hasandratra ny Zanak’olona? Iza moa izany Zanak’olona izany?

35Dia hoy i Jesoa taminy:

–Kely foana sisa hitoeran’ny fahazavana eo aminareo. Mandehana dieny mbola anananareo ny fahazavana, mba tsy ho tratry ny haizina ianareo; fa izay mandeha amin’ny haizina dia tsy mahalala izay alehany. 36Minoa ny fahazavana dieny mbola anananareo ny fahazavana, mba ho tonga olona miaina araka ny fahazavana ianareo.

mercredi 16 décembre 2020

Alarobia 16 Desambra 2020 - Mat 11 : 25 - 30

25Tamin’izay fotoana izay dia niteny i Jesoa nanao hoe:

–Ray ô, Tompon’ny tany aman-danitra Ianao, ka misaotra Anao Aho fa ireo zavatra nafeninao tamin’ny hendry sy ny manan-tsaina dia nasehonao tamin’ny madinika. 26Eny, Ray ô, izany tokoa no sitrakao!

27Efa natolotry ny Raiko ho Ahy ny zavatra rehetra; ary tsy misy olona mahalala tsara ny Zanaka afa-tsy ny Ray, na mahalala tsara ny Ray afa-tsy ny Zanaka mbamin’izay tian’ny Zanaka hanehoana azy!

28Mankanesa atỳ amiko ianareo rehetra torovana sy vesaran’ny lalàna, fa Izaho no hanome fialan-tsasatra anareo. 29Raiso ny fampianarako ary mianara amiko fa malemy fanahy sady tsy miavona am-po Aho; ary dia hahita fialan-tsasatra ao anatinareo ianareo. 30Eny, mora raisina ny fampianarako ary mora arahina ny lalànako.

mardi 15 décembre 2020

Talata 15 Desambra 2020 - Mar 9 : 14 - 29

 14Nony tafaverina teo amin’ny mpianatra hafa ry i Jesoa efa-mianaka, dia nahita vahoaka maro nanodidina ireto mpianatra ary koa mpahay lalàna niady hevitra taminy teo. 15Raha vao nahita an’i Jesoa ny vahoaka rehetra, dia talanjona sady faly ka nirohotra niarahaba Azy. 16Dia nanontany ireto mpianatra i Jesoa nanao hoe:

–Inona izato iadianareo hevitra amin’ny mpahay lalàna?

17Fa nisy olona iray tamin’ny vahoaka namaly Azy hoe:

–Mpampianatra ô, nentiko eto aminao ny zanako lahy fa azon’ny fanahy mampahamoana. 18Ary na aiza na aiza ahazoany azy, dia alavony amin’ny tany ilay zaza ary ataony mandoa vory sy mikitro-nify dia mihinjitra eo. Niangaviako ny mpianatrao handroaka ilay fanahy, kanefa tsy vitany.

19Dia hoy i Jesoa tamin’ny vahoaka:

–Karazan’olona tsy mino ianareo! Mandra-pahoviana no hitoerako eto aminareo? Mandra-pahoviana no handeferako aminareo? Ento atỳ amiko ny zaza!

20Dia nentiny teo aminy izy. Raha vao nahita an’i Jesoa ilay fanahy, dia nataony mifanintontsintona ilay zaza ka nianjera tamin’ny tany ary niolanolana sy nandoa vory. 21Ary nanontany ny rain-drazazalahy i Jesoa hoe:

–Hatramin’ny oviana izao?

Dia hoy ny rainy:

–Hatramin’ny fahakeliny. 22Ary matetika izy no nazeran’io fanahy io tany anaty afo sy tany anaty rano hamonoana azy; koa raha misy efanao re, dia mamindrà fo aminay ka vonjeo izahay!

23Fa hoy ny navalin’i Jesoa azy:

–Raha misy efako hoe? Tsy misy tsy efan’izay mino!

24Avy hatrany ilay rain’ilay zaza dia niantsoantso mafy nanao hoe:

–Mino aho, nefa vonjeo fa tsy ampy finoana.

25Nahita ny vahoaka nitangorona teo i Jesoa, dia niteny mafy ilay fanahy maloto nanao hoe:

–Mandidy anao Aho, ry fanahy mampahamoana sady mamparenina, mialà amin’io zaza io ary aza miverina ao aminy intsony!

26Dia ninananana ilay fanahy sady nampifanintontsintona mafy ny zaza no niala taminy. Nitsitra toy ny maty ilay zaza ka nataon’ny maro hoe maty. 27Fa noraisin’i Jesoa ny tanan’ilay zaza hanarenany azy; dia tafatsangana tokoa izy.

28Rehefa tonga tao an-trano i Jesoa, dia nanontany Azy manokana ny mpianany nanao hoe:

–Nahoana izahay no tsy naharoaka azy iny?

29Dia hoy i Jesoa taminy:

–Iny karazana iny dia tsy misy fomba azo amoahana azy afa-tsy ny fivavahana ihany.

lundi 14 décembre 2020

Alatsinainy 14 Desambra 2020 - Rom 3 : 21 - 36

 21Ankehitriny kosa dia efa nahariharin’Andriamanitra ny fomba anekeny antsika ho marina; ary tsy avy amin’ny lalàna velively izany. Ny lalànan’i Mosesy mbamin’ireo bokin’ny mpaminany rahateo dia efa mijoro ho vavolombelona manambara 22fa ny finoana niainan’i Jesoa Kristy no haneken’Andriamanitra ny olombelona ho marina; ary mankamin’ny mpino rehetra izany, satria tsy misy fanavakavahana intsony. 23Eny, nanota ny olon-drehetra ka tsy eo afovoan’izy ireo intsony ilay Andriamanitra be voninahitra. 24Kanefa, noho ny fahasoavan’Andriamanitra, dia nekeny maimaimpoana ho marina izy ireo tamin’ny alalan’ny fanavotana izay ao amin’i Kristy Jesoa. 25Fa notendren’Andriamanitra ho sorom-panonerana ho an’ireo manam-pinoana i Kristy Jesoa Izay nahafoy ny rany: izany no maneho ny fomba aneken’Andriamanitra ny olombelona ho marina! Ireo heloka vitan’ny olombelona fahiny dia noleferin’Andriamanitra 26ary tsy nosazîny, satria tiana haseho ankehitriny ny fomba aneken’Andriamanitra ny olombelona ho marina. Hita amin’izany fa marina tokoa Andriamanitra sady mahatonga ho marina izay entanin’ny finoana niainan’i Jesoa!

dimanche 13 décembre 2020

Alahady 13 Desambra 2020 - Eze 3 : 1 - 3

 1Dia hoy Ilay niteny tamiko hoe: «Ry ilay taranak’olombelona, hano io horonan-taratasy izay naseho anao io, dia mandehana miteny amin’ny Israelita.» 2Dia nosokafako ny vavako ary nafahany ahy ilay horonan-taratasy. 3Ary hoy Izy tamiko: «Ry ilay taranak’olombelona, fenoy ny kibonao ary vokiso amin’io horonan-taratasy omena anao io ny tenanao.» Dia nohaniko izany, ka tao am-bavako dia mamy toy ny tantely.

samedi 12 décembre 2020

Sabotsy 12 desambra 2020 - Jao 11 : 21 - 27

 21Ary hoy i Marta tamin’i Jesoa:

–Raha teto Ianao, ry Tompo, dia tsy maty ny anadahiko. 22Ary na dia izao ankehitriny izao aza, dia fantatro fa na inona na inona hangatahinao amin’Andriamanitra, dia homen’Andriamanitra Anao.

23I Jesoa kosa niteny taminy hoe:

–Hitsangana velona ny anadahinao!

24Fa hoy i Marta taminy:

–Fantatro fa hitsangana velona izy amin’ilay fitsanganan’ny maty amin’ny andro farany!

25Dia hoy i Jesoa taminy:

–Izaho no manangana ho velona sy manome aina. Izay mino Ahy, na dia maty aza, dia ho velona; 26ary izay rehetra mivelona amiko ka mino Ahy, dia tsy ho faty na oviana na oviana. Mino izany ve ianao?

27Ka novalian’i Marta hoe:

–Eny, ry Tompo, mino aho fa Ianao no ilay Mesia, ilay Zanak’Andriamanitra, Ilay tonga eo amin’izao tontolo izao!

vendredi 11 décembre 2020

Zoma 11 Desambra 2020 - Efe 1 : 15 - 23

 15Noho izany, rehefa nandre ny finoanareo an’i Jesoa Tompo sy ny fitiavanareo ny vahoakan’Andriamanitra rehetra aho, 16dia tsy mitsahatra misaotra an’Andriamanitra noho ny aminareo. Mahatsiaro anareo aho amin’ny fivavahako 17ka mangataka amin’ilay Andriamanitr’i Jesoa Kristy Tompontsika, dia amin’ilay Ray be voninahitra, mba hanomezany anareo ny Fanahy Masina Izay mampahendry anareo sy manambara an’Andriamanitra aminareo ka hahalalanareo Azy tokoa. 18Mangataka aho ny hanokafan’Andriamanitra ny sainareo handray ny fahazavàny: mba hahafantaranareo ny fanantenana niantsoan’Andriamanitra anareo; sy hahafantaranareo ny haren’ny voninahiny ary ny lova izay natokany ho an’ny vahoakany; 19ary hahafantaranareo ny hery lehibe sy mihoa-pampana tokoa izay anasoavany antsika mpino, araka ny fiàsany tsy hay tohaina sy mahery vaika. 20Izany hery izany dia nampiasain’Andriamanitra tamin’ny nananganany an’i Kristy ho velona avy tany amin’ny maty ary tamin’ny nampipetrahany Azy eo ankavanany any an-danitra. 21Any i Kristy dia ambony lavitra noho ny fanapahana sy fahefana ary hery sy fanjakana rehetra eny ana habakabaka; any Izy ambony lavitra noho ny anaram-boninahitra rehetra azo tononina tsy amin’izao fiainana izao ihany fa amin’ny ho avy koa. 22Fa napetrak’Andriamanitra eo ambany tongotr’i Kristy ny zavatra rehetra; ary i Kristy dia nomen’Andriamanitra ny Fiangonana ho Filoha faratampony. 23Ny Fiangonana no tenan’i Kristy sady heniky ny hafenoana omen’i Kristy Izay manerana ny zavatra rehetra hatraiza hatraiza.

jeudi 10 décembre 2020

Alakamisy 10 Desambra 2020 - Gen 49 : 8 - 10

8Ry Joda, hidera anao ireo rahalahinao;

Hofolahinao kosa ny hatok’ireo fahavalonao,

ka hiankohoka eo anatrehanao ireo ralahahinao.

9Ry Joda zanako, toy ny liona tanora ianao,

dia liona avy niremby ka mamonjy fierena;

mitorevaka toy ny lion-dahy i Joda ka matory,

ary mamitsaka toy ny liom-bavy,

ka iza no hampitsangana azy?

10Tsy hiala amin’i Joda ny tehim-panjakana,

ary tsy hiala amin’ny taranany ny tehim-pibaikoana

mandra-pahatongan’ilay tena tompony

izay hankatoavin’ny firenena rehetra.

mercredi 9 décembre 2020

Alarobia 09 Desambra 2020 - Jao 10 : 31- 42

 31Dia naka vato indray ny Jiosy hitorahana Azy, 32fa hoy i Jesoa taminy:

–Maro ny asa tsara nasehoko teo aminareo noho ny fahefana azoko tamin’ny Ray; ka inona amin’ireny asa ireny no itorahanareo vato Ahy?

33Ka novalian’ny Jiosy hoe:

–Tsy ny asa tsara no itorahanay vato Anao, fa ny fanevatevànao an’Andriamanitra; olombelona ihany manko Ianao, nefa manao ny tenanao ho Andriamanitra.

34I Jesoa kosa niteny taminy hoe:

–Tsy voalaza ao amin’ny Soratra Masina ve izao: «Hoy Aho: Andriamanitra ianareo»? 35Ary tsy azo foanana ny Soratra Masina; fa ireo olona nanambarana ny tenin’Andriamanitra dia natao hoe «Andriamanitra». 36Izaho kosa natokan’ny Ray sy nirahiny ho eo amin’izao tontolo izao; kanefa dia ataonareo hoe manevateva an’Andriamanitra Aho satria nilaza hoe: Zanak’Andriamanitra Aho! 37Raha tsy manao ny asan’ny Raiko Aho, dia aza mino ahy; 38fa raha manao ihany kosa Aho, na dia tsy mino ahy aza ianareo, dia minoa ny asako mba hahafantaranareo sy hanekenareo fa ny Ray ato anatiko, ary Izaho ao anatin’ny Ray!

39Tamin’izay dia nitady hisambotra an’i Jesoa indray ry zareo fa niala teo Izy ka tsy voatanany.

40Dia lasa i Jesoa nankany andafin’ny ony Jôrdàna, any amin’ilay toerana nanombohan’i Jôhany nanao batisa, ka nijanona tany. 41Maro no nankeo aminy ka nanao hoe:

–I Jôhany tsy nanao famantarana na dia iray aza; nefa izay rehetra voalazan’i Jôhany ny amin’ity Lehilahy ity, dia marina avokoa.

42Ary maro no nino an’i Jesoa teo.

mardi 8 décembre 2020

Talata 08 Desambra 2020 - Mat 1 : 1 - 17

 1Fitanisana ny razan’i Jesoa Kristy, taranak’i Davida, dia i Davida taranak’i Abrahama.

2I Abrahama no ray niteraka an’i Itsehàka, i Itsehàka, ray niteraka an’i Jakôba; i Jakôba, ray niteraka an’i Joda mirahalahy avy. 3I Joda, ray niteraka an’i Farèsa sy i Zara (ary dia i Tamara no renin’izy roa lahy); i Farèsa, ray niteraka an’i Hesrôna; i Hesrôna, ray niteraka an’i Arama. 4I Arama, ray niteraka an’i Haminadàba; i Haminadàba, ray niteraka an’i Nahasôna; i Nahasôna, ray niteraka an’i Salmôna. 5I Salmôna, ray niteraka an’i Bôhaza (ary dia i Rahaba no reniny); i Bôhaza, ray niteraka an’i Ôbeda (ary i Rota no reniny); i Ôbeda, ray niteraka an’i Jisay; 6i Jisay, ray niteraka an’i Davida mpanjaka.

I Davida kosa no ray niteraka an’i Salômôna (ary dia ny vadin’i Orià no reniny); 7i Salômôna, ray niteraka an’i Rehabohàma; i Rehabohàma, ray niteraka an’i Abià; i Abià, ray niteraka an’i Asà. 8I Asà, ray niteraka an’i Jôsafata; i Jôsafata, ray niteraka an’i Jôrama; i Jôrama, ray niteraka an’i Ozià. 9I Ozià, ray niteraka an’i Jôtama; i Jôtama, ray niteraka an’i Ahaza; i Ahaza, ray niteraka an’i Hezekià. 10I Hezekià, ray niteraka an’i Manase; i Manase, ray niteraka an’i Amôna; i Amôna, ray niteraka an’i Jôsià. 11I Jôsià, ray niteraka an’i Jekônià mirahalahy avy. Tamin’izany no nahababo ny vahoaka israelita tany Babilôna.

