Alakamisy 31 Desambra 2015 - Isa 44 : 21 - 23

21Ry firenen'i Jakôba, ry vahoaka Israely,
aoka hotsarovanao izao: «Mpanompoko ianao!
Izaho no namolavola anao hanompo Ahy.
Tsy hohadinoiko ianao, ry vahoaka Israely!
22Nofafako toy ny rahona ny fahadisoanao
ary nolevoniko toy ny zavona ny fahotanao.
Koa miverena amiko ianao fa efa navotako.»

23Miasa ny TOMPO ka mihobia, ry lanitra,
ary miravoravoa, ry fanambanin'ny tany.
Ataovy manako ny hoby, ry tendrombohitra
mbamin'ny ala sy ny hazo rehetra ao,
fa ny TOMPO efa nanavotra ny firenen'i Jakôba
ary efa naneho voninahitra tamin'ny vahoaka Israely.

Alarobia 30 Desambra 2015 - Eks 23 : 25 - 30

25Izaho TOMPO Andriamanitrareo irery ihany no hivavahanareo; amin'izay Aho dia hitahy anareo ka hanome anareo sakafo sy fisotro, sady hampanalavitra ny aretina aminareo. 26Tsy hisy vehivavy ho afa-jaza na ho momba eo amin'ny taninareo, ary hataoko ela velona ianareo.
27«Halefako hialoha anareo ny tahotra Ahy, ka hisavoritaka ny firenena rehetra izay hidiranareo.28Halefako hialoha anareo koa ny takolapanenitra ka hampandositra ny Hivita sy ny Kanahanita ary ny Hetita mialoha ny fahatongavanareo. 29Tsy hampandosiriko anareo ao anatin'ny taona iray ihany anefa ireo firenena ireo, fandrao hanjary ho lao ny tany ka hihamaro hamely anareo ny bibidia.30Horoahiko tsikelikely ny fahavalonareo, arakaraka ny hihamaroanareo ka handraisanareo ny tany ho anareo.

Talata 29 Desambra 2015 - Rom 1 : 1 - 7

1Avy amiko Paoly mpanompon'i Kristy* Jesoa ity taratasy ity, dia izaho nantsoin'Andriamanitra ho apôstôly*, ary natokany mba hampahafantatra ny Vaovao Mahafaly* avy aminy.
2Ao amin'ny Soratra Masina no efa nampanantenain'Andriamanitra tamin'ny alalan'ny mpaminany*io Vaovao Mahafaly io: 3dia ny amin'ny Zanany*, i Jesoa Kristy Tompontsika. Araka ny maha olombelona, dia avy amin'ny taranak'i Davida mpanjaka i Jesoa; 4araka ny Fanahy Masina kosa, dia naharihary tamin-kery fa Zanak'Andriamanitrajereo Mt 1.1. –Zanak'Andriamanitra: jereo Sal 2.7.'>fony Izy tafatsangana velona avy tany amin'ny maty. 5Tamin'ny alalan'i Jesoa Kristy no nandraisanay tombon-tsoa maha apôstôly ho voninahitr'i Kristy, mba hitarihanay ny firenen-drehetra hino sy hanaiky Azy. 6Ary ianareo, voaantson'Andriamanitra mba hatokana ho an'i Kristy, dia isan'ireny olona notarihinay ireny koa.

7Mamangy anareo atỳ Rôma aho, dia ianareo rehetra malalan'Andriamanitra sy nantsoiny ho vahoakany*. Ho aminareo anie ny fahasoavana sy ny fiadanana avy amin'Andriamanitra Raintsika sy i Jesoa Kristy Tompo!

Alatsinainy 28 Desambra 2015 - Sal 111 : 1 - 10

1 Haleloià*!
ALEFA
              Hoderaiko amin'ny foko manontolo ny TOMPO
BETA
              eo amin'ireo olo-mahitsy
              tafavory sy tafangona.
GIMELA
              2Lehibe ny asa ataon'ny TOMPO
DALETA
              ka tsapan'izay rehetra mankafỳ an'ireny.
HE
              3Madera sady malaza ny zava-bitany;
VAO
              maharitra mandrakizay ny fahamarinany.
ZAINA
              4Tiany hotsaroana ny zava-mahagaga nataony.
HETA
              Miantra sy mamindrafo ny TOMPO.
TETA
              5Omeny sakafo ireo matahotra Azy;
JODA
              tsaroany lalandava ny fanekempihavanany.
KAFA
              6Ny vahoakany nanehoany ny hery ampiasainy,
LAMEDA
              fony nomeny azy ny tanin'ireo hafa firenena.
MEMA
              7Mahatoky sy ara-drariny ny asa vitany;
NONA
              azo antoka avokoa ny fandaharany:
SAMEKA
              8mafy orina hatrany ka ho mandrakizay ireny,
HAINA
              mahatoky sy mahitsy no nanaovany azy.
PE
              9Nandefasany fanafahana ny vahoakany
TSADE
              sy nandraiketany fanekempihavanana mandrakizay.
KÔFA
              Andriamanitra masina sy mahatahotra Izy.
RESA
              10Ny fanajana ny TOMPO no loharanom-pahendrena:
SINA
              malina tsara izay rehetra mankatò izany.
              Maharitra mandrakizay ny fiderana ny TOMPO.

Alahady 27 Desambra 2015 - Lio 2 : 15 - 20

15Rehefa nilaozan'ny anjely* niverina any an-danitra ireto mpiandry* ondry, dia nifampiresaka hoe:
–Andao mihitsy ho any Betlehema isika hizaha izany zava-baovao nampahalalain'ny Tompo antsika izany!

16Dia nandeha faingana izy ireo nankany, ka nahita an'i Maria sy i Jôsefa ary nahita zazakely mandry eo amin'ny fihinanam-bilona. 17Nony avy nahita ireto mpamangy, dia nampiely ny teny nolazain'ny anjely taminy momba io zazakely io; 18ary izay rehetra nandre dia gaga tamin'ny zavatra voalazan'ireo mpiandry ondry. 19I Maria kosa nitadidy izany rehetra izany ka nieritreritra azy tao am-pony. 20Dia lasa nody ireo mpiandry ondry ka nanome voninahitra sy dera an'Andriamanitra noho izay rehetra reny sy hitany, araka ny voalazan'ny anjely taminy.

Sabotsy 26 Desambra 2015 - Jao 1 : 14 - 18

14Ilay Teny dia tonga olombelona, ka niara-nonina taminay. Feno fahasoavana sy fahamarinana Izy ary hitanay ny voninahiny, dia voninahitra avy amin'ny Ray ho an'ny Zanaka lahitokana. 15Vavolombelona manambara Azy i Jôhany ka niantso mafy hoe:
–Izy no Ilay voalazako hoe: «Ilay tamy aoriako dia lehibe noho izaho, satria efa nisy talohako.»

16Feno harem-pahasoavana ilay Teny ka nandraisantsika rehetra fahasoavana tovozin-tsy ritra: 17satria ny lalàna* dia nomen'Andriamanitra tamin'ny alalan'i Mosesy, fa ny fahasoavana sy ny fahamarinana kosa dia tonga tamin'ny alalan'i Jesoa Kristy*. 18Tsy nisy nahita an'Andriamanitra na oviana na oviana; fa ny Zanaka lahitokana, Izay Andriamanitra sy miombona tanteraka amin'ny Ray, no efa nanambara Azy.

Zoma 25 Desambra 2015 - Isa 9 : 1 - 6

1Ny vahoaka mandeha ao anatin'ny haizina
dia hahita hazavana lehibe;
ary ny olona mipetraka ao amin'ny tany
izay tandindomin'ny fahafatesana
dia hiposahan'ny hazavana.
2Nohamaroinao ny fifaliany
ary nampitomboinao ny firavoravoany.
Miravoravo eo anatrehanao izy
tahaka ny iravoravoana amin'ny fararano
sy anaovana antsoantsom-pifaliana
rehefa injay mizara babo ny olona.

3Fa ny ziogam*-pamoretana nanindry ny vahoakanao
ny tsora-kazo nikapohana ny lamosiny,
ny kibay namelezan'ny mpampiasa azy
dia samy hopotehinao avokoa
toy ny tamin'ny andro nampandosiranao ny Midianita'>.
4Fa ny kiraro rehetra entim-pahavalo
ka mikatrokatroka mampihozongozon-tany
ary ny fitafiana rehetra voahorona mihosin-dra
dia samy hodorana avokoa ho levon'ny afo.
5Satria misy zaza teraka ho antsika,
zazalahy no omena antsika;
eny an-tsorony ny mari-piandrianany,
ary ny anaram-boninahiny dia hatao hoe:
Mpitondra mahay, Andriamanitra mahery,
Ray mandrakizay, Andriana mitondra ny fiadanana.
6Hanao izay hanitarana ny fahefàny izy
ary hampisy fiadanana tsy misy fetra.
Ny sezafiandrianan'i Davida no hipetrahany
ary ny fanjakany no hofeheziny
ka haoriny sy hohamafisiny
amin'ny rariny sy ny hitsiny,
hatramin'izao ka ho mandrakizay.
Izany no hotanterahin'ny TOMPOn'izao rehetra izao,
vokatry ny firedaredam-pitiavany

Alakamisy 24 Desambra 2015 - Lio 1 : 26 - 38

26Rehefa bevohòka enim-bolana i Elizabeta, dia nirahin'Andriamanitra ny anjely* Gabriela ho any amin'ny tanàna anankiray any Galilea atao hoe Nazareta, 27hankao amin'ny tovovavy fofombadin'ny lehilahy atao hoe Jôsefa. Io Jôsefa io dia taranak'i Davida mpanjaka; ary i Maria no anaran'ilay tovovavy.

28Niditra tao an-tranon'i Maria ilay anjely ka nanao taminy hoe:
–Mifalia, ry nohasoavin'ny Tompo! Momba anao hatrany Izy!

29Taitra tokoa i Maria noho izany teny izany, ka nieritreritra izay mety ho hevitr'ilay fiarahabana.

30Ary hoy ny anjely taminy:
–Aoka izay ny tahotra, ry Maria, fa efa nahazo tombon-tsoa tamin'Andriamanitra ianao! 31Hitoe-jaza ianao, ho tera-dahy, ary i Jesoa no hataonao anarany. 32Ho lehibe Izy sady hantsoina hoe Zanaky ny Avo indrindra. Ny Tompo Andriamanitra hahatonga Azy ho mpanjaka handimby an'i Davida razambeny; 33dia hanjaka mandrakizay amin'ny vahoaka Israely* Izy ary tsy hanam-pahataperana ny Fanjakàny.

34Fa hoy i Maria tamin'ny anjely:
–Hanao ahoana àry no hahatanterahan'izany, fa izaho manko virijiny?

35Dia novalian'ny anjely hoe:
–Ho tonga eo aminao ny Fanahy Masina, ka ny herin'ny Avo indrindra hanarona anao. Noho izany ilay Masina haterakao dia hantsoina hoe Zanak'Andriamanitra*. 36Ary indro i Elizabeta havanao efa mitoe-jaza koa, na iny izy antitra iny aza, ary efa bevohòka enim-bolana izao ilay natao hoe momba.

37Fa tsy misy zavatra tsy ho vitan'Andriamanitra!

38Tamin'izay dia hoy i Maria:
–Intỳ aho mpanompovavin'ny Tompo, aoka anie ho tonga amiko araka ny teninao!

Dia nandao azy ilay anjely.

Alarobia 23 Desambra 2015 - Mik 5 : 1 - 5

1Dia hoy ny Tompo hoe:
«Ianao, ry Betlehema Efratà,
isan'ireo tanàna kely indrindra ao Joda ianao!
Kanefa avy aminao no hamoahako
ilay ho Mpanjaka an'i Israely.
Efa hatramin'ny fahagola no niandohany,
dia hatramin'ny andro taloha elabe.»

2–Noho izany, ny Tompo dia hanolotra ny vahoakany
amin'ny fahavalo
mandra-piavin'ny andro hahatera-dahy ny vehivavy iray;
ka izay sisa velona, amin'ireo rahalahiny
voasesi-tany,
dia hiverina ho any amin'ireo Israelita namany.
3Ary hitsangana hitondra ny vahoaka
izany mpanapaka nampanantenaina izany,
hombàn'ny hery sy heniky ny famirapiratana
avy amin'ny TOMPO Andriamaniny.
Dia handry feizay ny vahoakany,
satria ho lehibe hatrany am-paran'ny tany
izany mpanapaka izany:

4izy no hitondra fiadanana!
–Raha tonga hanafika ny tanintsika ny Asirianina
ka hitsofoka hatraty an-dapantsika,
dia hanangana mpitari-tafika marobe hamelezana azy isika.
5Ary handresy amin'ny sabatra sy lefom-pohy
ireo mpitari-tafika ireo
ka hifehy an'i Asiria, tanin'i Nimrôda.
Izany mpanapaka izany mihitsy
no hanafaka antsika–Izany mpanapaka izany mihitsy no hanafaka antsika: dkt hafa Ireo no hanafaka antsika (jereo and 2, 3).'> amin'ny Asirianina
izay hihoatra sisitany
ka ho tonga hanafika ny tanintsika.

Talata 22 Desambra 2015 - I Tan 16 : 28 - 37

28Ianareo fianakaviamben'ny firenen-drehetra, tolory haja ny TOMPO fa be voninahitra sy hery.

29Tolory haja ny TOMPO satria be voninahitra Izy. Mitondra fanatitra ka mankanesa eo anatrehany; dia miankohofa eo anatrehan'ny TOMPO, rehefa miseho ny fahamasinany.

30Mangovita eo anoloany, ry mponin'ny tany tontolo, fa izao rehetra izao voaorina mafy ka tsy hihontsona.

31Aoka hifaly ny lanitra, ary hiravoravo ny tany! Lazao amin'ny olona hoe: "Ny TOMPO no mpanjaka!"

32Aoka hirohondrohona ny ranomasina mbamin'izay ao anatiny! Aoka hibita-kafaliana ny saha mbamin'izay rehetra ao aminy!

33Aoka ny hazo any an'ala hihoby mba hitsena ny TOMPO, satria tamy Izy. Eny, tamy Izy mba hifehy ny tany.

34Midera ny TOMPO ianareo fa tsara Izy: Eny, maharitra mandrakizay ny fitiavany.

35Lazao hoe: "Vonjeo izahay, ry Andriamanitra mpamonjy anay o! Afaho avy any amin'ny hafa firenena izahay ka angony mba hideranay ny anaranao masina, sy hireharehanay amin'ny fankalazana Anao !"

36Hisaorana anie ny TOMPO Andriamanitr'i Israely hatrizay hatrizay ka ho mandrakizay. Ary ny vahoaka rehetra niredona hoe: " Amen!" sy hoe: "Ankalazao ny TOMPO!"

37Dia teo anoloan'ny Vatamasina mirakitra ny fanekem-pihavanan'ny TOMPO teo i Davida no nanankina adidy tamin-dry i Asafa sy ny namany mba hanao fanompoam-pivavahana tsy an-kiato eo, araka ny raharaha tokony hatao isan'andro,

38nanankinany adidy koa ry i Hobeda-Edoma sy ny namany 68 lahy, sy ilay Hobeda-Edoma zanakalahin'i Jeditona, ary i Hosa mba ho mpiandry vavahady

Alatsinainy 21 Desambra 2015 - Rom 11: 33 - 36

33Endrey tsy hita pesimpesenina ny haren'Andriamanitra sy ny fahendreny ary ny fahalalany! Endrey tsy takatry ny saina ny fitsarany ary tsy azo fantarina ny lalany!

Ka hoy ny Soratra Masina* hoe:
34«Iza no mahalala ny hevitry ny Tompo,
ary zovy no mpanolo-tsaina Azy?

35Iza no nanome zavatra Azy voalohany
mba handray valiny avy aminy?»

36Fa Izy no iavian'ny zavatra rehetra, Izy no mihazona azy, ary Izy no iafarany. Ho Azy mandrakizay anie ny voninahitra! Amen*.

