Alahady 31 janoary 2021 - II Mpa 5 : 15 - 27

 15Dia niverina nankao amin’ilay olon’Andriamanitra izy mbamin’ireo rehetra mpanaraka azy; ary niseho teo anatrehany izy ka nanao taminy hoe:

–Fantatro ankehitriny fa tsy misy Andriamanitra eto ambonin’ny tany tontolo afa-tsy ato amin’i Israely ihany. Koa mba raiso ny fanomezana atolotro anao.

16Fa hoy ny navalin’i Elisà:

–Velona ny TOMPO izay tompoiko, ka manizingizina aminao aho fa tsy handray izany.

Nitambezo azy handray ihany i Nahamàna, saingy nanda hatrany kosa i Elisà, 17ka nilazany hoe:

–Satria nolavinao ny fanomezako, dia avelao aho mba hitondra tany kely zakan’ny boriky roa avy amin’ny taninao; fa izaho tsy mba hanolotra intsony sorona dorana manontolo na sorom-pihavanana amin’ny andriamani-kafa afa-tsy amin’ny TOMPO ihany. 18Saingy mangata-pamelana mialoha amin’ny TOMPO aho momba izao zavatra izao: Raha miditra mba hivavaka ao amin’ny tempolin’i Rimôna andriamaniny ny tompoko mpanjakan’i Siria, dia tsy maintsy hiankohoka hitehi-tany miaraka aminy koa aho satria mitehina amin’ny tanako izy. Ny TOMPO anie hamela heloka ahy amin’izany fihetsiko izany!

19Ary hoy i Elisà taminy:

–Mandehana ombàm-piadanana.

Ary lasa nandeha i Nahamàna.

Raha mbola tsy lasa lavitra akory i Nahamàna, 20dia niteny anakampo i Gehazỳ mpanompon’i Elisà hoe: «Nalefan’ny tompoko tamin’izao fotsiny lahy i Nahamàna ilay Sirianina fa tsy nakany na inona na inona tamin’ny zavatra nentiny. Velona ny TOMPO, ka milokaloka aho fa tsy maintsy hotratrariko iny hahazoako zavatra.» 21Dia lasa i Gehazỳ nanenjika an’i Nahamàna; ary nony nahita azy mihazakazaka manatona kosa i Nahamàna, dia niala faingana tamin’ny kalesiny hitsena azy ka nanao hoe:

–Tsara ihany va ianao?

22Ary hoy ny navaliny:

–Tsara ihany aho; saingy nirahin’ny tompoko fotsiny aho hilaza aminao, fa misy zatovo roa lahy anisan’ny andia-mpaminany tonga ao aminy avy any amin’ny faritra havoan’i Efraîma. Koa miangavy anao izy mba hanome azy roa lahy volafotsy telopolo kilao ary akanjo fitondra mianjaika roa.

23Dia hoy i Nahamàna:

–Volafotsy enimpolo kilao re entina e!

Notereny handray izany i Gehazỳ, ary dia nataony tao anaty kitapo roa tsara fehy ny volafotsy enimpolo kilao sy ny akanjo roa; ka nasainy nentin’ny mpanompony roa lahy izay nanaraka an’i Gehazỳ ireo rehetra ireo. 24Rehefa tonga teo amin’ny toerana atao hoe Hôfela izy, dia nalain’i Gehazỳ ny kitapo sy ny akanjo ka napetrany tao an-tranony; ary nasainy niverina ireo mpanompon’i Nahamàna, ka lasa.

25Nony tafaverina teo anatrehan’ny tompony kosa i Gehazỳ, dia nanontanian’i Elisà hoe:

–Avy taiza ianao, ry Gehazỳ?

Ka hoy ny navaliny:

–Tsy avy taiza tsy avy taiza aho, tompoko.

26Fa hoy indray i Elisà:

–Moa ataonao tsy ho hitako am-panahy ve iny lehilahy izay niala tamin’ny kalesiny hitsena anao iny? Tsy fotoana fandraisam-bola na fitafiana, na tanin’ôliva na tanimboaloboka, na ondry aman’osy, na omby, na mpanompolahy na mpanompovavy izao; 27satria ny aretin-koditr’i Nahamàna dia hiraikitra aminao sy ny taranakao hatrany hatrany.

Rehefa niala teo anatrehan’i Elisà i Gehazỳ, dia indro fa niempaka fotsy toa oram-panala ny hodiny.

