samedi 31 décembre 2016

Sabotsy 31 Desambra 2016 - Efe 1 : 1 - 14

1Avy amiko Paoly ity taratasy ity, dia izaho apôstôlin'i Kristy* Jesoa noho ny sitrapon'Andriamanitra.
Mamangy anareo atỳ Efeso aho, dia ianareo vahoakan'Andriamanitra* sady mpino tafaray amin'i Kristy Jesoa. 2Ho aminareo anie ny fahasoavana sy ny fiadanana avy amin'Andriamanitra Raintsika sy i Jesoa Kristy Tompo!

3Hankalazaina anie ilay Andriamanitra sady Rain'i Jesoa Kristy* Tompontsika! Fa nitahy antsika Andriamanitra tamin'ny fitahiana rehetra araka ny Fanahy Masina ka nataony miray amin'i Kristy isika sady tonga mponina any an-danitra. 4Tsy mbola nahary ny tontolo Izy, dia efa nifidy antsika hiray amin'i Kristy; ka ho masina sady tsy hisy tsiny eo anatrehan'Andriamanitra isika. Noho ny fitiavany antsika, 5dia natokan'Andriamanitra isika mba ho Azy, mba ho tonga zanany amin'ny alalan'i Jesoa Kristy, fa izany no safidin'ny sitrapony. 6Hiderantsika an'Andriamanitra anie ny fahasoavana mamirapiratra izay nomeny antsika maimaimpoana ao amin'ilay Zanany* malalany.

7Ny ra nafoin-Janany no nahazoantsika ny fanavotana, dia ny famelana ny hadisoantsika. Izany no nanehoan'Andriamanitra ny harem-pahasoavany, 8izay natosany be dia be tamintsika ka nahazoantsika fahendrena amam-pahalalana feno. 9Dia nampahafantarin'Andriamanitra antsika ilay tsiambaratelon'ny sitrapony, araka ny safidy noheveriny hotontosaina ao amin'ny Zanany. 10Eny, hotanterahiny mandra-pahatongan'ny fotoanandro farany izany tsiambaratelo izany: dia ny hampivondrona ny zavatra rehetra, ny any an-danitra sy ny eto an-tany, ao amin'i Kristy Filoha tokana.

11Tafaray amin'i Kristy izahay ka tonga anjara lovan'Andriamanitra; satria natokany rahateo izahay, fa izany no fandaharan'Ilay manao ny zavatra rehetra araka izay efa nokasain'ny sitrapony. 12Hideranay an'Andriamanitra be voninahitra anie izany, satria izahay no nanantena voalohany an'i Kristy.

13Tafaray amin'i Kristy koa ianareo, satria efa renareo ilay hafatra marim-pototra, izany hoe ny Vaovao Mahafaly* izay nitondra ny famonjena taminareo, ary efa ninoanareo i Kristy. Ka dia nasiana tombokase maha fananan'Andriamanitra ianareo, tamin'ny nanomezana anareo ny Fanahy Masina Izay nampanantenaina. 14Io Fanahy Masina io no antoka hahazoantsika ny lova natokan'Andriamanitra ho an'ny vahoakany*, mba hahatanteraka ny fanavotana ireo olona natao mba ho fananan'Andriamanitra, hiderantsika ny voninahitr'Andriamanitra izany!

vendredi 30 décembre 2016

Zoma 30 Desambra 2016 - Sal 148 : 13 - 14

13Aoka ianareo samy hidera ny Tompo,
satria ny anarany irery no avo indrindra:
ambonin'ny tany aman-danitra ny fiandrianany.
14Nataony mitraka sy mahery ny vahoakany;
ka midera ny TOMPO ireo mpivavaka aminy,
dia ireo Israelita vahoaka lalainy.
Haleloià!

jeudi 29 décembre 2016

Alakamisy 29 Desambra 2016 - Jao 12 : 23 - 16

23Dia hoy i Jesoa tamin'izy roa lahy:

–Tonga ny fotoanandro hanomezam-boninahitra ny Zanak'olona*. 24Lazaiko marina dia marina aminareo fa raha tsy maty ny voam-bary latsaka ao amin'ny tany, dia mitoetra irery; raha maty kosa izy, dia mahavokatra be. 25Izay mandala ny ainy no hahavery azy; fa izay tsy mandala ny ainy eto amin'izao tontolo izao no hitahiry azy ho aina maharitra mandrakizay. 26Raha misy olona manompo Ahy, dia aoka izy hanaraka Ahy; ary izay itoerako, dia ao koa no hitoeran'ny mpanompoko. Raha misy olona manompo Ahy, dia homen'ny Raiko voninahitra izy.

mercredi 28 décembre 2016

Alarobia 28 Desambra 2016 - Isa 7 : 10 - 16

10Dia mbola nanafatra an'i Ahaza ny TOMPO ka nanao hoe:
11–Angataho famantarana ny TOMPO Andriamanitrao mba ho antoka ho anao, na any amin'izay fanambanin'ny toeran'ny maty izany na eny an-danitra ambony eny.

12Fa novalian'i Ahaza hoe:
–Tsia, tsy hangataka na inona na inona aho fa tsy te haka fanahy ny TOMPO.

13Dia hoy i Isaià taminy:
–Mihainoa ahy ianao sy ny fianakavianao izay samy taranak'i Davida. Moa tsy ampy anareo ve ny manasatra ny olombelona no dia hanasatra an'Andriamanitra koa ianareo? 14Noho izany àry, dia ny Tompo mihitsy no hanome famantarana ho anareo: jereo fa hitoe-jaza ny vehivavy ka hiteraka zazalahy ary ny anarany hataony hoe Himanoela, izany hoe «Andriamanitra miaraka amintsika.» 15Rononomandry sy tantely no ho sakafony ambara-pahalalàny mandà ny ratsy sy mifidy ny tsara. 16Fa raha tsy mbola mahalala handà ny ratsy sy hifidy ny tsara akory izany zaza izany, dia hilaozan'ny mponina ny tanin'ireo mpanjaka roa izay mampitahotra anao ireo.

mardi 27 décembre 2016

Talata 27 Desambra 2016 - Ezr 6 : 13 - 18

13Tamin'izay ry Tatenay governoran'ny faritra andrefan'ny ony Eofrata sy ry Setara-Bôzenay mbamin'ireo namany dia nankatò an-tsakany sy an-davany izany teny nalefan'i Dariôsa ho azy izany.

14Dia nanohy ny taotrano ireo loholona jiosy ka nambinina, araka ny hafatra nentin'ny mpaminany* Hagay sy ny mpaminany Zakarià zanakalahin'i Hidao. Nanorina ka nahavita ny tempoly* ry zareo, araka ny didin'Ilay Andriamanitr'i Israely sy araka ny baikon-dry i Kirôsa sy i Dariôsa ary i Artakserksesa, amperôran'i Persia. 15Tamin'ny andro fahatelon'ny volana Adara, nandritra ny taona fahenina nanjakan'ny amperôra Dariôsa, no nahavitan'ny tempoly. 16Ny Israelita nody avy any an-tsesitany, na mpisorona* na levita* na ny sarambabem-bahoaka, dia nitokana ny tranon'Andriamanitra tamim-pifaliana. 17Ny sorona* natolotra tamin'io fitokanana io dia ombilahy zato sy ondrilahy roanjato ary zanakondry efajato; ary ny ho sorona fanalana ny ota ho an'ny vahoaka Israely manontolo dia osilahy 12, izany hoe anankiray isam-poko. 18Dia nisy fanendrena ny mpisorona sy ny levita ho amin'ny antokony avy sy araka ny andraikiny avy, mba hanao ny fanompoana an'Ilay Andriamanitra Izay ao Jerosalema, araka ny voasoratra ao anatin'ny bokin'i Mosesy.

lundi 26 décembre 2016

Alatsinainy 26 Desambra 2016 - I Tan 29 : 10 - 20

10Dia nankalaza ny TOMPO teo imason'ny olona rehetra tafangona teo i Davida ka nanao hoe:

–Hankalazaina anie Ianao, ry TOMPO Andriamanitr'i Israely razambenay; hankalazaina anie Ianao hatrizay ka ho mandrakizay! 11Anao, TOMPO ô, ny halehibiazana sy hery; Anao ny voninahitra sy hamirapiratana ary fiandrianana; satria Anao ny zava-drehetra any an-danitra sy etỳ an-tany! Ianao, TOMPO ô, no mpanjaka; Ianao no asandratra ho filohan'ny zavatra rehetra. 12Avy aminao ny harena sy ny voninahitra*; ary Ianao no mifehy izao rehetra izao. Eo an-tananao ny fahefana sy ny hery, ka Ianao no mahalehibe sy manamafy ny zavatra rehetra. 13Koa misaotra Anao izahay, ry Andriamanitray ô, sy midera ny anaranao be voninahitra. 14Fa zinona moa aho, ary zinona moa ny mpiray firenena amiko, no hanan-kery hanolotra fanomezana an-tsitrapo toy izao? Eny, avy aminao ny zavatra rehetra; ary ny avy taminao ihany no nanomezanay Anao. 15Fa toy ny vahiny sy mpivahiny an-tanin'olona izahay eo anatrehanao, tahaka ny razanay rehetra rahateo; miserana tahaka ny aloka ny andronay etỳ an-tany, ka tsy azo ianteherana. 16Ry TOMPO Andriamanitray ô, ireo harena rehetra novononinay ireo, hanorenana tempoly* ho Anao mba hanajana Anao ilay Masina, dia avy taminao; ary Anao rahateo izy rehetra. 17Fantatro, ry Andriamanitro ô, fa mandinika ny ao am-pon'ny olona Ianao ary mankasitraka ny hitsim-po. Raha izaho, dia tamin-kitsim-po no nanolorako an-tsitrapo ireo fanomezana rehetra ireo; ary ankehitriny, dia amin-kafaliana no ahitako ny vahoakanao izay vory eto, nanolotra an-tsitrapo ny fanomezany ho Anao. 18Ry TOMPO Andriamanitr'i Abrahama sy i Itsehàka ary i Jakôba razanay ô, tahirizo mandrakizay izany toe-tsaina sy toe-po ananan'ny vahoakanao izany ka ataovy mitodika aminao hatrany ny fony; 19ary omeo an'i Salômôna zanako ny fo vonona manontolo hitandrina ny didinao sy baikonao ka hanatanterahany azy rehetra sady hanorina ny tempoly lapanao izay efa nanomanako fitaovana.

20Dia hoy i Davida tamin'ny olona rehetra tafangona teo:
–Aoka ianareo hankalaza ny TOMPO Andriamanitrareo!
Dia nankalazain'izy rehetra ilay TOMPO Andriamanitry ny razany; sady niondrika izy ka niankohoka teo anatrehan'ny TOMPO sy teo anatrehan'ny mpanjaka.

dimanche 25 décembre 2016

Alahady 25 Desambra 2016 - Mat 2 : 1 - 12


1Rehefa teraka tao Betlehema tanànan'i Jodea i Jesoa tamin'ny andron'i Herôda* mpanjaka, dia indreny nisy olon-kendry mpandinika momba ny kintana niainga avy tany atsinanana ary tonga tao Jerosalema, 2ka nanontany hoe:
–Aiza moa ilay Mpanjakan'ny Jiosy vao teraka? Efa hitanay niposaka tany atsinanana manko ny kintany, koa indreto izahay tonga hiankohoka eo anatrehany.

3Vao nandre izany i Herôda mpanjaka, dia nihorohoro izy mbamin'i Jerosalema iray vohitra. 4Novorîny avokoa ny lohandoha-mpisorona sy ny mpahay lalàna* teo amin'ny vahoakany, ka nanontaniany hoe:
–Aiza moa no tokony hahaterahan'ny Mesia*?

5Dia hoy ireo taminy:
–Ao Betlehema, tanàna any Jodea, fa izao no voalazan'ny Soratra Masina tamin'ny alalan'ny mpaminany*:

6«Ary ianao, ry Betlehema, tanin'i Joda,
tsy ianao tsy akory no kely indrindra amin'ireo tanàna malazan'i Jodea;
fa avy aminao no hipoiran'ilay filoha
izay ho mpiandry an'i Israely vahoakako.»