12Taorian’ny nahababo ny vahoaka israelita tany Babilôna kosa dia izao: i Jekônià no ray niteraka an’i Sealtièla; i Sealtièla, ray niteraka an’i Zerobabèla. 13I Zerobabèla, ray niteraka an’i Abihoda; i Abihoda, ray niteraka an’i Eliakîma; i Eliakîma, ray niteraka an’i Azôra. 14I Azôra, ray niteraka an’i Sadôka; i Sadôka, ray niteraka an’i Akima; i Akima, ray niteraka an’i Elihoda. 15I Elihoda, ray niteraka an’i Eleazara; i Eleazara, ray niteraka an’i Matàna; i Matàna, ray niteraka an’i Jakôba. 16I Jakôba, ray niteraka an’i Jôsefa vadin’i Maria; ary dia i Maria no reny niteraka an’i Jesoa, ilay atao hoe Mesia.

17Koa 14 izany no isan’ny taranaka rehetra hatramin’i Abrahama ka hatramin’i Davida; 14 koa hatramin’i Davida ka hatramin’ny nahababo ny vahoaka israelita tany Babilôna ka hatramin’ny Mesia.

lundi 7 décembre 2020

Alatsinainy 07 Desambra 2020 - I Jao 2 : 20 - 25

 20Ianareo kosa dia manana ny Fanahy Masina avy amin’i Kristy ary mahafantatra izany avokoa ianareo. 21Tsy noho ianareo tsy mahafantatra ny hafatra marim-pototra no nanoratako taminareo, fa noho ianareo mahafantatra izany; ary fantatrareo koa fa tsy misy lainga avy amin’ilay hafatra marim-pototra.

22Iza no mpandainga, raha tsy izay mandà an’i Jesoa tsy ho Kristy? Izy no ilay antikristy, mandà ny Ray sy ny Zanaka. 23Izay rehetra mandà ny Zanaka no tsy manana ny Ray koa; izay manaiky ny Zanaka no manana ny Ray koa.

24Ianareo kosa, dia ny hafatra izay efa renareo hatramin’ny voalohany no aoka hitoetra ao anatinareo. Raha mitoetra ao anatinareo ny hafatra izay efa renareo hatramin’ny voalohany, dia hitoetra ao anatin’ny Zanaka sy ny Ray koa ianareo. 25Ary ny zavatra nampanantenain’i Kristy antsika dia ny fiaina-maharitra mandrakizay.

dimanche 6 décembre 2020

Alahady 06 Desambra 2020 - I Kor 12 : 1 - 3

 1Izaho kosa, ry havako, ny amin’ireo fanomezan’ny Fanahy Masina: Irîko ny hahalalanareo ireo fanomezana ireo. 2Fantatrareo fa fony mbola tsy kristianina ianareo, dia voasintona tany amin’ny sampy moa araka izay nitaomana anareo. 3Koa ampahafantariko anareo fa tsy misy olona tarihin’ny Fanahin’Andriamanitra ka hiteny hanao hoe: «Voaozona i Jesoa!» Ary tsy misy koa afaka hilaza hoe: «I Jesoa no Tompo», raha tsy tarihin’ny Fanahy Masina.

samedi 5 décembre 2020

Sabotsy 05 Desambra 2020 - Asa 16 : 25 - 34

 25Tamin’ny mamatonalina, dia nivavaka sy nihira fiderana an’Andriamanitra i Paoly sy i Silasy; ary nihaino azy roa lahy ny gadra hafa. 26Dia injay nisy horohorontany mafy tonga tampoka nanozongozona ny fonja hatrany amin’ny fanorenany. Nivoha nidanadana ho azy ny varavarana rehetra, ary samy nivaha ho azy ny fatoran’ireo gadra rehetra. 27Tamin’izay dia taitra ilay mpiambina; ary nony hitany fa nivoha avokoa ny varavaran’ny fonja, dia nanatsoaka ny sabany saika hamono tena izy satria nampoiziny ho efa nitsoaka nandositra avokoa ny gadra. 28Fa niantso mafy i Paoly nanao hoe:

–Aza mamono tena, fa indreto avokoa izahay!

29Dia nangataka jiro ilay mpiambina ka niditra faingana nankao amin’ny fonja anatiny indrindra; ary tora-kovitra izy no niantoraka teo anoloan’i Paoly sy i Silasy. 30Dia navoakan’ilay mpiambina izy roa lahy sady nanontaniany hoe:

–Inona, tompoko, no tokony hataoko mba hovonjena aho?

31Dia novaliany hoe:

–Minoa an’i Jesoa Tompo, dia hovonjena ianao mbamin’ny ankohonanao!

32Dia nitorian’i Paoly sy i Silasy ny tenin’ny Tompo ilay mpiambina mbamin’izay rehetra tao an-tranony. 33Tamin’izany ora izany, iny alina iny ihany, dia nandray azy roa lahy ilay mpiambina ka nanasa ny feriny; ary natao batisa niaraka tamin’izay izy sy ny ankohonany rehetra. 34Nentin’ilay mpiambina niakatra tao an-tranony i Paoly sy i Silasy ka norosoany sakafo. Ary niravoravo niaraka tamin’ny olona rehetra tao an-tranony ralehilahy, noho izy efa tonga mpino an’Andriamanitra.

vendredi 4 décembre 2020

Zoma 04 Desmabra 2020 - Jao 6 : 59 - 71

 59Izany teny izany no nataon’i Jesoa, fony Izy nampianatra tao amin’ny sinagôga tany Kafarnahòma.

60Koa maro tamin’ny mpianatr’i Jesoa, rehefa avy nandre Azy no nilaza hoe:

–Sarotra izany teny izany, ka iza no mahahaino izany?

61Fantatr’i Jesoa tao am-pony fa nimonomonona ny mpianany noho izany teny izany, ka hoy Izy taminy:

–Misakana anareo tsy hino Ahy ve izany? 62Ahoana ianareo raha mahita ny Zanak’olona miakatra any amin’izay nitoerany taloha? 63Ny Fanahy Masina no mamelona aina; raha ny maha olombelona fotsiny dia tsy mahasoa akory. Ireo teny izay nolazaiko taminareo no mahatonga anareo handray ny Fanahy Masina mamelona aina, 64kanefa misy tsy mino aminareo. (Fantatr’i Jesoa hatramin’ny voalohany manko ireo tsy mino sy ilay hanolotra Azy.)

65Ary hoy i Jesoa:

–Izany no nilazako taminareo fa tsy misy olona mahay manatona Ahy, raha tsy nomen’ny Ray azy izany!

66Nanomboka tamin’io fotoana io dia maro tamin’ny mpianatr’i Jesoa no nihemotra, ka tsy niara-dia taminy intsony. 67Ka hoy i Jesoa tamin’ny 12 lahy:

–Ianareo koa ve mba te hiala?

68Dia novalian’i Simôna Petera hoe:

–Tompo ô, hankany amin’iza àry izahay? Ianao no manana ny teny manome ny aina maharitra mandrakizay; 69sady izahay efa mino sy mahalala fa Ianao no ilay Masina avy amin’Andriamanitra!

70Fa hoy i Jesoa tamin’ny 12 lahy:

–Tsy Izaho ve no nifidy anareo 12 lahy? Kanefa devoly ny anankiray aminareo!

71Ny nolazainy dia i Jodasy, zanakalahin’i Simôna Iskariôta; izy io manko, na dia anisan’ny 12 lahy aza, no ilay efa hanolotra an’i Jesoa.

jeudi 3 décembre 2020

Alakamisy 03 Desambra 2020 - Asa 10 : 34 - 39

 34Dia niteny i Petera ka nanao hoe:

–Azoko tsara ankehitriny, fa tsy mba mijery tavan’olona Andriamanitra. 35Eny, ankasitrahin’Andriamanitra avokoa izay olona manaja Azy sy manao ny rariny na aiza na aiza firenena misy azy. 36Fantatrareo ny teny nampitondrain’Andriamanitra ho an’ny vahoaka Israely, anambaràny ny Vaovao Mahafaly: dia ny fampihavanana amin’ny alalan’i Jesoa Kristy, ilay Tompon’ny olona rehetra. 37Fantatrareo ny zava-nitranga tany Galilea aloha ary dia nanerana an’i Jodea, taorian’ny toriteny sy ny batisa nataon’i Jôhany: 38nandrotsahan’Andriamanitra ny herin’ny Fanahy Masina i Jesoa avy any Nazareta, ka nitety tany nanao soa sy nanasitrana izay rehetra teo ambany fahefàn’ny devoly, satria nombàn’Andriamanitra Izy. 39Izahay dia vavolombelona nahita ny zavatra rehetra nataony manerana ny tanin’ny Jiosy sy tao Jerosalema. Io Jesoa io dia nahanton’ny olona tamin’ny hazofijaliana no namonoany Azy, 40nefa natsangan’Andriamanitra ho velona tamin’ny andro fahatelo. Nasehon’Andriamanitra miharihary Izy, 41tsy tamin’ny vahoaka ankapobeny fa taminay vavolombelona efa notendren’Andriamanitra mialoha hanambara an’i Jesoa. Niara-nihinana sy nisotro taminy izahay taorian’ny nananganan’Andriamanitra Azy ho velona avy any amin’ny maty; 42ary nomeny baiko mba hitory amin’ny vahoaka sy ho vavolombelona manambara fa Izy no voatendrin’Andriamanitra ho Mpitsara ny velona sy ny maty. 43Samy mijoro ho vavolombelona momba azy ny mpaminany rehetra ka manambara fa izay rehetra mino Azy dia hahazo famelan-keloka amin’ny anarany.

mercredi 2 décembre 2020

Alarobia 02 Desambra 2020 - Jao 4 : 16 - 24

 16I Jesoa kosa niteny taminy hoe:

–Ndeha antsoy ny vadinao, ka miverena atỳ?

17Fa novalian-dravehivavy hoe:

–Tsy manam-bady aho!

Ary hoy i Jesoa taminy:

–Marina ny filàzanao hoe tsy manam-bady ianao; 18efa nanam-bady indimy ianao, ary tsy vadinao ilay itoeranao ankehitriny. Koa marina izany voalazanao izany.

19Dia hoy ravehivavy taminy:

–Hitako, Tompoko, fa mpaminany Ianao! 20Ireo razanay Samaritanina dia nivavaka teto amin’ity tendrombohitra ity; fa ianareo Jiosy kosa milaza fa any Jerosalema no tsy maintsy ivavahana.

21Fa izao no tenin’i Jesoa taminy:

–Minoa Ahy ianao, ramatoa! Avy ny andro izay tsy hivavahana amin’ny Ray eto amin’ity tendrombohitra ity na any Jerosalema intsony. 22Ianareo Samaritanina dia mivavaka amin’izay tsy fantatrareo; fa izahay Jiosy kosa mivavaka amin’izay fantatray, satria mipoitra avy amin’ny Jiosy ny famonjena. 23Kanefa, ho an’ireo tena mpivavaka, dia avy ary efa tonga sahady aza ny andro izay hivavahany amin’ny Ray araka ny fanentanan’ny Fanahy Masina sy araka ny tena fivavahana marina; satria ny mpivavaka aminy araka izany no tadiavin’ny Ray. 24Andriamanitra dia Fanahy, ary ny mpivavaka aminy dia tsy maintsy mivavaka araka ny fanentanan’ny Fanahy Masina sy araka ny tena fivavahana marina.

lundi 30 novembre 2020

Alatsinainy 30 Oktobra 2020 - Rom 8 : 18 - 25

 18Heveriko fa tsy mendrika hohàrina amin’ny voninahitra izay haseho ao amintsika ny fijaliana amin’izao andro izao. 19Fa tsindrian-daona erỳ ny zavaboaary miandry ny hanehoan’Andriamanitra an’ireo zanany. 20Fa tonga nanaiky ho zavatra tsinontsinona ny zavaboaary, tsy araka ny nahiny anefa, fa noho ilay nampanaiky azy toy izany. Saingy eo ny fanantenana: 21Fa ny zavaboaary koa aza dia hoafahana tsy ho andevon’ny fahasimbana indray andro any ka handray anjara amin’ny fahafahana be voninahitra hananan’ireo zanak’Andriamanitra. 22Saingy fantatsika fa mandraka ankehitriny, ny zavaboaary manontolo dia miara-misento sy mijaly toy ny vehivavy mihetsi-jaza. 23Ary tsy ny zavaboaary ihany; fa isika koa, izay manana ny Fanahy Masina ho santatry ny fanomezan’Andriamanitra, dia misento ao anatintsika ao, miandry ny hanaovan’Andriamanitra antsika ho zanany ka hanavotany tanteraka ny tenantsika. 24Eny, efa voavonjy isika saingy mbola amin’ny fanantenana; ny mahita izay nantenaina dia tsy manantena intsony; satria iza no mbola hanantena izay zavatra efa hitany? 25Fa raha manantena ny tsy hitantsika isika, dia miandry amim-paharetana.

samedi 28 novembre 2020

Sabotsy 28 Novambra 2020 - Mat 5 : 1 - 12

 1Nony nahita ny vahoaka i Jesoa, dia niakatra teo an-tendrombohitra; ary rehefa tafapetraka Izy, dia nohatonin’ny mpianany. 2Dia niteny i Jesoa ka nampianatra azy rehetra hoe:

Ny hasambarana azo antoka

(Jereo Lk 6.20-23)

3–Sambatra izay miaiky ao am-po ho mahantra,

fa azy ny Fanjakàn’ny lanitra!

4Sambatra izay mitomany,

fa izy no hampiononin’Andriamanitra!

5Sambatra izay malemy fanahy,

fa izy no handova ny tany

nampanantenain’Andriamanitra!

6Sambatra izay maniry mafy hanao ny marina

nosoritan’Andriamanitra,

fa izy no homen’Andriamanitra fahafaham-po!

7Sambatra izay mamindra fo,

fa izy no hamindran’Andriamanitra fo!

8Sambatra izay mahitsy fo,

fa izy no hahita an’Andriamanitra!

9Sambatra izay mpampihavana,

fa izy no hantsoin’Andriamanitra hoe zanany!

10Sambatra izay enjehina noho izy manao ny marina

nosoritan’Andriamanitra,

fa azy ny Fanjakàn’ny lanitra!

11Sambatra ianareo raha tevatevain’ny olona sy enjehiny ary ampangaina lainga amin’ny ratsy isan-karazany noho ny maha mpianatro anareo. 12Mifalia sy miravoravoa ianareo fa lehibe ny valisoa miandry anareo any an-danitra, satria toy izany no nanenjehany ireo mpaminanin’Andriamanitra talohanareo!

vendredi 27 novembre 2020

Zoma 27 Novambra 2020 - Sal 121 : 1 - 8

 1 Hira fiakarana.

Manopy maso any amin’ireo tendrombohitra aho. Avy aiza moa ny famonjena ahy?