Sabotsy 30 Janoary 2021 - I Kor 12 : 27 - 31

27Ianareo rehetra no tenan’i Kristy; ianareo tsirairay kosa dia anisan’io tenany io araka ny anjaranareo avy. 28Ary ao amin’ny Fiangonana dia izao no nandaharan’Andriamanitra ny olona: voalohany, ireo apôstôly; faharoa, ireo mpilaza hafatra avy amin’Andriamanitra; fahatelo, ireo mpampianatra; manaraka izany, ireo mandray fanomezam-pahasoavana hanao asa mahagaga, hanasitrana marary, hanampy olona, hitondra olona ary hiteny fiteny samy hafa tsy fantatra. 29Izy rehetra tsy akory tsy hoe apôstôly avokoa na mpilaza hafatra avy amin’Andriamanitra, na mpampianatra. Izy rehetra tsy akory tsy hoe nandray fanomezam-pahasoavana hanao asa mahagaga avokoa, 30na hiteny amin’ny fiteny tsy fantatra na hanazava izany. 31Kanefa ireo fanomezam-pahasoavana lehibe indrindra no irio fatratra.

Zoma 29 Janoary 2021 - Mat 3 : 13 - 17

 13Tamin’izay dia niseho i Jesoa; avy any Galilea Izy no nanatona an’i Jôhany teo amoron’i Jôrdàna mba hataony batisa. 14Nandà mafy i Jôhany ka nanao hoe:

–Izaho no tokony hataonao batisa, ka Ianao indray ve no mankatỳ amiko?

15Fa novalian’i Jesoa hoe:

–Ekeo ihany aloha, fa izany no tsy maintsy anatontosantsika ny zavatra rehetra voasoritr’Andriamanitra.

Izay vao nanaiky i Jôhany. 16Nony vita batisa i Jesoa, dia niala avy hatrany tao anaty rano. Ary indro nisokatra tamin’i Jesoa ny lanitra ka hitany ny Fanahin’Andriamanitra nidina tahaka ny voromahailala nankeo amboniny. 17Dia injany nisy feo avy tany an-danitra nanao hoe:

–Ity no Zanako, ilay Malalako; Izy no sitrako!

Alakamisy 28 Janoary 2021 - Sal 18 : 20 - 27

 20navoakany ho eo an-kalalahana aho

ary nafahany satria tena tiany.

21Soa no ataon’ny TOMPO amiko satria marina aho;

izany no avaliny ahy satria madio ny toetrako,

22fa voatandriko ny làlan’ny TOMPO

ary tsy ivadihako ilay Andriamanitro;

23ankatoaviko avokoa ny fitsipiny

ary tsy mba ialako ireo didiny.

24Koa tsy manan-tsiny aminy aho

fa nitandrin-tena tsy ho diso.

25Eny, soa tokoa no navalin’ny TOMPO ahy

satria marina aho sy hitany madio toetra.

26Tompo ô, mahatoky Ianao

amin’izay matoky Anao;

tsy manan-tsiny koa Ianao

amin’izay tsy manan-tsiny;

27Madio Ianao amin’izay madio,

miolakolaka kosa amin’izay mpiolikolika.

Alarobia 27 Janoary 2020 - Eks 33 : 12 - 23

 12Hoy i Mosesy tamin’ny TOMPO:

–Jereo ange, TOMPO ô! Ianao nandidy ahy mba hitarika ity vahoaka ity, nefa tsy nanondro izay tianao halefa hanampy ahy. Ianao ihany no nilaza fa fantatrao mihitsy aho ary nahazo fanambinana teo imasonao. 13Koa raha mahazo fanambinana teo imasonao tokoa aho, dia mba ampahafantaro ahy izay fikasanao. Ho fantatro Ianao amin’izay; sady ho tena nahazo fanambinana teo imasonao aho. Tsarovy koa fa ity firenena ity dia vahoakanao.

14Dia namaly ny TOMPO hoe:

–Izaho mihitsy no handeha hiaraka aminao, ka hanome anao fiadanana!

15Fa hoy indray i Mosesy taminy:

–Raha tsy Ianao mihitsy no handeha hiaraka aminay, dia aza mibaiko anay hiala eto. 16Raha toa manko tsy hiaraka aminay Ianao, ahoana no hahafantarana fa nahazo fanambinana teo imasonao ny tenako sy ny vahoakanao? Satria ny fiarahanao aminay ihany no mampiavaka anay amin’ireo vahoaka hafa rehetra eto ambonin’ny tany.

17Dia hoy ny TOMPO tamin’i Mosesy:

–Hotanterahiko na dia izay vao nolazainao teo aza. Nahazo fanambinana teo imasoko manko ianao sady efa fantatro mihitsy.

18Hoy koa i Mosesy tamin’ny Tompo:

–Avelao àry aho mba hahita ny voninahitrao.