7Tamin'izay dia nampiantsoin'i Herôda mangingina ireto olon-kendry ka nofotopotoriny tsara taminy ilay fotoana nisehoan'ny kintana; 8izay vao nalefany ho any Betlehema sady nataony hoe:
–Ndeha àry ka fotopotory tsara ny amin'ilay zaza; rehefa hitanareo dia ilazao aho, fa te hankany koa aho hiankohoka eo anatrehany.

9-10Nony avy nandre ny tenin'ny mpanjaka ireo olon-kendry, dia niainga. Ary indro tazany indray ilay kintana hitany fony niposaka, hany ka faly dia faly aoka izany ry zareo. Nialoha lalana azy ireo hatrany ilay kintana ary tsy nijanona raha tsy efa teo ambonin'ny toerana nisy ny zaza. 11Niditra tao an-trano ireo olon-kendry ka nahita ny zaza teny amin'i Maria reniny ary niankohoka teo anatrehan'ilay zaza ho fanajana azy. Rehefa izany, nanokatra ny vata fasiany rakitra ireto mpamangy ary nanolotra fanatitra ho azy: dia volamena sy ditin-kazo manitra* ary miora*. 12Ary notoroan'Andriamanitra hevitra tamin'ny nofy izy ireo tsy hiverina any amin'i Herôda, ka dia lalan-kafa no nizorany hody any amin'ny tany fonenany.

samedi 24 décembre 2016

Sabotsy 24 Desambra 2016 - II Tes 1 : 11 - 12

11Izany no ivavahany lalandava ho anareo. Koa mangataka amin'Andriamanitsika izahay mba hataony mendrika ny fiainana niantsoany anareo ianareo. Mangataka izahay mba ho tanterahiny amin-kery avokoa ny fanirianareo hanao soa ary hataony lavorary koa ny asa ateraky ny finoanareo; 12dia homenareo voninahitra ny anaran'i Jesoa Tompontsika, sady ianareo koa homeny voninahitra. Izany no vokatr'ilay fahasoavana avy amin'ilay Andriamanitsika sy i Jesoa Kristy* Tompo.

vendredi 23 décembre 2016

Zoma 23 Desambra 2016 - Jer 9 : 22 - 23

22Izao no lazain'ny TOMPO:
«Aoka ny hendry tsy hirehareha
amin'ny fahendreny,
aoka ny mahery tsy hirehareha
amin'ny heriny,
ary aoka ny mpanankarena tsy hirehareha
amin'ny hareny!
23Fa raha misy te hirehareha,
dia aoka izy hirehareha
ho afaka mahafantatra Ahy
sy mahalala fa Izaho TOMPO,
dia mampihatra ny hatsaram-po
ary ny rariny sy ny hitsiny eto an-tany.
Eny, ny olona toy ireny no sitrako;
teny hentitra avy amiko TOMPO izany.»

jeudi 22 décembre 2016

Alakamisy 22 Desambra 2016 - I Pet 4 : 10 - 11

 10Samia mifanompo araka ny fanomezam-pahasoavana noraisinareo avy, mova tsy mpitandrim-pananana mitantana tsara ny fanomezana maro samy hafa avy amin'Andriamanitra. 11Izay mitoriteny, aoka ho toy ny milaza ireo hafatr'Andriamanitra; izay manompo, aoka ho araka ny hery ampombain'Andriamanitra azy; ka dia amin'ny zavatra rehetra no hanomezam-boninahitra an'Andriamanitra amin'ny alalan'i Jesoa Kristy*, fa an'Andriamanitra ny voninahitra sy ny fanjakana mandrakizay mandrakizay! Amen*.

mercredi 21 décembre 2016

Alarobia 21 Desambra 2016 - Lio 1 : 67 - 80

67Feno ny Fanahy Masina i Zakarià, rain'ny zazakely, ka nilaza faminaniana toy izao:

68–Hisaorana anie ny Tompo, Andriamanitr'i Israely*,
noho Izy namangy sy nanavotra ny vahoakany!
69Mpamonjy mahery ho antsika no najorony
avy amin'ny taranak'i Davida mpanompony,
70araka ny efa nambarany hatramin'ny fahagola
 tamin'ny alalan'ireo mpaminany* masina:
71dia Mpamonjy hanafaka antsika amin'ny fahavalontsika
sy amin'ny tanan'ireo mpankahala rehetra.
72Namindra fo tamin'ny razantsika Andriamanitra
sady nahatsiaro ilay fanekempihavanana* masina
73mbamin'ilay fianianana izay nataony
tamin'i Abrahama razantsika:
74dia ny hanala antsika amin'ny tanan'ny fahavalontsika,
ary ny hamela antsika hanompo Azy tsy amin-tahotra,
75fa amin-toetra masina sy marina eo anatrehany
mandritra ny andro rehetra iainantsika.
76Ary ianao kosa, anaka,
dia hatao hoe mpaminanin'ny Avo indrindra,
fa hialoha ny Tompo ianao
mba hamboatra ny lalany;
77ny vahoakany hampahalalainao ny famonjena,
ka hahafantatra fa voavela ny helony.
78Mangoraka sy mamindra fo ilay Andriamanitsika,
koa masoandro miposaka avy any ambony no hamangy antsika
79mba hanazava an'ireo mihitsoka amin'ny maizina
sy amin'ny aloky ny fahafatesana,
ary mba hitarika ny diantsika
hizotra mankany amin'ny fiadanana.

80Nitombo sy nihanahery ilay zaza, ary nitoetra tany an-taniefitra mandra-pisehony tamin'ny vahoaka Israely.

mardi 20 décembre 2016

Talata 20 Desambra 2016 - Oha 3 : 5 - 12

5Matokia ny TOMPO amin'ny fonao manontolo,
fa aza miantehitra amin'ny fahakingan-tsainao.
6Mieke Azy amin'izay rehetra alehanao,
dia hatorony anao ny soritra harahinao.
7Aza manao ny tenanao ho hendry,
fa hajao ny TOMPO ka ialao ny ratsy.
8Hanasitranana ny tenanao izany
ary hamelombelomana ny taolanao.
9Anomezo voninahitra ny TOMPO ireo fanananao
sy izay voaloham-bokatrao rehetra.
10Dia ho feno vary mitafotafo ny sompitrao;
ary hihoatra ny barika fanantazanao azy ny divay.

11Anaka, aza hamavoinao ny famaizan'ny TOMPO
ary aza tofoka amin'ny fananarany.
12Fa izay tian'ny TOMPO no anariny
toy ny ataon-dray amin'ny zanany malala.

lundi 19 décembre 2016

Alatsinainy 19 Desambra 2016 - I Kor 6 : 19 - 20

19Sa tsy fantatrareo fa ny tenanareo dia tempolin'ny Fanahy Masina, Ilay ao anatinareo sady noraisinareo tamin'Andriamanitra? Tsy anareo ny tenanareo, 20fa novidîn'Andriamanitra lafo ho fananany ianareo. Noho izany, ampiasao hanomezam-boninahitra an'Andriamanitra ny tenanareo.

dimanche 18 décembre 2016

Alahady 18 Desambra 2016 - Mik 5 : 1 - 5

1Dia hoy ny Tompo hoe:
«Ianao, ry Betlehema Efratà,
isan'ireo tanàna kely indrindra ao Joda ianao!
Kanefa avy aminao no hamoahako
ilay ho Mpanjaka an'i Israely.
Efa hatramin'ny fahagola no niandohany,
dia hatramin'ny andro taloha elabe.»
2–Noho izany, ny Tompo dia hanolotra ny vahoakany
amin'ny fahavalo
mandra-piavin'ny andro hahatera-dahy ny vehivavy iray;
ka izay sisa velona, amin'ireo rahalahiny
voasesi-tany,
dia hiverina ho any amin'ireo Israelita namany.
3Ary hitsangana hitondra ny vahoaka
izany mpanapaka nampanantenaina izany,
hombàn'ny hery sy heniky ny famirapiratana
avy amin'ny TOMPO Andriamaniny.
Dia handry feizay ny vahoakany,
satria ho lehibe hatrany am-paran'ny tany
izany mpanapaka izany:
4izy no hitondra fiadanana!
–Raha tonga hanafika ny tanintsika ny Asirianina
ka hitsofoka hatraty an-dapantsika,
dia hanangana mpitari-tafika marobe hamelezana azy isika.
5Ary handresy amin'ny sabatra sy lefom-pohy
ireo mpitari-tafika ireo
ka hifehy an'i Asiria, tanin'i Nimrôda.
Izany mpanapaka izany mihitsy
no hanafaka antsika amin'ny Asirianina
izay hihoatra sisitany
ka ho tonga hanafika ny tanintsika.


vendredi 16 décembre 2016

Zoma 16 Desambra 2016 - Gal 1 : 18 - 24

18Telo taona taorian'izany vao niakatra tany Jerosalema aho mba hifankahita amin'i Petera ary dia nitoetra tapa-bolana niaraka taminy. 19Tsy nahita apôstôly hafa aho; fa ny hitako dia i Jakôba rahalahin'ny Tompo.

20Momba izao zavatra soratako aminareo izao, dia ijoroako eto anatrehan'Andriamanitra fa tsy mandainga aho!

21Taorian'izany, dia lasa nankany amin'ny faritany Siria sy Silisia aho. 22Nandritra izany fotoana izany, dia tsy mbola nisy nahita tava ahy ireo anisan'ny Fiangonana kristianina tany Jodea. 23Fa nandre fotsiny izy ireo hoe: «Ilay mpanenjika antsika fahiny dia indro ankehitriny mitory ny finoana izay nilofosany horavana fahiny!» 24Ary dia nanome voninahitra an'Andriamanitra ry zareo noho ny amiko.

jeudi 15 décembre 2016

Alakamisy 15 Desambra 2016 - Apo 15 : 1 - 4

1Ary hitako nisy famantarana* anankiray hafa tany an-danitra, famantarana sady lehibe no mahagaga: dia anjely fito izay nanana ny loza fito farany, satria amin'ireo loza ireo no hiseho faran'izay mafy indrindra ny haviniran*'Andriamanitra.

2Ary hitako nisy toa ranomasina fitaratra miharo afo; ka izay olona naharesy an'ilay biby sy ny sariny ary ny isa mifandraika amin'ny anarany dia nijoro teo amoron'io ranomasina fitaratra io sady nitana ny lokanga nomen'Andriamanitra azy. 3Ary miventy ny hiran'i Mosesy mpanompon'Andriamanitra sy ny hiran'ny Zanakondry izy ireo manao hoe:

                «Lehibe sy mahagaga ny asanao,
                  ry Tompo Andriamanitra Tsitoha!
                  Ara-drariny sy mahitsy ny fandaharanao
                  ry Mpanjakan'ny firenena!
                4Iza no tsy hanaja Anao, ry Tompo?
                  Iza no tsy hanome voninahitra Anao?
                  Satria Ianao irery no masina,
                  ka ho avy ny firenena rehetra
                  hiankohoka eo anatrehanao,
                  fa efa naharihary ny fitsaranao ara-drariny.»

mercredi 14 décembre 2016

Alarobia 14 Desambra 2016 - Sal 8 : 1 - 9

1 Tao amin'ny tahirin-kiran'ny filohan'antoko-mpihira*. Hampiarahina amin'ny jejilava. Salamo nataon'i Davida.

2TOMPO Andriamanitray ô,
endrey ny halehiben'ny voninahitrao
manerana ny tany tontolo!

Nataonao manoatra ny lanitra ny fiandriananao.
3Kanefa ny feon'ny ankizy madinika,
eny, ny feon'ireo zaza mbola minono aza
no anoheranao ny mpandrafy Anao;
ary izany dia toy ny manda natsanganao
hampanginanao ireo fahavalonao
sy izay te hamaly ratsy.