Alahady 20 Desambra 2015 - Fil 1 : 9 - 11

9Ary izao no tonombavaka ataoko ho anareo: hitombo bebe kokoa hatrany anie ny fitiavanareo ka hombàn'ny fahalalana marina sy ny tena fahatakaran-javatra 10mba hahaizanareo mifidy izay tsara; dia hadio sady tsy hanan-tsiny amin'ny andro hiavian'i Kristy ianareo, 11ary ho heniky ny vokatry ny fahamarinana, izay avy amin'ny alalan'i Jesoa Kristy, mba hanomezam-boninahitra sy hiderana an'Andriamanitra.

Sabotsy 19 Desambra 2015 - Eks 29 : 38 - 46

38«Zanakondry iray taona roa isan'andro no hatolotra tsy tapaka eo ambony alitara*. 39Ny iray hatolotra ny maraina, ary ny iray hatolotra ny hariva. 40-41Miaraka amin'ny zanakondry amin'ny maraina sy ny hariva, dia hitondrana koba telopolo kilao efa voakapoka amin'ny diloilo tsara iray litatra sy sasany sy fanatitra divay iray litatra sy sasany. Ireo dia ho sorona* atolotra Ahy TOMPO, ka ho hanitra ankasitrahina ho Ahy. 42Amin'ny hoavy dia tsy ho tapaka na oviana na oviana ny fanolorana sorona dorana manontolo ho Ahy TOMPO eo am-baravaran'ny Tranolay fihaonana*, fa eo no hihaonako aminareo sy hitenenako aminao.

43«Eo amin'io toerana io no hihaonako amin'ny Israelita, ka ny voninahitro hanome hasina izany. 44Ny tenako mihitsy no hanokana ny Tranolay fihaonana sy ny alitara, tahaka ny hanokanako an'i Aharôna sy ny zanany lahy ho mpisorona ho Ahy. 45Hitoetra eo anivon'ny Israelita Aho sady ho Andriamaniny. 46Ka amin'izay no hiekeny fa Izaho no TOMPO Andriamaniny, dia Izaho Ilay namoaka azy hiala tany Ejipta mba hahazoako miara-monina aminy.
«Izaho no TOMPO Andriamaniny.»

Zoma 18 Desambra 2015 - Apo 4 : 9 - 11

9Raha maninona ny tanora no hadio toetra?
Raha mitandrina ny teninao.
10Amin'ny foko manontolo no itadiavako Anao,
koa aza avela handao ny didinao aho.
11Raketiko ato am-poko ny hafatrao
mba tsy hanotako aminao.

Alakamisy 17 Desambra 2015 - Mpi 13 : 8 - 25

8Dia nivavaka tamin'ny TOMPO i Manôà ka nanao hoe:
–Tompo ô, miangavy anao aho, mba avereno atỳ aminay ilay lehilahin'Andriamanitra izay efa nirahinao ka hampianatra anay ny tokony hataonay amin'ny zaza izay ho teraka.

9Dia nohenoin'Andriamanitra ny fangatahan'i Manôà; koa niseho tamin-dravehivavy indray ilay anjely raha mbola tany an-tsaha izy. Tsy tafaraka taminy anefa ny lahy; 10koa nihazakazaka ravehivavy nampandre azy hoe:
–Miseho amiko ao indray ange ilay lehilahy tonga tamiko indray andro.

11Dia nanaraka ny vadiny avy hatrany i Manôà, ka nankany amin-dralehilahy ary nanontany azy hoe:
–Ianao ve ilay lehilahy izay niteny tamin'ny vadiko?

Ka novaliany hoe:
–Eny, izaho no izy.

12Fa hoy indray i Manôà hoe:
–Izao àry, rehefa ho tanteraka tokoa ny teninao, dia inona no fitsipika tokony harahinay momba ny zaza? Ary inona no tokony hataonay aminy?

13Dia hoy ilay anjelin'ny TOMPO tamin'i Manôà:
–Tokony hotandreman'ny vadinao avokoa izay rehetra nolazaiko taminy: 14tsy mahazo mihinana izay rehetra avy amin'ny voaloboka izy, tsy hisotro divay na toaka, tsy hihinana sakafo maloto; izay rehetra nandidiako azy dia tokony hotandremany avokoa.

15Ary hoy i Manôà tamin'ilay anjelin'ny TOMPO:
–Mba mijanòna kely aloha ianao ambara-pamboatray zanak'osy ho anao.

16Fa novalian'ilay anjely hoe:
–Na hijanona aza aho, dia tsy hihinana ny sakafo amboarinao; fa raha te hanao sorona* dorana manontolo ianao, dia atolory ho an'ny TOMPO izany.

Fa mbola tsy fantatr'i Manôà ho anjelin'ny TOMPO izy, 17ka nanontaniany hoe:
–Iza moa no anaranao mba hanomezanay voninahitra anao, rehefa tanteraka ny teninao?

18Ary hoy ilay anjelin'ny TOMPO taminy:
–Ahoana moa no anontanianao ny anarako? Anarana mahagaga izany!

19Dia naka zanak'osy sy fanatitra hohanina i Manôà ka napetrany teo ambony vatolampy mba hatolotra ny TOMPO Izay mpanao zavatra mahagaga. Raha mbola nijery teo i Manôà sy ny vadiny, 20dia niakatra ho any an-danitra ny lelafo avy tamin'ny sorona teo amin'ny alitara*. Ary hitan'izy roa fa niakatra tao anatin'ny lelafo ilay anjelin'ny TOMPO; koa niankohoka tamin'ny tany izy mivady. 21Dia fantatr'i Manôà tamin'izay fa anjelin'ny TOMPO izy; ary tsy niseho tamin'izy mivady intsony ilay anjely.

22Ary hoy i Manôà tamin'ny vadiny:
–Tena ho faty tokoa isika, satria nahita an'Andriamanitra.

23Fa namaly azy ny vavy hoe:
–Raha te hamono antsika ny TOMPO, dia tsy ho nanaiky ny sorona dorana manontolo sy fanatitra hohanina natolotsika, ary tsy ho nampahita antsika ireny zavatra rehetra ireny na ho nampandre antsika akory torolalana toy ireny aninkeo ireny.

24Ary nitera-dahy ny vadin'i Manôà ka ny anarany nataony hoe Samsôna. Dia nihalehibe ny zaza, ary ny TOMPO nitahy* azy. 25Fony i Samsôna tao an-tobin'i Dana, teo anelanelan'i Tsôrehà sy i Estaôla, no nanomboka nanetsika azy ny Fanahin'ny TOMPO.

Alarobia 16 Desambra 2015 - Jao 2 : 1 - 11

1Ary tamin'ny andro fahatelo dia nisy fampakaram-bady tany Kanà any Galilea; ary tao ny renin'i Jesoa. 2Nasaina ho amin'io fampakaram-bady io koa i Jesoa mbamin'ny mpianany*. 3Ary satria efa lany ny divay, dia hoy ny renin'i Jesoa taminy:
–Tapitra ny divain-dry zareo!

4Ary hoy i Jesoa tamin'ny reniny:
–Ravehivavy, inona no tadiavinao amiko? Moa tsy efa tonga ve ny fotoanandroko?

5Dia hoy ny renin'i Jesoa tamin'ireo mpanompo:
–Na inona na inona lazainy aminareo dia ataovy!

6Ary nisy siny vato enina nipetraka teo, ho fidiovana araka ny fanaon'ny Jiosy. Samy nahalany zato litatra eo ho eo ny siny tsirairay avy.

7Dia hoy i Jesoa tamin'ny mpanompo:
–Fenoy rano ireto siny ireto.

Dia nofenoiny hatramin'ny molony. 8Ary hoy i Jesoa tamin'ny mpanompo:
–Tovozy amin'izao ka ento any amin'ny mpandahatra ny fanasana.

Dia nentin'ireo mpanompo. 9Ary nanandrana ny rano nanjary divay ity mpandahatra ny fanasana, nefa tsy fantany izay niaviany (fa ireo mpanompo nanovo ny rano no nahafantatra).

Dia niantso ny mpampakatra kosa ity mpandahatra ny fanasana 10ka nilaza taminy hoe:
–Ny an'ny olona rehetra dia ny divay tsara no arosony aloha; ary rehefa mamomamo ny nasaina, vao arosony izay ratsiratsy kokoa. Fa ianao kosa dia nitahiry ny divay tsara hatramin'izao!
11Izany nataon'i Jesoa tao Kanà any Galilea izany no santatr'ireo famantarana narosony. Ary nasehon'i Jesoa ny voninahiny, ka nino Azy ny mpianany.

Talata 15 Desambra 2015 - Rom 4 : 13 - 25

13Nampanantenain'Andriamanitra fa handova izao tontolo izao i Abrahama sy ny taranany. Tsy noho izy ireo nandala lalàna*, fa noho izy ireo nino ka neken'Andriamanitra ho marina no nahazoany izany fampanantenana izany. 14Raha ny fanatanterahana ny lalàna no nahatonga azy ireo ho mpandova, dia ho poaka àty ny finoana ary ho foana ny fampanantenana. 15Fa mahatonga ny fahatezeran'Andriamanitra* ny lalàna; ka raha tsy misy ny lalàna, dia tsy hisy koa ny fandikan-dalàna.

16Noho izany, dia avy amin'ny finoana no ahazoana ny fampanantenana, hany ka fanomezana azo antoka ho an'ny taranak'i Abrahama rehetra: tsy ho an'izay mandala ny lalàna ihany, fa ho an'izay mino tahaka ny nataon'i Abrahama koa. Fa raintsika rehetra i Abrahama, 17araka ny voalazan'ny Soratra Masina* hoe: «Nahatonga anao ho raim-pirenena maro Aho.» Eny, raintsika rehetra izy eo anatrehan'ilay Andriamanitra ninoany, dia ilay Andriamanitra mamelona ny maty sy mampisy ny tsy misy. 18Nanantena i Abrahama na dia tsy nisy hanantenany aza, ary dia nino fa ho tonga «raim-pirenena» maro, araka ny voalazan'Andriamanitra taminy hoe: «Ho tahaka izany ny taranakao.» 19Tsy nalemy finoana i Abrahama raha nandinika ny tenany izay naman'ny maty, fa efa tokony ho zato taona izy tamin'izay, ary koa raha nandinika an'i Sarà vadiny, izay tsy afa-niteraka intsony. 20Tsy very finoana ny amin'ny fampanantenana izay nataon'Andriamanitra i Abrahama, fa vao mainka aza nankahery azy ny finoany; ka dia nanome voninahitra an'Andriamanitra izy, 21sady natoky mihitsy fa izay nampanantenain'Andriamanitra dia hain'Andriamanitra tanterahina. 22Izany no «nankatoavan'Andriamanitra azy ho marina.» 23Tsy ho an'i Abrahama ihany anefa ilay voasoratra hoe «nankatoavan'Andriamanitra azy ho marina», 24fa ho antsika koa, dia isika mino Ilay nanangana an'i Jesoa Tompontsika ho velona avy tany amin'ny maty. 25Fa natolotra ho faty noho ny fahotantsika i Jesoa ary natsangana ho velona mba hahatonga antsika ho olo-marina eo imason'Andriamanitra.

Alatsinainy 14 Desambra 2015 - Sal 66 : 1 - 4

1 Tononkira tao amin'ny tahirin-kiran'ny filohan'antoko-mpihira.* Salamo.

Mihobia an'Andriamanitra, ry mponina eran-tany.
2Ihirao salamo Izy satria be voninahitra.
Tolory voninahitra Izy amin'ny fiderànareo.
3Lazao amin'Andriamanitra hoe:
«Endrey mampitolagaga ny asanao!
Lehibe dia lehibe tokoa ity herinao,
ka indro fa ikoizan'ny fahavalonao.
4Hiankohoka aminao anie ny mponina eran-tany,
sy hihira salamo ho Anao Andriamanitra,
eny, hihira salamo ho fanajana Anao!»

Alahady 13 Desambra 2015 - Mat 21 : 12 - 17

12Dia namantana tao an-kianjan'ny tempoly i Jesoa; ka ireo mpivarotra sy mpividy teo dia noroahiny avokoa, ny latabatr'ireo mpanakalo vola sy ny sezan'ireo mpivaro-boromahailala nazerany; 13ary hoy i Jesoa tamin'ireo olona ireo:
–Izao no voalazan'ny Soratra Masina: «Ny tranoko dia hantsoina hoe trano fivavahana.» Nefa he ity izy ataonareo zohy fieren'ny mpangalatra!

14Ary nisy jamba sy mandringa nanatona an'i Jesoa tao an-kianjan'ny tempoly ka dia nositraniny. 15Fa tezitra mafy kosa ireo lohandoha-mpisorona sy ireo mpahay lalàna nony nahita ny zava-mahagaga nataony sy nahita ny ankizy madinika niantsoantso tao an-kianjan'ny tempoly hoe: «Dera anie ho an'ny Zanak'i Davida*!» 16Ka hoy ry zareo tamin'i Jesoa:
–Renao ve izay lazain'ireo?

Dia novaliany hoe:
–Eny, reko tokoa! Sady tsy mbola novakînareo ve ny andinin'ny Soratra Masina hoe: «Ny vavan'ny ankizy madinika aman-jaza minono avy no nataonao hahazoan-dera»?

17Dia nilaozan'i Jesoa ry zareo; ary niala tao an-tanàna Izy hankany Betania, ka nandry tany.
Tsy hamoa intsony ilay aviavy

Sabotsy 12 Desambra 2015 - Isa 66 : 5 - 9

5Mihainoa ny tenin'ny TOMPO ianareo
izay mandray ny teniny amin-kovitra:
«Misy mankahala anareo ny mpiray firenena aminareo
ka manilika anareo noho ny fanajanareo Ahy,
sady loa-bolana maneso anareo hoe:
‹Aoka ny TOMPO hampiseho ny voninahiny,
dia hahita anareo mandresy izahay!›
Kanjo ireny kosa no ho menatra.»
6Injany misy feo avy any an-tanàna,
misy feo avy ao amin'ny tempoly:
dia feon'ny Tompo Izay mamaly
ny nataon'ny fahavalony.

7Mbola tsy nihetsi-jaza akory, dia niteraka;
ary mbola tsy nanaintaina akory, dia velon-jaza!
8Iza no efa nandre sy nahita zavatra toy izany?
Tany anankiray ve hateraka indray andro monja?
ary firenena iray ve ho azo atao indray miteraka?
Kanefa izany no niseho tamin'i Tsiôna*:
vao nihetsi-jaza izy, dia teraka ireo zanany.
9Ka hoy ny TOMPO Andriamanitrao hoe:
«Raha Izaho no nikarakara ny vehivavy iray
nandritra ny fitondràny vohòka,
dia tsy Izaho no hisakana ny hahaterahany.
Raha Izaho no nanomana ny fahaterahana,
dia tsy Izaho no hanao izay tsy hiterahany.»

Zoma 11 Desambra 2015 - Apo 5 : 11 - 14

11Dia nahita aho sady nandre ny anjely maro, miisa arivoarivo sy alinalina. Nanodidina ilay sezafiandrianana sy ny zava-miaina ary ny loholona ireo, 12ka nanao tamin'ny feo mahery hoe:
«Ny Zanakondry, Izay efa voavono ho faty,
no mendrika handray ny fahefana sy ny harena,
ny fahendrena sy ny hery,
ny haja sy ny voninahitra ary ny dera.»

13Ary ny voaary tontolo eny ana habakabaka sy etỳ an-tany ary any ambanin'ny tany sy any an-dranomasina, izany hoe ny zavatra rehetra ao anatin'ireo, dia reko samy nanao hoe:
«An'Ilay mipetraka eo ambony sezafiandrianana
sy an'ny Zanakondry
ny dera sy ny haja ary ny voninahitra sy ny fanjakana
mandrakizay mandrakizay!»

14Dia novalian'ny zava-miaina efatra hoe: «Amen*!» Ary ny loholona kosa niankohoka sy nitsaoka.

Alakamisy 10 Desambra 2015 - Roma 15 : 5 - 12

5Ary Andriamanitra loharanon'ny faharetana sy ny fampaherezana anie hampiray hina anareo, hanaraka ny ohatra nomen'i Kristy Jesoa. 6Ka mba hiray feo ianareo hiara-manome voninahitra an'Andriamanitra, Rain'i Jesoa Kristy Tompontsika.