19Dia novalian’ny TOMPO hoe:

–Handalo eo anatrehanao Aho ka haneho aminao ny hatsaram-poko manontolo sady hanambara ny anarako hoe «Ny TOMPO». Fa hiantra izay tiako hiantrana Aho, ary hamindrafo amin’izay tiako hamindrana fo. 20Kanefa ianao tsy mahazo mijery Ahy miatrika, satria tsy misy olona hijery Ahy miatrika ka ho velona. 21Fa eto akaikiko eto, hoy Izaho TOMPO, dia misy toerana an-karambato hijanonanao. 22Rehefa mandalo mamirapiratry ny voninahitro Aho, dia hafeniko eo an-tsefatsefaky ny harambato ianao, ary hosaronako amin’ny tanako mandra-pandaloko. 23Avy eo vao hoesoriko ny tanako, ka ho azonao jerena avy ao ivohoko Aho, satria tsy azo jerena ny tavako.

Talata 26 Janoary 2021 - Heb 12 : 1 - 6

 1Voahodidina vavolombelona marobe tokoa àry isika; noho izany, dia aoka hanaisotra ny zavatra rehetra manembantsembana ny hazakazaka ataontsika sy hanaisotra ny ota mora mangeja antsika, ary hiezaka amim-paharetana eo amin’izao fifaninanana hazakazaka naroso hataontsika izao. 2Aoka isika hifantoka tsara amin’i Jesoa, Izay loharanon’ny finoantsika hatramin’ny voalohany ka hatramin’ny farany. Niaretan’i Jesoa ny namonoana Azy teo amin’ny hazofijaliana fa tsy nitandroany henatra, satria tsinjony sahady ny hafaliana natao ho azony; ka izao Izy efa mipetraka eo ankavanan’ny sezafiandrianan’Andriamanitra.

3Eritrereto tsara i Jesoa, Izay niaritra ny fanoherana mafy nafitsoky ny mpanota taminy; ka aza kivy, aza ketraka ianareo. 4Fa tsy mbola nihatra taman’aina tsy akory ny ady nataonareo hanoherana ny fahotana. 5Ary efa hadinonareo ve ny teny fampaherezana milaza aminareo toy ny amin-janaka hoe:

«Anaka, aza atao tsirambina ny famaizana ampiharin’ny Tompo;

ary aza ketraka rehefa anariny.

6Fa ny zanaka tiany no faizin’ny Tompo

ary izay rehetra raisiny ho zanaka no kapohiny»?

Alatsinainy 25 Janoary 2021 - Sal 111 : 1 - 9

 1 Haleloià!

ALEFA

Hoderaiko amin’ny foko manontolo ny TOMPO

BETA

eo amin’ireo olo-mahitsy

tafavory sy tafangona.

GIMELA

2Lehibe ny asa ataon’ny TOMPO

DALETA

ka tsapan’izay rehetra mankafỳ an’ireny.

HE

3Madera sady malaza ny zava-bitany;

VAO

maharitra mandrakizay ny fahamarinany.

ZAINA

4Tiany hotsaroana ny zava-mahagaga nataony.

HETA

Miantra sy mamindrafo ny TOMPO.

TETA

5Omeny sakafo ireo matahotra Azy;

JODA

tsaroany lalandava ny fanekempihavanany.

KAFA

6Ny vahoakany nanehoany ny hery ampiasainy,

LAMEDA

fony nomeny azy ny tanin’ireo hafa firenena.

MEMA

7Mahatoky sy ara-drariny ny asa vitany;

NONA

azo antoka avokoa ny fandaharany:

SAMEKA

8mafy orina hatrany ka ho mandrakizay ireny,

HAINA

mahatoky sy mahitsy no nanaovany azy.

PE

9Nandefasany fanafahana ny vahoakany

TSADE

sy nandraiketany fanekempihavanana mandrakizay.

KÔFA

Andriamanitra masina sy mahatahotra Izy.