2–Ny famonjena ahy dia avy amin’ny TOMPO, Mpanao ny lanitra sy ny tany! 3–Tsy havelany ho solafaka anie ny tongotrao; tsy ho rendremana anie ny mpiambina anao!

4–Tsia, tsy rendremana na matory ny mpiambina an’i Israely. 5Ny TOMPO no mpiambina anao amin’ny alina;ny TOMPO eo anilanao no fialofanao; 6ka tsy hamely anao ny masoandro, raha antoandro; tsy hamely anao ny volana, raha alina. 7Ny TOMPO hiambina anao amin’ny ratsy rehetra; eny, hiambina ny ainao Izy, 8hiambina anao mandroso sy miverina manomboka izao ka ho mandrakizay!

jeudi 26 novembre 2020

Alakamisy 26 Novambra 2020 - Fit 3 : 25 - 27

 TETA

25Tsara ny TOMPO amin’izay miandry Azy,

dia amin’ny olona mitady Azy.

26Tsara ny manantena mangina

ny famonjen’ny TOMPO.

27Tsara ho an’ny lehilahy

ny mitondra zioga amin’ny fahatanorany.

mercredi 25 novembre 2020

Alarobia 25 Novambra 2020 - II Tan 14 : 10 - 14

 10Dia niantso vonjy tamin’ny TOMPO Andriamaniny i Asà ka nanao hoe:

–TOMPO ô, tsy misy afa-tsy Ianao no mahavonjy ny tsy manan-kery, raha iadian’ny matanjaka izy; ka vonjeo izahay, ry TOMPO Andriamanitray ô, fa Ianao no iankinanay ary ny anaranao no irosoanay hiady amin’ity tafika goavana ity. TOMPO ô, Ianao no Andriamanitray, ka aza avela hisy olombelona haharesy Anao.

11Dia noresen’ny TOMPO teo anoloan’i Asà sy ny miaramila jodeanina ireo Etiôpianina ka nandositra 12ary nenjehin’i Asà sy ny tafiny hatrany Gerara. Ary nahafatesana be tokoa ny Etiôpianina sady tsy nisy afa-nitsoaka akory aza, satria montsana teo anoloan’ny TOMPO sy ny tafika nombany. Babo betsaka no azon’ny Jodeanina tamin’izay. 13Nasian’ny tafik’i Asà koa ny tanàna rehetra manodidina an’i Gerara, satria nataon’ny TOMPO voagejan’ny horohoro ireo; dia norobain’ny tafik’i Asà avokoa ny tanàna, ka nahazoany babo betsaka. 14Nasiany koa ny vala fitobian’ny biby fiompy, ka namaboany ondry aman’osy marobe sy rameva. Avy eo dia niverina ho any Jerosalema i Asà sy ny tafiny.

mardi 24 novembre 2020

Talata 24 Novambra 2020 - Mar 7 : 24 - 30

 24Dia niala teo i Jesoa ary lasa nankany amin’ny faritany akaikin’ny tanàna atao hoe Tiro; ary niditra tao an-trano anankiray Izy fa tsy te ho fantatry ny olona, kanefa tsy afa-niafina. 25Dia nisy vehivavy anankiray izay, nanan-janaka vavy azon’ny fanahy maloto; vao nandre momba an’i Jesoa ravehivavy, dia lasa nankao aminy ka niankohoka teo an-tongony. 26Miteny grika ravehivavy sady Sirôfenisianina firazanana; ary niangavy an’i Jesoa izy handroaka ny demony hiala tao amin-janany. 27Fa hoy i Jesoa taminy:

–Avelao aloha ho voky ny zanaka nateraka, fa tsy tsara raha ny mofon-janaka no alaina ka atsipy ho an’ny amboa kely.

28Dia namaly ravehivavy ka nanao hoe:

–Nefa, Tompoko, na ny amboakely ao ambany latabatra aza, dia mba mihinana ny sombintsombiny avy amin’ny mofon’ny ankizy ihany.

29Dia hoy i Jesoa taminy:

–Izany no teninao, ka dia modia fa efa niala tamin’ny zanakao ny demony.

30Ary rehefa niala teo ravehivavy ka tonga tany an-tranony, dia nahita ny zanany matory tsara eo am-pandriana, efa nialan’ny demony.

lundi 23 novembre 2020

Alatsinainy 23 Novambra 2020 - II Kor 4 : 7 - 11

 7Izahay mitondra izany raki-tsoa izany kosa dia toy ny vilany tany ihany, mba hahitana tsara fa izao hery tsy manan-tsahala izao dia an’Andriamanitra fa tsy anay. 8Ifandaharam-pahoriana izahay, nefa tsy voapotsitra; very hevitra, nefa tsy mamoy fo; 9enjehin’olona, nefa tsy ilaozan’Andriamanitra; azera, nefa tsy maty. 10Entinay mandrakariva ao amin’ny tenanay koa fa velona i Jesoa; 11satria, eo amin’ny fiainanay, dia ny fahafatesana no mananontanona anay lalandava noho ny amin’i Jesoa mba haseho ao amin’ny tenanay mety maty koa fa velona i Jesoa, 12hany ka ny fahafatesana no miasa ao aminay, fa ny fiainana no miasa ao aminareo.

dimanche 22 novembre 2020

Alahady 22 Novambra 2020 - Fil 3 : 17 - 21

 17Ry havana, aoka hanahaka ahy ianareo ary diniho hatrany ireo manao fitondrantena araka izay ohatra nomenay anareo. 18Efa voalazako imbetsaka taminareo, ary dia mbola lazaiko amin-dranomaso ankehitriny, fa maro no manao fitondrantena manohitra an’i Kristy maty teo amin’ny hazofijaliana. 19Fahaverezana no hiafaran’ireo, satria ny zavatry ny tany no hany ankamamîny ka ny kibony no ataony andriamaniny, ny zavatra ahazoany henatra no ataony rehareha. 20Fa isika kosa dia mizaka ny zo maha mponin’ny lanitra; ka Mpamonjy avy any an-danitra no andrasantsika, dia i Jesoa Kristy Tompo. 21Izy no hanova izao tenantsika tsinontsinona izao, ka hampitovîny amin’ny tenany be voninahitra, araka ny heriny miasa hahatonga ny zavatra rehetra hanaiky Azy.

samedi 21 novembre 2020

Sabotsy 21 Novambra 2020 - Asa 3 : 1 - 8

 1Tamin’ny telo tolakandro, fotoana fivavahana, dia niakatra ho any an-kianjan’ny tempoly i Petera sy i Jôhany. 2Teo anoloan’ny vavahadin’ny tempoly, ilay antsoina hoe Itsaraendrika, dia nisy lehilahy malemy tongotra hatrany an-kibon-dreniny. Nentin’ny olona isan’andro ka napetrany teo izy mba hangataka fiantrana amin’izay olona miditra ao an-kianjan’ny tempoly. 3Hitan-dralehilahy i Petera sy i Jôhany efa ndeha hiditra ka nangatahany fiantrana. 4Izy roa lahy kosa nibanjina ilay kilemaina ary hoy i Petera taminy:

–Jereo izahay.

5Dia nanao tsara jery azy roa lahy ity mpangataka satria nanantena handray zavatra avy aminy. 6Fa hoy i Petera taminy:

–Tsy ananako na ny volafotsy na ny volamena, fa izay ananako no omeko anao: amin’ny anaran’i Jesoa Kristy avy any Nazareta, mitsangàna ka mandehana!

7Dia noraisin’i Petera ny tanan-kavanan’ilay kilemaina ary nasainy nitsangana izy. Natanjaka niaraka tamin’izay ny tongony sy ny kitrokeliny; 8niantsambotra izy dia nijoro ary nandeha. Niara-niditra tamin’i Petera sy i Jôhany tao an-kianjan’ny tempoly ralehilahy, sady nandeha no niantsambotsambotra ary nidera an’Andriamanitra.

vendredi 20 novembre 2020

Zoma 20 Novambra 2020 - Jod 24 - 25

 24Ho an’Andriamanitra tokana anie ny voninahitra! Fa Izy no mahay miaro anareo tsy ho solafaka amin’ny fahotana, Izy no mahay mampijoro anareo tsy hanan-tsiny ka haheni-karavoana anareo eo anoloan’ny voninahiny; 25Izy no Mpamonjy antsika amin’ny alalan’i Jesoa Kristy Tompontsika. Eny, ho an’Andriamanitra tokana anie ny voninahitra sy ny laza ary ny fanjakana sy ny fahefana hatramy talohan’ny taona rehetra sy ankehitriny ary mandrakizay! Amen.

jeudi 19 novembre 2020

Alakamisy 19 Novambra 2020 - Rom 13 : 11 - 14

 11Fantatrareo rahateo indrindra koa ny andro diavintsika. Izao no fotoana tokony hifohazanareo amin’ny torimaso; satria ankehitriny antomotra antsika kokoa ny famonjena, fa tsy tahaka ny tamin’ny andro vao ninoantsika. 12Madiva ho lasa ny alina, ary mby akaiky ny andro. Ialao àry ny asa fanao amin’ny maizina, ka itafio ny fiadiana fampiasa amin’ny mazava. 13Aoka isika hahay hitondra tena tsara toy ny amin’ny antoandro, ka hifady ny fanaranam-po sy ny fidorohana, ny fijangajangana sy ny fihetsika tsy maotina, ny adiady sy ny fifampialonana. 14Fa itafio ny fiadian’i Jesoa Kristy Tompo, ka aza mety hotarihin’ny maha olona mpanota ho amin’ny filàndratsy.

mercredi 18 novembre 2020

Alarobia 18 Novambra 2020 - Mat 20 : 29 - 34

 29Nony niala tao Jerikao i Jesoa mbamin’ny mpianany, dia nisy vahoaka betsaka nanaraka an’i Jesoa. 30Ary indreo nisy jamba roa lahy nipetraka teo amoron-dalana. Reny fa hoe i Jesoa no nandalo, ka niantsoantso mafy izy roa lahy nanao hoe:

–Ry Tompo, Zanak’i Davida ô, mamindrà fo aminay!

31Norahonan’ny vahoaka izy roa lahy hangina, kanefa vao mainka koa niantsoantso mafy hoe:

–Ry Tompo, Zanak’i Davida ô, mamindrà fo aminay!

32Dia nijanona i Jesoa sady niantso azy roa lahy ka nanao hoe:

–Inona no tianareo hataoko aminareo?

33Ary hoy ireo taminy:

–Tompo ô, ny mba hampahiratra ny masonay!

34Onena i Jesoa ary nikasika ny mason’ireto jamba. Dia nahiratra niaraka tamin’izay izy roa lahy, ka lasa nanaraka an’i Jesoa.

mardi 17 novembre 2020

Talata 17 Novambra 2020 - Sal 108 : 1 - 13

 1 Tononkira. Salamo nataon’i Davida.

2Andriamanitra ô, mitombina dia mitombina ny foko;

ka hihira ho Anao aho sy hankalaza Anao amin-tsalamo.

3Mifohaza, ry fanahiko; mifohaza, ry valiha sy lokanga,

fa tiako hofohazina ny mazavatsinanana.

4TOMPO ô, vory vahoaka no hiderako Anao;

ary eo anivom-pirenena no hankalazako Anao amin-tsalamo,

5satria lehibe mihoatra noho ny lanitra ny fitiavanao

ary avo tafapaka amin’ny rahona ny toetranao mahatoky.

6Andriamanitra ô, misandrata Ianao

ho any an-tampon’ny lanitra;

aoka anie ny voninahitrao

hamiratra amin’ny tany tontolo!

7Vonjeo amin’ny herinao aho ary valio vavaka,

dia ho afaka ilay vahoaka malalanao.

8Tao an-Toeramasiny no niteny Andriamanitra hoe:

«Faly tokoa Aho fa hizara an’i Sekema

sy ny lohasahan’i Sokôta ho an’ny vahoakako;

9Ahy i Gilehada, Ahy koa i Manase;

i Efraîma no toy ny satro-by fiarolohako;

i Joda no toy ny tehim-piandrianako.

10I Môaba hampiasaiko toy ny tavy fisasàko;

i Edôma hanipazako kapa ho fananako;

i Filistia hanaovako horakora-pandresena.»

11Iza no hampiditra ahy ho eo anivon’i Edôma?

Zovy no hitondra ahy ho amin’ilay tanàna mafy?

12Moa tsy Ianao ihany ve, Andriamanitra ô?

Kanefa izahay efa narianao mihitsy

ary ny tafikay tsy iarahanao intsony.

13Ampio re izahay hiady amin’ilay mpandrafy,

fa tsy mankaiza ny famonjena ataon’ny olona.

lundi 16 novembre 2020

Alatsinainy 16 Novambra 2020 - Jak 2 : 14 - 26

 14Ry havako, inona moa no soa azon’ny olona milaza azy ho manam-pinoana, raha tsy miseho amin’ny asa izany? Mahavonjy azy ve izany finoana izany? 15Raha tàhiny misy havana iray finoana tsy manan-kitafy sady tsy ampy sakafo, 16dia inona moa no soa azonareo milaza aminy hoe: «Veloma finaritra, manaova mafana tsara, manaova voky tsara», raha tsy mba omenareo azy izay ilain’ny tenany? 17Toy izany kosa àry ny finoana: raha misy tsy miseho amin’ny asa, dia maty mihitsy.

18Nefa raha misy manao hoe: «Ny anao finoana, fa ny ahy asa», dia hovaliako hoe: «Asehoy ahy izay finoanao tsy ombàn’asa, fa hasehoko anao amin’ny asa kosa ny finoako.» 19Inoanao ve fa misy Andriamanitra tokana? Tsara ny ataonao. Mba mino izany koa anefa ireo demony ka mangovitra. 20Ry adala, tianao ve ny hahafantatra fa tsy vanona ny finoana tsy ombàn’asa? 21Ahoana moa no nahazoan’i Abrahama razantsika ny fahamarinana avy amin’Andriamanitra? Noho ny asa nataon’i Abrahama, fony izy nanolotra an’i Itsehàka zanany lahy teo ambonin’ny alitara. 22Hitanao fa indray mientana ny azy ny finoana sy ny asa; ary tonga lavorary ny finoan’i Abrahama noho ny asa nombàny azy. 23Koa tanteraka ny Soratra Masina manao hoe: ‹Nino an’Andriamanitra i Abrahama, ka nankatoavan’Andriamanitra azy ho marina izany; ary dia nantsoin’Andriamanitra hoe sakaizany izy». 24Hitanareo àry fa nahazo ny fahamarinana avy amin’Andriamanitra ny olona, noho ny asa fa tsy noho ny finoana fotsiny ihany.