7Koa mifandraisa tsara ianareo, tahaka ny nandraisan'i Kristy* anareo koa ho voninahitr'Andriamanitra. 8Fa izao no ambarako aminareo: Tonga mpanompon'ny Jiosy i Kristy mba hahatanteraka ny fampanantenana natao tamin'ny razan'izy ireo ka anehoana fa azo antoka Andriamanitra.

9Ary izany koa dia mba hahazoan'ny hafa firenena* manome voninahitra an'Andriamanitra noho ny famindrampony, araka izay voalazan'ny Soratra Masina* hoe:
«Izany no hiderako Anao any amin'ny hafa firenena
sy hihirako ho voninahitry ny anaranao.»

10Ary hoy indray ny Soratra Masina hoe:
«Miaraha miravo amin'ny vahoakan'ny Tompo,
ry hafa firenena!»

11Ary koa hoe: «Derao ny Tompo, ry firenena rehetra;
ankalazao Izy, ry vahoaka rehetra!»

12Ary hoy indray i Isaià hoe:
«Ho avy ilay solofon'i Jisay,
dia ilay hitsangana hifehy ny firenena:
Izy no hitokian'ireo firenena!»

Alarobia 09 Desambra 2015 - Sal 86 : 8 - 13

8Tompo ô, tsy misy tahaka Anao
amin'ireo andriamanitra;
tsy misy mahavita ny vitanao.
9Ianao no namorona ny firenen-drehetra,
ka ho avy hiankohoka eo anatrehanao izy
ary hanome voninahitra Anao, Tompo ô,
10fa lehibe Ianao sy manao zava-mahagaga;
Ianao ihany no tena Andriamanitra.

11TOMPO ô, toroy ny lalanao aho
mba handehanako araka ny fahamarinanao,
ataovy tokam-po aho mba hankatò Anao.
12Tompo Andriamanitro ô,
hoderaiko amin'ny foko manontolo Ianao
ary homeko voninahitra mandrakizay,
13satria lehibe ny fitiavanao ahy;
fa izaho no efa nafahanao
tsy ho lasa any an-davaka,
any amin'ny toeran'ny maty any.

Talata 08 Desambra 2015 - Mat 15 : 29 - 31

29Niainga avy teo i Jesoa dia lasa nankany amoron'ny farihin'i Galilea, ary niakatra nankeo an-tendrombohitra ka nipetraka teo. 30Ary nisy vahoaka betsaka nanatona Azy sady nitondra ny mandringa, ny jamba, ny kilemaina, ny moana, mbamin'ny maro hafa koa; napetraka teo an-tongotr'i Jesoa ireo marary ireo ka nositraniny. 31Gaga ny vahoaka raha nahita ny moana niteny, ny kilemaina nanjary tomady, ny mandringa nandeha tsara sy ny jamba nahiratra, ka dia nanome voninahitra an'ilay Andriamanitr'i Israely*.

Alatsinainy 07 Desambra 2015 - Efe 1 : 7 - 14

7Ny ra nafoin-Janany no nahazoantsika ny fanavotana, dia ny famelana ny hadisoantsika. Izany no nanehoan'Andriamanitra ny harem-pahasoavany, 8izay natosany be dia be tamintsika ka nahazoantsika fahendrena amam-pahalalana feno. 9Dia nampahafantarin'Andriamanitra antsika ilay tsiambaratelon'ny sitrapony, araka ny safidy noheveriny hotontosaina ao amin'ny Zanany. 10Eny, hotanterahiny mandra-pahatongan'ny fotoanandro farany izany tsiambaratelo izany: dia ny hampivondrona ny zavatra rehetra, ny any an-danitra sy ny eto an-tany, ao amin'i Kristy Filoha tokana.

11Tafaray amin'i Kristy izahay ka tonga anjara lovan'Andriamanitra; satria natokany rahateo izahay, fa izany no fandaharan'Ilay manao ny zavatra rehetra araka izay efa nokasain'ny sitrapony. 12Hideranay an'Andriamanitra be voninahitra anie izany, satria izahay no nanantena voalohany an'i Kristy.

13Tafaray amin'i Kristy koa ianareo, satria efa renareo ilay hafatra marim-pototra, izany hoe ny Vaovao Mahafaly* izay nitondra ny famonjena taminareo, ary efa ninoanareo i Kristy. Ka dia nasiana tombokase maha fananan'Andriamanitra ianareo, tamin'ny nanomezana anareo ny Fanahy Masina Izay nampanantenaina. 14Io Fanahy Masina io no antoka hahazoantsika ny lova natokan'Andriamanitra ho an'ny vahoakany*, mba hahatanteraka ny fanavotana ireo olona natao mba ho fananan'Andriamanitra, hiderantsika ny voninahitr'Andriamanitra izany!

Alahady 06 Desambra 2015 - Isa 60 : 1 - 3

1Mitsangàna, ry Jerosalema ô, mamirapirata,
satria tonga ny famirapiratanao:
ny voninahitry ny TOMPO no manazava anao
toy ny masoandro miposaka.
2Ny haizim-pito manarona ny tany,
ary ny alina mandrakotra ireo firenena;
fa ianao kosa no iposahan'ny TOMPO
sady isehoan'ny voninahiny.
3Ireo firenena hanatona ny fahazavanao
ary ny mpanjaka ho voasariky ny famirapiratana
izay vao miposaka eo aminao.

Sabotsy 05 Desambra 2015 - II Kor 4 : 12 - 15

12hany ka ny fahafatesana no miasa ao aminay, fa ny fiainana no miasa ao aminareo.
13Hoy ny Soratra Masina*: «Nino aho, ka izany no nitenenako.» Noho izahay manana io finoana omen'ny Fanahy Masina io, dia mino koa izahay ka izany no itenenanay. 14Fantatray fa Andriamanitra, Izay nanangana an'i Jesoa Tompo ho velona, dia hanangana anay koa ho velona miaraka amin'i Jesoa, ary hametraka anay mbaminareo ho eo akaikiny.

Zoma 04 Novambra 2015 - Apo 14 : 6 - 8

6Ary hitako nisy anjely anankiray hafa koa nanidina teny amin'ny habakabaka farany ambony. Io anjely io dia nanana hafatra soa maharitra mandrakizay hotorîny amin'izay monina ambonin'ny tany, dia amin'ny firenena sy ny fokom-pirenena mbamin'ny olona samy hafa fiteny sy ny vahoaka isan-tokony; 7ka hoy izy tamin'ny feo mahery hoe: «Manajà an'Andriamanitra ka manomeza voninahitra Azy, fa tonga ny andro fitsaràny! Mitsaoha an'Ilay nanao ny lanitra sy ny tany ary ny ranomasina mbamin'ny loharano.»

8Nanaraka an'io dia nisy anjely faharoa nanao hoe: «Rava, rava i Babilôna lehibe, izay nampisotro ny firenena rehetra tamin'ny divainy, dia ny divain'ny fijangajangàny* mihoa-pampana!»

Alakamisy 03 Desambra 2015 - Sal 79 : 8 - 13

8Aza tsaroana hamelezana anay
ny heloka vitan'ireo talohanay;
fa aoka ny famindramponao
no ho tonga haingana hitsena anay,
satria voa mafy tokoa izahay!
9Andriamanitra mpamonjinay ô,
vonjeo izahay noho ny voninahitrao;
mba avelao re ny fahotanay,
ka afaho izahay noho ny lazanao.
10Nahoana ny firenen-kafa no hanontany hoe:
«Aiza àry izay Andriamanitrareo?»
Aoka ho fantany sy hohitanay
fa valianao ny ran'ireo mpanomponao
izay novonoin'izy ireny ho faty!
11Aoka ho tonga eo anatrehanao
ny fitarainan'ireo voafonja!
Araka ny haben'ny herinao
no iarovy ny ain'ireo voaheloka ho faty.
12Tompo ô, mba valio impito heny
amin'ireo firenena mifanila aminay
ny fanalàm-baràka nataony Anao.

13Fa izahay vahoakanao,
andian'ondry fiandrinao*,
dia hanolotra fisaorana Anao mandrakizay,
hanambara ny fiderana Anao hatrany hatrany.

Alarobia 02 Desambra 2015 - Heb 6 : 7 - 12

7Izay tany mifoka ny ranonorana milatsaka aminy matetika ka mahavokatra anana tsara ho an'ny olona iasana azy, dia mahazo fitahiana avy amin'Andriamanitra. 8Fa izay tany maniry tsilo sy songosongo kosa dia tsy misy antony sady efa hiharan'ny ozon'Andriamanitra; ary hodorana no hiafarany.

9Na izany aza no teninay, ry hava-malala, dia zavatra tsara kokoa sady miantoka ny famonjena anareo no antenainay, raha ny aminareo. 10Fa tsy manao ny tsy rariny Andriamanitra: tsy hohadinoiny akory ny asanareo sy ny fitiavanareo Azy nasehonareo tamin'ny nanompoanareo sady mbola anompoanareo ny kristianina havanareo. 11Ary dia irînay haneho fahazotoana toy izany hatramin'ny farany ianareo tsirairay avy, mba ho tanteraka tokoa ny zavatra antenainareo. 12Tsy tianay ho ketraka ianareo fa mba hanahaka ireo mino sy maharitra ka manana anjara amin'ny soa nampanantenain'Andriamanitra.

Talata 01 Desambra 2015 - II Tan 20 : 20 - 30

20Nifoha maraina koa ireto Jodeanina sy mponin'i Jerosalema ny ampitso, dia niainga nankany amin'ny taniefitr'i Tekôa. Teo am-piaingàny, dia nitsangana i Jôsafata ka nanao hoe:
–Mihainoa ahy ianareo, ry Jodeanina sy ry mponin'i Jerosalema. Matokia ny TOMPO Andriamanitrareo, dia tsy ho voahozongozona ianareo; matokia ny mpaminaniny*, dia handresy ianareo!

21Rehefa niara-nidinika tamin'ny vahoaka i Jôsafata, dia nanendry mpihira hialoha ny tafika, ka hanao fanamiana masina sady hidera ny TOMPO hanao hoe: «Miderà ny TOMPO ianareo; eny, maharitra mandrakizay ny fitiavany!»

22Raha vao nanomboka nihoby sy nidera ireo mpihira, dia nataon'ny Tompo nisy fifanjevoana teo amin'ny Hamônita sy Môabita ary Edômita izay tonga hanafika ny Jodeanina, ka dia nifamely ireo. 23Nitsangana ny Hamônita sy Môabita hamely ny Edômita, ka namono nahafaty sy nandringana azy; ary nony voaringan'izy roa tonta ny Edômita, dia izy samy izy kosa avy eo no nifandringana. 24Rehefa tonga teo amin'ilay toerana fitazanana ny taniefitra ireto Jodeanina, dia nijery ity tafika goavana; ka indreo faty niampatrampatra tamin'ny tany no hitany, fa tsy nisy afa-nandositra. 25Dia nandeha nandroba azy i Jôsafata sy ny vahoakany, ka betsaka tokoa ny biby fiompy sy harena ary fitafiana sy fanaka sarobidy hitany. Be loatra ny remby ka na dia nandany telo andro hanangonana aza izy ireo, dia tsy nahazaka azy rehetra.

26Tamin'ny andro fahefatra dia nivory tao amin'ny Lohasaha Berakà izy. Tao no nisaorany ny TOMPO, ka izany no niantsoana io toerana io hoe Lohasaha Berakà mandraka androany. 27Ny mponin'i Jerosalema sy ny Jodeanina hafa rehetra izay teo ambany fitarihan'i Jôsafata dia niainga hiverina any Jerosalema indray tamim-pifaliana, satria ny TOMPO efa nampifaly azy fony nafahany tamin'ny fahavalony. 28Dia tonga tany Jerosalema izy nombàn'ny feom-baliha sy lokanga ary trompetra, ka nankao an-tranon'ny TOMPO*.

29Ary azon'ny tahotra an'Andriamanitra ny fanjakana rehetra manodidina, rehefa nandre fa ny TOMPO no niady tamin'ny fahavalon'i Israely. 30Dia nandry feizay ny fanjakàn'i Jôsafata, satria nomen'Andriamanitra fiadanana tamin'ny sisin-tany manodidina izy.

Alatsonainy 30 Novambra 2015 - I Kor 1 : 1 - 9

1-2Avy amiko Paoly ity taratasy ity, dia izaho voaantso ho apôstôlin'i Kristy* Jesoa noho ny sitrapon'Andriamanitra.

Mamangy anareo isan'ny Fiangonan'Andriamanitra atỳ Kôrinto aho, ary mamangy anareo koa i Sôstena havantsika. Voatokana ho an'Andriamanitra sy voaantso ho anisan'ny vahoakany* ianareo satria efa tafaray amin'i Kristy Jesoa. Eny, anisan'ny vahoakan'Andriamanitra ianareo miaraka amin'izay rehetra miantso ny anaran'i Jesoa Kristy Tompontsika, na aiza na aiza, fa sady Tompon'izy rehetra i Kristy no Tompontsika koa. 3Ho aminareo anie ny fahasoavana sy ny fiadanana avy amin'Andriamanitra Raintsika sy i Jesoa Kristy Tompo!

4Velom-pisaorana mandrakariva an'Andriamanitro ny aminareo aho noho ny fahasoavana efa nomeny anareo izay tafaray amin'i Kristy Jesoa. 5Eny, noho ianareo tafaray amin'i Kristy Jesoa no mampanankarena anareo amin'ny fanomezana rehetra, dia ny teny sy ny fahalalana rehetra. 6Izay nijoroana ho vavolombelona momba an'i Kristy dia efa tafaorina mafy ao aminareo, 7ka tsy misy fanomezam-pahasoavana tsy anananareo eo am-piandrasana ny hisehoan'i Jesoa Kristy Tompontsika. 8Andriamanitra koa no hampiorina anareo hatramin'ny farany, ka tsy hanananareo tsiny amin'ny andro hiavian'i Jesoa Kristy Tompontsika. 9Mitana ny toky nomeny Andriamanitra Izay niantso anareo hiombona amin'ny Zanany*, dia i Jesoa Kristy Tompontsika.

Alahady 29 Novambra 2015 - Jer 33 : 14 - 18

14Hoy ny teny hentitry ny TOMPO hoe:
«Indro avy ny andro izay hanatanterahako ny zava-tsoa nampanantenaiko ny vahoakan'i Israely sy ny vahoakan'i Joda. 15Amin'izany andro sy fotoana izany, dia solofo mpandala ny hitsiny no hapoitrako ho an'i Davida. Izy no hampihatra ny rariny sy ny hitsiny eo amin'ny tany. 16Amin'izay dia ho afaka ny fanjakan'i Joda ary hiaina am-pilaminana ny mponin'i Jerosalema. Ka ny hiantsoana an'i Jerosalema dia hoe ‹Ny TOMPO no fahamarinantsika.› »

17Izao koa no lazain'ny TOMPO:
«I Davida mpanjaka dia tsy ho tapaka mpandimby azy eo amin'ny sezafiandrianan'i Israely. 18Ary ny mpisorona taranak'i Levỳ tsy ho tapaka olona hijoro eo anatrehako hanolotra sorona* dorana manontolo, ary hampakatra ny eton'ny fanatitra sy ny sorom-pihavanana fanao isan'andro.

Sabotsy 28 Novambra 2015 - I Sam 24 : 10 - 23

Nitodika nijery i Saoly, dia niankohoka ho mari-panajana azy i Davida. 10Ary hoy i Davida tamin'i Saoly:
–Nahoana ianao, ry mpanjaka, no dia mihaino izay vavan'olona milaza fa mitady hanisy ratsy anao aho? 11Kanefa ny masonao mihitsy no mahita androany, fa ny TOMPO efa nanolotra anao ho eo am-pelatanako tao an-johy. Nasain'ny olona hovonoin-ko faty ianao, nefa niantra anao aho, fa hoy aho hoe: Tsy haninji-tanana amin'ny mpanjakako aho, satria ny TOMPO no efa nifidy anao ho mpanjaka. 12Jereo koa, ry mpanjakako ô! Eny, jereo fa ity an-tanako ity ny morontongotr'akanjonao. Koa raha nanapaka ny akanjonao fotsiny aho fa tsy namono nahafaty anao, dia aoka ho fantatrao fa tsy olon-dratsy na mpikomy aho, ary tsy mba nanota taminao! Ianao no manao haza lambo ahy sady mifofo ny aiko. 13Ny TOMPO anie no hitsara ahy sy ianao, ka hamaly anao noho ny ratsy nataonao tamiko! Fa izaho kosa tsy haninji-tanana aminao. 14Araka ny lazain'ny ohabolan'ntaolo, dia «ny olon-dratsy no ipoiran'ny faharatsiam-panahy», fa izaho kosa tsy haninji-tanana aminao. 15Amin'iza moa no iadianao, ry mpanjakan'i Israely? Izaho izay amboa maty sy parasy kely ity ve no enjehinao? 16Aoka ny TOMPO no ho mpitsara ka dia hitsara ahy sy ianao! Aoka handinika ny amiko Izy ka hiaro ahy ary hanafaka ahy amin'ny fanenjehanao!