Alahady 24 Janoary 2021 - Asa 17 : 22 - 34

 22Dia nijoro teo afovoan’ny Areôpazy i Paoly ka nanao hoe:

–Ry Atenianina, hitako fa amin’ny lafin-javatra rehetra dia olona fatra-pivavaka ianareo. 23Raha nitsangantsangana eran’ny tanàna aho, ka nijerijery ireo toeram-pivavahanareo, dia nahita alitara anankiray misy soratra hoe: «Ho an’ilay Andriamanitra tsy fantatra.» Ka izany tsy fantatrareo izany, kanefa ivavahanareo, no ambarako aminareo. 24Ilay Andriamanitra Izay nanao izao tontolo izao sy ny zavatra rehetra eo aminy no Tompon’ny lanitra sy ny tany, ka tsy mba mitoetra ao anaty tempoly nataon-tanan’olombelona. 25Tsy hoe orin-javatra Andriamanitra ka tompoin’olombelona, satria Izy ihany no manome ny aina sy ny fofon’aina mbamin’ny zavatra rehetra ho an’ny olombelona tsy an-kanavaka. 26Noarîny avy amin’olona anankiray ny firenena rehetra mba honina manerana ny tany tontolo; ary nofariparitany koa ny vanim-potoana hiainany sy ny zaratany honenany. 27Nataon’Andriamanitra izany mba hahazoan’ny olombelona mitady Azy, sao izy ireo mba mety maminavina Azy sy mifandray aminy; fa Andriamanitra dia tsy lavitra antsika tsirairay avy, 28satria

«Ao aminy no ivelomantsika sy ihetsiketsehantsika

ary isiantsika.»

Izany indrindra koa no nilazan’ny mpanao tononkira sasany teo aminareo hoe:

«Avy amin’Andriamanitra no ipoirantsika.»

29Koa satria avy amin’Andriamanitra no ipoirantsika, dia tsy tokony hoheverintsika fa Andriamanitra dia mitovy endrika amin’ny sampy volamena na volafotsy na vato, sary sokitra vokatry ny fahaizana amam-pisaintsainan’olombelona. 30Kanefa ninian’Andriamanitra tsy jerena intsony ireo andro tsy nahalalana Azy, fa antsoiny hiala amin’ny toe-dratsy avokoa ny olona rehetra, na aiza na aiza. 31Nisy manko andro anankiray natao hitsaran’Andriamanitra izao tontolo izao araka ny rariny, amin’ny alalan’ny lehilahy anankiray efa voatendriny; ary ny nananganany Azy ho velona avy any amin’ny maty no nataony porofon’izany ho an’ny olona rehetra!

32Vao nandre an’i Paoly niteny momba ny fitsanganan’ny maty ireo olona teo amin’ny Areôpazy, dia tao ny naneso azy ary tao kosa ny nilaza hoe:

–Mbola hihaino anao indray izahay ny amin’io zavatra io.

33Dia toy izany no nandaozan’i Paoly azy ireo. 34Kanefa nisy olona sasantsasany nikambana taminy ary tonga mpino: anisan’ireny i Diônisy, mambran’ny antenimiera Areôpazy, sy vehivavy atao hoe Damarida ary ny sasany hafa koa izay niaraka tamin’ireo.

Sabotsy 23 Janoary 2021 - Jer 18 : 5 - 11

 5Dia nanafatra ahy ny TOMPO hoe: 6«Moa tsy afaka manao aminareo toy izay ataon’ity mpanefy tanimanga ity va Aho, ry olon’i Israely, hoy ny fanontaniana hentitra avy amiko TOMPO? Indro eo an-tanako ianareo, tahaka ny tanimanga eo an-tanan’ny mpanefy azy. 7Indraindray dia milaza ny hanongotra sy hanjera ary handrava firenena iray na fanjakana iray Aho. 8Nefa raha miala amin’ny ratsy izay nahatonga ny fandrahonako izy, dia hiova hevitra amin’ny loza izay nokasaiko hamelezana azy Aho. 9Ary indraindray dia milaza ny hanorina sy hamboly firenena iray na fanjakana iray Aho. 10Nefa raha manao izay ratsy eo imasoko izy ka tsy mihaino ny feoko, dia hiova hevitra Aho amin’ny soa izay nampanantenaiko hatao aminy.

11«Ankehitriny, ry Jeremià, mitenena amin’ny olon’i Joda sy ny mponin’i Jerosalema, ka ambarao aminy hoe: ‹Izao no lazain’ny TOMPO: Indro efa namolavola loza hamelezana anareo Aho, ary eo am-panomanana ny tetika hampiharana izany. Koa samia miala amin’ny fitondrantena ratsy avy ianareo ary ovay ho tsara ny fitondrantenanareo sy ny asanareo.› »

Zoma 22 Janoary 2021 - Eze 36 : 33 - 38

 33«Izao no lazain’ny Tompo ANDRIANANAHARY: Rehefa voadioko ho afaka amin’ny helokareo rehetra ianareo, dia hamponeniko indray ao amin’ireo tanàna; ka haorina indray izay efa rava. 34Hasaina indray ny tany lavavolo ka tsy hahita tany nilaozana intsony ny mpandalo. 35Dia holazainy hoe: ‹Nanjary toy ny zaridainan’i Hedèna ity ilay tany efa lavavolo. Ireo tanàna efa tonga korontam-bato sady foana sy rava dia voamboatra sy misy mponina indray. 36Amin’izay dia hoeken’ireo firenena sisa tavela manodidina anareo, fa Izaho TOMPO no manorina indray ny tanàna rava sy mamboly indray ny tany lavavolo. Izaho TOMPO no miteny sady hahatanteraka izany.›

Alakamisy 21 Janoary 2021 - Isa 51 : 12 - 16

 12Izaho, eny, Izaho ihany

no mampahery anao, hoy ny TOMPO.