4Raha jereko ny lanitra asan-tananao
sy ny volana aman-kintana napetrakao eny,
5dia mba inona moa ny olombelona no tsarovanao,
sy izay zanak'olombelona no karakarainao?
6Fa nataonao latsaka kely noho ny anjely* izy,
ka nosatrohanao voninahitra sy fiandrianana;
7nampanjakainao amin'ny asan-tananao:
nataonao ho eo an-tongony ny zava-drehetra,
8dia ny omby aman'ondry sy osy
mbamin'ny bibidia any an-tsaha,
9ny voro-manidina sy ny trondron-dranomasina
izay miriaria manaraka ny onjan-driaka.

mardi 13 décembre 2016

Talata 13 Desambra 2016 - I Tan 16 : 4 - 7

4Nisy levita* sasany notendren'i Davida ho amin'ny fanompoana teo anoloan'ny Vatamasin'ny TOMPO* mba hampahatsiaro sy hidera ary hanome voninahitra ny TOMPO Andriamanitr'i Israely. 5I Asafa no filohany, ary i Zakarià no lefitra. I Jahaziela sy i Semiramôta, i Jehiela sy i Matitià, i Eliaba sy i Benaià ary i Hôbeda-Edôma sy i Jehiela no nitendry ny valiha sy ny lokanga; fa i Asafa no nively ny kipantsona. 6I Benaià sy i Elihezera mpisorona* kosa no mpitsoka ny trompetra mandrakariva eo anoloan'ny Vatamasina mirakitra ny fanekempihavanan'Andriamanitra. 7Koa tamin'io andro io no voalohany nanendren'i Davida an'i Asafa sy ny namany hidera ny TOMPO.

lundi 12 décembre 2016

Alatsinainy 12 Desambra 2016 - Jao 15 : 1 - 8

1–Izaho no tena voaloboka; ary ny Raiko no mpamboly. 2Ny sampana rehetra izay tafaray amiko nefa tsy mamokatra dia esorin'ny Raiko; ary ny sampana rehetra izay mamokatra kosa, dioviny mba hamokatra bebe kokoa. 3Madio izao ianareo noho ny teny izay nolazaiko taminareo. 4Aoka hiray amiko hatrany ianareo toy ny iraisako aminareo. Ny sampana tsy afa-mamokatra ho azy raha tsy miray amin'ny voaloboka hatrany; dia toy izany koa ianareo: tsy afa-mamokatra, raha tsy miray amiko hatrany. 5Izaho no voaloboka; ianareo no sampana. Izay miray amiko hatrany, toy ny iraisako aminy, no mamokatra be; satria raha misaraka amiko ianareo, dia tsy afa-manao na inona na inona. 6Raha misy olona tsy miray amiko hatrany, dia ariana any ivelany tahaka ny sampana izy, ka mihamaina; ary angonina ireo sampana maina ka atsipy ao anaty afo, dia may. 7Raha miray amiko hatrany ianareo ka mitoetra ao anatinareo ny teniko, dia angataho izay zavatra tianareo na inona na inona, fa ho tonga aminareo izany. 8Ny ahazoan'ny Raiko voninahitra, dia ianareo mamokatra be sady tonga mpianatro*.

dimanche 11 décembre 2016

Alahady 11 Desambra 2016 - I Kor 10 : 31 ; 11 : 1

31Koa na mihinana na misotro ianareo, eny, na inona na inona ataonareo, dia ataovy ho voninahitr'Andriamanitra ny zavatra rehetra. 32Aza manao izay hahasolafaka olona amin'ny ratsy, na Jiosy izy na hafa firenena* na ny Fiangonan'Andriamanitra. 33Mba manaova tahaka ahy, fa iezaho izay hahafaly ny olona rehetra amin'ny zavatra rehetra; ka tsy ny soa ho an'ny tenako no katsahiko, fa ny ho an'ny besinimaro, mba ho voavonjy izy rehetra.

1Manafahy ahy ianareo, tahaka ny anafahako an'i Kristy*!

samedi 10 décembre 2016

Sabotsy 10 Desambra 2016 - Isa 26 : 11 - 15

11TOMPO ô, manandra-tanana handrahona Ianao
kanefa tsy ahoan'ireo olon-dratsy akory.
Aoka ho menatra izy raha mahita
ny zotomponao hiaro ny vahoakanao;
eny, aoka handevona azy ny afo
izay natokanao ho an'ny fahavalonao!
12TOMPO ô, Ianao no manome anay ny fiadanana
ary Ianao koa no mahatomombana ho anay
ny asa rehetra nataonay.
13Ry TOMPO Andriamanitray ô,
tompo maro no efa notompoinay talohanao;
nefa ny anaranao ihany no satrinay hotsaroana.
14Ny maty tsy ho velona intsony
ary ny matoatoa tsy hitsangana koa;
fa efa nirotsaka handringana azy Ianao
ka nolevoninao mbamin'ny fahatsiarovana azy.
15TOMPO ô, nampitomboinao ny firenenay,
ary izany no nahazoanao voninahitra;
eny, nampitomboinao ny firenenay
ka nitarinao halalaka avokoa ny sisin-taniny.

vendredi 9 décembre 2016

Zoma 09 Desambra 2016 - Neh 8 : 4 - 8

4Teo ambony lampihazo vao narafitra ho an'io fotoana io no nitsanganan'i Hezrà mpahay lalàna. Ary nitsangana teo anilany ankavanana ry i Matitià sy i Sema, i Hanaià sy i Orià ary i Hilkià sy i Mahaseià; teo ankaviany kosa ry i Pedaià sy i Misaela, i Malkià sy i Hasoma, i Hasbadanà sy i Zakarià ary i Mesolama. 5Dia nanokatra ny boky teo imason'ny vahoaka rehetra i Hezrà, satria ambony toerana noho ny daholobe; ka rehefa nosokafany izany, dia nitsangana koa ny vahoaka rehetra. 6Nisaotra ny TOMPO Andriamanitra lehibe i Hezrà; ary nanandra-tanana ny vahoaka rehetra ka namaly hoe: «Amen*!» Avy eo izy ireo dia niondrika sady niankohoka nitehi-tany teo anatrehan'ny TOMPO. 7Dia nitsangana indray ny olona ka samy nijanona teo amin'ny toerany avy. Ary ny levita*, ry i Jesoa sy i Banỳ, i Serebià sy i Jamina, i Hakoba sy i Sabetahy, i Hôdià sy i Mahaseià, i Kelità sy i Hazarià, i Jôzabada sy i Hanàna ary i Pelaià, dia nampianatra ny vahoaka ny lalàna. 8Novakîn'ireo levita ireo mazava ny boky mirakitra ny lalànan'Andriamanitra sady novoasany koa ny heviny, ka azo tsara ny teny novakîna.

jeudi 8 décembre 2016

Alakamisy 08 Desambra 2016 - II Sam 22 : 47 - 51

47Velona ny TOMPO! Isaorana ilay Vatolampiko.
Hasandratra anie Andriamanitra
vatolampy mampandresy ahy.
48Izy no manao ny famaliana ho ahy
ary mampanaiky firenena hofeheziko.
49TOMPO ô, afahanao amin'ny fahavaloko aho;
eny, ataonao resiko ireo mpamely ahy
ary tsy mahazo ahy ny mpanao an-keriny.
50Koa eo anivom-pirenena no hiderako Anao
sady hankalazako Anao amin-kira.
51Ny TOMPO manome fandresena lehibe
ho an'ilay mpanjaka voafidiny;
ary maneho fitia an'ilay voahosony,
dia i Davida sy ireo taranany
hatrany amin'ny mandrakizay.

mercredi 7 décembre 2016

Alarobia 07 Desambra 2016 - I Pet 2 : 11 - 12

11Ry hava-malala, amin'ny maha vahiny sy mpivahiny anareo eto an-tany dia mampirisika anareo aho mba hifady ny filàndratsin'ny maha olona mpanota, fa miady manohitra ny fanahinareo ireny. 12Manàna fitondrantena tsara eo anivon'ny mpanompo sampy; fa na dia endrikendrehiny ho mpanao ratsy aza ianareo, dia ho hitany tokoa ny asa tsara ataonareo, ka hanomezany voninahitra an'Andriamanitra amin'ny andro hiavian'i Kristy*.

mardi 6 décembre 2016

Talata 06 Desambra 2016 - Jao 11 : 1 - 5

1Nisy lehilahy anankiray narary, dia i Lazara izay nonina tao Betania, tanàna nisy an'i Maria sy i Marta rahavaviny. 2I Maria dia ilay vehivavy nanosotra ilomanitra ny tongotry ny Tompo sy namaoka ny tongony tamin'ny volon-dohany; ary i Lazara anadahiny no narary. 3Dia naniraka olona tany amin'i Jesoa izy mirahavavy hilaza hoe:
–Tompo ô, marary ilay sakaizanao!

4Rehefa nandre izany i Jesoa, dia nanao hoe:
–Aretina tsy miafara amin'ny fahafatesana izay fa aretina tonga mba hisehoan'ny voninahitr'Andriamanitra ka hahazoan'ny Zanak'Andriamanitra* voninahitra!

5I Jesoa dia fatra-pitia an'i Marta sy ny rahavaviny ary i Lazara.

lundi 5 décembre 2016

Alatsinainy 05 Desambra 2016 - Deo 26 : 16 - 19

16Anio no andidian'ny TOMPO Andriamanitrareo anareo hanatanteraka ireo lalàna amam-pitsipika ireo; koa himasoanareo hotanterahina amin'ny fonareo manontolo sy amin'ny fanahinareo manontolo ireo. 17Efa nampiteneninareo ny TOMPO androany fa ho Andriamanitrareo Izy, ary ianareo hanaraka ny sori-dàlany ka hitandrina ny lalànany sy didy amam-pitsipiny ary hihaino ny feony. 18Efa nampitenenin'ny TOMPO kosa ianareo androany fa ho vahoaka fananany sarobidy indrindra ianareo, araka izay nampanantenainy taminareo, sady hitandrina ny didiny rehetra. 19Eny, tiany hasandratra ho ambonin'ny firenena rehetra izay nataony ianareo na amin'ny voninahitra na amin'ny laza na amin'ny famirapiratana; dia ho vahoaka voatokana ho an'ny TOMPO Andriamanitrareo ianareo, araka izay nampanantenainy.

dimanche 4 décembre 2016

Alahady 04 Desambra 2016 - Mat 5 : 13 - 16

13–Ianareo no sira hanasoa ny tany; fa raha ny sira no tonga matsatso, hatao ahoana indray no fanome hasina azy? Tsy misy antony intsony izy fa dia ariam-potsiny any ivelany hohitsakitsahin'ny olona. 14Ianareo no fahazavana ho an'izao tontolo izao; tsy azo afenina ny tanàna miorina eo an-tampon-tendrombohitra. 15Ary tsy misy mampirehitra jiro ka hametraka azy ao ambany vata famarana; fa eo ambony fitoeran-jiro no apetrany mba hanazava izay rehetra ao an-trano. 16Aoka hamiratra eo imason'ny olona toy izany koa ny fahazavanareo, mba hahitany ny asa soa ataonareo ka hanomezany voninahitra ny Rainareo Izay any an-danitra.

samedi 3 décembre 2016

Sabotsy 03 Desambra 2016 - Sal 44 : 4 - 8

4Ny nahazoan'ny razanay ity tany ity
dia tsy ny sabatra nananany;
ny nahazoany fandresena
dia tsy ny heriny velively,
fa ny herinao nirotsaka an-tsehatra
sy ny fanatrehanao azy amim-pitiavana.