17Rehefa vita izany tenin'i Davida tamin'i Saoly izany, dia nanontany azy i Saoly hoe:
–Feonao tokoa ve izany, ry Davida zanako ô!

Ary dia nigogogogo nitomany i Saoly. 18Dia hoy indray izy tamin'i Davida:
–Marina ny anao, anaka, fa izaho no tena diso, satria ianao nanao soa tamiko fa izaho kosa nanao izay ratsy taminao. 19Nasehonao tamiko androany ny hatsaram-ponao, fa tsy novonoinao ho faty aho na dia efa natolotry ny TOMPO teo an-tananao aza aho. 20Raha misy olona mahatratra ny fahavalony, moa avelany handeha soa aman-tsara ve izy? Sanatria! Koa hamaly fitia anao anie ny Tompo noho izay nataonao tamiko androany. 21Ankehitriny, fantatro fa ianao no ho mpanjaka ary hitoetra eo an-tananao ny fanjakan'i Israely. 22Koa mianiàna amiko amin'ny TOMPO ianao ankehitriny, fa tsy handringana ny taranako mandimby ahy ianao ary tsy hamono ny anarako tsy ho isan'ny taranaky ny raiko. 23Dia nianiana izany tamin'i Saoly i Davida. Ary i Saoly nody tany aminy, fa i Davida sy ny olony kosa niverina niakatra tany amin'ny fiereny.

Zoma 27 Novambra 2015 - Jao 11 : 25 - 27

25Dia hoy i Jesoa taminy:
–Izaho no manangana ho velona sy manome aina. Izay mino Ahy, na dia maty aza, dia ho velona; 26ary izay rehetra mivelona amiko ka mino Ahy, dia tsy ho faty na oviana na oviana. Mino izany ve ianao?

27Ka novalian'i Marta hoe:
–Eny, ry Tompo, mino aho fa Ianao no ilay Mesia*, ilay Zanak'Andriamanitra*, Ilay tonga eo amin'izao tontolo izao*!

Alakamisy 26 Novambra 2015 - Asa 5 : 26 - 32

26Dia lasa ny lehiben'ny mpiambina ny tempoly mbamin'ireo mpandraharaha naka ny apôstôly, kanefa tsy nanao an-keriny satria natahotra sao torahan'ny vahoaka vato. 27Nentina ireo apôstôly, naroso teo anatrehan'ny Fitsarana ambony, ary nadinin'ny mpisorombe 28nataony hoe:
–Noraranay mafy dia mafy ianareo tsy hampianatra amin'ny anaran'iny Lehilahy iny; kanjo vao mainka nofenoinareo ny fampianaranareo i Jerosalema iray vohitra, ka satrinareo ho tompon'andraikitra amin'ny nahafatesan'iny Lehilahy iny izahay.

29Fa novalian'i Petera sy ny apôstôly hoe:
–Andriamanitra no tsy maintsy ekena fa tsy ny olombelona. 30Efa natsangan'ilay Andriamanitry ny razantsika ho velona i Jesoa, Izay nahantonareo teo amin'ny hazofijaliana no namonoanareo azy. 31Efa nasandratr'Andriamanitra eo ankavanany Izy ka tonga Mpitari-dalana sy Mpamonjy mba hahazoan'ny vahoaka Israely* miala amin'ny toe-dratsy sady mandray famelan-keloka. 32Vavolombelona manambara izany ny tenanay mbamin'ny Fanahy Masina nomen'Andriamanitra ny olona manaiky Azy.

Alarobia 25 Novambra 2015 - Lio 16 : 9 - 13

9Ka hoy Aho aminareo mpianatro: ampiasao ny haren'izao tontolo izao hananan-kavana handray anareo any amin'ny fonenana mandrakizay, rehefa tonga ilay andro hamoizana ireny harena ireny. 10Izay mahatoky amin'ny zava-madinika, dia mahatoky koa amin'ny zava-dehibe; ary izay tsy marina amin'ny zava-madinika, dia tsy marina koa amin'ny zava-dehibe. 11Raha tsy azo itokiana amin'ny haren'izao tontolo izao ianareo, iza no hametraka aminareo ny tena harena; 12ary raha tsy azo itokiana amin'izay tsy anareo ianareo, iza no hanome anareo ny fananana tena anareo?

13Tsy misy mpanompo mahay manompo tompo roa: satria na ny anankiray ho hàlany ary ny anankiray ho tiany, na ny anankiray hombany ary ny anankiray hohamavoiny. Tsy hainareo atao ny sady manompo an'Andriamanitra no manompo ny harena.

Talata 24 Novambra 2014 - Sal 62 : 1 - 12

1 Tao amin'ny tahirin-kiran'i Jedotòna filohan'antoko-mpihira.* Salamo nataon'i Davida.

2Andriamanitra irery no iadanako;
avy aminy ny famonjena ahy.
3Izy irery no Vatolampy ahazoako famonjena,
fiarovana avo ho ahy ka tsy hihontsona aho.

4–Ianareo kosa, mandra-pahoviana
no hifarimbona hamely olona
ka hiara-mioko handrodana azy
ho toa rindrina mirona sy fefy mikoa?
5Ny hany itadiavanareo hanongana azy
dia satria izy manana toerana ambony.
Fitaka no zavatra mba maminareo:
am-bava mirary soa*, fa am-po manozona.

6Andriamanitra irery no iadanako
satria Izy mihitsy no antenaiko.
7Izy irery no Vatolampy ahazoako famonjena,
fiarovana avo ho ahy ka tsy hihontsona aho.
8Miankina amin'Andriamanitra
ny famonjena ahy sy ny voninahitro;
Andriamanitra no Vatolampy
ianteherako mafy sy fialofako.
9–Matokia Azy lalandava, ry vahoakany,
atosahy eo anoloany ny fiahianareo
fa Izy Andriamanitra no fialofantsika.

10Tsio-drivotra mandalo ihany
ny sarambabem-bahoaka;
rendrarendra foana koa
ireo olona manan-kaja;
raha indray atao amin'ny mizana izy roa tonta,
dia maivana noho ny tsio-drivotra mandalo.
11–Aza mitoky amin'ny fanaovana an-keriny,
aza miankina amin'ny fangalarana.
Raha mitombo fananana ianareo,
aza mba miraiki-po amin'izany.

12Izao no tenin'Andriamanitra
fandreko matetika: «Ahy ny hery!»
13–Tompo ô, Anao ihany koa ny fitiavana;
sady Ianao no mamaly ny olona
araka ny asa nataony avy.

Alatsinainy 23 Novambra 2015 - Mik 6 : 6 - 8

6«Inona àry no hoentiko,
rehefa manatona aho hiankohoka
eo anatrehan'ny TOMPO,
Andriamanitra avo indrindra?
Moa zanak'omby iray taona
hatao sorona* dorana manontolo ve
no hoentiko rehefa manatona Azy aho?
7Ho sitraky ny TOMPO ve ny ondrilahy an'arivony
na ny menaka mikoriana toy ny renirano?
Hatolotro Azy ve ny zazalahy voalohan-terako
ho fanalana ny heloka amam-pahotàko?»
8Tsia, ry olombelona, fa efa nampianarina anao
ny fitondrantena tsara
sy izay tadiavin'ny TOMPO aminao:
dia ny hanao ny rariny
sy handala ny fitiavana
ary ny hanaraka an'Andriamanitrao amim-panetrentena.

Alahady 22 Novambra 2015 - Efe 5 : 8 - 14

8Tao amin'ny haizina ianareo fahiny, fa ao amin'ny fahazavana kosa ankehitriny, noho ianareo tafaray amin'ny Tompo. Koa manaova fitondrantena tahaka ny olona ao amin'ny fahazavana, 9satria ny fahazavana dia mamokatra ny soa sy ny rariny ary ny hitsiny isan-karazany. 10Miezaha mamantatra izay ankasitrahin'ny Tompo. 11Aza miombona amin'ny asa tsy mahavoka-tsoa ataon'ireo olona ao anatin'ny haizina, fa aleo aseho ny tena toetr'ireny asa ireny; 12(satria mahamenatra na dia ny hilaza izay ataon-dry zareo ao amin'ny miafina aza). 13Fa rehefa asehon'ny fahazavana kosa ny tena toetry ny zavatra rehetra, dia hiharihary avokoa; 14eny, izay rehetra miharihary dia tonga mazava. Izany no ilazana hoe:

        «Mifohaza ianao izay matory,
          ary mitsangàna ho velona avy any amin'ny maty,
         dia hampahazava anao iKristy*.»

Sabotsy 21 Novambra 2015 - I Mpa 18 : 16 - 19

16Dia lasa nitsena an'i Ahaba i Hôbadià ka nanao tatitra taminy; ary lasa nitsena an'i Elià i Ahaba.

17Rehefa hitan'i Ahaba i Elià, dia nilazany hoe:
–Hay! Tonga ianao, ry ilay mpitondra loza amin'i Israely!

18Fa i Elià namaly hoe:
–Tsy izaho no mpitondra loza amin'i Israely, fa ianao sy ny fianakavianao satria nandà ny didin'ny TOMPO ianareo sady nivavaka tamin'ireo andriamanitra Bahala. 19Ary ankehitriny maniraha olona hamory ny vahoakan'i Israely rehetra hihaona amiko any an-tendrombohitr'i Karmela miaraka amin'ny mpaminanin'i Bahala 450 sy ny mpaminanin'i Aserà efajato izay mihinana eo amin'ny latabatr'i Jezebela.

Zoma 20 Novambra 2015 - Jao 14 : 1 - 14

1Ary hoy i Jesoa tamin'ny mpianany*:
–Aoka tsy hangorohoro ny fonareo: minoa an'Andriamanitra ianareo, ary mino Ahy koa. 2Misy fonenana maro ao an-tranon'ny Raiko; raha tsy izany, dia ho nilaza taminareo ve Aho fa handeha hamboatra toerana ho anareo? 3Ary rehefa lasa Aho ka voavoatra ny toerana ho anareo, dia hiverina Aho haka anareo ho eo anilako; ka izay misy Ahy no hisy anareo koa. 4Ary fantatrareo ny lalana ho any amin'izay alehako.

5Dia hoy i Tômà taminy:
–Tsy fantatray izay alehanao, ry Tompo! Ka ahoana no hahafantaranay ny lalana?

6Fa novalian'i Jesoa hoe:
–Izaho no lalana sy fahamarinana ary aina; tsy misy olona mankany amin'ny Ray raha tsy amin'ny alalako. 7Raha mahafantatra Ahy ianareo, dia hahafantatra ny Raiko ihany koa; dieny izao no ahafantaranareo Azy sady efa nahitanareo Azy.

8I Filipo kosa nanao taminy hoe:
–Asehoy anay ny Ray, ry Tompo, dia ampy ho anay izay.

9Fa hoy i Jesoa taminy:
–Izay ela izay no niarahako taminareo ka tsy fantatrao ve Aho, ry Filipo? Izay nahita Ahy, dia nahita ny Ray; koa ahoana no anaovanao hoe: «Asehoy anay ny Ray»? 10Tsy mino ve ianao fa Izaho dia ao anatin'ny Ray, ary ny Ray ato anatiko? Ny teny izay lazaiko aminareo, dia tsy ambarako avy amin'ny tenako: fa ny Ray Izay mitoetra ao anatiko no manao ny asany. 11Minoa Ahy fa Izaho dia ao anatin'ny Ray ary ny Ray ato anatiko; raha tsy mino ny teniko ianareo, dia minoa ahay noho ireny asa ireny. 12Lazaiko marina dia marina aminareo fa izay mino Ahy dia hanao ny asa ataoko ihany koa; ary hanao asa lehibe noho izany aza izy, satria mankany amin'ny Ray Aho. 13Ary na inona na inona angatahinareo noho ny anarako, dia hataoko izany, mba hahazoan'ny Ray voninahitra eo amin'ny Zanaka. 14Raha noho ny anarako no angatahanareo zavatra amiko, dia hataoko izany.

Alakamisy 19 Novambra 2015 - Gal 6 : 11 - 18

11Jereo amin'ny havaventin'ny soratra fa tanako mihitsy no anoratako ho anareo izao. 12Izay rehetra te hiseho ho tsara araka ny maha olombelona, dia ireo no manery anareo hoforana; nefa noho izao antony izao ihany: mba tsy hanenjehana azy noho ny hazofijalian'i Kristy*. 13Fa na dia ny tenan'izy voafora aza tsy mitandrina ny lalàna*; kanefa tiany hoforana ianareo, mba hireharehany amin'ny fampiharana izany amin'ny vatanareo. 14Raha ny amiko, dia sanatria raha mba misy hataoko rehareha afa-tsy ny hazofijalian'i Jesoa Kristy Tompontsika: fa tamin'ny alalan'ny hazofijaliany no efa maty izao tontolo izao* raha ny amiko, ary izaho kosa efa maty raha ny amin'izao tontolo izao. 15Tsy dia ny hoe maha voafora na tsy maha voafora manko no tena zavatra, fa ny maha olom-baovao. 16Ary fiadanana sy famindrampo avy amin'Andriamanitra no ao amin'izay rehetra hanaraka io fitsipika io, izany hoe ao amin'ilay Israely* vahoakan'Andriamanitra.

17Amin'ny ho avy, aoka tsy hisy olona hanahirana ahy intsony; fa izaho dia mitondra ny diam-pery eo amin'ny tenako noho ny maha mpanompon'i Jesoa ahy.

18Homba anareo anie, ry havana, ny fahasoavan'i Jesoa Kristy Tompontsika! Amen*.

Alarobia 18 Novambra 2015 - Mar 6 : 14 - 20

13Dia naniraka roa lahy tamin'ny mpianany i Jesoa ka nanao taminy hoe:
–Mandehana mankany an-tanàna, fa hisy lehilahy mitondra siny feno rano hifanena aminareo, dia iny arahina; 14ary ilazao ny tompon'izay trano hidirany hoe: «Izao no tenin'ny Mpampianatra: aiza, hono, izay efitrano hiarahako mihinana ny sakafo Paska amin'ny mpianatro?» 15Dia hotoroany efitrano ambony rihana ianareo, efitrano malalaka sy ary fomba sady voavoatra tsara; ka ao ny sakafontsika no omàny.

16Dia nandeha izy roa lahy ka tonga tany an-tanàna, ary nahita ny toe-javatra araka izay voalazan'i Jesoa taminy sy nanomana ny sakafo Paska.

17Nony hariva ny andro, dia tonga i Jesoa mbamin'ny 12 lahy. 18Dia nipetraka hihinana izy rehetra, ka iny teo am-pisakafoana iny dia hoy i Jesoa:
–Lazaiko marina aminareo fa hanolotra Ahy ny anankiray aminareo; dia ilay miara-mihinana amiko.

19Nalahelo ny mpianatra ka nanomboka niteny tsirairay tamin'i Jesoa hoe:
–Tsy izaho manko izany!

20Fa hoy i Jesoa taminy:
–Ny anankiray aminareo 12 lahy, ilay miara-manatsoboka mofo amiko ao anaty lovia, no izy!

Talata 17 Novambra 2015 - Apo 22 : 10 - 13

10Dia hoy koa ny anjely tamiko:
–Aza afenina ny teny faminaniana raketin'ity boky ity, satria antomotra ny fotoanandro hahatanterahan'ireo zavatra ireo. 11Izay manao ny tsy rariny, aoka mbola hanao ny tsy rariny hatrany; ary izay ratsy toetra, aoka hiharatsy toetra hatrany. Izay tia rariny, aoka hanao ny rariny hatrany; ary izay masina*, aoka hihamasina hatrany!