Ka inona no atahoranao ny olona mety maty,

dia ny zanak’olombelona izay mihelina toy ny ahitra?

13Hadinonao Izaho TOMPO, Ilay nahary anao,

Ilay namelatra ny lanitra sy nanorina ny tany.

Fa tsy mitsaha-mangovitra isan’andro ianao

eo anoloan’ny fahatezeran’ny mpampahory,

izay toy ny efa mikendry hanimba anao.

Kanefa aiza izao ny fahatezerany?

14Vetivety dia hoafahana ny gadra mitanondrika

ka tsy ho faty ho any am-pasana

ary tsy ho ory hanina intsony.

15Satria Izaho Tompo no Andriamanitrao,

Ilay mamolaka ny ranomasina

raha mirohondrohona ny onjany;

Ny TOMPOn’izao rehetra izao no anarako.

16Hamelatra ny lanitra indray Aho

sady hanorina indray ny tany,

ka hilaza amin’i Tsiôna hoe: «Vahoakako ianao.

Ataoko eo am-bavanao ny teniko;

ary arovako eo ambany aloky ny tanako ianao.»

Alarobia 20 Janoary 2021 - Apo 1 : 1 - 8

 1Fanambaràna nataon’i Jesoa Kristy no aroso amin’ity boky ity. Izany fanambaràna izany dia nomen’Andriamanitra Azy mba hanehoan’i Jesoa Kristy amin’ireo mpanompony izay zavatra tsy maintsy ho tonga faingana. I Jesoa Kristy, tamin’ny alalan’ny anjely izay nirahiny, no nampahalala izany tamin’i Jôhany. 2Io Jôhany io no vavolombelona nampita ny teny avy amin’Andriamanitra sy ny hafatra nijoroan’i Jesoa Kristy ho vavolombelona, dia ny zavatra rehetra efa hitany. 3Sambatra izay mamaky sy ireo mihaino ny tenin’ity faminaniana ity, ka mitandrina izay voasoratra ato anatiny; fa antomotra ny fotoanandro hahatanterahan’ireo zavatra ireo.

4Avy amiko Jôhany ireto taratasy ireto, ary mamangy ny Fiangonana fito ao amin’ny faritany Azia aho.

Ho aminareo anie ny fahasoavana sy ny fiadanana avy amin’Ilay ankehitriny sy taloha ary avy; ho aminareo anie ny fahasoavana sy ny fiadanana avy amin’ny Fanahy Masina, ombàm-panomezana fito, Izay eo anoloan’ny sezafiandrianan’Andriamanitra; 5ary ho aminareo anie ny fahasoavana sy ny fiadanana avy amin’i Jesoa Kristy, ilay Vavolombelona mahatoky, ilay Zanaka lahimatoa sady voalohany natsangana ho velona avy tany amin’ny maty, ary ilay filohan’ny mpanjakan’ny tany!

Tia antsika i Jesoa Kristy ka efa namaha antsika tamin’ny fatoran’ny fahotantsika fony Izy nahafoy ny rany, 6ary efa nahatonga antsika ho fanjaka-mpisorona hanompo an’Andriamanitra Rainy. Ho an’i Jesoa Kristy anie ny voninahitra sy ny fahefana mandrakizay mandrakizay! Amen.

7Indro i Jesoa Kristy, tamy eo amin’ny rahona, ka hahita maso Azy ny olona rehetra, na dia ireo nandefona Azy aza, ary hitomany Azy ny firenena rehetra ambonin’ny tany. Eny, izany tokoa!

8«Izaho no Alfa sy Ômega», hoy ny Tompo Andriamanitra, Ilay ankehitriny sy taloha ary ho avy, ilay Tsitoha.

Talata 19 Janoary 2020 - Jer 4 : 22 - 28

 22«Adala tokoa ny vahoakako

fa tsy mahalala Ahy», hoy ny Tompo.

