28–Raiso ho anatra ity fanoharana* avy amin'ny aviavy ity: Raha vao manaroka ny rantsany ka mandravina, dia fantatrareo fa efa akaiky izay ny fahavaratra. 29Toy izany koa, raha vao hitanareo tonga izany rehetra izany, dia fantaro fa efa akaiky ny Zanak'olona*13.29 efa akaiky ny Zanak'olona... am-baravarana: dkt hafa efa akaiky ny farany ary mby eo am-baravarana (ny farany eto dia sady milaza ny hiafaran'i Jerosalema no milaza ny farandro hiavian'ny Zanak'olona amim-boninahitra). ary mby eo am-baravarana. 30Lazaiko marina aminareo fa mbola tsy ho tapitra akory ity taranaka ity, dia ho tonga izany rehetra izany. 31Ho levona ny tany amana habakabaka, fa ny teniko tsy mba ho levona.
32–Fa ny amin'izay andro sy ora hahatongavan'izany, dia tsy misy mahalala na ny anjely* any an-danitra na ny Zanak'olona*, fa Izy Ray ihany. 33Mitandrema sy miareta tory ary mivavaha fa tsy fantatrareo izay hahatongavan'izany fotoanandro izany. 34Ho tahaka ny amin'ity lehilahy handeha any an-tany hafa izany: nandao ny tranony ralehilahy ary nizara fahefana tamin'ireo mpiasany ka samy notolorany ny raharahany avy, dia nanafatrafatra ny mpiandry vavahady hiambina. 35Koa miambena àry fa tsy fantatrareo ny fotoana hiavian'ny tompon-trano, na ho hariva, na ho mamatonalina, na ho maneno akoho, na ho maraina. 36Tandremo sao tonga tampoka izy ka hitany matory ianareo. 37Ary izao lazaiko aminareo izao, dia lazaiko amin'ny olona rehetra koa: Miambena!