12«Indro avy faingana Aho, hoy i Jesoa; ary miaraka amiko ny valin'asa, mba hamaliako ny olona rehetra araka izay nataony avy. 13Izaho no Alfa sy Ômega, ny voalohany sy ny farany, ny fiandohana sy ny fiafarana.

Alatsinainy 16 Novambra 2015 - III Jao : 1 - 8

1Avy amiko loholona ity taratasy ity. Mamangy anao aho, ry Gaio, hava-malala izay tiako marina tokoa.

2Mangataka amin'Andriamanitra aho, rahavako, mba hambinina amin'ny zavatra rehetra ianao ary mba ho salama tsara, tahaka izay anambinana anao ara-panahy. 3Faly tokoa aho, fony nisy havana iray finoana tonga ka nijoro ho vavolombelona nanambara tamiko fa mifikitra amin'ny hafatra marim-pototra ianao, araka ny efa iainanao an'izany. 4Tsy misy mahafaly ahy mihoatra noho ny andrenesako fa miaina ny hafatra marim-pototra ireo zanako.

5Asan'olona mahatoky, rahavako, no ataonao na inona na inona tontosainao amin'ny havana iray finoana, na dia vahiny mandalo aza izy. 6Ireo no nanambara teo anatrehan'ny Fiangonana izany fitiavanao izany. Dia ho soa no hataonao, raha manatitra sy mamatsy azy ireo amin'ny diany ianao, araka izay fomba mendrika an'Andriamanitra; 7fa ho voninahitr'i Kristy* no niaingan'ireo sady tsy anekeny handray na inona na inona avy amin'ny tsy kristianina. 8Koa isika no tokony hanohana ny olona toy ireny mba ho mpiara-miasa aminy hampiely ny hafatra marim-pototra.

Alahady 15 Novambra 2015 - Gen 39 : 1 - 10

1Tafidina tany Ejipta i Jôsefa, satria ireo Jismahelita no nitondra azy tany. Lehilahy ejiptianina atao hoe Pôtifara, tandapan'ny Farao* sady lehiben'ny mpiambina, no nividy azy tamin'ny Jismahelita. 2Ary ny TOMPO nomba an'i Jôsefa izay nanjary lehilahy nambinina. Nitoetra tao an-tranon'ilay Ejiptianina tompony izy; 3ary hitan'ity tompony fa nombàn'ny TOMPO i Jôsefa ka nampahombiaziny avokoa izay rehetra nataony. 4Ary nahafaly fatratra ny tompony i Jôsefa ka nataony mpiasa manokana; dia nomeny hiandraiketany ny tao an-tranony sy izay nananany rehetra. 5Nanomboka hatreo, noho ny amin'i Jôsefa, dia notahîn'ny TOMPO ny tao an-tranon'ilay Ejiptianina sy izay rehetra nananany. Io fitahian'ny TOMPO io dia nanenika ny fananany rehetra na an-tsaha na an-tanàna. 6Noho izany dia navelany teo am-pelatanan'i Jôsefa avokoa ny fananany rehetra; ka tsy nihevitra na inona na inona intsony i Pôtifara, afa-tsy izay sakafo hohanin'ny tenany ihany.

Tovolahy tsara tarehy sady bikàna i Jôsefa. 7Taorian'ireo zava-niseho ireo, dia nangata-maso tamin'i Jôsefa ny vadin'ny tompony, ka nanao taminy hoe:
–Avia handry amiko!

8Fa hoy ny navalin'i Jôsefa azy:
–Sanatria! Napetraky ny tompoko eo an-tanako avokoa ny fitandremana ny fananany rehetra ary matoky manana ahy izy ka tsy mikarakara na inona na inona intsony ato an-trano. 9Ary na ato an-trano aza dia tsy manana fahefana noho izaho izy; ka tsy nisy nandrarany ahy, afa-tsy ianao izay vadiny. Koa ahoana no ahazoako manao zava-dratsy lehibe toy izany, ka hanotako amin'Andriamanitra?

10Isan'andro isan'andro dia mbola nanangoly an'i Jôsefa ihany ilay vehivavy; fa tsy nanaiky handry na hiray aminy izy.

Sabotsy 14 Novambra 2015 - Sal 24 : 3 - 6

3–Iza àry no hiakatra ny tendrombohitry ny TOMPO?
Zovy no hahajoro ao amin'ny Toeramasiny*?
4–Izay madio tanana sy mahitsy fo,
izay tsy nirona tamin'ny lainga
na nianiana hoenti-mamitaka.
5Ireo no handray ny fitahian*'ny Tompo,
sy hoeken'Andriamanitra Mpamonjy ho marina.
6Izany no karazan'olona mitady an'Andriamanitra,
te hiatrika an'ilay Andriamanitr'i Jakôba!

Zoma 13 Novambra 2015 - Rom 13 : 6 - 7

6Izany ihany koa no antony andoavanareo hetra; fa ny mpiasam-panjakana miandraikitra izany dia mpandraharahan'Andriamanitra mitozo amin'io asa io. 7Aloavy amin'ny olona rehetra izay tokony haloha aminy avy: ny hetra amin'izay tokony handoavan-ketra, ny fadintseranana amin'izay tokony handoavam-padintseranana. Atahory izay tokony hatahorana; hajao izay tokony hohajaina

Alakamisy 12 Novambra 2015 - Lio 24 : 45 - 49

45Tamin'izay dia nosokafan'i Jesoa ny sain'ireo mpianatra mba hahafantatra ny Soratra Masina,

46sady hoy Izy taminy:
–Izao no voalazan'ny Soratra Masina: tsy maintsy hijaly ny Mesia*, nefa tsy maintsy hitsangana velona avy any amin'ny maty, amin'ny andro fahatelo; 47ary ny anarany no tsy maintsy hotorîna hatao antso avo amin'ny firenen-drehetra miantomboka eto Jerosalema, mba hanainga ny olona hiala amin'ny toetra ratsiny sy handray famelan-keloka.

48Ianareo no vavolombelona hanambara izany! 49Indro hirahiko ho eo aminareo Ilay nampanantenain'ny Raiko; ianareo kosa mitoera eto an-tanàna mandra-pahahenika anareo ny hery avy any ambony.

Alarobia 11 Novambra 2015 - Sal 18 : 20 - 27

21Soa no ataon'ny TOMPO amiko satria marina aho;
izany no avaliny ahy satria madio ny toetrako,
22fa voatandriko ny làlan'ny TOMPO
ary tsy ivadihako ilay Andriamanitro;
23ankatoaviko avokoa ny fitsipiny
ary tsy mba ialako ireo didiny.
24Koa tsy manan-tsiny aminy aho
fa nitandrin-tena tsy ho diso.
25Eny, soa tokoa no navalin'ny TOMPO ahy
satria marina aho sy hitany madio toetra.
26Tompo ô, mahatoky Ianao
amin'izay matoky Anao;
tsy manan-tsiny koa Ianao
amin'izay tsy manan-tsiny;
27Madio Ianao amin'izay madio,
miolakolaka kosa amin'izay mpiolikolika.

Talata 10 Novambra 2015 - Efe 4 : 17 - 24

17Koa dia izao no lazaiko sy ambarako noho izaho tafaray amin'ny Tompo: aza atao intsony ny fomba fiainan'ny mpanompo sampy, izay manaraka ny hevi-poanany 18sady maizin-tsaina. Olon-ko azy amin'ny fiainam-baovao omen'Andriamanitra ireny, satria tena tsy mahalala sady mafy fo tokoa; 19efa lany henatra mihitsy, ka mivarilavo amin'ny fihetsika tsy maotina sady revo manaram-po amin'ny fahalotoana isan-karazany.

20Tsy mba toy izany kosa no nianaranareo an'i Kristy*! 21Fa efa nandre ny aminy tokoa ianareo ary efa norosoana ny fampianarana marina ao amin'i Jesoa, araka ny maha kristianina anareo. 22Noho izany aoka hialanareo ny toetrareo taloha nifandraika tamin'ny fitondrantenanareo fahiny, dia ilay toetra mihasimba noho ny fitaky ny filàndratsy. 23Aoka hohavaozina tanteraka ny fanahinareo sy ny sainareo; 24ary aoka ianareo hitafy ny toetra vaovao, dia ilay toetra noarîna araka an'Andriamanitra, ka asehon'ny fiainana mandala rariny sy masina vokatry ny fampianarana marina.

Alatsinainy 09 Novambra 2015 - 2 Tim 1 : 11 - 14

11Ny hitory izany Vaovao Mahafaly izany no nanendren'Andriamanitra ahy ho apôstôly* sy ho mpampianatra; 12ary izany koa no antony iaretako izao fijaliana izao. Kanefa tsy mahakivy ahy izany, satria fantatro Ilay nametrahako ny fitokiako ary azoko antoka fa Izy dia mahatahiry ilay raki-tsoa nankininy tamiko mandra-piavin'ny andro fitsarana. 13Ireo teny efa renao tamiko no ataovy fenitra ho anao, ka tano mafy amin'ny finoana sy ny fitiavana ananantsika tafaray amin'i Kristy Jesoa. 14Ny Fanahy Masina Izay mitoetra ao anatintsika no itahirizo ilay raki-tsoa nankinina taminao.

Alahady 08 Novambra 2015 - Mar 12 : 13 - 17

13Nisy iraka sasantsasany avy amin'ny Farisianina* sy ny Herôdianina* nankeo amin'i Jesoa hamandrika Azy amin'ny fanontaniana; 14ka nony tonga teo ry zareo, dia nanao taminy hoe:
–Mpampianatra ô, fantatray fa milaza ny marina Ianao sady tsy mampaninona anao izay mety ho hevitry ny hafa, ary tsy mizaha tavan'olona Ianao fa mampianatra tsotra ny lalana soritan'Andriamanitra. Koa azonay atao ve ny mandoa hetra ho an'ny amperôra rômanina sa tsia? Tokony handoa izahay sa tsy handoa?

15Fantatr'i Jesoa anefa ny fihatsarambelatsihin'ireo, ka hoy Izy taminy:
–Nahoana no maka fanahy Ahy ianareo? Itondray vola denàry* anankiray Aho hojereko.

16Dia nitondrany, ka hoy i Jesoa taminy:
–Sarin'iza io ary anaran'iza?

Dia novalian'ireo hoe:
–An'ny amperôra rômanina!

17Ka hoy i Jesoa taminy:
–Avereno amin'ny amperôra rômanina izay an'ny amperôra rômanina ary amin'Andriamanitra izay an'Andriamanitra.

Dia gaga tamin'i Jesoa ireto iraka.

Sabotsy 07 Novambra 2015 - Dan 03 : 16 - 18

16Dia namaly i Sadràka sy i Mesàka ary i Habeda-Negao ka nanao hoe:

–Ry Nebokadnetsara, tsy misy tokony hamalianay anao akory momba izany. 17Fantaro fa afaka mamonjy anay ny Andriamanitray, dia ilay Andriamanitra izay tompoinay; eny, hanafaka anay amin'ny lafaoro misy afo mivaivay sy amin'ny fahefànao Izy, ry mpanjaka. 18Ary na tsy hataony aza izany, dia aoka ho fantatrao, ry mpanjaka, fa ireo andriamanitrao dia tsy hotompoinay ary ny sarivongana volamena izay natsanganao dia tsy hivavahanay.

Zoma 06 Novambra 2015 - Fil 2 : 12 - 18

12Koa amin'izany, ry hava-malalako, efa nanaiky ahy mandrakariva ianareo fony aho teo aminareo, fa vao mainka tokony hanaiky ahy bebe kokoa ianareo ankehitriny amin'izao tsy maha eo ahy izao. Miasà amin-tahotra sy hovitra hahatomombana ny famonjena anareo; 13satria miasa ao anatinareo hatrany Andriamanitra hahatonga anareo hikasa sy hahatanteraka izay mifanaraka amin'ny safidim-pony.
14Amin'izay rehetra atao, dia aza asiana fimonomononana sy fisalasalana, 15mba ho tsy manan-tsiny sady tsy misy fitaka ianareo, dia ho zanak'Andriamanitra* tsy misy kilema eo afovoan'ny olo-meloka sady maditra. Eo afovoan'ireo olona ireo, dia tokony hamirapiratra toy ny kintana eny an'habakabaka ianareo, 16ka hanolotra azy ireo ny teny manome fiainana. Raha izany no ataonareo, dia hanan-kireharehana momba anareo aho amin'ny andro hiavian'i Kristy, satria hiharihary fa tsy foana tsy akory ny ezaka nataoko sy ny zavatra nisasarako.

17Mety halatsa-dra ho sorona araraka aho ka hampombaina ilay sorona atolotrareo an'Andriamanitra, dia ny finoanareo. Raha izany tokoa, dia faly aho ary mampiombona anareo rehetra amin'ny hafaliako; 18aoka hifaly amin'izany koa ianareo, ary hampiombona ahy amin'ny hafalianareo.

Alakamisy 05 Novambra 2015 - Lio 3 : 7 - 14

7Toy izao àry no tenin'i Jôhany tamin'ny vahoaka nidodododo hataony batisa*:
–Ry tarana-menarana, iza no nanoro hevitra anareo mba tsy ho tratry ny fahatezeran'Andriamanitra izay efa antomotra? 8Asehoy amin'ny fitondrantena mendrika fa nialanareo tokoa ny toe-dratsinareo. Ary aza manao anakampo hoe: «Manana an'i Abrahama ho razambenay izahay!» Satria lazaiko aminareo fa hain'Andriamanitra ny manangana zanaka ho an'i Abrahama avy amin'ireto vato ireto. 9Indro efa eo am-poto-kazo rahateo ny famaky: koa ny hazo rehetra tsy mamoa voa tsara, dia hokapaina ka hatsipy any anaty afo.

10Ary hoy ny vahoaka nanontany an'i Jôhany hoe:
–Inona àry no tokony hataonay?

11Dia novaliany hoe:
–Izay manana akanjo roa, aoka hizara amin'izay tsy manana; ary izay manan-kohanina, aoka hanao toy izany koa.

12Mba nisy koa mpamory hetra* tonga hatao batisa ka niteny tamin'i Jôhany hoe:
–Mpampianatra ô, inona no tokony hataonay?

13Dia novaliany hoe:
–Aza mitaky mihoatra noho izay voafetra halainareo.

14Nisy ihany koa miaramila nanontany azy hoe:
–Mba inona kosa no tokony hataonay?

Dia hoy izy taminy:
–Aza maka zavatr'olona an-keriny na am-pitaka, fa aoka ianareo ho afa-po amin'ny karamanareo.

Alarobia 04 Novambra 2015 - Jos 24 : 14 - 15

14Dia hoy ihany i Josoa hoe:

–Koa ankehitriny manajà ny TOMPO ka manompoa Azy amim-pahitsiana sy fahamarinana. Ario ny andriamanitra izay notompoin'ny razanareo tany ampitan'i Eofrata sy tany Ejipta, ka manompoa ny TOMPO. 15Nefa raha tàhiny tsy sitrakareo ny hanompo ny TOMPO, dia fidio anio izay hotompoinareo, na ny andriamanitra izay notompoin'ny razanareo tany ampitan'i Eofrata na ny andriamanitry ny Amôrita izay mponina teto amin'ny tany onenananareo; fa izaho sy ny ankohonako kosa dia hanompo ny TOMPO izahay.

Talata 03 Novambra 2015 - II Kor 7 : 11 - 16

11Jereo tokoa ny vokatr'izany alahelo araka an'Andriamanitra izany teo aminareo: He izato fahazotoana hanova ny toe-javatra! He izato ezaka hanala tsiny ny tenanareo! He izato fahatezerana noho ny zava-nitranga! He izato tahotra ny famaizan'Andriamanitra! He izato faniriana hihaona amiko indray! He izato zotompo hanaiky ahy! He izato finiavana hanafay ny ratsy! Izany rehetra izany no nampisehoanareo fa tsy misy tsininareo mihitsy amin'iny raharaha iny.