25Toy izay koa i Rahaba vehivavy janga: nahazo ny fahamarinana avy amin’Andriamanitra izy noho ny asa nataony, fony izy nampiantrano ireo iraka israelita ary nampandeha azy tamin’ny lalan-kafa. 26Eny, maty ny vatantena raha tsy misy fofonaina, ary maty toy izany koa ny finoana raha tsy ombàn’asa.

dimanche 15 novembre 2020

Alahady 15 Novambra 2020 - II Mpa 19 : 14 - 19

 14Ary noraisin’i Hezekià ny taratasy nentin’ireo iraka asirianina ka novakiny; avy teo izy dia niakatra tao an-tranon’ny TOMPO ka namelatra izany taratasy izany teo anatrehan’ny TOMPO, 15ary nivavaka tamin’ny TOMPO nanao hoe: «Ry TOMPO Andriamanitr’i Israely ô, Ianao Izay mipetraka eo ambony kerôbima, Ianao irery no Andriamanitry ny fanjakana rehetra eto an-tany, satria Ianao no nanao ny lanitra sy ny tany. 16TOMPO ô, mba atongilano ny sofinao ka mihainoa; TOMPO ô, mba ahirato ny masonao ka mijere; ary aoka ho renao ny teny izay nampitondrain’i Saneheriba hanevatevana Anao Andriamanitra velona. 17TOMPO ô, marina fa ireo mpanjakan’i Asiria dia nandringana ny hafa firenena sy nandrava ny taniny; 18ary nodorany tamin’ny afo sy nosimbany aza ny andriamaniny satria tsy Andriamanitra ireny fa asan’ny tanan’olombelona, vato aman-kazo ihany. 19Fa ankehitriny kosa ry TOMPO Andriamanitray ô, vonjeo tsy ho azon’ny tanan’i Saneheriba izahay mba hahafantaran’ny fanjakana rehetra etỳ an-tany fa Ianao irery ihany, TOMPO ô, no Andriamanitra.»

samedi 14 novembre 2020

Sabotsy 14 Novambra 2020 - Lio 16 : 1 - 8

 1Hoy kosa i Jesoa tamin’ny mpianany:

–Nisy mpanankarena anankiray nanana mpitandrim-pananana, izay notorîn’ny olona taminy fa mandanilany foana ny fananany. 2Dia nampiantsoin’ilay tompony izy ka nanontaniany hoe: «Inona izany henoko momba anao izany? Avoahy hoe ny fitandremanao fa tsy hahazo hitandrina ny fananako intsony ianao!» 3Ka hoy ilay mpitandrim-pananana anakampony hoe: «Esorin’ny tompoko amin’ny asako aho ity, ka inona re no hataoko? Ny miasa tany, tsy vitako; ny mangataka, mahamenatra ahy. 4Aoka fa fantatro izay hataoko, mba handraisan’ny olona ahy any an-tranony, rehefa voaroaka amin’ny asako aho.» 5Dia nampiantsoin’ilay mpitandrim-pananana tsirairay ireo olona nitrosa tamin’ny tompony. Ka hoy izy tamin’ilay voalohany: «Ananan’ny tompoko hoatrinona ianao?» 6Dia hoy ilay mpitrosa hoe: «Menaka efatra arivo litatra.» Ary hoy ny mpitandrim-pananana taminy: «Intỳ ny taratasinao, mipetraha faingana ka soraty hoe roa arivo.» 7Nisy hafa koa nilazany hoe: «Ary ianao, ananan’ny tompoko hoatrinona ianao?» Dia hoy ilay mpitrosa hoe: «Vary zato kitapo.» Ary hoy ny mpitandrim-pananana taminy: «Intỳ ny taratasinao, ka soraty hoe valopolo.» 8Noderain’ny tompony ilay mpitandrim-pananana tsy marina, satria niseho ho kinga; fa amin’ny raharaha ifanaovany avy, dia kinga kokoa ny olona miaina araka izao tontolo izao noho ny olona miaina araka ny fahazavan’Andriamanitra.

vendredi 13 novembre 2020

Zoma 13 Novambra 2020 - Sal 130 : 1 - 8

 1 Hira fiakarana.

Anaty hantsam-pahoriana aho

no miantso Anao, ry TOMPO.

2Mba henoy, Tompo ô, izany feoko!

Ho tandrin’ny sofinao anie ny feoko mitaraina!

3Raha mitsikilo heloka Ianao, ry TOMPO,

iza moa no hahatanty, Tompo ô?

4Kanefa ao aminao ny famelana

mba hanajan’ny olona Anao.

5Koa manantena mafy ny TOMPO aho

sady matoky ny teniny.

6Miandry ny Tompo aho,

manoatra ny mpiambina miandry ny maraina.

Eny, manoatra ny mpiambina miandry ny maraina,

7no aoka hitokian’ny vahoaka Israely ny TOMPO,

satria ny fitiavana no ao amin’ny TOMPO

ary koa ny fanavotana tsy hita lany!

8Eny, Izy no hanavotra ny vahoaka Israely

ho afaka amin’ny fahotana rehetra.

jeudi 12 novembre 2020

Alakamisy 12 Novambra 2020 - Isa 64 : 1 - 11

 1Ho toy ny afo mampirehitra kitay rantsan-kazo

na mampangotraka rano anie Ianao;

ka ho fantatry ny fahavalonao ny lazanao

ary hangovitra eo anatrehanao ny firenen-kafa,

2rehefa nanao zava-mahatahotra

izay tsy nampoizinay akory Ianao.

Eny, hidina tokoa Ianao, Tompo ô,

ka hihorohoro eo anatrehanao ny tendrombohitra.

3Fa hatrizay hatrizay dia tsy mbola henon’ny olona

na ren’ny sofiny na hitan’ny masony

izay Andriamanitra hafa noho Ianao

nahavita izany tamin’izay matoky Azy.

4Mitsena izay mifaly hanao ny marina Ianao,

dia izay mihevitra hanaraka ny lalanao;

koa raha tezitra Ianao, dia satria nanota izahay.

Nefa ho voavonjy ihany izahay,

rehefa ho voakosokao tanteraka ny otanay.

5Samy efa tahaka ny olo-maloto izahay rehetra,

ary tahaka ny lamba mihosin-dra

ny asa soa rehetra mba vitanay.

Paohin’ny helokay izahay rehetra

toy ny ravin-kazo maina paohin’ny tadio.

6Tsy nisy niantso ny anaranao intsony

na nahatsiaro hifikitra aminao,

satria nandà ny hijery anay Ianao

ary namela anay handevozin’ny helokay.

7Na dia izany aza anefa, TOMPO ô, Ianao no Rainay;

tanimanga izahay, fa Ianao no mpanefy

ary asan’ny tananao izahay rehetra.

8TOMPO ô, aza vinitra loatra aminay

ary aza tsarovana hatrany ny helokay;

mba tsinjovy re izahay vahoakanao rehetra.

9Tonga aolo ireo tanànanao masina,

tonga taniefitra i Tsiôna

ary tonga lao i Jerosalema.

10Ny tempoly masina sady mamirapiratra

izay nanaovan’ny razanay hira fiderana Anao

dia kilan’ny afo,

ary ny zava-drehetra maminay indrindra

dia rava avokoa.

11Eo anoloan’ireo fahavoazana rehetra ireo,

dia tsy hiraika aminay ve Ianao, TOMPO ô?

Mbola hangina ihany ve Ianao

ka hampahory anay mafy loatra?

mercredi 11 novembre 2020

Alarobia 11 Novambra 2020 - I Kor 12 : 9 - 21

 9Ny anankiray omen’izany Fanahy izany finoana; ary ny anankiray omen’izany Fanahy izany fanomezam-pahasoavana hanasitrana marary. 10Ny anankiray, hanao asa mahagaga; ny anankiray, hilaza hafatra avy amin’Andriamanitra; ny anankiray, hahay manavaka ny Fanahy Masina sy ny fanahy manodoka; ny anankiray, hiteny amin’ny fiteny samy hafa tsy fantatra; ary ny anankiray, hanazava ny fiteny tsy fantatra. 11Izany Fanahy iray izany ihany no loharano ipoiran’ireo fanomezana rehetra ireo, ka mizarazara azy, araka izay sitrapony, amin’ny olona tsirairay.

12Eny, iray ny tena kanefa misy zavatra maro ao aminy: dia toy izany koa i Kristy. Fa ireo zavatra rehetra anisan’ny tena ireo, na maro aza, dia tena iray ihany. 13Isika rehetra manko, na Jiosy na hafa firenena, na mpanompo na tsy mpanompo, dia iray ny Fanahy Masina nanaovana batisa antsika mba ho tena iray ihany isika; ary iray ny Fanahy Masina nampisotroana antsika rehetra.

14Eny, ny tena dia tsy zavatra karazana iray monja no mamorona azy fa maro. 15Raha ny tongotra hanao hoe: «Tsy tanana aho ka tsy mba isan’ny tena», dia tsy izay akory no tsy haha isan’ny tena azy. 16Raha ny sofina hanao hoe: «Tsy maso aho, ka tsy mba isan’ny tena», dia tsy izay akory no tsy haha isan’ny tena azy. 17Raha maso ny tena manontolo, ahoana no handrenesany? Ary raha sofina ny tena manontolo, ahoana no hanamboloany? 18Eny, efa voalahatr’Andriamanitra araka izay nitiavany azy avy eo amin’ny tena ireo zavatra anisan’ny tena ireo. 19Tsy ho nisy ny tena, raha karazana iray monja ny zavatra rehetra anisan’ny tena. 20Eny, maro ny zavatra anisan’ny tena, kanefa ny tena dia iray ihany.

21Ny maso tsy afaka hilaza amin’ny tanana ila hoe: «Tsy ilaiko ianao!» Ary ny loha tsy afaka hilaza amin’ny tongotra roa hoe: «Tsy ilaiko ianareo!» 

mardi 10 novembre 2020

Talata 10 Novambra 2020 - Lio 12 : 35 - 40

 35–Aoka ho vonona lalandava ka ny lambanareo sikino ary ny jironareo areheto. 36Manaova toy ny mpanompo miandry izay hiverenan’ny tompony avy any amin’ny fanasana; raha vao tonga sy mandondòna izy, dia vohain’ny mpanompony miaraka amin’izay. 37Sambatra ireo mpanompo hitan’ny tompony miari-tory raha tonga izy. Lazaiko marina aminareo fa hisikina lamba ny tompony ka hampipetraka azy hihinana ary handroso sakafo ho azy. 38Na misasakalina na maneno akoho no ahatongavan’ny tompony ka mahita ireo mpanompo miari-tory toy izany, dia sambatra ireo mpanompo ireo! 39Izao no ataovy an-tsaina: raha fantatry ny tompon-trano ny ora iavian’ny mpangalatra, dia tsy havelany hotamîna ny tranony! 40Ianareo koa, aoka ho vonona hatrany, fa ho avy amin’ny ora tsy ampoizinareo ny Zanak’olona.

lundi 9 novembre 2020

Alatsinainy 09 Novambra 2020 - Mat 15 : 21 - 28

 21Dia niala teo i Jesoa ary nankany amin’ny faritanin’i Tiro sy i Sidôna. 22Ary indro nisy vehivavy kanahanita, avy amin’izany faritany izany, tonga teo amin’i Jesoa sady niantsoantso mafy hoe:

–Mamindrà fo amiko, ry Tompo, Zanak’i Davida ô; fa ampahorîn’ny demony mafy loatra ny zanako vavy!

23Tsy namaly teny azy i Jesoa, ka nohatonin’ny mpianany ary nangatahany hoe:

–Omeo an-dramatoa io izay tadiaviny, satria miantsoantso mafy manjohy antsika izy.

24Fa novalian’i Jesoa hoe:

–Tsy nirahina Aho afa-tsy amin’ireo ondry very, dia ny vahoaka Israely!

25Tonga niankohoka teo anatrehan’i Jesoa anefa ravehivavy ka nanao hoe:

–Tompo ô, ampio re aho!

26Dia novalian’i Jesoa hoe:

–Tsy mety raha mofon-jaza no alaina ka atsipy ho an’ny amboakely.

27Fa hoy kosa ravehivavy:

–Marina izany, Tompoko, kanefa na ny amboakely aza dia mba mihinana ny sombintsombiny latsaka avy amin’ny latabatry ny tompony ihany.

28Tamin’izay dia niteny i Jesoa nanao taminy hoe:

–Lehibe ny finoanao, ramatoa; aoka ho tonga aminao araka izay irînao.

Ary nanomboka tamin’io ora io dia sitrana ilay zanany vavy.

dimanche 8 novembre 2020

Alahady 08 Novambra 2020 - Tit 2 : 11 - 15

 11Fa Andriamanitra efa naneho ny fahasoavany, izay loharanom-pamonjena ho an’ny olona rehetra. 12Izany fahasoavana izany dia mitaiza antsika handà ny toetra tsy miraharaha an’Andriamanitra sy handà ny filàn’izao tontolo izao, fa ho velona mahafehy tena sy mandala ny rariny ary tia vavaka mandritra izao fiainana ankehitriny izao. 13Toy izany no tokony hiandrasantsika ny hasambarana antenaintsika sy ny andro hisehoan’ny voninahitr’i Jesoa Kristy, ilay Andriamanitra lehibe sady Mpamonjy antsika. 14I Jesoa Kristy dia nanolo-tena ho antsika mba hanavotra antsika ho afaka amin’ny ratsy rehetra ka hahatonga antsika ho vahoaka voadio, natao ho Azy tokoa sy hazoto hanatontosa asa tsara.

15Izany lazaina sy ananarana ary andresena lahatra ombàn’ny fahefana rehetra anananao. Aoka tsy hisy olona hanao tsinontsinona anao.

samedi 7 novembre 2020

Asabotsy 07 Novambra 2020 - Mik 6 : 6 - 8

 6«Inona àry no hoentiko,

rehefa manatona aho hiankohoka

eo anatrehan’ny TOMPO,

Andriamanitra avo indrindra?

Moa zanak’omby iray taona

hatao sorona dorana manontolo ve

no hoentiko rehefa manatona Azy aho?

7Ho sitraky ny TOMPO ve ny ondrilahy an’arivony

na ny menaka mikoriana toy ny renirano?

Hatolotro Azy ve ny zazalahy voalohan-terako

ho fanalana ny heloka amam-pahotàko?»