Ankizy tsy misaina ireo,

tsy mahatakatra na inona na inona,

tsy kinga afa-tsy amin’ny fanaovan-dratsy

fa raha izay hanao ny tsara tsy hainy.

23Nojereko ny tany,

ka indro foana sady tsy nisy endrika,

ary ny lanitra tsy nisy fahazavana.

24Nojereko ny tendrombohitra

ka tsy nahajoro intsony;

ary ny havoana rehetra nihozongozona.

25Nojereko ka tsy nisy olona intsony

fa lasa mbamin’ny voronkely rehetra aza.

26Nojereko ity tany izay saha nahavokatra

ka tonga taniefitra sisa,

fa rava avokoa ny tanànany.

Noho ny nataon’ny TOMPO izany,

noho ny fahatezerany mirehitra.

27Izao no lazain’ny TOMPO:

«Ho lao ny tany manontolo

nefa tsy hofoanako avokoa.

28Noho izany, dia misaona ny tany

ary mihamaizina ny lanitra any ambony.

Satria Izaho no efa niteny;

ka tsy hanova ny fanapahan-kevitro Aho

na hihemotra amin’izany.»

Alatsinainy 18 Janoary 2021 - I Jao 1 : 5 - 10

 5Izao no hafatra renay tamin’i Jesoa Kristy, ka mba ambaranay aminareo: Andriamanitra dia fahazavana, ary tsy mba misy haizina akory ao aminy. 6Raha milaza ho manam-piombonana amin’Andriamanitra isika, nefa miaina ao amin’ny haizina, dia mandainga sady tsy manatanteraka ny hafatra marim-pototra. 7Andriamanitra dia ao amin’ny mazava: ka raha miaina ao amin’ny fahazavana tahaka Azy isika, dia misy fiombonana amintsika samy isika; ary ny ran’i Jesoa Zanany no manadio antsika ho afaka amin’ny karazam-pahotana rehetra.

8Raha milaza ho tsy manam-pahotana isika, dia mamita-tena, ary tsy ao anatintsika ny hafatra marim-pototra. 9Fa raha miaiky ny fahotantsika isika, dia mitana ny toky nomeny Andriamanitra sady miantra, ka hamela ny fahotantsika sy hanadio antsika ho afaka amin’ny ratsy isan-karazany. 10Raha milaza ho tsy nanota isika, dia mampandainga an’Andriamanitra sady tsy ao anatintsika ny teniny.

Alahady 17 Janoary 2021 - Jao 5 : 30 - 38

 30–Raha Izaho dia tsy mahavita na inona na inona avy amin’ny tenako. Araka izay reko amin’ny Ray no itsarako; ka ara-drariny ny fitsaràko, satria tsy ny sitrapoko no tadiaviko hatao fa ny sitrapon’Ilay naniraka Ahy. 31Raha Izaho ihany no vavolombelona manambara ny tenako, dia tsy azo antoka ny fijoroako ho vavolombelona; 32fa misy hafa izay mijoro ho vavolombelona momba Ahy, ary fantatro fa azo antoka ny fijoroany ho vavolombelona momba Ahy. 33Nandefa iraka tany amin’i Jôhany ianareo, ary nijoro ho vavolombelona nanambara ny marina i Jôhany. 34Tsy dia ny fijoroana ho vavolombelona avy amin’olona anefa no ianteherako, fa ny mba hahavoavonjy anareo no ilazako izany. 35I Jôhany dia toy ny jiro nirehitra sy nanazava, ka satrinareo nifaliana vetivety ny fahazavany. 36Raha Izaho dia manana fijoroana ho vavolombelona manoatra ny an’i Jôhany, satria ireo asa nomen’ny Raiko hotontosaiko sady ataoko tokoa no vavolombelona momba Ahy sady manambara fa nirahin’ny Ray Aho: 37ny Ray Izay naniraka Ahy mihitsy no vavolombelona nanambara Ahy. Tsy mba nandre ny feony na nahita ny endriny na oviana na oviana ianareo, 38sady tsy mba manana ny teniny mitoetra ao anatinareo, noho ianareo tsy mino Ilay nirahiny.

Sabotsy 16 Janoary 2021 - Sal 9 : 1 - 10

 1 Tao amin’ny tahirin-kiran’ny filohan’antoko-mpihira. Hohiraina araka ny feon’ny hoe «Ny fahafatesan-janaka.» Salamo nataon’i Davida.

ALEFA

2Hidera Anao amin’ny foko manontolo aho, TOMPO ô,

ka hitantara ny zava-mahagaga rehetra nataonao.

3Ho faly sy ravo aminao aho, ry Avo Indrindra ô,

ary hankalaza ny anaranao amin’ny zava-maneno.