5Ianao tokoa, ry Andriamanitra Mpanjakako,
no manome fandresena an'i Jakôba vahoakanao.
6Ianao no anosehanay ny fahavalonay;
ny anaranao no anitsakitsahanay ny mpamely anay.
7Tsy ny tsipîkako no itokiako,
tsy ny sabatro no andreseko;
8fa Ianao no mamonjy anay amin'ny fahavalonay
sy manafo-kenatra ny mpankahala anay.

vendredi 2 décembre 2016

Zoma 02 Novambra 2016 - Fil 1 : 9 - 11

9Ary izao no tonombavaka ataoko ho anareo: hitombo bebe kokoa hatrany anie ny fitiavanareo ka hombàn'ny fahalalana marina sy ny tena fahatakaran-javatra 10mba hahaizanareo mifidy izay tsara; dia hadio sady tsy hanan-tsiny amin'ny andro hiavian'i Kristy ianareo, 11ary ho heniky ny vokatry ny fahamarinana, izay avy amin'ny alalan'i Jesoa Kristy, mba hanomezam-boninahitra sy hiderana an'Andriamanitra.

jeudi 1 décembre 2016

Alakamisy 01 Desambra 2016 - Eks 35 : 29 - 35

29Ny Israelita malala-tanana rehetra, na lahy na vavy, dia nitondra fanatitra an-tsitrapo ho an'ny TOMPO mba ho enti-manao ireo asa izay efa nandidian'ny TOMPO an'i Mosesy.

30Hoy i Mosesy tamin'ny Israelita:
–Jereonareo fa nofidin'ny TOMPO i Betsalela, zanakalahin'i Orỳ sady zafikelin'i Hora, avy amin'ny fokon'i Joda, 31ary nofenoiny ny Fanahiny mba ho tena kinga sy marani-tsaina, ka mahalala ny haitao isan-karazany: 32hainy ny manao vinavinan'asa, ny miasa volamena sy volafotsy ary halimo, 33ny mandidy ny vatosoa sy mandrafitra azy, ny manao sokitra ny hazo, izany hoe hainy atao ny asa kanto samihafa. 34Nomen'ny TOMPO azy ny fahaiza-mampianatra, tahaka izay nomeny an'i Ôhôliaba, zanakalahin'i Ahisamàka, avy amin'ny fokon'i Dana. 35Nomeny azy roa lahy ny talenta hanao asa isan-karazany: ny mandidy vatosoa, ny manao sary, ny manao peta-kofehy amin'ny volon'ondry miloko volomparasy sy mena ary jaky, ny manao peta-kofehy amin'ny kiran-drongony madinika, ny manenona ary ny manatontosa asa samihafa na mamorona zava-kanto.

mercredi 30 novembre 2016

Alarobia 30 Novambra 2016 - Isa 62 : 10 - 12

10Ry mponin'i Jerosalema, mivoaha tao an-tanàna,
mivoaha amin'ny vavahady,
anokafy lalana ny vahoaka mody,
ataovy mitovy tantana ny arabe
ka esory ny vato eo aminy
ary atsangano ny faneva hanaingana ireo firenena.
11Injay nisy baiko nampitain'ny TOMPO
hatrany amin'ny faran'ny tany!
Koa lazao amin'ny olona ao Tsiôna* hoe:
«Indro tonga ny Mpamonjinareo,
indro entiny miaraka aminy ny karama azony
ary eo anoloany ny valin-kasasarany.»
12Ny besinimaro, na ianareo na iretsy,
dia hantsoina hoe «ilay vahoaka masina»,
«ireo olona navotan'ny TOMPO»;
ary ianao, ry Jerosalema, dia hatao hoe:
«ilay irîna», «ilay tanàna tsy foy.»

mardi 29 novembre 2016

Talata 29 Novambra 2016 - Lio 19 : 11 - 28

11Raha mbola nihaino izany teo ny olona, dia nanaovan'i Jesoa fanoharana* indray. Akaiky an'i Jerosalema manko Izy tamin'izay ka noheverin'ny olona fa efa nadiva hiseho ny Fanjakàn'Andriamanitra*. 12Toy izao àry ny tenin'i Jesoa:

–Lasa tany an-tany lavitra ity andriandahy anankiray handray ny fahefana hanjaka, dia hiverina. 13Niantsoany folo lahy ny mpanompony talohan'ny hiaingany, ka samy nomeny denàry* zato avy sady nataony hoe: «Ampiasao ireny mandra-piveriko.» 14Hàlan'ny mpiray tanindrazana aminy kosa ilay andriandahy ka nandefasany iraka nanaraka azy hilaza hoe: «Tsy mila iny lehilahy iny ho mpanjaka izahay.»

15Rehefa nahazo ny fahefana hanjaka izy, dia nody an-tanindrazana ary nampiantso an'ireo nomeny vola mba hahalalany izay tombony azony avy. 16Niseho ilay voalohany ka nilaza hoe: «Nahazo denàry arivo, tompoko, ny denàry zato nomenao ahy!» 17Dia hoy ny mpanjaka taminy: «Mahafinaritra izany, ry mpanompo tsara; nahatoky tamin'ny zava-madinika ianao, ka dia tendreko hiandraikitra tanàna folo.» 18Tonga ny faharoa ka nanao hoe: «Namokatra denàry dimanjato, tompoko, ny denàry zato nomenao ahy!» 19Dia hoy ny mpanjaka taminy: «Ianao indray dia tendreko hiandraikitra tanàna dimy.» 20Tonga kosa ny anankiray hafa ka nanao hoe: «Intỳ, tompoko, ny denàry zato nomenao ahy, fa nataoko tsara tahiry tanaty mosara. 21Natahotra anao manko aho, satria lehilahy sarotiny ianao, ka maka izay tsy napetrakao ary mijinja izay tsy nafafinao.» 22Dia hoy ny mpanjaka taminy: «Mpanompo ratsy fanahy raha ianao! Ny teninao no itsarako anao: fantatrao fa lehilahy sarotiny aho, maka izay tsy napetrako ary mijinja izay tsy nafafiko; 23koa nahoana àry no tsy napetrakao tany amin'ny banky ny volako, ka ho noraisiko mbamin'ny zana-bola rehefa tafaverina aho?» 24Ary hoy ny mpanjaka tamin'izay nanatrika teo: «Alao ny denàry zato eny aminy ka omeo an'ilay nahazo denàry arivo!» 25Dia hoy ireo tamin'ny mpanjaka: «Ka efa manana denàry arivo anie izy, tompoko!» 26Fa novaliany hoe: «Lazaiko aminareo fa izay rehetra manana no homena hatrany; ary izay tsy manana kosa, na izay kely ananany aza dia halana aminy. 27Fa iretsy fahavaloko tsy nanaiky hanjakako iretsy, dia ento atỳ ka vonoy eto anatrehako!»

28Nony avy niteny izany i Jesoa, dia nitarika ny dia hiakatra ho any Jerosalema.

lundi 28 novembre 2016

Alatsinainy 28 Novambra 2016 - Asa 9 : 36 - 41

36Tany Jôpa dia nisy vehivavy mpianatra* atao hoe Tabità (na «Dôrkasy» amin'ny teny grika izany hoe gazela). Be tokoa ny asa soa amam-piantrana vitany. 37Ary tamin'izany andro izany dia narary izy ka maty. Rehefa avy nampandroina ny faty, dia napetraka tao amin'ny efitrano ambony rihana. 38Tanàna akaikin'i Jôpa moa i Lida; ka nony henon'ny mpianatra tao Jôpa fa hoe any Lida i Petera, dia nandefa iraka roa lahy ry zareo mba hiangavy azy hoe: «Tongava faingana atỳ aminay.» 39Teo no ho eo ihany i Petera dia niainga niaraka tamin'ireto iraka. Vao tonga tao Lida i Petera, dia nentin'ny mpianatra ho any amin'ilay efitrano ambony rihana. Nanatona an'i Petera avokoa ireo mpitondratena tao, izay sady nitomany no nampiseho ny akanjo sy fitafiana hafa nataon'i Dôrkasy ho azy ireo fony fahavelony.

40Namoaka ny olona rehetra ho any alatrano i Petera, dia nandohalika nivavaka. Avy eo izy dia nitodika nanatrika ny faty ka niteny hoe:
–Ry Tabità, mitsangàna!

Nahiratr'i Tabità ny masony, ary nahita an'i Petera izy dia niarina. 41Nanolo-tanana azy kosa i Petera ka nampitsangana azy. Rehefa nantsoin'i Petera ny vahoakan'Andriamanitra* tao Jôpa mbamin'ireo mpitondratena, dia Tabità velona soa aman-tsara no natolony azy ireo.

dimanche 27 novembre 2016

Alahady 27 Novambra 2016 - Kol 3 : 22 - 25

22Ianareo mpanompo, maneke ny tomponareo ara-nofo amin'ny zavatra rehetra. Aza eo imasony ihany no manao izany, toy ny mila sitraka amin'olona; fa maneke amim-pahatsoram-po noho ny fanajànareo an'i Jesoa Tompo. 23Na inona na inona ataonareo, dia tontosao amin'ny fo tokoa tahaka ny atao amin'i Jesoa Tompo fa tsy amin'olona. 24Eny, fantatrareo fa i Jesoa Tompo no handraisanareo ny valiny, dia ny anjara lova natokana ho an'ny vahoakan'Andriamanitra*; satria ny tena Tompo Izay tompoinareo, dia i Kristy*. 25Fa izay manao ratsy dia hovaliana amin'izay ratsy nataony, fa tsy mba mizaha tavan'olona Andriamanitra.

samedi 26 novembre 2016

Sabotsy 26 Novambra 2016 - Mat 5 : 21 - 24

21–Efa renareo fa voalaza tamin'ny ntaolo hoe: «Aza mamono olona»; ary izay mamono olona dia mendrika hatolotra ny fitsarana! 22Izaho koa milaza aminareo hoe: izay rehetra tezitra amin'ny namana iray finoana dia mendrika hatolotra ny fitsarana isan-tanàna; izay hanao ny namana iray finoana hoe: misy kely, dia mendrika hatolotra ny Fitsarana ambony*; izay hanao azy hoe: foka, dia mendrika havarina any amin'ny lohasahan'afo. 23Koa raha manolotra ny fanatitrao amin'Andriamanitra eo amin'ny alitara* ianao ary eo no mahatsiaro fa manana alahelo aminao ny namanao iray finoana, 24dia avelao eo anoloan'ny alitara ny fanatitrao, ka mandehana aloha mihavana amin'ilay namanao; izay vao miverina manolotra ny fanatitrao.

25Mihavàna faingana amin'izay manana ady aminao dieny samy mbola eny an-dalana ho any amin'ny fitsarana ianareo; fandrao ilay manana ady aminao hanolotra anao amin'ny mpitsara; ny mpitsara kosa hanolotra anao amin'ny miaramila, ka hatao am-ponja ianao.

vendredi 25 novembre 2016

Zoma 25 Novambra 2016 - Job 42 : 7 - 10

7Rehefa voalazan'ny Tompo tamin'i Jôba ireo teny ireo, dia i Elifaza avy any Temàna no nataotaony hoe:
–Tezitra aminao sy ny namanao roa lahy Aho satria tsy mba marina tahaka izay nolazain'i Jôba mpanompoko ny filàzanareo Ahy. 8Koa ankehitriny makà ombilahy fito sy ondrilahy fito ianareo, dia mankanesa any amin'ny Jôba mpanompoko. Hatolotrareo ho sorona* dorana manontolo noho ny fahotanareo ireo biby ireo; ary hifona ho anareo i Jôba mpanompoko. Fa ho sitrako ny vavak'i Jôba, ka tsy hamaly anareo araka ny hadalànareo Aho na dia tsy marina tahaka izay nolazain'i Jôba mpanompoko aza ny filàzanareo Ahy.

9Dia nandeha i Elifaza avy any Temàna sy i Bildada avy any Soha ary i Tsôfara avy any Nahama ka nanao izay nasain'ny TOMPO hataony; ary sitraky ny TOMPO ny vavak'i Jôba.
10Rehefa avy nivavaka ho an'ireo namany i Jôba, dia naverin'ny TOMPO hanan-karena indray ary nomeny indroan'izay rehetra nananany fahiny aza.

jeudi 24 novembre 2016

Alakamisy 24 Novambra 2016 - Mat 26 : 6 - 13

6Tany Betania i Jesoa tamin'izay ary tao an-tranon'i Simôna mpivaro-bakoly. 7Raha mbola teo am-pisakafoana i Jesoa, dia nisy vehivavy anankiray nitondra tavoahangy alabasitra* feno ilomanitra sarobidy; ary naidin-dravehivavy tamin'ny lohan'i Jesoa ny ilomanitra. 8Tezitra ireo mpianatra* nony nahita izany ka nanao hoe:
–Nahoana re iny no dia lanîna foana tahaka izao? 9Azo namidy lafo be iny ilomanitra iny ka omena ny mahantra ny vidiny.