8Tsia, ry olombelona, fa efa nampianarina anao

ny fitondrantena tsara

sy izay tadiavin’ny TOMPO aminao:

dia ny hanao ny rariny

sy handala ny fitiavana

ary ny hanaraka an’Andriamanitrao amim-panetrentena.

vendredi 6 novembre 2020

Zoma 06 Novambra 2020 - Asa 16 : 6 - 10

 6Noraran’ny Fanahy Masina tsy hitory ny tenin’Andriamanitra tany Azia i Paoly sy ny namany ka nandeha namaky ny faritany Frijia sy Galatia. 7Nihazo ny faritany Mizia izy ireo ary nitady hankany Bitinia, kanjo tsy navelan’ny Fanahin’i Jesoa. 8Dia namaky an’i Mizia ry i Paoly ka nanitsy nankany Trôasy, tanàna seranana. 9Tamin’ny alina dia nisehoam-pahitana i Paoly: nisy lehilahy Masedônianina nijoro teo anatrehany, sady niangavy azy hoe: «Mità mankatỳ Masedônia, ka vonjeo izahay!» 10Tsy nangataka andro izahay taorian’izany fahitàn’i Paoly izany, fa nivonona hiainga ho any Masedônia, satria azonay antoka fa nantsoin’Andriamanitra hitondra ny Vaovao Mahafaly amin’ny olona any izahay.

jeudi 5 novembre 2020

Alakamisy 05 Novambra 2020 - Mat 24 : 35 - 44

 35Ho levona ny tany amana habakabaka, fa ny teniko tsy mba ho levona.

36–Ny amin’izay andro sy ora hahatongavan’izany dia tsy misy mahalala na ny anjely any an-danitra na ny Zanaka, fa izy Ray irery ihany. 37Eny, tahaka ny tamin’ny andron’i Noà, dia ho tahaka izany koa ny fiavian’ny Zanak’olona. 38Fa tamin’ireo andro nialoha ny safodrano dia nihinana sy nisotro ary nampaka-bady na nampakarina ny olona, mandra-pigadon’ny andro nidiran’i Noà tao amin’ny sambofiara, 39ary tsy nanampo na inona na inona ny olona mandra-pahatongan’ny safodrano izay nandringana azy rehetra. Dia ho tahaka izany koa ny fiavian’ny Zanak’olona. 40Amin’izany, hisy roa lahy tafaraka eny an-tsaha; ka ny iray halaina, ny iray havela; 41hisy roa vavy miara-mikoso-bary: ka ny iray halaina, ny iray havela. 42Koa miambena àry, fa tsy fantatrareo izay andro hiavian’ny Tomponareo. 43Izao no ataovy ao an-tsaina: raha fantatry ny tompon-trano ny vanim-potoana hiavian’ny mpangalatra amin’ny alina, dia ho niambina izy ary tsy ho namela ny tranony hotamîna. 44Noho izany, aoka ho vonona hatrany koa ianareo, fa ho avy amin’ny ora tsy ampoizinareo ny Zanak’olona.

mercredi 4 novembre 2020

Alarobia 04 Novambra 2020 - Mat 9 : 27 - 31

 27Raha niala teo i Jesoa, dia nisy jamba roa lahy nanaraka Azy sady niantsoantso hoe:

–Ry Zanak’i Davida ô, mamindrà fo aminay!

28Ary rehefa niditra tao an-trano i Jesoa, dia nohatonin’ireo jamba; ka hoy i Jesoa taminy:

–Mino ve ianareo fa haiko atao izany?

Dia novalian’izy roa lahy hoe:

–Eny, Tompoko!

29Tamin’izay dia nokasihin’i Jesoa ny mason’ireto jamba sady nataony hoe:

–Aoka ho tonga aminareo araka ny finoanareo.

30Dia nahiratra ny mason’izy roa lahy, fa i Jesoa namepetra azy mafy hoe:

–Tandremo sao fantatr’olona izao!

31Kanjo nony lasa ireo, dia nampiely ny lazan’i Jesoa manerana io faritany io.

mardi 3 novembre 2020

Talata 03 Novambra 2020 - Sal 145 : 14 - 21

 SAMEKA

14Ny TOMPO no manohana izay rehetra ho lavo

sy mampitraka izay rehetra mitanondrika.

HAINA

15Mifantoka aminao ny mason’izao rehetra izao

fa Ianao manome azy ny sakafony ara-potoana.

PE

16Manokatra ny tananao Ianao

ka mamoky zava-tsoa ny miaina rehetra.

TSADE

17Marina amin’ny lalany rehetra ny TOMPO

ary be fitiavana amin’ny asany rehetra.

KÔFA

18Ny TOMPO eo akaikin’izay rehetra miantso Azy,

dia izay rehetra miantso Azy marina tokoa.

RESA

19Manao izay irîn’ny manaja Azy ny Tompo,

ary mihaino ny tarainany ka mamonjy azy.

SINA

20Ny TOMPO miambina izay rehetra tia Azy;

ny olon-dratsy kosa aringany avokoa.

TAO

21Aoka ny vavako hiteny fiderana ny TOMPO;

ny voaary rehetra anie hankalaza ny anarany masina

mandrakizay mandrakizay!

lundi 2 novembre 2020

Alatsinainy 02 Novambra 2020 - II Kor 4 : 12 - 15

 12hany ka ny fahafatesana no miasa ao aminay, fa ny fiainana no miasa ao aminareo.

13Hoy ny Soratra Masina: «Nino aho, ka izany no nitenenako.» Noho izahay manana io finoana omen’ny Fanahy Masina io, dia mino koa izahay ka izany no itenenanay. 14Fantatray fa Andriamanitra, Izay nanangana an’i Jesoa Tompo ho velona, dia hanangana anay koa ho velona miaraka amin’i Jesoa, ary hametraka anay mbaminareo ho eo akaikiny. 15Eny, noho ny aminareo avokoa izany rehetra izany, ka dia mihamaro ny olona tratran’ny fahasoavana mba hitomboan’ny vavaka fisaorana ho voninahitr’Andriamanitra.

dimanche 1 novembre 2020

Talata 01 Desambra 2020 - Jao 1 : 35 - 51

  35Ny ampitson’iny indray, dia mbola teo ihany i Jôhany sy ny mpianany roa lahy; 36ary nahatazana an’i Jesoa nandalo i Jôhany ka hoy izy hoe:

–Indro ny Zanakondrin’Andriamanitra!

37Nandre an’i Jôhany niteny izany ireto mpianany roa lahy ka lasa nanaraka an’i Jesoa. 38Ary nitodika i Jesoa ka nahita azy roa lahy nanaraka, dia nanao taminy hoe:

–Inona no tadiavinareo izay?

Ka novalian’izy roa lahy hoe:

–Rabỳ ô, (izany hoe Mpampianatra ô, raha adika), aiza ianao no mitoetra?

39Dia hoy i Jesoa taminy:

–Avia, fa ho hitanareo!

Koa dia nandeha izy roa lahy ka nahita izay nitoeran’i Jesoa ary nitoetra teo aminy tamin’io andro io. (Tokony ho tamin’ny efatra tolakandro tamin’izay).

40I Andrea, rahalahin’i Simôna Petera, no anankiray tamin’izy roa lahy nandre ny tenin’i Jôhany, ka nanaraka an’i Jesoa. 41Ny nihaonan’i Andrea voalohany dia i Simôna rahalahiny ka nilazany hoe:

–Efa hitanay ny Mesia (izany hoe i Kristy na hoe Voahosotra, raha adika)!

42Dia nentin’i Andrea nankany amin’i Jesoa i Simôna; ary nony nijery azy i Jesoa, dia nanao hoe:

–Ianao no Simôna, zanakalahin’i Jônà! Hantsoina hoe Kefasy ianao (izany hoe Petera na hoe Vato, raha adika)!

43Ny ampitson’iny, dia niroso nankany amin’ny faritany Galilea i Jesoa; tafahaona tamin’i Filipo Izy ary nanao taminy hoe:

–Avia hiaraka amiko!

44I Filipo dia avy any Betsaidà, tanàna fiavian-dry i Andrea sy i Petera. 45Tafahaona tamin’i Natanaela kosa i Filipo ka niteny taminy hoe: «Efa hitanay Ilay voalazan’i Mosesy tao amin’ny bokin’ny Lalàna sy voalazan’ireo mpaminany, dia i Jesoa zanak’i Jôsefa, Ilay avy any Nazareta.»

46Ary hoy i Natanaela taminy:

–Moa mba mety hisy zava-tsoa ve avy any Nazareta?

Dia novalian’i Filipo hoe:

–Ndao ianao hizaha!

47Nahita an’i Natanaela tamy nanatona Azy i Jesoa ka izao no teniny momba an’i Natanaela:

–Izany ka tena Israelita tsy misy fitaka!

48Dia hoy i Natanaela taminy:

–Ahoana no ahafantaranao ahy?

Ka novalian’i Jesoa hoe:

–Talohan’ny niantsoan’i Filipo anao, dia hitako teo ambany aviavy ianao!

49Fa i Natanaela kosa nilaza taminy hoe:

–Mpampianatra ô, Ianao no Zanak’Andriamanitra, Ianao no Mpanjakan’i Israely!

50Ary novalian’i Jesoa hoe:

–Mino ve ianao satria nilazako fa hitako teo ambany aviavy? Zavatra lehibe noho izany no mbola ho hitanao!

51Dia hoy koa i Jesoa tamin-dry i Natanaela:

–Lazaiko marina dia marina aminareo fa ho hitanareo ny lanitra misokatra mbamin’ny anjelin’Andriamanitra miaka-midina eo ambonin’ny Zanak’olona!

Talata 01 desambra 2020 - Jao 1 : 35 - 51

 35Ny ampitson’iny indray, dia mbola teo ihany i Jôhany sy ny mpianany roa lahy; 36ary nahatazana an’i Jesoa nandalo i Jôhany ka hoy izy hoe:

–Indro ny Zanakondrin’Andriamanitra!

37Nandre an’i Jôhany niteny izany ireto mpianany roa lahy ka lasa nanaraka an’i Jesoa. 38Ary nitodika i Jesoa ka nahita azy roa lahy nanaraka, dia nanao taminy hoe:

–Inona no tadiavinareo izay?

Ka novalian’izy roa lahy hoe:

–Rabỳ ô, (izany hoe Mpampianatra ô, raha adika), aiza ianao no mitoetra?

39Dia hoy i Jesoa taminy:

–Avia, fa ho hitanareo!

Koa dia nandeha izy roa lahy ka nahita izay nitoeran’i Jesoa ary nitoetra teo aminy tamin’io andro io. (Tokony ho tamin’ny efatra tolakandro tamin’izay).

40I Andrea, rahalahin’i Simôna Petera, no anankiray tamin’izy roa lahy nandre ny tenin’i Jôhany, ka nanaraka an’i Jesoa. 41Ny nihaonan’i Andrea voalohany dia i Simôna rahalahiny ka nilazany hoe:

–Efa hitanay ny Mesia (izany hoe i Kristy na hoe Voahosotra, raha adika)!

42Dia nentin’i Andrea nankany amin’i Jesoa i Simôna; ary nony nijery azy i Jesoa, dia nanao hoe:

–Ianao no Simôna, zanakalahin’i Jônà! Hantsoina hoe Kefasy ianao (izany hoe Petera na hoe Vato, raha adika)!

43Ny ampitson’iny, dia niroso nankany amin’ny faritany Galilea i Jesoa; tafahaona tamin’i Filipo Izy ary nanao taminy hoe:

–Avia hiaraka amiko!

44I Filipo dia avy any Betsaidà, tanàna fiavian-dry i Andrea sy i Petera. 45Tafahaona tamin’i Natanaela kosa i Filipo ka niteny taminy hoe: «Efa hitanay Ilay voalazan’i Mosesy tao amin’ny bokin’ny Lalàna sy voalazan’ireo mpaminany, dia i Jesoa zanak’i Jôsefa, Ilay avy any Nazareta.»

46Ary hoy i Natanaela taminy:

–Moa mba mety hisy zava-tsoa ve avy any Nazareta?

Dia novalian’i Filipo hoe:

–Ndao ianao hizaha!

47Nahita an’i Natanaela tamy nanatona Azy i Jesoa ka izao no teniny momba an’i Natanaela:

–Izany ka tena Israelita tsy misy fitaka!

48Dia hoy i Natanaela taminy:

–Ahoana no ahafantaranao ahy?

Ka novalian’i Jesoa hoe:

–Talohan’ny niantsoan’i Filipo anao, dia hitako teo ambany aviavy ianao!

49Fa i Natanaela kosa nilaza taminy hoe:

–Mpampianatra ô, Ianao no Zanak’Andriamanitra, Ianao no Mpanjakan’i Israely!

50Ary novalian’i Jesoa hoe:

–Mino ve ianao satria nilazako fa hitako teo ambany aviavy? Zavatra lehibe noho izany no mbola ho hitanao!

51Dia hoy koa i Jesoa tamin-dry i Natanaela:

–Lazaiko marina dia marina aminareo fa ho hitanareo ny lanitra misokatra mbamin’ny anjelin’Andriamanitra miaka-midina eo ambonin’ny Zanak’olona!

Alahady 01 Novambra 2020 - Gen 32 : 4 - 13

 4Ary i Jakôba nandefa iraka hialoha azy ho any amin’i Hesao rahalahiny, any ambanivohitr’i Edôma, any amin’ny tany Sehira. 5Nanafatra an’ireo iraka izy hoe:

–Izao no holazainareo amin’i Hesao: «I Jakôba mpanomponao, tompokolahy, dia nanafatra anay hilaza hoe: Nivahiny tany amin’i Labàna aho ary nijanona tany hatramin’izao. 6Manana omby sy boriky sy ondry aman’osy aho ary koa mpanompo lahy sy vavy maro. Nandefa ireto irako ireto aho hampilaza aminao tompokolahy mba handraisanao ahy tsara.»

7Niverina tany amin’i Jakôba ireo iraka ka nilaza hoe:

–Tonga tany amin’i Hesao rahalahinao izahay; ary ny tenany mihitsy no tamy hitsena anao miaraka amin’ny olona efajato lahy.

8Dia raiki-tahotra mafy i Jakôba ka nangitakitaka; ary nozarainy ho antoko roa ny olona niaraka taminy sy ireo ondry aman’osy ary omby sy rameva, 9fa hoy izy anakampony: «Raha tonga hamely ny antoko iray i Hesao, dia afa-mandositra kosa ny antoko hafa.» 10Ary nivavaka i Jakôba nanao hoe:

–Ry Andriamanitr’i Abrahama raibeko sy Andriamanitr’i Itsehàka raiko ô, Ianao Ilay TOMPO efa nilaza tamiko hoe: «Miverena any amin’ny taninao sy ny fianakavianao, dia hanisy soa anao Aho.» 11Tsy mendrika an’ireo mari-pitiavana sy zavatra azo antoka rehetra izay nataonao tamiko mpanomponao akory aho, satria tsy nanana afa-tsy tehina ny tenako raha niampita an’ity Jôrdàna ity, ary ankehitriny kosa efa tonga antokony roa. 12Mba afaho amin’ny tanan’i Hesao rahalahiko aho, satria matahotra azy, fandrao tonga izy ka hamono ahy sy ny zaza amam-behivavy ho faty. 13Ianao manko efa nampanantena ahy hoe: «Hanisy soa anao tokoa Aho, ka hahatonga ny taranakao ho marobe tsy hita isa tahaka ny fasika eny amoron-dranomasina.»

samedi 31 octobre 2020

Sabotsy 31 Oktobra 2020 - Neh 5 : 1 - 13

 1Indray andro dia nisy lehilahy sy vehivavy sarambabem-bahoaka nitaraina mafy noho ny ataon’ny Jiosy sasany mpiray firenena aminy. 2Fa nisy nanao hoe: «Maro izahay mbamin’ny zanakay lahy aman-janakay vavy; koa te hahazo vary izahay mba hohaninay sy hivelomanay». 3Nisy koa nanao hoe: «Ny sahanay sy ny tanimboalobokay ary ny tranonay dia efa nataonay antoka; koa te hahazo vary izahay mandritra ny mosary». 4Nisy indray nanao hoe: «Efa nisambo-bola izahay handoavanay ny hetran’ny amperôra; ary ny sahanay sy ny tanimboalobokay no nataonay antoka. 5Kanefa mba tahaka ireo mpiray firenena aminay ihany ny tenanay, ary tahaka ny zanak’ireo ihany ny zanakay; saingy na izany aza, dia voatery manolotra ny zanakay lahy sy vavy ho mpanompo izahay, ary ny sasany amin’ny zanakay vavy efa mpanompo rahateo. Tsy manan-ko enti-manavotra azy izahay, satria lasan’ny hafa ny sahanay sy ny tanimboalobokay».