BETA

4Miverina ilalana ireo fahavaloko;

lavo izy ka ringana teo anoloanao.

5Eo ambonin’ilay sezafiandriananao

no ipetrahanao ho Mpitsara marina;

ka niaro ny zoko Ianao

ary nanome rariny ahy.

GIMELA

6Norahonanao ny hafa firenena

ary naringanao ny olon-dratsy;

nokosehinao ny fahatsiarovana azy

mba ho levona mandrakizay.

7Nifarana hatreo ny amin’ny fahavalonay,

satria rava tanteraka izy;

efa narodanao ireo tanànany,

ka tsy hotsarovana intsony.

HE

8Injay ny TOMPO Izay maharitra mandrakizay:

mametraka ny sezafiandrianana hitsarany Izy,

9ka hitsara izao tontolo izao araka ny rariny

sy hanapaka ny firenena araka ny hitsiny.

VAO

10Ny TOMPO no fialofana ho an’ny ampahorîna,

eny, fialofana amin’ny andro mahory.

Zoma 15 Janoary 2021 - Apo 21 : 22 - 27

 22Tsy nahita tempoly tao amin’ilay tanàna aho, satria ny Tompo Andriamanitra Tsitoha sy ny Zanakondry no tempoliny. 23Ny tanàna tsy mba mila ny masoandro na ny volana hamirapiratra ao aminy: fa ny voninahitr’Andriamanitra no efa manazava azy, ary ny Zanakondry no jiro manilo azy. 24Handeha amin’ny fahazavàn’ilay tanàna ny firenena rehetra: ary ny mpanjakan’ny tany dia hitondra ny voninahiny ho ao anatiny. 25Hisokatra tontolo andro ny vavahadin’ny tanàna, (satria tsy mba hisy alina ao aminy). 26Ny voninahitra sy ny zava-tsoan’ny firenena rehetra dia hoentina ho ao anatiny; 27ary tsy mba hiditra ao mihitsy ny zavatra maloto na ny olona mpanazimbazimba na ny mpandainga; fa ny hany miditra ao dia ireo olona voasoratra anarana anatin’ilay horonamboky mirakitra ny lisitr’ireo hanana ny fiaina-maharitra mandrakizay: io horonamboky io dia teo am-pelatanan’ny Zanakondry.

Alakamisy 14 Janoary 2021 - Job 42 : 1 - 6

 1Namaly ny Tompo i Jôba ka nanao hoe:

2Fantatro fa mahay ny zava-drehetra Ianao,

ary tsy misy maharara izay tianao hatao.

3Hoy Ianao tamiko: «Zovy moa ianao

no sahy manivaiva ny fikasàko

amin’ireo teny foana tsisy dikany?»

Eny, zava-tsy takatry ny saiko no voateniko

dia zava-mahagaga loatra amiko sady tsy fantatro!

4«Henoy, hoy Ianao, fa mbola hiteny Aho;

hanontany anao Aho ka hovalianao.»

5Tsy nahafantatra ny aminao aho

afa-tsy izay henoko momba Anao ihany.

Kanefa ankehitriny izao kosa

dia ny masoko no nahita Anao.

6Izany no anatsoahako izay voambarako,

sy iekeko hadisoana ary ietreko tena

eto amin’ny vovoka sy ny lavenona.

Alarobia 13 Janoary 2021 - Lio 4 : 14 - 22

 14Nombàn’ny Fanahy Masina i Jesoa no niverina tany Galilea; ary nanomboka niely tamin’ny faritany manontolo ny lazany. 15Nampianatra tany amin’ny sinagôga Izy sady nomen’ny olona rehetra voninahitra.

16Nandeha tany Nazareta tanàna nahabe Azy i Jesoa ary tamin’ny andro sabata dia niditra tao amin’ny sinagôga araka ny fanaony. Nitsangana Izy hamaky ny Soratra Masina 17ka natolotra Azy ny bokin’i Isaià mpaminany. Novelariny ilay boky ary izao no andinin-tsoratra hitany:

18«Ato amiko ny Fanahy avy amin’ny Tompo.

Ka natokan’ny Tompo Aho hanambara

Vaovao Mahafaly amin’ny mahantra;

nirahiny Aho hitory fanafahana amin’ny mpigadra

sy fahiratana amin’ny jamba,

hanafaka ny ampahorîna

19ary hitory taona hanehoan’ny Tompo fanambinana.»