10Tsikaritr'i Jesoa izany ka hoy Izy tamin'ny mpianany:
–Nahoana no anaovanareo izay mampalahelo an-dravehivavy? Eny, asa soa iny nataony tamiko iny. 11Ny mahantra dia misy eto aminareo mandrakariva; fa Izaho kosa tsy mba eto aminareo mandrakariva. 12Naidin'ity vehivavy ity tamin'ny tenako iny ilomanitra iny, ary mba hamboarany Ahy halevina no nanaovany an'izany dieny mialoha. 13Lazaiko marina aminareo fa na aiza na aiza eran'izao tontolo izao hanambaràna ity Vaovao Mahafaly* ity dia holazaina koa izao nataon'ity vehivavy ity izao mba ho fahatsiarovana azy.

mercredi 23 novembre 2016

Alarobia 23 Novambra 2016 - Mar 4 : 15 - 23

15Ao ny amafazana ny teny eo amoron-dalana: vao mahaheno izy, dia tonga i Satàna* manaisotra ny teny voafafy tao aminy. 16Ao koa ny amafazana an-tany be vato: vao mahaheno ny teny izy, dia mandray azy an-kafaliana, 17saingy tsy alatsany lalina ao aminy fa vetivety foana no itanany azy; ka raha vao mitranga ny fahoriana na fanenjehana noho ny tenin'Andriamanitra, dia very finoana izy. 18Ao indray ny amafazana anaty tsilo: mahaheno ny teny izy, 19saingy ny fiahiana ny fiainana etoana sy ny fanodokan'ny harena ary ny fitsiriritana hafa rehetra, samy miditra ao aminy, ka mangeja ny teny tsy ho afa-mamoa. 20Ao koa ny amafazana an-tany lonaka, dia ireo mahaheno ny teny sy mandray azy ka mamokatra: ny iray telopolo heny, ny iray enimpolo heny, ny iray zato heny.
Fanoharana momba ny jiro

21Hoy koa i Jesoa tamin'ireo mpomba Azy sy tamin'ny 12 lahy:
–Inona moa no angalana ny jiro, ny hametrahana azy ao ambany vata famarana na ao ambany farafara ve sa ny hametrahana azy eo ambony fitoeran-jiro? 22Satria tsy misy takona izay tsy haseho, na miafina izay tsy haharihary. 23Izay manan-tsofina hihainoana, aoka hihaino!

mardi 22 novembre 2016

Talata 22 Novambra 2016 - Apo 2 : 18 - 28

18–Manorata ho an'ny anjelin'ny Fiangonana any Tiatira:

«Izao no lazain'ilay Zanak'Andriamanitra*, dia Ilay manana maso mivaivay tahaka ny lelafo sady manana tongotra mangirangirana tahaka ny varahina manganohano: 19Fantatro ny asanao, ny fitiavanao, ny finoanao, ny fanompoanao, ary ny faharetanao; ary ny asanao farany izao dia be noho ny tany am-boalohany. 20Saingy izao no anomezako tsiny anao: leferinao ilay vehivavy Jezebela izay milaza ny tenany ho mpaminany*, ka dia mampianatra sy manoloky ny mpanompoko hijangajanga sy hihinan-kena natao fanatitra tamin'ny sampy. 21Efa nomeko andro io vehivavy io hialany amin'ny toe-dratsiny, saingy tsy mety miala amin'ny fijangajangàny*. 22Indro hampandamahiko eo am-pandriana izy, ary izay nanitsakitsa-bady taminy dia hozoim-pahoriana lehibe, raha toa tsy miala amin'ny asa nampianarin-dravehivavy azy. 23Hovonoiko ho faty ny zanany, ka ho fantatry ny Fiangonana rehetra fa Izaho no mahalala ny ao am-po tsy miloatra; ary hovaliako araka ny asanareo avy ianareo.

24«Fa ianareo sisa rehetra amin'ny Fiangonana any Tiatira dia tsy nanaraka izany fampianarana izany sady tsy mba mahalala ny ataon'ireo hoe ‹hevi-dalin'i Satàna*›; ka izao no lazaiko aminareo: tsy hovesarako entana hafa ianareo; 25fa izay anananareo no tano mafy mandra-piaviko.

26-28«Izay maharesy ka mitandrina ny hanao ny asako hatramin'ny farany, dia homeko fahefana toy izay efa noraisiko tamin'ny Raiko: homeko fahefana amin'ny firenena izy, ka hifehy azy amin'ny tehim-by ary hanorotoro azy toy ny vilany tany. Homeko an'izay maharesy koa ny kintana fitarikandro.

lundi 21 novembre 2016

Alatsinainy 21 Novambra 2016 - Isa 43 : 1 - 7

1Ankehitriny kosa izao no lazain'ny TOMPO
Izay nahary anao, ry firenen'i Jakôba
sy namorona anao, ry vahoaka Israely:
«Aza matahotra ianao, fa efa navotako;
ny anaranao no efa niantsoako anao, ka Ahy ianao.
2Raha mamakivaky ny rano ianao,
dia homba anao Aho;
raha miampita ny ony ianao,
dia tsy hanafotra anao ireny;
raha mandeha eo anivon'ny afo ianao,
dia tsy ho may akory
fa tsy handoro anao ny lelafo.
3Satria Izaho no TOMPO Andriamanitrao,
ilay Masin'i Israely mpamonjy anao.
Nomeko hanavotana anao i Ejipta;
ary nataoko solonao i Etiôpia sy i Sebà.
4Satria sarobidy eo imasoko ianao,
manan-danja amiko sady tiako.
Koa nanome olona ho solonao Aho
sy firenena maro ho takalon'ny ainao.

5Aza matahotra fa momba anao Aho.
Avy any atsinanana no hamerenako ny taranakao,
avy any andrefana no hanangonako ireo olonao.
6Hoy Aho amin'ny avaratra: ‹Omeo Ahy ireo›,
ary amin'ny atsimo: ‹Aza hazonina izy!›
Avereno amiko ny zanako lahy avy any lavitra
sy ny zanako vavy avy any am-paran'ny tany,
7dia izay rehetra mitondra ny anarako
sady noarîko sy novolavolaiko
mba hanome voninahitra Ahy.

dimanche 20 novembre 2016

Alahady 20 Novambra 2016 - Fil 4 : 15 - 23

15Fantatrareo koa, ry Filipianina, fa nony niala tany Masedônia aho, tamin'ny fotoana niandohan'ny fitoriana ny Vaovao Mahafaly*, dia ianareo no hany Fiangonana nanampy ahy ka nanana kaontin'ny miditra sy mivoaka nifanaovana tamiko. 16Fony aho mbola tany Tesalônika, dia efa indray mandeha amana indroa no nandefasanareo izay nilaiko. 17Tsy hoe mitady fanomezana aho no milaza izany, fa mitady ny vokatra hiavosa ao amin'ny kaontin'ny miditra ho anareo. 18Eny, manana ny zavatra rehetra ilaiko aho izao sady manana amby ampy; efa voaraiko tamin'i Epafrôdito ny fanomezana avy aminareo, ka heni-tsoa mitafotafo aho. Izany fanomezanareo izany dia toy ny zava-manitra mamerovero atao sorona ka raisin'Andriamanitra sady ankasitrahiny. 19Fa Andriamanitro kosa hanome mitafotafo izay rehetra ilainareo araka ny harena heni-boninahitra atolony ao amin'i Kristy Jesoa. 20Ho an'ilay Andriamanitra sady Raintsika anie ny voninahitra mandrakizay mandrakizay! Amen*.

21Veloma any amin'izay rehetra isan'ny vahoakan'Andriamanitra* ka tafaray amin'i Kristy* Jesoa. Manao veloma anareo ny havana iray finoana, izay tafaraka amiko; 22manao veloma anareo ny vahoakan'Andriamanitra rehetra eto, fa indrindra ry zareo ao an-dapan'ny amperôra.

23Homba anareo anie ny fahasoavan'i Jesoa Kristy Tompo!

samedi 19 novembre 2016

Sabotsy 19 Novambra 2016 - Lio 15 : 29 - 32

29Fa hoy izy tamin-drainy: «Jereo ange! Taona firifiry moa izay no nanompoako anao ary tsy mbola nandika ny didinao na oviana na oviana aho; kanefa dia nofy izany hoe mba nomenao zanak'osy iray hiarahako mihinana sy mifaly amin'ny sakaizako. 30Fa nony tonga kosa io zanakao io, izay nahafongana ny fanananao tamin'ny vehivavy mpivarotena, dia amonoanao ny zanak'omby nafahy.» 31Ary hoy ny rainy taminy: «Ianao anie, anaka, dia eto amiko mandrakariva ary anao avokoa izay rehetra ahy. 32Fa tsy maintsy atao ny fihinanam-be aman-korana, satria io rahalahinao io: efa maty no velona indray, ary efa very no hita indray.»

vendredi 18 novembre 2016

Zoma 18 Novambra 2016 - Isa 58 : 6 - 12

6Tsia, fa ny fifadian-kanina tiako dia izao:
ny mamaha ny olona voafatotra tsy an-drariny,
ny manaisotra ny zioga mitambesatra aminy,
ny manafaka ireo ampahorîna
ka manapatapaka izay zioga rehetra mangeja azy.
7Ny hizarànao ny haninao ho an'ny noana
sy hampiantranoanao ireo mahantra mirenireny,
ny hampitafînao izay hitanao fa miboridana
ka tsy hampihirimbelona anao eo anatrehan'ny namanao.
8Amin'izay dia hiposaka toy ny maraina ny fahazavànao
ary ho tonga haingana ny fahasitrananao.
Ny fanafahana anao no hialoha lalana anao,
ary ny TOMPO mihitsy no ho vodilalanao.
9Rehefa miantso ianao, dia hamaly anao ny TOMPO;
rehefa mitady vonjy ianao, dia hovaliany hoe: «Inty Aho.»
Raha foananao eo aminao ny ziogam-pamoretana
mbamin'ny fanendrikendrehana sy ny fitenenan-dratsy,
10raha zarainao ho an'ny noana ny haninao
ka manome sakafo ireo sahirana ianao,
dia hamirapiratra ao amin'ny haizina ny fahazavànao
ary ho toy ny mitataovovonana ny haizim-pitonao.
11Hitari-dalana anao hatrany ny TOMPO;
na dia ao amin'ny tany karakaina aza ianao,
dia hovokisany hanina sy hampahatanjahiny.
Hanjary mahate hijery toy ny saha vonton-drano ianao
na toy ny loharano miboiboika tsy mety ritra.
12Noho ny ezakao, dia haorina indray
ireo zavatra rava fahiny
ary hatsangana indray ny fanorenana
izay efa nilaozana hatry ny elabe;
ary ianao dia hantsoina hoe:
«Vahoaka mpamboatra ny manda simba
sy mpamelona ny lalankely efa maty
mba ho tsara honenana ao an-tanàna.»

jeudi 17 novembre 2016

Alakamisy 17 Novambra 2016 - Job 4 : 7 - 10

7Tsarovy izao: efa nahita tsy manan-tsiny
na olo-marina maty nahantra ve ianao?
8Hitako tsara fa izay mamboly tsy fahamarinana
sy mamafy fahoriana no hijinja ny vokany.
9Ny fofonain'Andriamanitra no andringanana azy;
ny fahatezerany no toa rivo-mahery mahalevona azy;
10na mierona toa liona izy na minaonaona toa tigra,
dia tapatapahiny nify ireo toa biby masiaka ireo.

mercredi 16 novembre 2016

Alarobia 16 Novambra 2016 - Lio 14 : 12 - 14

12Avy eo dia ilay nanasa Azy indray no nilazan'i Jesoa hoe:

–Raha manasa olona hisakafo antoandro na hisakafo hariva ianao, aza mba ny sakaizanao na ny rahalahinao na ny havanao na ny mpanankarena iray tanàna aminao no asaina, fandrao hasainy koa ianao ka ho voavaliny izay nataonao taminy. 13Fa raha misy fanasana ataonao, ny mahantra, ny kilemaina, ny mandringa mbamin'ny jamba kosa asaina; 14dia ho sambatra ianao, satria tsy mba mahavaly ny vitanao ireo. Ary Andriamanitra hamaly soa anao rehefa mby amin'ny fitsanganan'ny olo-marina ho velona.

mardi 15 novembre 2016

Talata 15 Novambra 2016 - Mat 25 : 33 - 40

33ka ny ondry no hataon'ny Zanak'olona eo ankavanany fa ny osy hataony eo ankaviany. 34Ary dia izao no holazain'ny Mpanjaka amin'izay eo ankavanany: «Avia ianareo nombàn'ny Raiko fitahiana; raiso ho lova ny Fanjakana* izay voavoatra ho anareo hatrizay nahariana an'izao tontolo izao. 35Fa noana Aho, dia nomenareo hanina; nangetaheta Aho, dia nomenareo hosotroina; nivahiny Aho, dia nampiantranoinareo; 36tsy nitafy Aho, dia notafînareo; narary Aho, dia nokarakarainareo; tany am-ponja Aho, dia novangianareo.» 37Ary dia hanontany Azy ny olo-marina ka hanao hoe: «Tompo ô, oviana Ianao no hitanay noana ka nomenay hanina; na nangetaheta ka nampisotroinay? 38Oviana Ianao no hitanay nivahiny ka nampiantranoinay, na tsy nitafy ka notafînay? 39Oviana Ianao no hitanay narary na tany am-ponja ka novangianay?» 40Dia hovalian'ny Mpanjaka hoe: «Lazaiko marina aminareo fa araka izay nataonareo tamin'ny anankiray amin'ireto havako madinika indrindra ireto no nataonareo tamiko.»

lundi 14 novembre 2016

Alatsinainy 14 Novambra 2017 - I Mpa 18 : 36 - 38

36Fa tamin'ny fotoan'ny sorona tolakandro dia nanatona i Elià mpaminany ka nanao hoe:
–Ry TOMPO Andriamanitr'i Abrahama sy i Itsehàka ary i Jakôba ô, asehoy ankehitriny fa Ianao no Andriamanitra amin'i Israely; ary izaho dia mpanomponao ka baiko avy taminao no nanaovako izao zavatra rehetra izao. 37TOMPO ô, mihainoa ahy mba hahafantaran'ireto vahoaka ireto fa Ianao TOMPO no tena Andriamanitra, ary Ianao ihany no mampiverina indray ny fony ho aminao.

38Dia nalatsaky ny TOMPO ny afo, ka nandoro ny sorona dorana manontolo sy ny kitay ary ny vato sy ny vovoka sady nandritra ny rano tao amin'ny hady.

dimanche 13 novembre 2016

Alahady 13 Novambra 2016 - I Tim 5 : 1 - 8

1Aza levilevena ny lehilahy efa zokiolona fa anaro toy ny rainao izy; ny zatovolahy, ento toy ny rahalahy; 2ny vehivavy efa zokiolona, ento toy ny reny; ary ny zatovovavy, ento toy ny anabavy, amin'ny fahadiovana tanteraka.

3Hajao ny vehivavy mpitondratena, dia ireo tena mpitondratena tokoa. 4Raha manana zanaka aman-jafy ilay vehivavy mpitondratena, dia aoka ireo aloha hianatra haneho ny toe-panahy araka an'Andriamanitra amin'ny fianakaviany ka hamaly babena ny ray aman-dreniny na ny raibe aman-drenibeny, fa izany no ankasitrahin'Andriamanitra. 5Ny vehivavy, tena mpitondratena tokoa sady tsy mana-mpiahy, dia efa nametraka ny fanantenany amin'Andriamanitra, ka mivavaka hatrany ary mangataka hampian'Andriamanitra andro aman'alina. 6Fa ny mpitondratena, manaram-po amin'ny fahafinaretana, dia efa maty fanahy mbola velona. 7Izany no anafatrafaro ny vehivavy mpitondratena sy ny fianakaviany, mba tsy hananany tsiny. 8Fa raha misy tsy mahakarakara ny havany, indrindra fa ny ankohonany, dia efa nandà ny finoana izy ka ratsy kokoa noho ny tsy mpino.

samedi 12 novembre 2016

Sabotsy 12 Novambra 2016 - Efe 6 : 5 - 9

5Ianareo mpanompo, maneke ny tomponareo ara-nofo amin-tahotra sy fanajana ary amin'ny fahatsorampo toy ny anekenareo an'i Kristy*. 6Tsy hoe raha eo imason'ny tomponareo ara-nofo ihany no manaiky, toy ny mila sitraka amin'ny olona; fa tontosao amin'ny fo tokoa ny sitrapon'Andriamanitra, toy ny ataon'ny mpanompon'i Kristy. 7Ataovy amin'ny fo mirana ny asa fanompoanareo, tahaka ny atao amin'ny Tompo fa tsy amin'ny olona; 8satria fantatrareo fa ny olona tsirairay, na mpanompo na tsy mpanompo, dia samy hovalian'ny Tompo, amin'izay soa nataony avy.
9Ary ianareo tompo, manaova toy izany koa amin'ny mpanomponareo, ka atsaharo ny fandrahonana; satria fantatrareo fa na ianareo, na ny mpanomponareo, dia samy an'ilay Tompo Izay monina ao an-danitra sady tsy mba mizaha tavan'olona.

vendredi 11 novembre 2016

Zoma 11 Novambra 2016 - Gen 4 : 1 - 5

1Niraisan'i Adama i Eva vadiny, ka nitoe-jaza. Dia niteraka an'i Kaina izy, ary nanao hoe: «Nahazo zazalahy noho ny amin'ny TOMPO aho.» 2Dia mbola niteraka an'i Abela rahalahiny koa izy. Ary i Abela dia mpiandry* ondry, fa i Kaina kosa mpamboly. 3Nony tonga ny fotoam-pahavokarana, dia nitondran'i Kaina fanatitra ho an'ny TOMPO ireo vokatry ny tany. 4I Abela koa nitondra ireo voalohan-teraky ny ondriny hatao sorona* ka nanolotra ny jaborany ho an'ny TOMPO. Ary ny Tompo nankasitraka an'i Abela sy ny fanatiny, 5fa tsy nankasitraka kosa an'i Kaina sy ny fanatiny; koa tezitra mafy i Kaina sady nanjombona tarehy.

jeudi 10 novembre 2016

Alakamisy 10 Novambra 2016 - II Kor 5 : 6 - 15

6Koa feno toky mandrakariva isika, na dia fantatsika aza fa raha mbola mitoetra ao amin'ity vatana ity isika, dia lavitry ny fonenan'ny Tompo, 7(satria finoana no andehanantsika fa tsy hoe efa mahita sahady). 8Feno toky isika, koa aleontsika ny miala amin'ity vatana ity mba hitoetra eo anilan'ny Tompo. 9Fa ny hankasitrahin'ny Tompo no irîntsika voalohany indrindra, na mbola mitoetra ao amin'ity vatana ity isika na miala ao; 10satria tsy maintsy hiseho eo anatrehan'i Kristy* mba hotsarainy isika rehetra, ka handraisan'ny tsirairay avy ny tandrify azy araka izay nataony na tsara na ratsy fony mbola velona tao amin'ity vatana ity.

11Fantatray ny atao hoe fahatahorana ny Tompo, ka miezaka hampanaiky ny olona izahay. Tena mahalala anay Andriamanitra, ary antenaiko fa mahalala ahy ao amin'ny fieritreretanareo koa ianareo. 12Tsy hoe midera tena indray aminareo izahay, fa manome anareo izay hahazoanareo mirehareha ny aminay; ka dia mba hisy havalinareo ny olona mirehareha amin'ny zavatra eto ivelany fa tsy amin'ny zavatra ao am-po. 13Raha marina fa very saina izahay, dia ho an'Andriamanitra izany; raha mitombin-tsaina izahay, dia ho anareo izany. 14Fa ny fitiavan'i Kristy no manery anay, satria izao no hevitray: maty hamonjy ny olona rehetra ny olona anankiray; noho izany, nandalo fahafatesana koa izy rehetra. 15Maty hamonjy ny olona rehetra ny olona anankiray, mba tsy ho velona ho an'ny tenany intsony ireo velona, fa ho an'Ilay efa maty sy nitsangana velona hamonjy azy.

mercredi 9 novembre 2016

Alarobia 09 Novambra - Mat 10 : 40 - 42

40–Izay mandray anareo dia mandray Ahy; ary izay mandray Ahy dia mandray Ilay naniraka Ahy. 41Izay mandray mpaminanin*'Andriamanitra noho izy mpaminanin'Andriamanitra dia hahazo valisoana mpaminanin'Andriamanitra; ary izay mandray olo-marina noho izy olo-marina dia hahazo valisoan'olo-marina; 42ary lazaiko marina aminareo fa na iza na iza hanome rano mangatsiaka, na eran'ny kaopy ihany aza, hosotroin'ny anankiray amin'ireo mpianatro madinika ireo noho izy mpianatro, dia tsy ho diso valisoa.

mardi 8 novembre 2016

Talata 08 Novambra 2016 - Sal 133 : 1 - 3

1 Hira fiakarana. Nataon'i Davida.

Endrey, tsara sady mahafinaritra tokoa
izany firîndran'ny mpiray tampo miara-monina!
2Toy ny ilomanitra mby an-dohan'olona nasaina
ka mitsororoka hatreny amin'ny somotra.
Toy ny somotr'i Aharôna* mpisorombe
ka midina hatreny amin'ny vozon'akanjony.
3Toy ny ando avy any amin'ny tendrombohitra Hermôna
ka mirotsaka eo amin'ny tendrombohitra Tsiôna*;
satria eo Tsiôna no fanomezan'ny TOMPO fitahiana*,
dia ny fiaina-maharitra mandrakizay.

lundi 7 novembre 2016

Alatsinainy 07 Novambra 2016 - Lio 10 : 33 - 37

33Nisy kosa Samaritanina* nivahiny tonga teo amin'ity tra-boina ary onena tokoa nahita azy. 34Nohatonin'ilay Samaritanina izy ka nofeheziny ny feriny sady nandrarahany diloilo sy divay; avy eo dia natainginy teo amin'ny ampondrany ralehilahy ary nentiny tany an-tranombahiny ka nokarakarainy tao. 35Ny ampitson'iny, notolorany vola denàry* anankiroa ny tompon-trano sady nataony hoe: «Karakarao ity olona ity; ary na hoatrinona na hoatrinona laninao mihoatra noho ireto, dia honerako rehefa miverina aho.»

36Dia nanontanian'i Jesoa ity mpahay lalàna nataony hoe:
–Iza tamin'izy telo lahy ireo, araka ny hevitrao, no nanjary naman'ilay nasian'ny jiolahy?

37Dia novaliany hoe:
–Ilay niantra azy.