6Dia tezitra mafy aho rehefa nahare ny fitarainan’ny olona sy izany teny izany. 7Koa nanapa-kevitra anakampoko aho fa ny loholona sy mpanapaka no hanariko noho izy samy nampanàna zavatra tamin’ny mpiray firenena aminy. Dia nampanao fivoriam-be hitsarana azy aho 8sady niteny taminy hoe:

–Izahay, araka izay tratry ny fanananay, dia efa nanavotra ny mpiray firenena aminay, izany hoe ireo Jiosy namidy tamin’ny hafa firenena; fa ianareo kosa mivarotra ny mpiray firenena aminareo, ka amintsika samy isika ihany no ivarotanareo azy.

Dia sina ry zareo fa tsy nahita havaly. 9Ary hoy koa aho hoe:

–Tsy tsara izao ataonareo izao! Moa tsy tokony niaina tamim-pahatahorana an’Andriamanitra ve ianareo mba tsy hiharan’ny fanaratsian’ireo hafa firenena fahavalontsika? 10Izaho sy ny havako ary ny mpanompoko dia efa nampisambotra vola sy vary, koa aoka re isika mba samy hamoy izany trosa izany! 11Eny, avereno amin’ny mpitrosa, izao anio izao ihany, ny sahany sy ny tanimboalobony mbamin’ny tanin’ôlivany sy ny tranony; ary afoizo ny tombon-tsoa ateraky ny vola mbamin’ny vary sy divay ary menaka izay nampisamborinareo.

12Dia hoy ireo hoe:

–Eny, hanao araka izay lazainao izahay. Hamerina izay nalainay izahay ary tsy hitaky na inona na inona amin’ny mpitrosa.

Dia niantso ny mpisorona aho ka teo anatrehany no nampianianako an’ireo mpampisambotra fa hanao araka izany toky nomena izany. 13Avy eo aho dia nanakopaka ny lambako sady niteny hoe:

–Ho tahaka izany anie no hanakopahan’Andriamanitra ny olona rehetra izay tsy hahatanteraka izany toky nomena izany! Eny, ho voakopaka hiala amin’ny tranony sy ny fananany anie izy, ka ho tavela tsy hanana na inona na inona!

Dia ny fivoriam-be no indray namaly hoe «Amen» sady nidera ny TOMPO; ary nanao araka izany toky nomena izany tokoa ny olona.

vendredi 30 octobre 2020

Zoma 30 Oktobra 2020 - Kol 2 : 4 - 7

 4Lazaiko aminareo izany mba tsy hahavoafitaka anareo amin’ny fandrebirebena tsara lahatra. 5Fa na dia lavitra anareo aza aho ara-batana, dia eo aminareo ihany am-panahy; ka faly aho mahita fa milamina tsara ianareo ary ijoroanareo mafy ny finoanareo an’i Kristy.

Hafenoan’ny fiainam-baovao ao amin’i Kristy

6Noho ianareo efa nandray an’i Kristy Jesoa ho Tompo, dia manaova fitondrantena toy ny olona tafaray aminy. 7Aoka hahazo vahatra sy hiorina ao amin’i Kristy ianareo; aoka hihamafy hatrany ny finoanareo araka izay efa nampianarina anareo, ary aoka ho feno fisaorana an’Andriamanitra ianareo.

jeudi 29 octobre 2020

Alakamisy 29 Oktobra 2020 - Mpits 3 : 7 - 11

 7Ary nanao izay ratsy eo imason’ny TOMPO ny Israelita fa nanadino ny TOMPO Andriamaniny ka nanompo ireo Bahala sy ireo Aserà. 8Dia nirehi-pahatezerana tamin’ny Israelita ny TOMPO ka nanolotra azy teo an-tanan’i Kosàna-Risehataîma, mpanjakan’i Mezôpôtamia; ary nandritra ny valo taona no nanompoany azy. 9Koa niantso vonjy tamin’ny TOMPO ny Israelita; ary IZY nanangana mpamonjy izay hanafaka ny Israelita, dia i Hôtniela, zanakalahin’i Kenaza izay zandrin’i Kaleba. 10Dia nitoetra tao aminy ny Fanahin’ny TOMPO, ka nitondra ny Israelita izy. Ary niainga hiady i Hôtniela; dia natolotry ny TOMPO teo an-tanany i Kosàna-Risehataîma mpanjakan’i Mezôpôtamia ka resiny. 11Dia nandry fahalemana ny tany nandritra ny efapolo taona; avy eo dia maty i Hôtniela, zanakalahin’i Kenaza.

mercredi 28 octobre 2020

Alarobia 28 Oktobra 2020 - Jao 4 : 46 - 54

 46Tamin’izay i Jesoa dia nankany Kanà tanànan’i Galilea indray, tany amin’ilay nanovany ny rano ho divay. Ary nisy tandapa anankiray nanan-janaka lahy narary tany Kafarnahòma. 47Rehefa reny fa hoe tonga ao Galilea avy tany Jodea i Jesoa, dia nanatona Azy ilay tandapa ary niangavy Azy mba hidina any Kafarnahòma hanasitrana ny zanany lahy efa ho faty. 48Ka hoy i Jesoa taminy:

–Raha tsy mahita famantarana sy zava-mahagaga ianareo, dia tsy mba hety hino mihitsy!

49Fa novalian’ilay tandapa hoe:

–Midîna re, Tompoko, dieny mbola tsy maty ny zanako!

50Ka hoy i Jesoa taminy:

–Ndeha mody, fa velona soa aman-tsara ny zanakao!

Nino ny teny voalazan’i Jesoa taminy ralehilahy, ka lasa nody. 51Efa teny an-dalana midina ho any Kafarnahòma izy no tamy nitsena azy ny mpanompony ka nilaza hoe:

–Velona soa aman-tsara ny zanakao!

52Ary nanontaniany azy ireo ny ora nahasitranany ka hoy ireo taminy:

–Omaly tamin’ny iray tolakandro no nialan’ny tazo taminy.

53Koa fantatry ny rain-drazazalahy fa tamin’izany ora izany indrindra no nanaovan’i Jesoa taminy hoe: «Velona soa aman-tsara ny zanakao»; dia nino izy mbamin’ny ankohonany rehetra.

54Izany no famantarana faharoa nataon’i Jesoa, dia fony Izy tonga tao Galilea avy tany Jodea.

mardi 27 octobre 2020

Talata 27 Oktobra 2020 - II Tim 3 : 10 - 12

 10Fa ianao kosa efa nanaraka tsara ny fampianarako, ny fitondrantenako, ny foto-pisainako, ny finoako, ny fandeferako, ny fitiavako, ny faharetako, 11ny fanenjehana ahy ary ny fijaliana nanjo ahy. Fantatrao avokoa izay nihatra tamiko tany Antiôkia, tany Ikôniôma, tany Listra, mbamin’ireo fanenjehana nianjady tamiko; kanefa dia nafahan’ny Tompo tamin’izany rehetra izany aho. 12Eny, izay te hiaina araka ny maha mpivavaka tafaray amin’i Kristy Jesoa dia hoenjehina.

lundi 26 octobre 2020

Alatsinainy 26 Oktobra 2020 - Mar 7 : 31 - 37

 31Dia niala tao amin’ny faritanin’i Tiro i Jesoa ka nandalo tany Sidôna ary niverina teo amin’ny farihin’i Galilea, rehefa avy namakivaky ny faritany atao hoe Dekapôly. 32Dia nisy lehilahy sady marenina no raiki-dela, nentin’ny olona ho eo aminy ary niangaviany Azy hametrahany tanana. 33Dia nentin’i Jesoa nihataka irery lavitra ny vahoaka ralehilahy ka noharoniny tamin’ny rantsan-tanana ny sofiny, ary nokasihiny sady nasiany rora ny lelany. 34Dia niandrandra ny lanitra i Jesoa sady nisento ary niteny tamin-dralehilahy hoe:

–Efatà! (izany hoe: «misokafa!»).

35Ary niaraka tamin’izay dia nisokatra ny sofin-dralehilahy ary nivaha ny fatoran’ny lelany, ka afaka niteny tsara izy. 36Dia namepetra ny olona teo i Jesoa tsy hitantara na amin’iza na amin’iza; kanefa arakaraka ny nameperan’i Jesoa azy no vao mainka koa nampielezany izany. 37Ary dia talanjona izaitsizy ny olona ka vaky vava hoe:

–Tsara avokoa no nanaovany ny zavatra rehetra, fa sady nampalady ny marenina Izy no nampiteny ny moana.

dimanche 25 octobre 2020

Alahady 25 Oktobra 2020 - Isa 7 : 1 - 9

 1Tamin’ny andro nanjakàn’i Ahaza, zanakalahin’i Jôtama sady zafikelin’i Hozià mpanjakan’i Joda, dia niakatra i Retsîna mpanjakan’i Siria sy i Peka, zanakalahin’i Remalià sady mpanjakan’i Israely, mba hanafika an’i Jerosalema, kinanjo tsy nahafaka azy. 2Dia nampandrenesina i Ahaza, taranak’i Davida, sy ny tao an-dapany fa efa mitoby any Efraîma ny Sirianina. Koa taitra ny fon’ny mpanjaka sy ny an’ny vahoakany, tahaka ny hazo any an’ala rehefa tsofin’ny rivotra.

3Dia hoy ny TOMPO tamin’i Isaià:

–Mivoaha ny trano ianao mba hitsena an’i Ahaza, dia ianao sy i Seara-Jasoba zanakao lahy, fa efa mby amin’ny lakandrano ambony izy, eo amin’izay lalana mankany amin’ny sahan’ny mpanasa lamba. 4Ary lazao aminy hoe: «Tandremo! Aza taitaitra foana, aza matahotra. Aoka tsy ho ketraka ny fonao noho ny fahatezeran’i Retsîna avy any Siria sy ny fahatezeran’ny zanakalahin’i Remalià, fa tapa-porohana midonaka ihany ireo. 5Ny Sirianina ary i Peka sy ny Efraîmita dia efa niray tetika tokoa hanisy ratsy anao ka nanao hoe: 6‹Andeha isika hiakatra hamely an’i Joda mba hampitahotra azy, ka hoterentsika hanaraka antsika izy; dia ilay zanakalahin’i Tabeela no hatsangantsika hanjaka ao aminy.› 7Izao kosa no lazain’ny Tompo ANDRIANANAHARY:

‹Tsy ho tanteraka sady tsy hisy izany

8-9I Damasy manko no renivohitr’i Siria,

ary ao ihany i Retsîna no filoha;

i Samaria no renivohitr’i Efraîma,

ary ao ihany i Peka no filoha.

I Efraîma, ao anatin’ny 65 taona,

dia tsy ho vanon-ko firenena intsony.›

Kanefa raha tsy ny TOMPO no itokianareo,

dia tsy ho azo itokiana haharitra koa ianareo.»

samedi 24 octobre 2020

Asabotsy 24 Oktobra 2020 - Ezr 10 : 1 - 8

 1Raha mbola nanao izany vavaka fieken-keloka izany i Hezrà sady nitomany sy niankohoka teo anoloan’ny tranon’Andriamanitra, dia nisy vahoaka israelita maro, lehilahy sy vehivavy mbamin’ny ankizy madinika, nivory nanodidina azy; ary nitomany mafy dia mafy izy rehetra. 2Tamin’izany no niteny i Sekanià, zanakalahin’i Jehiela sady anisan’ny taranak’i Helama, ka nanao tamin’i Hezrà hoe:

–Efa nanao izay mahadiso amin’Ilay Andriamanitsika izahay, satria naka vehivavy hafa firenena anisan’ireo mponin’ity tany ity ho vadinay; nefa na izany aza, dia mbola misy fanantenana ihany ho an’i Israely. 3Aoka hifanaiky amin’Ilay Andriamanitsika izahay fa handroaka mbamin-janany ireo vehivavy rehetra hafa firenena ireo. Harahinay ny anatra nataonao sy naroson’izay fatra-panaja ny didin’Andriamanitra; aoka hatao araka ny lalànany tokoa izany! 4Mitsangàna fa adidinao izao raharaha izao; ary izahay koa vonon-kiaraka aminao. Aoka ho sahinao atao izany!

5Dia nitsangana i Hezrà ka nampianiana ny lohandohan’ireo mpisorona levita10.5 mpisorona levita: Jereo Deot 17.9 sy nta. sy ireo filohan’ny Israelita hanao araka izany tolokevitr’i Sekanià izany; ary dia nianiana ireo. 6Taorian’izay i Hezrà no niala teo anoloan’ny tranon’Andriamanitra ka nankany amin’ny efitranon’i Jôhanàna zanakalahin’i Eliasiba ary nitoetra tao; saingy tsy nety nihinan-kanina sy nisotro rano izy satria nalahelo tokoa noho ny fahadisoan’ireo Jiosy tafaverina avy any an-tsesitany.

7Dia nisy teny nalefa eran’i Jerosalema sy i Joda ho an’ireo Israelita tafaverina avy any an-tsesitany mba hivory ao Jerosalema; 8ary na iza na iza tsy tonga anatin’ny telo andro, araka ny tenin’ireo lehibe sy loholona, dia horobaina ny fananany rehetra ary hesorina tsy ho anisan’ny fiangonana israelita izy.

vendredi 23 octobre 2020

Zoma 23 Oktobra 2020 - Mat 21 : 18 - 22

 18Dia niverina maraina ho any an-tanàna i Jesoa ary nahatsiaro noana. 19Nahatazana aviavy anankiray teo amoron-dalana Izy, dia lasa nankeo; kanjo tsy nahita na inona na inona teo aminy afa-tsy raviny fotsiny. Dia hoy i Jesoa tamin’ilay aviavy:

–Tsy hamoa intsony ianao na oviana na oviana!