20Rehefa nahorony ilay boky ka naveriny tamin’ny mpandraharaha, dia nipetraka i Jesoa. Nifantoka teny aminy avokoa ny mason’izay rehetra tao amin’ny sinagôga. 21Fa i Jesoa kosa niteny taminy hoe:

–Tanteraka androany amin’izao andrenesanareo azy izao izany andinin’ny Soratra Masina izany.

22Ary samy vavolombelona niaiky Azy daholo ny olona sady gaga noho ny teny soa naloaky ny vavany, ka hoy izy rehetra hoe:

–Tsy zanak’i Jôsefa ve ity?

Talata 12 Janoary 2021 - II Pet 1 : 1 - 11

 1Avy amiko Petera ity taratasy ity, dia izaho apôstôlin’i Jesoa Kristy.

Mamangy anareo olom-boafidin’Andriamanitra aho, dia ianareo mpivahiny miely patrana any amin’ny faritany Pônto, Galatia, Kapadôsia, Azia sy Bitinia. 2Voafidy araka ny efa voatendrin’Andriamanitra Ray ianareo ary voatokana ho Azy noho ny asan’ny Fanahy Masina, mba hanaiky an’i Jesoa Kristy sy hanana anjara amin’ny famafazana ny rany.

Hampitomboina ao aminareo anie ny fahasoavana sy ny fiadanana!

3Hankalazaina anie ilay Andriamanitra sady Rain’i Jesoa Kristy Tompontsika! Be famindrampo tokoa Andriamanitra, ka niteraka antsika indray tamin’ny alalan’i Jesoa Kristy Izay natsangany ho velona avy any amin’ny maty. Izany no ananantsika fanantenana mivaivay 4fa hahazo ny lova tsy mety simba sady tsy azon-doto no tsy mety levona. Voatahiry any an-danitra io lova io mba ho anareo, 5dia ianareo izay arovan’ny herin’Andriamanitra amin’ny alalan’ny finoana mba handray ny famonjena efa vonona haseho amin’ny andro farany.

6Izany koa no iravoravoanareo na dia mbola tsy maintsy hampahorîna vetivety amin’ny fitsapana samy hafa aza ianareo. 7Ny volamena dia sedraina amin’ny alalan’ny afo na dia zavatra mety simba aza; ary ny finoanareo, izay sarobidy lavitra noho ny volamena, dia sedraina amin’ny alalan’ireny fitsapana ireny ka ho hita fa hahazoan’Andriamanitra dera sy voninahitra ary haja izany, amin’ny andro hisehoan’i Jesoa Kristy. 8Manam-pitiavana an’i Jesoa Kristy ianareo, na dia tsy nahita Azy aza; mino Azy ianareo, na dia tsy mahita Azy aza ankehitriny: izany no iravoravoanareo amin’ny hafaliana tsy hay lazaina sady be voninahitra, 9satria azonareo ilay zava-kendren’ny finoanareo, dia ny famonjena ny fanahinareo.

10Ny amin’izany famonjena izany dia nanaovan’ireo mpaminany famotopotorana sy fikarohana fatratra, satria ireo no efa nilaza mialoha ny fahasoavana voatendrin’Andriamanitra ho anareo. 11Nokarohin’ny mpaminany tokoa izay vaninandro sy toe-javatra notondroin’ny Fanahin’i Kristy; fa tao anatin’izy ireo ny Fanahin’i Kristy ka nanambara mialoha ny fijaliana hanjo an’i Kristy sy ny voninahitra hanaraka izany.

Alatsinainy 11 Janoary 2021- Asa 8 : 18 - 24

 18Nony hitan’i Simôna fa ny fametrahan’ny apôstôly tanana no nanomezana ny Fanahy Masina tamin’ireo mpino, dia notolorany vola i Petera sy i Jôhany 19sady nataony hoe:

–Omeo ahy koa re izany fahefana izany, dia mba handray ny Fanahy Masina izay olona hametrahako tanana.

20Fa hoy i Petera taminy:

–Vereza miaraka amin’ny tenanao ny volanao satria nataonao fa azo vidîm-bola ny fanomezan’Andriamanitra. 21Tsy misy anjaranao na lovanao amin’ity raharaha ity satria tsy mahitsy fo eo anatrehan’Andriamanitra ianao. 22Koa ialao izao faharatsianao izao ary mangataha amin’ny Tompo mba hamelany izany fihevitry ny fonao izany, raha azo atao. 23Hitako manko fa mbola feno fialonana mangidy sy voafatotry ny fahotana ianao.

24Dia hoy i Simôna tamin’i Petera sy i Jôhany:

–Ianareo mihitsy no mangataha ho ahy amin’ny Tompo, mba tsy hisy hihatra amiko akory izay voalazanareo.