12Koa raha nanoratra taminareo aho, dia tsy noho ilay nahavita ratsy na noho ilay nasian-dratsy; nanoratra taminareo aho mba hampiharihary aminareo fa eo anatrehan'Andriamanitra dia mazoto hanaiky ahy ianareo. 13Nampahery anay izany fihetsikareo izany.

Ankoatra ny fampaherezana azonay, dia vao mainka safononoka ny hafalianay tamin'ny nahitanay fa faly aoka izany i Tito satria namelombelona aina azy ianareo rehetra. 14Eny, nirehareha teo anatrehan'i Tito aho ny aminareo, ary dia tsy nandiso fanantenana ahy tokoa ianareo; fa tahaka ny nilazanay marina taminareo ny zavatra rehetra, dia tonga marina koa ny reharehanay teo anatrehan'i Tito ny aminareo. 15Vao mainka nitombo ny fankamamian'i Tito anareo, rehefa tsaroany fa vonon-kanoa ianareo rehetra, sady tamin-tahotra sy hovitra tokoa no nandraisanareo azy. 16Faly aho fa mahazo matoky anareo amin'ny zavatra rehetra.

Alatsinainy 02 Novambra 2015 - Jao 4 : 40 - 42

40Koa rehefa tonga teo amin'i Jesoa ny Samaritanina, dia niangavy Azy hitoetra tao aminy; ary dia nitoetra tao indroa andro i Jesoa. 41Vao mainka maro aza no nino Azy noho ny teny nataony; 42ka hoy ireo tamin-dravehivavy:

–Tsy noho ny filàzanao ihany no inoanay fa ny tenanay no nandre, ka fantatray fa Izy tokoa no Mpamonjy an'izao tontolo izao*.

Alahady 01 Novambra 2015 - Lev 19 : 35 - 37

35«Aza manao izay tsy marina eo amin'ny lamina voarindra momba ny refy sy lanja ary fatra. 36Mizàna marina sy vatomizana marina ary famarana marina no tano. Izaho no TOMPO Andriamanitrareo, Izay namoaka anareo hiala tany Ejipta.

37«Imasoy hotanterahinareo ny lalànako amam-pitsipiko rehetra. Izaho no TOMPO.»

Sabotsy 31 Oktobra 2015 - I Sam 17 : 42 - 54

42Dia nandinika an'i Davida ilay Filistinina ka naneso azy, satria hitany fa mbola tanora izy no mazava endrika ary tsara tarehy. 43Ary hoy i Gôliata tamin'i Davida:
–Alika angaha aho no hatonin'ialahy amin'ny tehina? Ho voaozona anie ialahy amin'ny alalan'ireo andriamanitray! 44Avia atỳ, fa homeko ny voro-manidina sy ny bibidia ny nofon'ialahy.

45Dia hoy ny navalin'i Davida azy:
–Manatona ahy amin'ny sabatra sy ny lefona ary ny lefom-pohy ianao, izaho kosa manatona anao amin'ny anaran'ny TOMPOn'izao rehetra izao, Andriamanitry ny tafik'i Israely, Izay efa nohantsinao. 46Anio ihany no hanoloran'ny TOMPO anao ho eo am-pelatanako, hahafaty anao aho ka hanapaka ny lohanao. Anio koa dia homeko hohanin'ny voro-manidina sy ny bibidia ny fatin'ny miaramila filistinina. Ary ho fantatry ny tany tontolo fa manana Andriamanitra tokoa i Israely. 47Dia ho fantatry ny Fiangonan'i Israely tsivakivolo koa fa tsy mba mila sabatra na lefona ny TOMPO hanomezam-pandresena. An'ny TOMPO ny ady, koa dia hatolony ho eo an-tananay ianareo.

48Raha vao nanomboka nihetsika hanatona an'i Davida ilay Filistinina, dia nihazakazaka mafy i Davida hitsena azy. 49Nandray vato tao anaty kitapony i Davida ary nandefa izany tamin'ny antsamotady ka nahavoa ilay Filistinina teo an-tampon-kandriny. Tafalentika teo ilay vato ka nidaraboka niankohoka tamin'ny tany izy.

50Toy izany no nandresen'i Davida an'i Gôliata ka namonoany azy tamin'ny antsamotady sy ny vato, fa tsy mba tamin'ny sabatra.

51Dia nihazakazaka nankeny amin'i Gôliata i Davida ka nanatsoaka ny sabatr'i ilay rapeto tamin'ny tranony ary nanapaka ny lohany. Koa rehefa hitan'ny Filistinina fa maty ilay maherifony, dia nitsoaka nandositra izy ireo. 52Tafatsangana ny miaramilan'i Israely sy i Joda ka nanao hiakan'ady sady nanenjika ny Filistinina hatrany am-bavahadin'i Gata sy i Hekrôna. Ary ny fatin'ny Filistinina niampatrampatra teny an-dalan'i Saharaîma ka hatrany Gata sy i Hekrôna.

53Dia navelan'ny Israelita ny fanenjehana ny Filistinina fa lasa izy ireo namabo ny tobiny. 54Nalain'i Davida ny lohan'i Gôliata mba hoentiny any Jerosalema, fa ny fiadian'ilay rapeto kosa notahiriziny tao an-dainy.

Zoma 30 Oktobra 2015 - I Kor 16 : 10 - 14

10Rehefa tonga i Timôty, dia mba ataovy izay hahatsapany fa tsara fandray azy ianareo; satria miasa tahaka ahy koa izy amin'ny asan'ny Tompo. 11Aoka mba tsy hisy hanao tsinontsinona azy. Omeo vatsy izy ary atero mba ho tonga soa aman-tsara atỳ amiko, fa miandry azy aho sy ireo havana iray finoana eto.

12Fa i Apôlao havantsika kosa dia nampirisihiko matetika hankatỳ aminareo miaraka amin'ny havana sasany iray finoana; saingy tsy tiany hatao mihitsy izany ankehitriny, fa ho avy ihany izy rehefa misy hahafahany.

13Miambena ianareo, mamahara tsara amin'ny finoana, aoka hitombandahy, mahereza. 14Ataovy amim-pitiavana ny zavatra rehetra.

Alakamisy 29 Oktobra 2015 - Apo 1 : 17 - 20

17Vao nahita ny Zanak'olona aho, dia lavo niankohoka toy ny maty teo anoloan'ny tongony. Fa nametraka teo amboniko ny tanany ankavanana Izy ka nanao hoe:

–Aoka izay ny tahotra! Izaho no Voalohany sy Farany, 18dia ilay Velona; efa maty Aho, nefa indro velona mandrakizay mandrakizay, sady manam-pahefana amin'ny fahafatesana sy amin'ny Toeran'ny maty. 19Koa soraty izay zavatra efa hitanao, na izay ankehitriny, na izay mbola ho avy any aoriana. 20Izao no hevi-miafina fonosin'ny kintana fito hitanao teo an-tanako havanana sy ny fitoeranjiro volamena fito: ny kintana fito dia ny anjelin'ny Fiangonana fito; ary ny fitoeranjiro fito dia ny Fiangonana fito.

Alarobia 28 Oktobra 2015 - Eks 1 : 15 - 21

15Nisy mpampivelona hebreo anankiroa nantsoina hoe Sifrà sy Pohà. Nandidy azy ireo ny mpanjakan'i Ejipta, 16ka nanao hoe:
–Rehefa mampiteraka ny vehivavy hebreo ianareo, dia jereo ny zaza vao teraka; ka raha zazalahy dia vonoy ho faty, fa raha zazavavy kosa dia velomy.

17Natahotra an'Andriamanitra anefa ireo mpampivelona ireo ka tsy nanao araka izay nodidian'ny mpanjakan'i Ejipta, fa namela ireo zazalahy ho velona. 18Koa nampanantsoin'ny mpanjaka ireo mpampivelona ka nanontaniany hoe:
–Nahoana no nanao izany zavatra izany ianareo, ka namela ireo zazalahy ho velona?

19Fa namaly ireo mpampivelona hoe:
–Tsy mba tahaka ny vehivavy ejiptianina ireo vehivavy hebreo fa matanjaka; koa raha tsy mbola tonga akory ny mpampivelona, dia efa teraka izy.

20Noho izany, dia nihamaro hatrany hatrany ireo Israelita sady nihanahery tokoa. Nasian'Andriamanitra soa ireo mpampivelona, 21ka nomeny fara aman-dimby satria natahotra Azy.

Talata 27 Oktobra 2015 - Jos 11 : 1 - 11

1Nony ren'i Jabîna mpanjakan'i Hatsôra ny fandresen'i Josoa, dia nandefasany iraka i Jôbaba mpanjakan'i Madôna sy ny mpanjakan'i Simrôna ary ny mpanjakan'i Aksafa. 2Nandefasany iraka ihany koa ireo mpanjaka izay any an-tendrombohitra any avaratra sy ireo mpanjaka tany amin'ny lohasahan'i Jôrdàna eo atsimon'ny farihin'i Genesareta, ary ireo mpanjaka teny amin'ny lemak'i Sefelà* sy teny amoron-tsiraka akaikin'i Dôra ao andrefana. 3Nandefasan'i Jabîna iraka ihany koa ny Kanahanita tany atsinanana sy andrefan'i Jôrdàna, ny Amôrita* sy Hetita ary ny Perizita sy Jebosita tany an-tendrombohitra, ary ireo Hivita nonina tany am-pototr'i Hermôna, tany amin'ny faritanin'i Mitsepà. 4Dia niainga ireo mpanjaka rehetra ireo, niaraka tamina miaramila tsy hita isa tahaka ny fasika eny amoron-dranomasina ary soavaly sy kalesy maro dia maro. 5Nifanaraka izy rehetra ka tonga niara-nitoby teo akaikin'ny loharanon'i Merôma mba hiady amin'ny Israelita.

6Fa hoy ny TOMPO tamin'i Josoa:
–Aza matahotra an'ireo ianao; fa rahampitso amin'ny ora toy izao, dia hatolotro ho fatin-dratra eo anatrehan'ny Israelita izy rehetra ireo. Koa traingoy ny soavaliny ary dory amin'ny afo ny kalesiny.
7Dia lasa i Josoa sy ny tafiny manontolo hamely tampoka ny fahavalo tao akaikin'ny loharanon'i Merôma, ka niantoraka taminy. 8Natolotry ny TOMPO teo an-tanan'ny Israelita ireo ka resiny, nenjehiny nianavaratra hatrany Sidôna tanàn-dehibe sy hatrany Misrefôta-Maîma ary hatrany amin'ny lohasahan'i Mitsepà any atsinanana. Nasian'ny Israelita ireo ka tsy nisy niangana. 9Araka izay nolazain'ny TOMPO no nataon'i Josoa taminy, ka notraingoiny ny soavalin'ireo ary nodorany tamin'ny afo ny kalesiny.

10Rehefa niverina i Josoa, dia naka an'i Hatsôra satria i Hatsôra no renivohitr'ireo fanjakana tany avaratra. Novonoiny tamin'ny sabatra ny mpanjakany 11ary nasainy naringana avokoa ny olona rehetra tao; tsy nisy zava-manana aina niangàna mihitsy, sady nodorana ny tanàna.

Alatsinainy 26 Oktobra 2015 - Efe 3 : 8 - 13

8Kely noho izay bitika indrindra amin'ny vahoakan'Andriamanitra rehetra aho, kanefa nomen'Andriamanitra izany tombon-tsoa izany: dia ny hitory amin'ny hafa firenena ny Vaovao Mahafaly momba ny haren'i Kristy tsy hita lany, 9ary ny hampahazava amin'ny olona rehetra ny fomba hanatanterahan'Andriamanitra ny tsiambaratelony. Hatrizay hatrizay dia voaafina tao amin'Andriamanitra Mpahary ny zavatra rehetra, izany tsiambaratelo izany; 10fa ankehitriny kosa naseho tamin'ny alalan'ny Fiangonana izany, ka tonga fantatr'ireo fanapahana sy ny fahefana eny ana habakabaka ny fahendren'Andriamanitra, dia fahendrena mahefa zavatra tsy tambo isaina. 11Izany rahateo no fandaharana hatrizay hatrizay ka notanterahin'Andriamanitra tamin'ny alalan'i Kristy Jesoa Tompontsika. 12Ary isika efa tafaray amin'i Kristy dia manana ny fahasahiana manatona an'Andriamanitra amim-pahatokiana, noho ny finoana niainan'i Kristy. 13Koa izany no angatahako anareo mba tsy ho ketraka amin'ny fahoriana manjo ahy hanasoavana anareo, fa misy vokany be voninahitra ho anareo izany.

Alahady 25 Oktobra 2015 - Jao 20 : 19 - 23

19Ny harivan'io alahady io ihany, dia vory tao amin'ny trano iray ny mpianatra*; ary noho izy ireo natahotra ny manampahefana jiosy, dia voahidy avokoa ny varavarana. Kanefa tonga i Jesoa nijoro teo afovoan'ny mpianatra ary nanao taminy hoe:
–Ho ao aminareo anie ny fiadanana!

20Rehefa nilaza izany i Jesoa, dia nasehony azy ireo ny tanany sy ny fony, ka faly ny mpianatra fa nahita ny Tompo.

21Dia hoy indray i Jesoa taminy:
Ho ao aminareo anie ny fiadanana! Tahaka ny nanirahan'ny Ray Ahy no anirahako anareo koa.

22Rehefa nilaza izany Izy, dia nitsoka taminy ary nanao hoe:
–Raiso ny Fanahy Masina. 23Na iza na iza avelanareo heloka, dia voavela; ary na iza na iza tsy avelanareo heloka, dia tsy voavela.

Sabotsy 24 Oktobra 2015 - Mat 9 : 20 - 22

20Fa indro nisy vehivavy mitsi-dra efa nandritra ny 12 taona, nanatona an'i Jesoa avy eo ivoho ary nikasika ny somotraviavin-dambany*; 21fa hoy izy anakampony: «Na dia ny lambany fotsiny aza no voakasiko, dia ho sitrana aho.»

22Dia nitodika i Jesoa ka nahita azy ary niteny hoe:
–Mahereza, anaka; ny finoanao no nahasitrana anao!

Zoma 23 Oktobra 2015 - Est 7 : 1 - 6

1Dia lasa ny amperôra sy i Hamàna nankany amin'i Estera mpanjakavavy, ho ao amin'ilay fanasana faharoa.

2Ary teo am-pamaranana ny sakafo, dia hoy indray ny amperôra tamin'i Estera:
–Inona no angatahinao sy tadiavinao? Fa na dia hatramin'ny antsasaky ny fanjakako aza, dia homeko anao izany ary ho azonao tokoa.

3Dia namaly i Estera mpanjakavavy ka nanao hoe:
–Ry andriamanjaka, raha mba mahazo fitia eo imasonao ary raha sitrakao izao, dia aoka hotsimbininao aina ny tenako sy ny mpiray firenena amiko fa izany no angatahiko sy tadiaviko.

4Namidy manko ny tenako sy ny mpiray firenena amiko mba haringana sy hovonoina ho ripaka; fa raha tàhiny namidy handevozina fotsiny izahay, dia ho nangina ihany aho satria tsy tokony hanahiranana anao izany fampahoriana izany.

5Dia nanontany an'i Estera mpanjakavavy ny amperôra Kserksesa nanao hoe:
–Iza moa ilay olona mikasa hanao izany ary aiza no misy azy?

6Ka novalian'i Estera hoe:
–Io Hamàna ratsy fanahy io no fahavalonay sy mpankahala anay!
Dia raiki-tahotra teo anatrehan'ny amperôra sy ny mpanjakavavy i Hamàna.