Ary vetivety foana dia maina ilay aviavy. 20Gaga ny mpianatra nahita izany ka vaky vava hoe:

–Ahoana re no nahamaina vetivety io aviavy io?

21Dia novalian’i Jesoa hoe:

–Izao no lazaiko marina aminareo; raha manam-pinoana ianareo ka tsy misalasala, dia tsy izao nataoko tamin’ny aviavy izao ihany no ho vitanareo, fa na itsy tendrombohitra itsy aza hitenenanareo hoe: «Mialà eo ary mianjerà any an-dranomasina», dia ho tonga izany. 22Raha mino ianareo, na inona na inona hangatahinareo amin’ny fivavahana dia ho azonareo avokoa.

jeudi 22 octobre 2020

Alakamisy 22 Oktobra 2020 - I Kor 4 : 14 - 21

 14Tsy ny hanome henatra anareo no anoratako izany, fa ny hananatra anareo, araka ny maha zanaka malalako anareo. 15Na dia miisa iray alina aza ny mpanabe anareo amin’izao maha kristianina anareo izao, dia tsy maro ray tsy akory ianareo: izaho no rainareo ka nahatonga anareo ho tafaray amin’i Kristy Jesoa tamin’ny alalan’ny Vaovao Mahafaly. 16Koa miangavy anareo aho: manahafa ahy. 17Noho izany, dia alefako atỳ aminareo i Timôty4.17 Timôty: jereo Asa 16.1., zanaka malalako sady mahatoky amin’ny fanompoana ny Tompo. Izy no hampahatsiaro anareo ireo lalana nodiaviko nahatafaray ahy amin’i Kristy Jesoa, araka izay ampianariko amin’ny Fiangonana rehetra hatraiza hatraiza.

18Nisy manko taminareo nirehareha hoatra ny tsy ho tonga hitsidika anareo iny aho. 19Kanefa ho avy faingana hitsidika anareo aho, raha sitrapon’ny Tompo; ary tsy izay tenin’ireo mpirehareha no hofantariko fa izay zavatra vitany. 20Ny Fanjakàn’Andriamanitra dia tsy teny foana fa hery mahavita zavatra. 21Ka asa izay tianareo: ho avy hitsidika anareo aho, ka tsorakazo ve no hoentiko sa fo feno fitiavana sy fahalemem-panahy?

mercredi 21 octobre 2020

Alarobia 21 Oktobra 2020 - II Tan 20 : 20 - 23

 20Nifoha maraina koa ireto Jodeanina sy mponin’i Jerosalema ny ampitso, dia niainga nankany amin’ny taniefitr’i Tekôa. Teo am-piaingàny, dia nitsangana i Jôsafata ka nanao hoe:

–Mihainoa ahy ianareo, ry Jodeanina sy ry mponin’i Jerosalema. Matokia ny TOMPO Andriamanitrareo, dia tsy ho voahozongozona ianareo; matokia ny mpaminaniny, dia handresy ianareo!

21Rehefa niara-nidinika tamin’ny vahoaka i Jôsafata, dia nanendry mpihira hialoha ny tafika, ka hanao fanamiana masina sady hidera ny TOMPO hanao hoe: «Miderà ny TOMPO ianareo; eny, maharitra mandrakizay ny fitiavany!»

22Raha vao nanomboka nihoby sy nidera ireo mpihira, dia nataon’ny Tompo nisy fifanjevoana teo amin’ny Hamônita sy Môabita ary Edômita izay tonga hanafika ny Jodeanina, ka dia nifamely ireo. 23Nitsangana ny Hamônita sy Môabita hamely ny Edômita, ka namono nahafaty sy nandringana azy; ary nony voaringan’izy roa tonta ny Edômita, dia izy samy izy kosa avy eo no nifandringana.

mardi 20 octobre 2020

Talata 19 Oktobra 2020 - Lio 7 : 1 - 10


1Rehefa avy nampandre ny vahoaka izany teniny rehetra izany i Jesoa, dia niverina tany Kafarnahòma. 2Nisy kosa kapitenin-tafika nanana mpiasa narary efa ho faty, mpiasa sarobidy aminy tokoa. 3Vao nahaheno ny amin’i Jesoa ilay kapiteny, dia naniraka loholona jiosy hankany aminy hangataka Azy ho avy hanasitrana ilay mpiasa. 4Rehefa tonga teo amin’i Jesoa ireto iraka, dia niangavy Azy mafy hoe:

–Mendrika hanaovana izany io kapiteny io fa tia ny firenentsika, 5ary izy mihitsy aza no nanorina ny sinagôgantsika.

6Dia niara-nandeha tamin’ireo loholona i Jesoa. Ary rehefa mby akaikin’ny trano Izy, dia nanirahan’ilay kapiteny olona mahatoky indray hilaza aminy hoe:

–Aza misahirana toy izao re, Tompoko, fa tsy mendrika handrosoanao an-trano aho; 7ary izany no anton’ny tsy nisehoako vatana taminao; fa teny fotsiny re atao, dia ho sitrana anie ny mpiasako. 8Izaho manko, na ambany fahefàn’olona aza, mba mifehy miaramila ihany: ka raha misy ataoko hoe «Mandehana», dia mandeha izy; na misy antsoiko hoe «Avia», dia avy izy; ary raha ny mpiasako no ilazako hoe «Ataovy izao», dia manao izy.

9Gaga tamin’ilay kapiteny i Jesoa raha nandre izany, ary dia nitodika tamin’ny vahoaka nanaraka Azy ka nanao hoe:

–Lazaiko aminareo fa tsy mbola nahita finoana toy izany Aho, na dia tamin’i Israely aza!

10Nony tafaverina tany an-tranon’ilay kapiteny ireto iraka, dia nahita ilay mpiasa salama soa aman-tsara.

lundi 19 octobre 2020

Alatsinainy 19 Oktobra 2020 - Est 4 : 10 - 17

10fa mbola nirahin’ity mpanjakavavy indray izy hilaza amin’i Môrdôkay hoe: 11«Ny olona rehetra, hatramin’ny mpanompon’ny amperôra sy sarambabem-bahoaka any amin’ny faritany aza, dia samy mahalala fa na iza na iza mankeo amin’ny amperôra ho eo an-kianja anatin’ny lapa, na lehilahy na vehivavy, nefa tsy nantsoina, dia lalàna tokana manameloka ho faty no mihatra aminy; izay hotondroin’ny amperôra amin’ny tehim-bolamena ihany no ho velona. Izaho kosa efa telopolo andro izay no tsy nantsoina hankao amin’ny mpanjaka.» 12Rehefa nilazana ny tenin’i Estera i Môrdôkay, 13dia izao no nasainy navaly azy: «Aza mihevitra anakampo fa ho afaka irery amin’ny Jiosy rehetra ianao satria monina ao an-dapa. 14Raha hangina mihitsy ianao amin’ity toe-javatra ity, dia hisy fanampiana sy fanafahana hipoitra avy any an-kafa4.14 avy any an-kafa: firotsahan’Andriamanitra an-tsehatra no fonosin’izany fomba fiteny izany. ho an’ny Jiosy; fa ianao no haringana ary ho lany tamingana ny fianakavianao. Ary iza no mahalala fa angamba ho amin’ity toe-javatra ity mihitsy no nanandratana anao ho mpanjakavavy?» 15Izao kosa no nasain’i Estera navaly an’i Môrdôkay: 16«Ndeha vorio àry ny Jiosy rehetra eto Sosany; dia manaova fifadian-kanina noho ny amiko ianareo, ka aza mihinana na misotro mandritra ny telo andro sy telo alina. Hifady hanina toy izany koa ny tenako sy ireo mpanompovaviko; avy eo dia hankao amin’ny amperôra aho, na dia tsy ara-dalàna aza izany. Koa raha tsy maintsy ho faty aho, dia ho faty!» 17Dia lasa i Môrdôkay nanao araka izay rehetra nandidian’i Estera azy.

dimanche 18 octobre 2020

Alahady 17 Oktobra 2020 - II Tim 1 : 1 - 5

 1Avy amiko Paoly ity taratasy ity, dia izaho apôstôlin’i Kristy Jesoa noho ny sitrapon’Andriamanitra mba hitory ny fiainana nampanantenaina izay ananantsika tafaray amin’i Kristy Jesoa.

2Mamangy anao aho, ry Timôty1.2 Jereo Asa 16.1. zanako malala. Ho aminao anie ny fahasoavana sy ny famindrampo ary ny fiadanana avy amin’Andriamanitra Ray sy i Kristy Jesoa Tompontsika!

Fampirisihana mba ho mahatoky amin’ny finoana

3Velom-pisaorana an’Andriamanitra aho, dia Andriamanitra Izay tompoiko amin’ny fieritreretana mahitsy toy ny nataon’ireo razako1.3 Jiosy nanaraka tsara ny fivavahan-drazany ny fianakaviana nipoiran’i Paoly (jereo Fil 3.4-5).. Velom-pisaorana Azy aho rehefa mahatsiaro anao tsy tapaka amin’ny fivavahana ataoko andro aman’alina. 4Tsaroako ny ranomasonao1.4 Ao an-tsain’i Paoly ny alahelon’i Timôty fony nilaozany tany Efeso (jereo 1Tim 1.3)., ka tsy andriko mihitsy ny hahitako anao mba ho safononoka ny hafaliako. 5Tsahiviko ny finoana tsy mihatsaravelatsihy izay ao anatinao, dia ilay finoana efa nananan’i Lôisa renibenao sy i Eonika reninao talohanao. Azoko antoka fa anananao koa izany.

samedi 17 octobre 2020

Asabotsy 17 Oktobra 2020 - I Jao 1 : 5 - 10

 5Izao no hafatra renay tamin’i Jesoa Kristy, ka mba ambaranay aminareo: Andriamanitra dia fahazavana, ary tsy mba misy haizina akory ao aminy. 6Raha milaza ho manam-piombonana amin’Andriamanitra isika, nefa miaina ao amin’ny haizina, dia mandainga sady tsy manatanteraka ny hafatra marim-pototra. 7Andriamanitra dia ao amin’ny mazava: ka raha miaina ao amin’ny fahazavana tahaka Azy isika, dia misy fiombonana amintsika samy isika; ary ny ran’i Jesoa Zanany no manadio antsika ho afaka amin’ny karazam-pahotana rehetra.

8Raha milaza ho tsy manam-pahotana isika, dia mamita-tena, ary tsy ao anatintsika ny hafatra marim-pototra. 9Fa raha miaiky ny fahotantsika isika, dia mitana ny toky nomeny Andriamanitra sady miantra, ka hamela ny fahotantsika sy hanadio antsika ho afaka amin’ny ratsy isan-karazany1.9 Ampit Sal 32.1-5.. 10Raha milaza ho tsy nanota isika, dia mampandainga an’Andriamanitra sady tsy ao anatintsika ny teniny.

vendredi 16 octobre 2020

Zoma 16 Oktobra 2020 - I Sam 17 : 42 - 51

 42Dia nandinika an’i Davida ilay Filistinina ka naneso azy, satria hitany fa mbola tanora izy no mazava endrika17.42 Jereo 16.12 sy nta. ary tsara tarehy. 43Ary hoy i Gôliata tamin’i Davida:

–Alika angaha aho no hatonin’ialahy amin’ny tehina? Ho voaozona anie ialahy amin’ny alalan’ireo andriamanitray! 44Avia atỳ, fa homeko ny voro-manidina sy ny bibidia ny nofon’ialahy.

45Dia hoy ny navalin’i Davida azy:

–Manatona ahy amin’ny sabatra sy ny lefona ary ny lefom-pohy ianao, izaho kosa manatona anao amin’ny anaran’ny TOMPOn’izao rehetra izao, Andriamanitry ny tafik’i Israely, Izay efa nohantsinao. 46Anio ihany no hanoloran’ny TOMPO anao ho eo am-pelatanako, hahafaty anao aho ka hanapaka ny lohanao. Anio koa dia homeko hohanin’ny voro-manidina sy ny bibidia ny fatin’ny miaramila filistinina. Ary ho fantatry ny tany tontolo fa manana Andriamanitra tokoa i Israely. 47Dia ho fantatry ny Fiangonan’i Israely tsivakivolo koa fa tsy mba mila sabatra na lefona ny TOMPO hanomezam-pandresena. An’ny TOMPO ny ady, koa dia hatolony ho eo an-tananay ianareo.

48Raha vao nanomboka nihetsika hanatona an’i Davida ilay Filistinina, dia nihazakazaka mafy i Davida hitsena azy. 49Nandray vato tao anaty kitapony i Davida ary nandefa izany tamin’ny antsamotady ka nahavoa ilay Filistinina teo an-tampon-kandriny. Tafalentika teo ilay vato ka nidaraboka niankohoka tamin’ny tany izy.

50Toy izany no nandresen’i Davida an’i Gôliata ka namonoany azy tamin’ny antsamotady sy ny vato, fa tsy mba tamin’ny sabatra.

51Dia nihazakazaka nankeny amin’i Gôliata i Davida ka nanatsoaka ny sabatr’i ilay rapeto tamin’ny tranony ary nanapaka ny lohany. Koa rehefa hitan’ny Filistinina fa maty ilay maherifony, dia nitsoaka nandositra izy ireo.

jeudi 15 octobre 2020

Alakamisy 15 Oktobra 2020 - Mar 15 : 42 - 47

 42-43Efa hariva ny andro no tonga i Jôsefa avy any amin’ny tanàna atao hoe Harimatia15.42 Harimatia: jereo Mt 27.57 sy nta.. Lehilahy manan-kaja tao amin’ny Fitsarana ambony izy sady fatra-piandry ny Fanjakàn’Andriamanitra. Andro fiomanana tamin’io, izany hoe andro mialoha ny sabata; koa lasa i Jôsefa niditra tamim-pahasahiana tao an-tranon’i Pilato ary nangataka ny vatan’i Jesoa. 44Fa gaga i Pilato raha hoe maty sahady i Jesoa, ka dia nampiantso ny kapiteny ary nanontany azy raha efa ela no nahafatesany. 45Nony reny ny filàzan’ilay kapiteny, dia navelany homena an’i Jôsefa ny faty. 46Dia nividy lamba sarobidy i Jôsefa, ary nampidininy avy teo amin’ny hazofijaliana ny vatan’i Jesoa ka nofonosiny lamba sarobidy ary napetrany tao amin’ny fasana nolavahana tamin’ny vatolampy; dia nanakodiavany vato teo amin’ny vavafasana. 47Ary nataon’i Maria avy any Magdalà sy i Maria renin’i Jôsèta tsara jery ny toerana nametrahan’i Jôsefa an’i Jesoa.

mercredi 14 octobre 2020

Alarobia 14 Oktobra 2020 - I Kor 16 : 13 - 18

 13Miambena ianareo, mamahara tsara amin’ny finoana, aoka hitombandahy, mahereza. 14Ataovy amim-pitiavana ny zavatra rehetra.