Dia hoy i Jesoa taminy:
–Ndeha àry, ka mba manaova torak'izany koa!

dimanche 6 novembre 2016

Alahady 06 Novambra 2016 - Heb 6 : 9 - 12

9Na izany aza no teninay, ry hava-malala, dia zavatra tsara kokoa sady miantoka ny famonjena anareo no antenainay, raha ny aminareo. 10Fa tsy manao ny tsy rariny Andriamanitra: tsy hohadinoiny akory ny asanareo sy ny fitiavanareo Azy nasehonareo tamin'ny nanompoanareo sady mbola anompoanareo ny kristianina havanareo. 11Ary dia irînay haneho fahazotoana toy izany hatramin'ny farany ianareo tsirairay avy, mba ho tanteraka tokoa ny zavatra antenainareo. 12Tsy tianay ho ketraka ianareo fa mba hanahaka ireo mino sy maharitra ka manana anjara amin'ny soa nampanantenain'Andriamanitra.

samedi 5 novembre 2016

Sabotsy 05 Novambra 2016 - I Tim 4 : 13 - 16

13Mandra-pahatongako, dia mahavara tsara mamaky ny Soratra Masina* sy mampirisika ary mampianatra. 14Aza atao tandrevaka ny fanomezam-pahasoavana ao anatinao, fanomezam-pahasoavana izay natolotra anao fony niteny taminao ny mpilaza hafatr'Andriamanitra ary nametra-tanana taminao ny loholona tafangona. 15Tontosay ireo adidy ireo ka imasoy tsara, mba hiharihary amin'ny olona rehetra ny fandrosoanao. 16Tandremo ny tenanao sy ny fampianaranao, ka mahareta amin'ireo adidy ireo; fa raha manao izany ianao, dia hamonjy ny tenanao sy izay mihaino anao.

vendredi 4 novembre 2016

Zoma 04 Novambra 2016 - Mal 3 : 7 - 12

 7Fa hatramin'ireo razana talohanareo no efa nialanareo tamin'ny didiko ka tsy nitandremanareo izany. Miverena amiko, dia hiverina aminareo koa ny tenako, hoy Izaho TOMPOn'izao rehetra izao. Nefa dia hoy ianareo hoe: ‹Ahoana no iverenanay aminao?› 8Dia hamaly anareo Aho hoe: ‹Azon'ny olona fitahina ve Andriamanitra no mamitaka Ahy ianareo?› Dia manontany indray ianareo hoe: ‹Amin'inona no amitahanay Anao?› Amin'ny fandrotsahana ny ampahafolon-karena sy amin'ny fanaovanareo fanatitra. 9Hiharan'ny ozona ianareo satria Izaho no fitahinareo, dia ianareo rehetra mpiray firenena. 10Ento manontolo àry ny ampahafolon-karena ho ao an-trano fitahirizana azy, mba tsy ho tapaka sakafo ao an-tempoliko*. Ary zahao toetra amin'izany ny tenako, hoy Izaho TOMPOn'izao rehetra izao, dia ho hitanareo fa hovohako ho anareo ny vavahadin-dranon'ny lanitra hampidinako fitahiam-be miavosa aminareo. 11Tsy havelako hanimba ny volinareo ny bibikely ka hahavanom-boa ny voalobokareo any an-tsaha, hoy Izaho TOMPOn'izao rehetra izao. 12Ary hataon'ny firenen-drehetra hoe sambatra ianareo, satria hahafinaritra hivelomana ny taninareo, hoy Izaho TOMPOn'izao rehetra izao.»

jeudi 3 novembre 2016

Alakamisy 03 Novambra 2016 - Sal 128 : 1 - 6

1 Hira fiakarana.

Sambatra izay rehetra manaja ny TOMPO
sy manaraka ny sori-dàlana nataony.
2Ny vokatry ny asanao tokoa no hivelomanao
ka sambatra sy ambinina ianao!
3Ny vadinao eo an-tranonao
dia toy ny voaloboka mahavokatra;
ny zanakao manodidina ny latabatrao
dia toy ny solofon'ôliva.
4Eny, toy izany no itahiana*
ny lehilahy manaja ny TOMPO!
5Hitahy anao avy ao Tsiôna* anie ny TOMPO,
ka amin'ny andro rehetra iainanao
no hahitanao ny hasambaran'i Jerosalema
6sy hahitanao ny zafikelinao!
Ny fiadanana anie
ho an'i Israely!

mercredi 2 novembre 2016

Alarobia 02 Novambra 2016 - Apo 14 : 12 - 13

12Amin'izany no ilana ny faharetana eo amin'ny vahoakan'Andriamanitra*, dia eo amin'izay mitandrina ny didin'Andriamanitra sy mitana ny finoana niainan'i Jesoa.

13Ary reko nisy feo avy tany an-danitra nanao hoe:
–Soraty izao: «Sambatra ireo maty, izay maty amin'ny fanompoana ny Tompo manomboka izao! Eny, hoy ny Fanahy Masina, aoka izy ireo hahazo fitoniana amin'ny fisasarany, fa ny asany manaraka azy.»

mardi 1 novembre 2016

Talata 01 Novambra 2016 - Sal 90 : 13 - 19

13TOMPO ô, mandra-pahoviana no mbola hitezeranao anay?
Mba itodiho izahay mpanomponao ka amindrao fo.
14Fenoy ny fitiavanao izahay raha vao maraina,
dia hihoby sy hifaly amin'ny andro sisa iainanay.
15Aoka hampifalînao izahay
araka ny andro nampahorînao anay
sy araka ny taona nahitanay loza!
16Ny ataonao aminay anie ho hitanay maso
ary ny voninahitrao ho tsapan'ny taranakay!
17Ry Tompo Andriamanitray ô,
aoka ho aminay ny fahamoram-panahinao
ka ampahombiazo ny asan'ny tananay;
eny, ampahombiazo ny asan'ny tananay.

lundi 31 octobre 2016

Alatsinainy 31 Oktobra 2016 - Apo 2 : 8 - 11

8«Izao no lazain'ilay Voalohany sady Farany, Izay efa maty nefa velona indray: 9Fantatro ny fahorianao sy ny fahantrànao, kanefa manankarena ianao. Fantatro ianao fa endrikendrehin'ireo milaza ny tenany ho Jiosy, kanjo tsiizy fa olona mivavaka amin'i Satàna*. 10Aza matahotra na inona na inona amin'izay fijaliana efa hanjo anao; indro ny devoly* efa hanao am-ponja ny sasany aminareo, mba ho voazaha toetra ianareo ary hiaritra fahoriana mandritra ny folo andro. Aoka ho mahatoky ambara-pahafaty ianao, dia ny fiainana no homeko anao ho satroboninahitra.

11«Izay manan-tsofina, aoka hihaino izay lazain'ny Fanahy Masina amin'ireo Fiangonana.
«Izay maharesy dia tsy hiharan-doza avy amin'ny fahafatesana faharoa.»

dimanche 30 octobre 2016

Alahady 30 Oktobra 2016 - I Sam 2 : 35 - 36

35Avy eo Aho dia hifidy mpisorona iray mahatoky ho Ahy, mpisorona izay hiasa araka ny sitrapoko; ary homeko taranaka izy mba ho mpisorona mifandimby tsy an-kijanona, eo anatrehan'ny mpanjaka voahosotro. 36Ary izay sisa amin'ny fianakavianao dia handohalika eo anatrehan'ny mpisorona mba hahazo vola kely sy tapa-mofo, ka hanao aminy hoe: ‹Mba miangavy re, tompoko, omeo izay asa azoko anampiana ny mpisorona aho, mba sitrany ahay mofokely hohaniko›.»

samedi 29 octobre 2016

Sabotsy 29 Oktobra 2016 - Lio 16 : 9 - 13

9Ka hoy Aho aminareo mpianatro: ampiasao ny haren'izao tontolo izao hananan-kavana handray anareo any amin'ny fonenana mandrakizay, rehefa tonga ilay andro hamoizana ireny harena ireny. 10Izay mahatoky amin'ny zava-madinika, dia mahatoky koa amin'ny zava-dehibe; ary izay tsy marina amin'ny zava-madinika, dia tsy marina koa amin'ny zava-dehibe. 11Raha tsy azo itokiana amin'ny haren'izao tontolo izao ianareo, iza no hametraka aminareo ny tena harena; 12ary raha tsy azo itokiana amin'izay tsy anareo ianareo, iza no hanome anareo ny fananana tena anareo?
13Tsy misy mpanompo mahay manompo tompo roa: satria na ny anankiray ho hàlany ary ny anankiray ho tiany, na ny anankiray hombany ary ny anankiray hohamavoiny. Tsy hainareo atao ny sady manompo an'Andriamanitra no manompo ny harena.

vendredi 28 octobre 2016

Zoma 20 Oktobra 2016 - Lio 17 : 7 - 10

7–Aoka hatao hoe misy aminareo manana mpanompo, mpiasa tany na mpiandry biby fiompy. Raha mody avy any an-tsaha ve ilay mpanompo, dia hilazana hoe: «Avia faingana hisakafo»? 8Tsia, fa izao no hatao aminy: «Anamboary sakafo aho; ary misikîna hampihinana ahy mandritra ny isakafoanako. Aorian'izany vao hisakafo ianao.» 9Ary ankasitrahina ve ilay mpanompo, rehefa vitany izay nasaina hataony? Tsia! 10Torak'izany koa ianareo, rehefa vitanareo izay rehetra nasain'Andriamanitra hatao, dia milazà hoe: «Mpanompo tsy mendrika sitraka izahay, fa izay nataonay dia adidinay rahateo!»

jeudi 27 octobre 2016

Alakamisy 27 Oktobra 2016 - II Tan 34 : 1 - 7

1Feno valo taona i Jôsià fony tonga mpanjaka; ary naharitra 31 taona no nanjakany tao Jerosalema. 2Nanao izay mahitsy eo imason'ny TOMPO i Jôsià; ka narahiny ny toetran'i Davida razambeny, fa tsy mba nivily hiala tamin'izany izy.
3Tamin'ny taona fahavalo nanjakàny, fony i Jôsià mbola zatovolahy, no nanombohany nitady an'ilay Andriamanitr'i Davida razambeny; ary efatra taona taorian'izany kosa no nanombohany nanadio ny fanjakàn'i Joda sy ny tanànan'i Jerosalema mba tsy hisy toeram-panasinana* na tsatokazo fanajana an'i Aserà*, ary tsy hisy sarin-tsampy voasokitra na mivongana intsony. 4Noravana teo anatrehan'i Jôsià ny alitara*n'ireo andriamanitra Bahala*; nazerany ny fandoroana vovo-javamanitra* teo amboniny; novakivakiny ny tsatokazo fanajana an'i Aserà mbamin'ireo sarin-tsampy voasokitra na mivongana; ary notorotoroiny ho lasan-ko vovoka izany rehetra izany ka nafafiny teny amin'ny fasan'ireo efa nanolotra sorona* tamin'ireny andriamani-tsiizy ireny. 5Nisy aza taolan'ny mpisorona* amin'ny sampy mihitsy no naroso hodorana teo amin'ny alitara fisoronany. Dia toy izany no nanadiovan*'i Jôsià ny fanjakàn'i Joda sy ny tanànan'i Jerosalema.

6Tany amin'ny tanàna manasita sy efraimita ary simehônita ka hatrany amin'ny tanàna naftalita mbamin'ny faritra manodidina azy avy 7dia noravan'i Jôsià koa ny alitara; nokapakapainy ny tsatokazo fanajana an'i Aserà ary ny sarin-tsampy voasokitra mba hotorotoroina ho lasan-ko vovoka. Nazerany ny fandoroana vovo-javamanitra eran'ny tanin'i Israely manontolo; izay vao niverina ho any Jerosalema izy.

mercredi 26 octobre 2016

Alarobia 26 Oktobra 2016 - Sal 141 : 1 - 4

1 Salamo nataon'i Davida.
TOMPO ô, miantso Anao aho: faingàna ho eto amiko.
Mba henoy ny feoko amin'ny fiantsoako Anao.
2Ny fivavahako anie hisandratra eo anoloanao
toy ny eton'ny vovo-javamanitra*!
Ny fanandratako tanana anie
ho toy ny fanatitra hariva!

3TOMPO ô, asio mpiambina ny vavako;
arovy ny varavaran'ny molotro.
4Aza avela hirona amin'ny zava-dratsy ny foko.
Aoka aho tsy hiaraka amin'ny mpanao heloka
na hivarilavo amin'ny fanao tsy mety
na hihinana ny hanim-pin'ireo koa!

mardi 25 octobre 2016

Talata 25 Oktobra 2016 - Tit 2 : 6 - 10

6Anaro toy izany koa ny lehilahy tanora mba hahafehy tena. 7Amin'ny zavatra rehetra dia aoka ny tenanao ho ohatra amin'ny asa tsara; aoka ny fampianaranao ho madio sy maotina: 8teny tsy misy tomika sady tsy azo kianina ampiasaina, mba ho menatra ny mpanohitra anao, noho izy tsy hanan-kitenenan-dratsy antsika.