Alakamisy 22 Oktobra 2015 - Asa 4 : 23 - 31

23Vantany vao afaka izy roa lahy, dia namonjy ireo namany ka nitantara izay rehetra voalazan'ny lohandoha-mpisorona sy ny loholona*. 24Nony nandre izany ireo mpino, dia indray nientana nanandratra tonom-bavaka tamin'Andriamanitra hoe:
–Tompo ô, Ianao no nanao ny lanitra sy ny tany ary ny ranomasina mbamin'izay rehetra eo aminy; 25ary tamin'ny alalan'ny Fanahy Masina no nampitenenanao an'i Davida razanay sady mpanomponao hoe:
             «Nahoana no mihotakotaka ny firenena?
               Nahoana no mioko foana ny vahoaka?
               26Nivonon-kiady ny mpanjakan'ny tany,
               ary nivondrona ny manampahefana
               mba hanohitra ny Tompo sy ilay Mesiany*.»
27Marina tokoa fa i Herôda* sy i Pônty Pilato*, niaraka tamin'ny olona hafa firenena* sy ny vahoaka israelita*, dia nivondrona teto amin'ity tanàna ity mba hanohitra an'i Jesoa Mpanomponao masina, Izay natokanao ho Mesia. 28Notanterahin'izy ireo izay efa notendrenao rahateo tamin'ny herinao sy ny fikasanao. 29Tompo ô, hitanao ankehitriny ny fandrahonany, koa omeo anay mpanomponao ny hery hitoriana ny teninao amim-pahasahiana tokoa; 30ahinjiro ny tananao hahasitrana ary hahatontosa famantarana* sy zava-mahagaga amin'ny anaran'i Jesoa ilay Mpanomponao masina.
31Rehefa avy nivavaka ireo mpino, dia nihovitrovitra ny trano niangonany ary feno Fanahy Masina izy rehetra ka nitory ny tenin'Andriamanitra tamim-pahasahiana.

Alarobia 21 Oktobra 2015 - I Tan 22 : 11 - 16

11Koa ankehitriny, anaka, hiaraka aminao anie ny TOMPO ka hanambina anao hanorina trano ho Azy TOMPO Andriamanitrao, araka izay efa voalazany ny aminao. 12Homen'ny TOMPO saina mahiratra sy mahay anie ianao rehefa hatsangany hifehy an'i Israely, mba hitandremanao ny lalànan'ny TOMPO Andriamanitrao. 13Eny, raha tandremanao hotanterahina ny lalàna amam-pitsipika izay nandidian'ny TOMPO an'i Mosesy ho an'ny Israelita, dia hambinina tokoa ianao. Mahereza sy matanjaha, fa aza matahotra na mivadi-po. 14He! nanao ezaka mafy aho ka nahavonona ho an'ny tranon'ny TOMPO ireto fitaovana ireto: volamena milanja telo tapitrisa kilao mahery, volafotsy milanja telopolo tapitrisa kilao mahery, halimo sy vy betsaka tsy hita lanja; ary nahavonona hazo sy vato koa aho. Dia hampianao kosa ireo. 15Mpiasa maro no eto aminao: dia tambato sy mpanao sokitra hazo ary olona mahay ny asa isan-karazany. 16Tsy hita isa ny volamena sy ny volafotsy ary ny halimo sy ny vy; koa arosoy ny asa, ary hiaraka aminao anie ny TOMPO!

Talata 20 Oktobra 2015 - Lio 12 : 4 - 7

4–Izao no lazaiko aminareo sakaizako: aza matahotra ireo mahafaty ny vatana, kanefa tsy afa-manao mihoatra an'izany. 5Fa hasehoko anareo izay tokony hatahoranareo: matahora an'Andriamanitra Izay manam-pahefana hamarina anareo any amin'ny lohasahan'afo* rehefa novonoiny ianareo; eny, hoy Aho aminareo, Izy ihany no atahory.
6Tsy ampahafolon'ny denàry* monja ve no vidin'ny fody dimy? Kanefa tsy misy hadinon'Andriamanitra izy ireny na iray aza. 7Na ny volon-dohanareo aza dia fantatr'Andriamanitra ny isany: koa aza matahotra, fa sarobidy noho ny fody maro ianareo!

Alatsinainy 19 Oktobra 2015 - I Pet 5 : 5 - 9

17Fa sambatra ny olona izay anarin'Andriamanitra!
Koa aza hamaivanina, ry Jôba, ny famaizan'ilay Tsitoha.

18Fa Andriamanitra dia mety mampijaly, raha mitsabo fery;
ary ny tànany dia mety mandratra, raha manasitrana.
19Hamonjy anao amin'ny fahoriana matetika Izy;
ka amin'ny farany tsy hahavoa anao intsony ny loza.
20Tsy hamela anao ho faty Izy, raha avy ny mosary;
harovany tsy ho voan'ny sabatra ianao, raha avy ny ady.
21Ho voaaro amin'ny endrikendrika ianao,
ka tsy hatahotra raha tonga ny antambo.
22Hihomehezanao fotsiny ny mosary aman'antambo,
ary tsy hatahoranao izay bibidia.
23Ho vita fanekempihavanana mirindra ianao
amin'ny vato eny an-tsaha sy amin'ny bibidia,
24hiadam-pinaritra ao amin'ny fonenanao,
ary hahita ny ondrinao tsy misy very
rehefa tonga hisafo azy any an-kijàna.
25Ho hitanao hihamaro koa ny zanakao;
ary ny taranakao dia hihabetsaka
tahaka ny ahitra eny an-tsaha.

Alahady 18 Oktobra 2015 - Jer 17 : 5 - 8

5Izao no lazain'ny TOMPO:

–Voaozona izay mitoky amin'olombelona
sy miantehitra amin'ny nofo ho heriny
ka mampiala ny fony amiko.
6Ho tahaka ny anjavidy ao an-tany hay izy
ka tsy hahita ny soa ho avy;
hitoetra an-tsaham-bato any an-taniefitra izy
dia eo amin'ny tanin-tsira tsy azo onenana.
7Fa hotahîna izay mitoky amiko
ka manana Ahy TOMPO ho fialofany.
8Ho tahaka ny hazo ambolena eo amoron-drano izy
ka misandraha-paka eo akaikin'ny renirano.
Tsy misy atahorany na avy aza ny hafanana,
ary maitso hatrany ny raviny;
Na dia amin'ny taonan'ny hain-tany aza,
tsy manahy izy fa mamokatra hatrany.

Sabotsy 17 Oktobra 2015 - Lio 12 : 32 - 33

32–Aza matahotra, ry andian'ondry vitsy, fa efa sitraky ny Ray homena anareo ny Fanjakany*! 33Amidio ny fanananareo ka ny vola azo, anaovy asa fiantrana. Kitapom-bola tsy mety tontan'ny ela atao ho anareo, dia harena tsy mety lany any an-danitra; any tsy mba misy mpangalatra mihaodihaody na kadradraka manimba.

Zoma 16 Oktobra 2015 - Isa 54 : 6 - 10

6Fa tahaka ny vady nariana ka ory am-panahy ianao
nefa nampodîn'ny TOMPO indray.

Fa hoy ny Andriamanitrao aminao:
«Ahoana no hanariana tanteraka
ny vadin'ny fahatanorana?
7Vetivety foana no nanariako anao,
fa amin'ny indrafo lehibe no hampodîko anao.
8Tamin'ny firongatry ny hatezerako
no nandavako vetivety tsy hijery anao;
fa amin'ny fitiavana mandrakizay kosa
no anehoako indrafo aminao.
Izaho TOMPO mpanavotra anao no milaza izany.

9Tamin'ny andron'i Noà, dia nianiana Aho
fa tsy hanafotra ny tany intsony ny rano;
mianiana toy izany koa Aho ankehitriny
fa tsy hisafoaka aminao na handrahona anao intsony.

10Fa na dia hifindra hiala aza ny tendrombohitra
ary na dia hihozongozona aza ny havoana,
dia tsy hiala aminao ny fitiavako
ary tsy hihozongozona ny fanekempihavanako
mikendry ny hampiadam-pinaritra anao.
Izaho TOMPO mpamindra fo aminao no milaza izany.»

Alakamisy 15 Oktobra 2015 - Mar 4 : 35 - 41

35Ny harivan'iny andro iny ihany dia hoy i Jesoa tamin'ny mpianany*:
–Andeha isika hankerỳ ampita!

36Ary rehefa avy nandefa ny vahoaka ny mpianatra, dia nitondra an'i Jesoa tamin'ilay sambokely efa nisy Azy rahateo. Nisy sambokely maro hafa koa tafaraka taminy. 37Ary indro nisy tafio-drivotra mahery ka tafiditry ny alon-drano hatrany anaty sambokely, ary efa nila ho feno rano ny sambokely. 38I Jesoa anefa natory teo amin'ny zoron-tsambo terỳ aoriana fa nisy ondana niondanany teo; ary nofohazin'ny mpianany Izy ka nilazany hoe:
–Mpampianatra ô, tsy mampaninona Anao ve na ho faty aza isika?

39Dia nifoha Izy ka niteny mafy ny rivotra ary nanao tamin'ny farihy hoe:
–Mangîna! Mitonia!

Dia nitsahatra ny rivotra ary nanjary tony dia tony ny andro. 40Dia hoy i Jesoa tamin'ny mpianany:
–Nahoana no saro-tahotra ianareo? Tsy mbola manam-pinoana angaha ianareo?

41Ary natahotra dia natahotra tokoa iretsy mpianany, ka nifampilaza hoe:
–Fa iza àry io no manaiky Azy hatramin'ny rivotra sy ny farihy?

Alarobia 14 Oktobra 2015 - Sal 112 : 1 - 10

1 Haleloià*!
ALEFA
              Sambatra ny olona izay manaja ny TOMPO
BETA
              sady finaritra tokoa mankatò ny didiny.
GIMELA
              2Hahery eto amin'ity tany ity ny zanany;
DALETA
              ombàn'ny Tompo fitahiana ireo olo-mahitsy:
HE
              3fananana sy harena no ao an-tranony.
VAO
              Maharitra hatrany koa ny asa fiantràny:
ZAINA
              4na dia ao anatin'ny haizina aza
              dia iposahan'ny hazavana ireo olo-mahitsy
HETA
              izay miantra sy mamindrafo
              ary mitandro ny fahamarinana;
TETA
              5tsara ny miantra sy ny mampisambotra
JODA
              ary ny mitantana asa fihariana amim-pahitsiana.
KAFA
              6Tsy hihontsona na oviana na oviana ny olo-marina;
LAMEDA
              haharitra mandrakizay ny fahatsiarovana azy.
MEMA
              7Ny fandrenesana loza dia tsy mba atahorany;
NONA
              ny fony mitombina matoky ny TOMPO.
SAMEKA
              8Mahery fo izy ka tsy mba hatahotra
HAINA
              ary dia hahita ny fahavalony resy.
PE
              9Malala-tanana izy manome ny mahantra;
TSADE
              maharitra hatrany ny asa fiantràny,
KÔFA
              ka hitraka hombam-boninahitra* izy.
RESA
              10Mahita izany kosa ny olon-dratsy ka sosotra

Talata 13 Oktobra 2015 - Job 5 : 17 - 25

Alatsinainy 12 Oktobra 2015 - Sal 108 : 1 - 9

1 Tononkira. Salamo nataon'i Davida.

2Andriamanitra ô, mitombina dia mitombina ny foko;
ka hihira ho Anao aho sy hankalaza Anao amin-tsalamo.
3Mifohaza, ry fanahiko; mifohaza, ry valiha sy lokanga,
fa tiako hofohazina ny mazavatsinanana.

4TOMPO ô, vory vahoaka no hiderako Anao;
ary eo anivom-pirenena no hankalazako Anao amin-tsalamo,
5satria lehibe mihoatra noho ny lanitra ny fitiavanao
ary avo tafapaka amin'ny rahona ny toetranao mahatoky.
6Andriamanitra ô, misandrata Ianao
ho any an-tampon'ny lanitra;
aoka anie ny voninahitrao*
hamiratra amin'ny tany tontolo!
7Vonjeo amin'ny herinao aho ary valio vavaka,
dia ho afaka ilay vahoaka malalanao.

8Tao an-Toeramasiny* no niteny Andriamanitra hoe:
«Faly tokoa Aho fa hizara an'i Sekema
sy ny lohasahan'i Sokôta ho an'ny vahoakako;
9Ahy i Gilehada, Ahy koa i Manase;
i Efraîma no toy ny satro-by fiarolohako;
i Joda no toy ny tehim-piandrianako.
10I Môaba hampiasaiko toy ny tavy fisasàko;
i Edôma hanipazako kapa ho fananako;
i Filistia hanaovako horakora-pandresena.»

Alahady 11 Oktobra 2015 - I Tes 2 : 1 - 12

1Ianareo, ry havana, dia mahalala fa tsy very maina velively ny nidiranay tatỳ aminareo. 2Fantatrareo koa fa taloha kelin'izay, dia nampijalîna sy nalam-baràka tany Filipy izahay; kanefa dia nomen'ilay Andriamanitray fahasahiana hanambara taminareo ny Vaovao Mahafaly* avy aminy, na dia be aza ny fanoherana. 3Eny, ny antso nataonay dia tsy mifototra amin'ny fitaka na amin'ny fahalotoana na amin'ny fisolokiana; 4fa Andriamanitra no efa nizaha toetra anay ka nanankina taminay ny Vaovao Mahafaly, ary dia araka izany no itenenanay: tsy mila sitraka amin'olombelona izahay, fa amin'Andriamanitra Izay mizaha toetra ny fonay. 5Fantatrareo fa tsy nanao teny manasohaso olona izahay na nihatsaravelatsihy hanafina fitiavan-karena; Andriamanitra no vavolombelonay. 6Tsy nitady voninahitra tamin'olombelona izahay, na taminareo na tamin'ny hafa, 7na dia azonay natao aza ny nanampatra fahefana araka ny maha apôstôlin'i Kristy* anay; fa teo anivonareo, dia nalemy fanahy izahay, mova tsy reny mikolokolo ny zanany naterany. 8Noho ny fankamamianay anareo, dia tsy ny Vaovao Mahafaly avy amin'Andriamanitra ihany no sitrakay hampitaina aminareo, fa vonona koa izahay hahafoy na dia ny ainay aza, satria efa tonga malalanay ianareo. 9Tsaroanareo, ry havana, ny nikelezanay aina sy nisasaranay mafy; niasa andro aman'alina izahay mba tsy hanahirana na dia olona iray taminareo aza, fony izahay nitory taminareo ny Vaovao Mahafaly avy amin'Andriamanitra. 10Samy vavolombelonay, na ianareo na Andriamanitra, fa madio sy marina ary tsy manan-tsiny ny fitondrantenanay teo anoloanareo mpino. 11Fantatrareo fa toy ny fitondran'ny ray ny zanany naterany no nitondranay anareo tsirairay avy: 12nampirisika anareo izahay sy nampahery anareo ary nananatra anareo mba hanao fitondrantena mendrika an'Andriamanitra, dia ilay Andriamanitra Izay miantso anareo hiditra ao amin'ny Fanjakàny* sy ny voninahiny.

Sabotsy 10 Oktobra 2015 - Sal 57 : 1 - 6

1 Tao amin'ny tahirin-kiran'ny filohan'antoko-mpihira.* Hohiraina araka ny feon'ny hoe «Aza ravana....» Salamo nataon'i Davida fony izy nandositra lavitra an'i Saoly ka niery tao anaty zohy.

2Iantrao aho, Andriamanitra ô, iantrao
satria Ianao no fialofako;
eo ambany elatrao tokoa no ialofako
mandra-pidifin'ny loza.
3Ilay Andriamanitra Avo Indrindra no antsoiko,
dia ilay Andriamanitra manao izay mahasoa ahy.
4Hirahiny avy any an-danitra anie ny famonjena ahy,
hataony ho afa-baràka anie ireo mpanenjika ahy!

Fiatoana*

Eny, hirahin'Andriamanitra ho amiko anie
ny fitiavana amam-pahamarinany!
5Izaho monina afovoan'ny fahavalo masiaka
izay tahaka ny liona mandripaka olona:
toy ny lefona na zana-tsipîka ny nifiny,
toy ny sabatra maranitra ny lelany.

6Andriamanitra ô, misandrata Ianao
hanerinerina any an-tampon'ny lanitra.
Aoka anie ny voninahitrao
hamiratra amin'ny tany tontolo!

Zoma 09 Oktobra 2015 - I Sam 20 : 30 - 34

30Tezitra tamin'i Jônatàna i Saoly ka nanao taminy hoe:
–Zana-behivavy mpikomy ialahy! Fantatro izao fa miandany amin'ny zanakalahin'i Jisay ialahy ho henatra ho an'ialahy sy ny renin'ialahy. 31Fa raha mbola velona eto ambonin'ny tany koa iny zanakalahin'i Jisay iny, dia tsy ho tonga mpanjaka na oviana na oviana amin'ity tany ity ialahy! Koa sambory izy ary ento atỳ amiko, fa mendrika azy ny ho faty.