15Fantatrareo ry i Stefanasy mianakavy16.15 Jereo 1.16.: ireo no kristianina voalohany tany Akaîa sady nanokan-tena hanampy ny vahoakan’Andriamanitra. Mangataka anareo aho, ry havako, 16mba hanaiky tsara ny olona tahaka ireny mbamin’izay rehetra miara-miasa sy miara-misasatra aminy.

17Mahafaly ahy ny fahatongavan’i Stefanasy sy i Fôrtnato ary i Akaîko, fa ireo no nahefa ny tsy vitanareo. 18Sady namelombelona ahy izy telo lahy no namelombelona anareo. Koa mahaiza mankasitraka ny olona tahaka ireny.

mardi 13 octobre 2020

Talata 13 Oktobra 2020 - Gen 22 : 1 - 14

 1Taorian’izany toe-javatra izany, dia nizaha toetra an’i Abrahama Andriamanitra ka niantso azy hoe:

–Ry Abrahama!

Dia namaly i Abrahama hoe:

–Inty aho.

2Dia hoy Andriamanitra hoe:

–Ento i Itsehàka zanakao lahitokana izay tianao; dia mandehana any amin’ny tany Môrià eo ambonin’ny tendrombohitra anankiray izay holazaiko anao, ka atolory ho sorona dorana eo izy22.2 Môrià: jereo 2 Tan 3.1. –atolory ho sorona dorana eo izy: jereo Heb 11.17-19..

3Dia nifoha vao maraina be i Abrahama nony ampitso. Namaky kitay hanaovana sorona izy, dia nanisy lasely ny borikiny ary niainga ho any amin’ny toerana izay voatondron’Andriamanitra. Nentiny niaraka taminy koa ny zatovony roa lahy sy i Itsehàka zanany lahy. 4Nony afaka ampitso maraina dia tazan’i Abrahama tery lavitra tery ny tendrombohitra izay halehany. 5Koa hoy izy tamin’ireo zatovony roa lahy:

–Mijanòna eto ianareo miaraka amin’ny boriky, fa izaho sy ny zazalahy handeha hatreny an-tendrombohitra mba hivavaka amin’Andriamanitra, dia hiverina aty aminareo indray.

6Dia nalain’i Abrahama ny kitay hanaovana sorona ka natataony an’i Itsehàka zanany; fa izy kosa nitondra ny vainafo sy ny antsy. Ary raha mbola niara-nandeha izy mianaka, 7dia hoy i Itsehàka tamin’i Abrahama rainy:

–Dada ô!

Ka novaliany hoe:

–Mihaino anao aho, anaka.

Ary hoy i Itsehàka hoe:

–Indreo ny vainafo sy ny kitay, fa aiza kosa ny zanak’ondry hatao sorona dorana manontolo?

8Fa namaly azy i Abrahama hoe:

–Andriamanitra no hahita izay zanak’ondry hatao sorona dorana manontolo, anaka!

Dia niara-nanohy ny diany izy mianaka. 9Rehefa tonga teo amin’ny toerana izay voatondron’Andriamanitra izy ireo, dia nanorina alitara teo i Abrahama sady nandahatra ny kitay. Dia namatotra an’i Itsehàka zanany izy, ka nametraka azy teo amin’ny alitara, teo ambony kitay. 10Ary naninji-tanana handray ny antsy i Abrahama mba hamonoana ny zanany. 11Fa niantso azy avy any an-danitra ny anjelin’ny TOMPO ka nanao hoe:

–Abrahama ô! Abrahama ô!

Hoy kosa ny navalin’i Abrahama azy:

–Inty aho.

12Dia hoy indray ilay anjely:

–Aza maninji-tanana amin’io zazalahy io ianao ary aza manao aminy na inona na inona akory, satria fantatro ankehitriny fa manaja Ahy ianao; ka, na dia ny zanaka lahitokanao aza, dia tsy narovanao tamiko.

13Dia nanopy maso i Abrahama ka nahatazana ondrilahy iray voasarangotry ny kirihitr’ala ny tandrony; dia lasa i Abrahama naka ilay ondrilahy, ka nanolotra azy ho sorona dorana manontolo ho solon’ny zanany lahy. 14Dia nataon’i Abrahama hoe «Ny TOMPO no hahita» ny anaran’izany toerana izany ary mbola fiteny ankehitriny ny hoe: «Any an-tendrombohitra ny TOMPO no hahita22.14 Jereo and 8..»

lundi 12 octobre 2020

Alatsinainy 12 Oktobra 2020 - Asa 13 : 6 - 12

 6Namakivaky ny nosy manontolo izy roa lahy mandra-pahatongany tany Pafo. Tao no nahitany mpanao majika atao hoe Barjesoa, lehilahy nihambo ho mpaminany. 7Io Barjesoa io dia niara-nitoetra tamin’i Serzy Paoly, izay governoran’ny nosy Sipra sady lehilahy hendry. Nampiantso an’i Barnabà mbamin’i Saoly ilay governora satria naniry mafy handre ny tenin’Andriamanitra. 8Fa nanohitra azy roa lahy kosa i Barjesoa Elimà, ilay mpanao majîka (fa izany no dikan’ny anarana hoe Elimà), ka nitady hampiverina ilalana an’ilay governora tsy hirosoany amin’ny finoana. 9Tamin’izay i Saoly, atao koa hoe Paoly13.9 Saoly: anarana jiosy niantsoana an’i Paoly apôstôly fa ny hoe Paoly dia anarana rômanina (jereo 22.27-29)., dia tonga feno Fanahy Masina ka nibanjina an’i Elimà 10sady nanao hoe:

–Ry ilay andevozin’ny devoly ity! Feno fitaka sy faharatsiana isan-karazany ianao, ary mpanohitra ny marina rehetra nosoritan’Andriamanitra! Mbola te hisompatra foana ny lala-mahitsin’ny Tompo ve ianao? 11Ankehitriny, indro hasian’ny tanan’ny Tompo ianao ka ho jamba tsy hahita ny fahazavan’ny masoandro mandritra ny fotoana voafetra.

Niaraka tamin’izay dia sarona haizina ny mason’i Elimà, ka niraparapa izy nitady olona hitantana azy. 12Nony nahita ny zava-nitranga ilay governora, dia tonga mpino sady talanjona fatratra tamin’ny fampianarana momba ny Tompo.

samedi 10 octobre 2020

Asabotsy 10 Oktobra 2020 - I Tan 14 : 8 - 17

 8Nony ren’ny Filistinina fa efa voahosotra ho mpanjaka amin’i Israely manontolo i Davida, dia niakatra ny Filistinina rehetra mba hambabo an’i Davida. Nahare izany i Davida, ka nivoaka hifanehatra amin’ireo. 9Dia tonga ny Filistinina ka nandroba tao amin’ny lohasahan’ny Refaîta14.9 ny lohasahan’ny Refaîta: dia ao atsimo andrefan’i Jerosalema.. 10I Davida kosa nanontany an’Andriamanitra hoe:

–Handeha hamely ny Filistinina ve aho? Ary hatolotrao ho eo an-tanako ve ireo?

Ka hoy ny TOMPO taminy:

–Mandehana fa hatolotro ho eo an-tananao ireo.

11Dia niakatra nankao Bahala-Peratsima i Davida ka namely ny Filistinina tao. Ary hoy i Davida hoe:

–Ny tanako no namakian’Andriamanitra ny fahavaloko hipariaka toy ny rano vaky.

Izany no nanaovana ny anaran’io toerana io hoe Bahala-Peratsima. 12Dia nilaozan’ny Filistinina teo ireo andriamaniny ka nasain’i Davida nodorana tamin’ny afo.

13Avy indray ny Filistinina ka nandroba tao amin’ny lohasahan’ny Refaîta. 14Dia mbola nanontany an’Andriamanitra indray i Davida ka novaliany hoe:

–Aza miakatra hanenjika azy; fa mivilia lavidavitra azy, dia manatòna azy avy eo amin’ny tandrifin’ny foto-boaroihazo14.14 foto-boaroihazo: tsy azo antoka loatra ny karazan-kazo; ny dkt sasany manao hoe hazo balsama.. 15Ary rehefa mahare hoatra ny figodongodon’olona eny an-tendron-kazo ianao, dia miaingà amin’izay hiady, satria efa miainga mialoha anao Andriamanitra mba handresy ny tafiky ny Filistinina.

16Dia nanao araka izay nandidian’Andriamanitra azy i Davida, ka nandresy ny tafiky ny Filistinina hatreo Gibehôna ka hatrany Gezera14.16 Gibehôna: jereo 1 Mp 3.4 sy nta. –Gezera: jereo 2 Sam 5.25 sy nta.. 17Dia niely eran’ny tany rehetra ny lazan’i Davida, ary nataon’ny TOMPO matahotra an’i Davida ny firenena rehetra.

vendredi 9 octobre 2020

Zoma 09 Oktobra 2020 - Jod 17 - 23

 17Ianareo kosa, ry hava-malala, tsarovy ny teny efa nolazain’ireo apôstôlin’i Jesoa Kristy Tompontsika; 18satria izao no voalazany taminareo: «Amin’ny andro farany dia hisy mpaniratsira, hiaina araka ny filàn’ny haratsiam-panahiny1.18 Ampit 2Pt 3.3..» 19Ireo mpampianatra sandoka ireo no mahatonga fisaratsarahana, satria entin’ny maha olombelona ihany fa tsy mba manana ny Fanahin’Andriamanitra. 20Ianareo kosa, ry hava-malala, ataovy izay handrosoanareo amin’ny finoana masina indrindra efa anananareo, ka mivavaha ombàn’ny herin’ny Fanahy Masina; 21mitahiriza tena ao amin’ny fitiavan’Andriamanitra, ka mahandrasa ny famindrampon’i Jesoa Kristy Tompontsika hahazoanareo fiaina-maharitra mandrakizay. 22Reseo lahatra1.22 Reseo lahatra: misy stf sasany ahitana hoe Amindrao fo. ny sasany izay miahanahana; 23ny sasany indray, sariho ho afaka amin’ny afo no famonjy azy; ary ny sasany kosa amindrao fo, saingy mitandrema tsara ka ankahalao na dia ny akanjo voaloton’ny maha olona mpanota azy aza.

jeudi 8 octobre 2020

Alakamisy 08 Oktobra 2020 - II Tes 3 : 1 - 5

 1Farany, ry havana, mivavaha ho anay mba hiely faingana ny tenin’ny Tompo, ka hankatoavina araka ny voninahitra tandrify azy, toy ny teo aminareo. 2Mivavaha koa mba hanafahan’Andriamanitra anay amin’ny olona tsy valahara sy ratsy fanahy; satria tsy ary manana finoana avokoa ny olona rehetra.

3Fa mitana ny toky nomeny ny Tompo, ka hampahery anareo sady hiaro anareo tsy ho azon’ilay Ratsy3.3 Ampit Mt 6.13; Jôh 17.15.. 4Ary omen’ny Tompo fitokiana izahay ny momba anareo, ka azonay antoka fa ny zavatra ameperanay anareo dia efa ataonareo sady mbola hataonareo hatrany.

5Ny Tompo anie hitarika ny fonareo hahatsapa ny fitiavan’Andriamanitra anareo sy hanam-paharetana miandry ny fiavian’i Kristy3.5 hahatsapa... Kristy: dkt hafa ho amin’ny fitiavana an’Andriamanitra sy ny faharetana omen’i Kristy.!

mercredi 7 octobre 2020

Alarobia 08 Oktobra 2020 - Jao 9 : 39 - 41

 Sady niankohoka teo anatrehany izy.

39Dia hoy i Jesoa:

–Ho fitsarana no nahatongavako eto amin’izao tontolo izao, mba hahiratra izay tsy mahiratra ary ho tonga jamba izay mahiratra!

40Nandre izany ny Farisianina sasany teo ka nanao taminy hoe:

–Izahay koa ve jamba?

41Dia hoy i Jesoa taminy:

–Raha jamba ianareo, dia tsy ho nanan-keloka; fa noho ianareo ankehitriny manao hoe: «Mahiratra izahay», dia tsy afaka ny helokareo.

mardi 6 octobre 2020

Talata 06 Oktobra 2020 - Asa 4 : 5 - 17

 5Nony ampitson’iny vao nifamory tao Jerosalema ny manampahefana jiosy: dia ny loholona sy ny mpahay lalàna 6ary koa i Hanà mpisorombe sy i Kaiàfa, i Jôhany sy i Aleksandra mbamin’izay rehetra havan’ny mpisorombe. 7Nampanatrehan-dry zareo i Petera sy i Jôhany sady nanontaniany hoe:

–Fahefana ahoana moa na amin’ny anaran’iza no nanaovanareo izany fanaratsiana izany?

8Feno Fanahy Masina i Petera tamin’izay ka nanao hoe:

–Ry mpifehy ny vahoaka sy ry loholona, 9raha adinina izahay anio satria nanasoa lehilahy kilemaina anankiray ary anontaniana ny fomba nahasitranany, 10dia izao no aoka ho fantatrareo rehetra mbamin’ny vahoaka Israely manontolo: salama tsara io lehilahy manoloana anareo io noho ny anaran’i Jesoa Kristy avy any Nazareta, Izay nohomboanareo tamin’ny hazofijaliana kanefa natsangan’Andriamanitra ho velona avy any amin’ny maty. 11I Jesoa no Ilay voalazan’ny Soratra Masina hoe:

«Ny vato nolavinareo mpanao trano

no nanjary vato fehizoro4.11 Sal 118.22.!»

12Ao aminy no hany ahazoam-pamonjena; eny, tsy misy eto ambanin’ny lanitra anarana hafa nomen’Andriamanitra ny olona, izay hahazoantsika famonjena!

13Gaga dia gaga ireo anisan’ny Fitsarana ambony raha nahita ny fahasahiana nasehon’i Petera sy i Jôhany: satria tandriny tokoa fa olona tsotra tsy nahita fianarana izy roa lahy, sady fantany fa olona niaraka tamin’i Jesoa; 14hitany koa ralehilahy sitrana soa aman-tsara nitsangana teo anilan’izy roa lahy, hany ka tsy nanan-kolazaina ry zareo.

15Dia nasaina niala teo amin’ny efitranon’ny Fitsarana ambony ireto voampanga fa ry zareo kosa nifampidinika 16nanao hoe:

–Inona no hataontsika amin’ireo lehilahy ireo? Ny mponina rehetra eto Jerosalema dia mahalala miharihary ny famantarana vitany ka tsy haintsika lavina. 17Kanefa mba tsy hielezan’izany intsony amin’ny vahoaka, dia aoka horahonantsika izy roa lahy ka hosakanana tsy hiteny amin’ny anaran’i Jesoa intsony na amin’iza na amin’iza.

Talata 11 Aprily 2023 - Isa 52 : 7 - 12