32Fa namaly an'i Saoly i Jônatàna hoe:
–Nahoana no mendrika ho faty izy? Inona no ratsy nataony?

33Natorak'i Saoly tamin'i Jônatàna ny lefony mba hamelezany azy, ka dia fantany fa tena vonona hifofo ny ain'i Davida tokoa ny rainy. 34Nitsangana niala teo amin'ny sakafo tamim-pahatezerana mafy i Jônatàna, ary tsy nihinana na inona na inona ny andro faharoan'ny fety. Nalahelo mafy an'i Davida izy, satria niteny ratsy azy ny rainy.

Alakamisy 08 Oktobra 2015 - Asa 27 : 21 - 26

21Efa ela tsy nihinan-kanina ireo olona tao an-tsambo. Dia nitsangana teo afovoan'izy rehetra i Paoly ka nanao taminy hoe:

–Inay anie ianareo, ry sakaiza, mba nihaino ahy ihany ka tsy niala tao Kreta, dia tsy ho niharan'izao fahasimbana sy fatiantoka izao isika. 22Kanefa izao no hevitra atoroko anareo: mahereza tsara, fa tsy misy ho faty tsy akory ianareo, fa ny sambo no hany ho very. 23Halina manko dia nisy anjeli*n'ilay Andriamanitra Tompoko sady ivavahako tonga tamiko 24ary nanao hoe: «Aza matahotra, ry Paoly, fa tsy maintsy hanatrika ny amperôra rômanina ianao. Ary Andriamanitra, noho ny fitiavany anao, dia hamonjy ny ain'ireto olona rehetra miray sambo aminao.» 25Koa noho izany, mahereza tsara, ry sakaiza, fa itokiako Andriamanitra; tsy ho raraka an-tany izay voalazany tamiko. 26Nefa tsy maintsy ho fefika ihany eo amin'ny nosy anankiray isika.

Alarobia 07 Oktobra 2015 - Jos 10 : 12 - 21

12Tamin'ny andro nanomezan'ny TOMPO fandresena ho an'ny Israelita teo anoloan'ny Amôrita, dia nivavaka tamin'ny TOMPO i Josoa ka niteny teo imason'ny Israelita hoe:
–Ry masoandro, mijanona eo ambonin'ny lohasahan'i Aialôna!

13Dia nijanona ny masoandro ary niato ny volana ambara-pandresin'ny firenena israelita ny fahavalony. Araka izay efa voasoratra tao amin'ny bokin'i Ilemahitsy, dia nijanona teo afovoan'ny lanitra tokoa ny masoandro, ka tsy nety hilentika indray andro manontolo. 14Ary tsy nisy andro tahaka iny, na taloha na taoriana, izay nihainoan'ny TOMPO hatak'olona; fa niady ho an'i Israely ny TOMPO.

15Avy eo dia niverina ho any an-toby tany Gilgala i Josoa sy ny Israelita rehetra tafaraka taminy.

16Kanjo nandositra ireo mpanjaka amôrita* dimy ka niafina tao amin'ny zohy tao Makedà. 17Hita fa niafina tao ireo ka nambara tamin'i Josoa izany. 18Dia nanome baiko i Josoa hoe:
–Anakodiavo vato lehibe eo am-bavazohy ary asio olona hiambina azy. 19Kanefa ianareo aza mijanona any, fa enjeho ny fahavalonareo ka asio avy ao ivohony; aza avela hiditra any an-tanànany, satria efa natolotry ny TOMPO Andriamanitrareo ao an-tananareo izy.

20Rehefa nasian'i Josoa sy ny Israelita ireo Amôrita, dia voan'ny faharesena lehibe tokoa tamin'ny farany, ary faharesena tanteraka; saingy nisy ihany afa-nandositra ka nitsofoka tao amin'ny tanànany mimanda. 21Avy teo dia niverina soa aman-tsara ho any amin'i Josoa tao an-toby tany Makedà ny tafiny manontolo. Ary tsy nisy olona sahy nanao vava ratsy tamin'ny Israelita intsony.

Talata 06 Oktobra 2015 - Jao 6 : 16 - 21

16Nony hariva ny andro, dia nidina nankeny amoron'ny farihy ireo mpianatr*'i Jesoa. 17Ary niondrana an-tsambokely izy ireo ka nita ny farihy ho any Kafarnahòma. Efa maizina ny andro tamin'izay, nefa i Jesoa mbola tsy tonga teo amin'ireo mpianany; 18ary nanonja ny farihy, satria nifofofofo mafy ny rivotra. 19Rehefa nivoy tokony ho dimy na enina kilaometatra izy ireo, dia nahita an'i Jesoa nandeha teny ambony farihy sy nanakaiky ny sambokely; hany ka raiki-tahotra ireo mpianatra. 20Fa hoy kosa i Jesoa taminy:

–Izaho ihany ity, fa aoka izay ny tahotra!

21Dia te handray Azy ho eo an-tsambokely ireo mpianany; nefa niaraka tamin'izay dia tafatody tamin'ny tany nokasain'izy ireo haleha ny sambokely.

Alatsinainy 05 Oktobra 2015 - 2 Tes 1 : 1 - 12

Mamangy anareo isan'ny Fiangonana atỳ Tesalônika, izay tafaray amin'Andriamanitra Raintsika sy i Jesoa Kristy* Tompo, aho. Mamangy anareo koa i Silasy sy i Timôty. 2Ho aminareo anie ny fahasoavana sy ny fiadanana avy amin'Andriamanitra Ray sy i Jesoa Kristy Tompo!
Ny fitsarana amin'ny andro hiavian'i Kristy

3Tsy maintsy velom-pisaorana mandrakariva an'Andriamanitra izahay, ry havana, noho ny aminareo. Mendrika hataonay izany satria mandroso fatratra ny finoanareo ary mitombo hatrany ny fifankatiavanareo rehetra. 4Izany no mahatonga anareo ho reharehanay manerana ireo Fiangonan'Andriamanitra, noho ianareo manam-paharetana sy mino hatrany eo anivon'ny fanenjehana sy fahoriana rehetra mianjady aminareo.

5Porofo izany fa mitsara ara-drariny Andriamanitra, satria vokatr'izay mianjady aminareo dia hatao mendrika ny Fanjakàn'Andriamanitra* ianareo, sady io Fanjakàn'Andriamanitra io no anton'ny iaretanareo fijaliana. 6Satria izao no ara-drariny amin'Andriamanitra: hovaliany fahoriana ireo mpampahory anareo, 7ary homeny fialan-tsasatra miaraka aminay ianareo ampahorîna. Ho tonga izany amin'ny andro hisehoan'i Jesoa Tompo avy any an-danitra, otronin'ireo anjely* mitory ny heriny; 8voahodidin'afo miredareda Izy no tonga hanasazy ireo tsy mahalala an'Andriamanitra sady tsy manaiky ny Vaovao Mahafaly* momba an'i Jesoa Tompontsika. 9Fahaverezana maharitra mandrakizay no sazy hihatra amin'ireo, ka tsy hifanatri-tava amin'ny Tompo sy ho lavitry ny heriny heni-boninahitra ireo 10amin'ilay andro hahatongavan'ny Tompo mba homen'ny vahoakany* voninahitra sady higagan'izay rehetra mino Azy. Ho isan'ireto hanome voninahitra ny Tompo ireto koa ianareo, satria nino ny fijoroanay ho vavolombelona nanambara Azy taminareo.

11Izany no ivavahany lalandava ho anareo. Koa mangataka amin'Andriamanitsika izahay mba hataony mendrika ny fiainana niantsoany anareo ianareo. Mangataka izahay mba ho tanterahiny amin-kery avokoa ny fanirianareo hanao soa ary hataony lavorary koa ny asa ateraky ny finoanareo; 12dia homenareo voninahitra ny anaran'i Jesoa Tompontsika, sady ianareo koa homeny voninahitra. Izany no vokatr'ilay fahasoavana avy amin'ilay Andriamanitsika sy i Jesoa Kristy* Tompo.

Alahady 04 Oktobra 2015 - Sal 34 : 4 - 10

GIMELA
                 4Mankalazà ny TOMPO miaraka amiko ianareo,
                 ary aoka hiara-manandratra ny voninahiny isika.
DALETA
                 5Nitady ny TOMPO aho, dia novaliany vavaka;
                 ka nafahany avokoa ny tahotro rehetra.
HE
                 6Mijere Azy ianareo, dia aoka ho mirana;
VAO
                 ny tavanareo tsy ho safo-kenatra intsony.
ZAINA
                 7Niantso vonjy aho fa olo-mahantra
                 ka nohenoin'ny TOMPO sy novonjeny
                 tamin'izay fahoriako rehetra.
HETA
                 8Ny anjelin*'ny TOMPO miambina
                 manodidina ny mpanaja an'Andriamanitra
                 ka manafaka azy amin'ny loza.
TETA
                 9Andramo sy jereo fa tsara ny TOMPO.
                 Sambatra ny olona mialoka aminy!
JODA
                 10Mankatoava ny TOMPO, ianareo vahoakany:
                 fa tsy misy mahory ny mpankatò Azy.

Sabotsy 03 Oktobra 2015 - Fil 1 : 12 - 14

12Ry havana, tiako ny hahafantaranareo fa izay nihatra tamiko dia vao mainka nanjary fampandrosoana ny Vaovao Mahafaly*; 13ka ny ato an-dapa manontolo sy ny olon-kafa rehetra dia samy mahalala fa voafonja noho ny amin'i Kristy aho. 14Nony nahita ahy voafonja ny ankamaroan'ireo havana iray finoana, dia vao mainka nataon'ny Tompo feno fahatokiana ka mihasahisahy kokoa mitory ny tenin'Andriamanitra tsy amin-tahotra.

Zoma 02 Oktobra 2015 - II Tan 20 : 14 - 17

14Teo anivon'izany vahoaka tafangona izany i Jahaziela, levita* zanakalahin'i Zakarià sy zafin'i Benaià sy zafiafin'i Jehiela ary zafindohalik'i Matanià sady anisan'ny taranak'i Asafa, dia voatsindrin'ny Fanahin'ny TOMPO, 15ka niteny hoe:

–Mihainoa tsara ianareo, ry Joda iray manontolo sy ry mponin'i Jerosalema, ary indrindra ianao, ry Jôsafata mpanjaka. Izao no lazain'ny TOMPO aminareo: «Aza matahotra na mivadi-po ny amin'io tafika goavana io, fa tsy anareo ny ady, fa Ahy Andriamanitrareo. 16Rahampitso dia midîna hiady amin'ny fahavalonareo izay miakatra amin'ny fiakarana Hatsitsa izao. Ianareo kosa hahita azy eo amin'ny faran'ny lohasahan-driaka tandrifin'ny taniefitr'i Jeroela. 17Ry mponin'i Joda sy i Jerosalema, tsy ianareo anefa no hiady amin'ity; mijanòna tsara fotsiny, fa ho hitanareo ny hamonjen'ny TOMPO anareo. Aza matahotra na mivadi-po; rahampitso dia miaingà hifanehatra amin'io tafika io, fa ny TOMPO no hiaraka aminareo.»

Alakamisy 01 Oktobra 2015 - Eze 3 : 4 - 9

4Ary hoy indray Izy: «Ry ilay taranak'olombelona, mandehana mankany amin'ny Israelita ka ampitao aminy ny teniko. 5Tsy maniraka anao any amin'ny vahoaka izay miteny fiteny vahiny sarotra takarina Aho, fa any amin'ny vahoakan'i Israely. 6Raha maniraka anao hankany amin'ireo firenen-kafa izay miteny fiteny vahiny sarotra sy mety tsy ho takatrao Aho, dia tsy isalasalana fa hihaino anao izy. 7Fa ny Israelita kosa tsy hanaiky hihaino anao satria tsy te hihaino Ahy izy, fa olona mafy loha sady be kirina izy rehetra. 8Kanefa hataoko sahy mifanatri-tava aminy ianao, ary hataoko mafy loha tahaka azy. 9Eny, hataoko mafy lalandava ny lohanao ary mafy lavitra noho ny vatolampy aza. Ka aza matahotra azy ianao, ary aza mivadi-po noho ny fihetsika ataon'io vahoaka maditra io.

Alarobia 30 Septambra 2015 - Kol 4 : 5 - 6

5Manàna fitondrantena feno fahendrena eo anoloan'izay tsy kristianina, ka hararaoty ny fotoana azo anaovan-tsoa. 6Aoka ho mahatehotia sy mahasoa mandrakariva ny teny ataonareo, dia ho fantatrareo izay tokony havalinareo ny olona tsirairay avy.

Talata 29 Septambra 2015 - I Jao 4 : 20 - 21

20Raha misy manao hoe: «Manam-pitiavana an'Andriamanitra aho», nefa mankahala ny namana iray finoana, dia mpandainga izy; fa raha ny namana izay hitany aza tsy tiany, hataony ahoana no fitia an'Andriamanitra Izay tsy hitany? 21Ary izao no didy azontsika tamin'i Kristy: izay manam-pitiavana an'Andriamanitra dia tsy maintsy manam-pitiavana ny namana iray finoana koa.

Alatsinainy 28 Septambra 2015 - Mat 25 : 31 - 46

31–Rehefa ho avy amin'ny voninahitra maha mpanjaka Azy ny Zanak'olona* sady hotronin'ny anjely rehetra, dia hipetraka eo amin'ny sezafiandrianany mamirapiratra. 32Ary hangonina eo anatrehan'ny Zanak'olona ny firenena rehetra. Dia hanavaka ny olona ho roa tonta ny Zanak'olona, tahaka ny mpiandry* manavaka ny ondry amin'ny osy; 33ka ny ondry no hataon'ny Zanak'olona eo ankavanany fa ny osy hataony eo ankaviany. 34Ary dia izao no holazain'ny Mpanjaka amin'izay eo ankavanany: «Avia ianareo nombàn'ny Raiko fitahiana; raiso ho lova ny Fanjakana* izay voavoatra ho anareo hatrizay nahariana an'izao tontolo izao. 35Fa noana Aho, dia nomenareo hanina; nangetaheta Aho, dia nomenareo hosotroina; nivahiny Aho, dia nampiantranoinareo; 36tsy nitafy Aho, dia notafînareo; narary Aho, dia nokarakarainareo; tany am-ponja Aho, dia novangianareo.» 37Ary dia hanontany Azy ny olo-marina ka hanao hoe: «Tompo ô, oviana Ianao no hitanay noana ka nomenay hanina; na nangetaheta ka nampisotroinay? 38Oviana Ianao no hitanay nivahiny ka nampiantranoinay, na tsy nitafy ka notafînay? 39Oviana Ianao no hitanay narary na tany am-ponja ka novangianay?» 40Dia hovalian'ny Mpanjaka hoe: «Lazaiko marina aminareo fa araka izay nataonareo tamin'ny anankiray amin'ireto havako madinika indrindra ireto no nataonareo tamiko.»

41Ary dia izao kosa no holazain'ny Mpanjaka amin'izay eo ankaviany: «Mialà amiko ianareo voaozona, mandehana any amin'ny afo maharitra mandrakizay izay voavoatra ho an'ny devoly sy ny anjeliny. 42Fa noana Aho, dia tsy nomenareo hanina; nangetaheta Aho, dia tsy nomenareo hosotroina; 43Nivahiny Aho, dia tsy nampiantranoinareo; tsy nitafy Aho, dia tsy notafînareo; narary sy tany am-ponja Aho, dia tsy nokarakarainareo.» 44Ary dia hanontany Azy kosa ireo ka hanao hoe: «Tompo ô, oviana Ianao no hitanay noana na nangetaheta, na nivahiny, na tsy nitafy, na narary, na tany am-ponja ka tsy nampianay?» 45Dia hovalian'ny Mpanjaka hoe: «Lazaiko marina aminareo fa araka izay tsy nataonareo tamin'ny anankiray amin'ireto havako madinika indrindra ireto no tsy nataonareo tamiko.» 46Dia hiroso ho any amin'ny fijaliana maharitra mandrakizay ireo fa ny olo-marina kosa ho any amin'ny fiaina-maharitra mandrakizay.