9Anaro koa ny mpanompo mba hanaiky ny tompony, ka hanao izay sitraky ny tompony amin'ny zavatra rehetra: tsy hamalivaly azy, 10tsy hangalatra ny zavany, fa haneho toetra mahatoky tokoa, mba hahazo voninahitra amin'ny zavatra rehetra ny fampianarana momba ilay Andriamanitra Mpamonjy antsika.

lundi 24 octobre 2016

Alatsinainy 24 Oktobra 2016 - Lio 12 : 41 - 48

41Tamin'izay dia niteny i Petera nanao hoe:
–Izahay ihany ve no ilazanao izany fanoharana* izany sa ny olona rehetra koa?

42Ka hoy ny Tompo hoe:
–Iza moa no mpanompo mahatoky sy mato-tsaina notendren'ny tompony ho mpandraharaha hifehy ireo mpanompony sady hanome azy ireo ny anjara sakafony ara-potoana? 43Sambatra io mpanompo io raha tonga ny tompony ka mahatratra azy manao raharaha toy izany. 44Lazaiko marina aminareo fa hotendren'ny tompony hiadidy ny fananany rehetra izy. 45Raha tàhiny kosa io mpanompo io manao anakampo hoe: «Mbola ho ela vao tafaverina ny tompoko», ka mihetraketraka amin'ny mpanompo hafa na lahy na vavy sady manaram-po mihinana sy misotro ary mimamo, 46dia ho tonga ilay tompony amin'ny andro tsy ampoiziny sy amin'ny ora tsy fantany; hosazîny mafy tokoa io mpanompo io ary hataony miombona anjara amin'ny tsy mpino.

47Fa ny mpanompo mahalala tsara ny sitrapon'ny tompony, nefa tsy mivonon-kanao ary tsy manatontosa, dia hahazo kapoka be. 48Izay tsy mahalala kosa, nefa manao zavatra tokony hikapohana azy, dia hahazo kapoka kely. Izay nomena be no hitakiana be; ary izy nanankinana be no hadinina bebe kokoa.

dimanche 23 octobre 2016

Alahady 23 Oktobra 2016 - Lio 7 : 1 - 10

1Rehefa avy nampandre ny vahoaka izany teniny rehetra izany i Jesoa, dia niverina tany Kafarnahòma. 2Nisy kosa kapitenin-tafika nanana mpiasa narary efa ho faty, mpiasa sarobidy aminy tokoa. 3Vao nahaheno ny amin'i Jesoa ilay kapiteny, dia naniraka loholona* jiosy hankany aminy hangataka Azy ho avy hanasitrana ilay mpiasa. 4Rehefa tonga teo amin'i Jesoa ireto iraka, dia niangavy Azy mafy hoe:
–Mendrika hanaovana izany io kapiteny io fa tia ny firenentsika, 5ary izy mihitsy aza no nanorina ny sinagôgantsika.

6Dia niara-nandeha tamin'ireo loholona i Jesoa. Ary rehefa mby akaikin'ny trano Izy, dia nanirahan'ilay kapiteny olona mahatoky indray hilaza aminy hoe:
–Aza misahirana toy izao re, Tompoko, fa tsy mendrika handrosoanao an-trano aho; 7ary izany no anton'ny tsy nisehoako vatana taminao; fa teny fotsiny re atao, dia ho sitrana anie ny mpiasako. 8Izaho manko, na ambany fahefàn'olona aza, mba mifehy miaramila ihany: ka raha misy ataoko hoe «Mandehana», dia mandeha izy; na misy antsoiko hoe «Avia», dia avy izy; ary raha ny mpiasako no ilazako hoe «Ataovy izao», dia manao izy.

9Gaga tamin'ilay kapiteny i Jesoa raha nandre izany, ary dia nitodika tamin'ny vahoaka nanaraka Azy ka nanao hoe:
–Lazaiko aminareo fa tsy mbola nahita finoana toy izany Aho, na dia tamin'i Israely* aza!
10Nony tafaverina tany an-tranon'ilay kapiteny ireto iraka, dia nahita ilay mpiasa salama soa aman-tsara.

samedi 22 octobre 2016

Sabotsy 22 Oktobra 2016 - II Kor 1 : 8 - 20

8Tianay, ry havako, ny hahalalanareo ny fahoriana nanjo anay tany amin'ny faritany Azia; nitambesatra loatra taminay izany ary tafahoatra ny zakanay, ka tsy nanantena intsony izay hoe mbola ho velona izahay. 9Tsapanay tao amin'ny tenanay fa voaheloka ho faty izahay, mba tsy hitokianay amin'ny tenanay, fa hitokianay amin'Andriamanitra Izay manangana ho velona ny efa maty. 10Izy no nanafaka anay tamin'ny fahafatesana nananontanona anay, ary dia mbola hanafaka any hatrany; eny, Izy no antenainay fa hanafaka hatrany, 11satria ianareo koa hanampy anay amin'ny fivavahana ataonareo ho anay. Dia ho maro ny olona hisaotra an'Andriamanitra ny aminay satria maro no nangataka mba hahazoanay izany fitahiana izany.

12Izao manko no ireharehanay: ny fieritreretanay dia vavolombelona manambara fa ny fomba nitondranay tena teto amin'izao tontolo izao, indrindra teo aminareo, dia tamin'ny fahatsorana sy hitsimpo nomen'Andriamanitra; satria ny fahasoavan'Andriamanitra no nitarika anay fa tsy ny fahendren'olombelona. 13-14Ka izay soratanay amin'ny taratasinay dia izay vakînareo sy azonareo tsara. Ary manantena aho fa araka ny efa fantapantatrareo ihany ankehitriny, dia ho fantatrareo tanteraka izao zavatra izao: amin'ny andro hiavian'i Jesoa Tompo, dia ho reharehanareo izahay toy ny maha reharehanay anareo.

15Natoky izany tokoa aho, ka dia nikasa ho atỳ aminareo tam-boalohany mba hahazoanareo soa indroa miantoana. 16Nokasaiko ny hihazo atỳ aminareo amin'ny diako hankany Masedônia, ary dia mbola hamangy anareo indray aho rehefa avy any; ka ho nanampy ahy koa ianareo hanohizako dia hankany Jodea. 17Moa nanao kitoatoa ve aho raha nikasa izany? Araka ny maha olombelona fotsiny ve no nikasako izany ka hahazoako hiroa teny, sady hanao «eny» no hanao «tsia»? 18Raha mahatoky koa Andriamanitra, dia tsy mandray roa ny teninay taminareo ka sady ho «eny» no ho «tsia». 19Satria i Jesoa Kristy*, ilay Zanak'Andriamanitra*, Izay notorînay sy i Silasy ary i Timôty teo aminareo, dia tsy hoe sady «eny» no «tsia»; fa i Jesoa Kristy dia «eny» hatrany hatrany: 20koa Izy no ilay «eny» mahatò ny fampanantenana rehetra nataon'Andriamanitra. Izany koa no anton'ny anononantsika ny «Amen*» amin'ny alalan'i Jesoa Kristy ho voninahitr'Andriamanitra.

vendredi 21 octobre 2016

Zoma 21 Oktobra 2016 - I Kor 4 : 14 - 20

14Tsy ny hanome henatra anareo no anoratako izany, fa ny hananatra anareo, araka ny maha zanaka malalako anareo. 15Na dia miisa iray alina aza ny mpanabe anareo amin'izao maha kristianina anareo izao, dia tsy maro ray tsy akory ianareo: izaho no rainareo ka nahatonga anareo ho tafaray amin'i Kristy Jesoa tamin'ny alalan'ny Vaovao Mahafaly*. 16Koa miangavy anareo aho: manahafa ahy. 17Noho izany, dia alefako atỳ aminareo i Timôty, zanaka malalako sady mahatoky amin'ny fanompoana ny Tompo. Izy no hampahatsiaro anareo ireo lalana nodiaviko nahatafaray ahy amin'i Kristy Jesoa, araka izay ampianariko amin'ny Fiangonana rehetra hatraiza hatraiza.

18Nisy manko taminareo nirehareha hoatra ny tsy ho tonga hitsidika anareo iny aho. 19Kanefa ho avy faingana hitsidika anareo aho, raha sitrapon'ny Tompo; ary tsy izay tenin'ireo mpirehareha no hofantariko fa izay zavatra vitany. 20Ny Fanjakàn'Andriamanitra* dia tsy teny foana fa hery mahavita zavatra. 21Ka asa izay tianareo: ho avy hitsidika anareo aho, ka tsorakazo ve no hoentiko sa fo feno fitiavana sy fahalemem-panahy?

jeudi 20 octobre 2016

Alakamisy 20 Oktobra 2016 - Lio 17 : 7 - 10

7–Aoka hatao hoe misy aminareo manana mpanompo, mpiasa tany na mpiandry biby fiompy. Raha mody avy any an-tsaha ve ilay mpanompo, dia hilazana hoe: «Avia faingana hisakafo»? 8Tsia, fa izao no hatao aminy: «Anamboary sakafo aho; ary misikîna hampihinana ahy mandritra ny isakafoanako. Aorian'izany vao hisakafo ianao.» 9Ary ankasitrahina ve ilay mpanompo, rehefa vitany izay nasaina hataony? Tsia! 10Torak'izany koa ianareo, rehefa vitanareo izay rehetra nasain'Andriamanitra hatao, dia milazà hoe: «Mpanompo tsy mendrika sitraka izahay, fa izay nataonay dia adidinay rahateo!»

mercredi 19 octobre 2016

Alarobia 19 Oktobra 2016 - II Tim 2 : 1 - 7

1Koa ianao, anaka, dia aoka hihahery amin'ny alalan'ny fahasoavana ananantsika tafaray amin'i Kristy Jesoa. 2Ireo zavatra efa renao tamiko teo anatrehan'ny vavolombelona maro dia ankino amin'ny olona mahatoky, izay afaka mampianatra ny sasany koa.

3Aoka hiaritra fijaliana miaraka amiko ianao, toy ny miaramila tsaran'i Kristy Jesoa. 4Ny miaramila miantafika dia tsy maningo-tena amin'ny raharaha fanaom-bahoaka, raha te hankasitrahin'izay mandatsaka azy hiantafika. 5Ny mpanao fanatanjahan-tena dia tsy mahazo satroboninahi-pandresena raha tsy manezaka araka ny fitsipika. 6Ny mpamboly izay misasatra no tokony ho voalohany mandray izay anjarany amin'ny vokatra. 7Saino izay lazaiko, fa homen'ny Tompo fahazavan-tsaina momba ny zavatra rehetra ianao.

mardi 18 octobre 2016

Talata 18 Oktobra 2016 - Eks 39 : 32 - 43

32Vita ny asa rehetra momba ny fonena-masina na Tranolay fihaonana*. Araka izay rehetra nandidian'ny TOMPO an'i Mosesy no nanatanterahan'ny Israelita izany.
33Nentin'ny Israelita tany amin'i Mosesy avokoa ny zavatra momba ny fonena-masina, dia:
–ny tranolay sy ny fitaovana rehetra miaraka aminy toy ny farango, ny hazo fisaka, ny barany, ny andry ary ny faladiany;
34–ny sarona vita amin'ny hoditr'ondry miloko mena, ny sarona vita amin'ny hoditra mafy sy ny efitra lamba fanasarahana;
35–ny Vatamasina misy ny raki-tsoratry ny fanekempihavanana*, miaraka amin'ny baony sy ny sarony;
36–ny latabatra voatokana sy ny baony ary ny fitaovana rehetra miaraka aminy mbamin'ny mofo fanolotra ho an'Andriamanitra;
37–ny fitoeran-jiro miaraka amin'ireo jirony sy ny fitaovana rehetra miaraka aminy, ary ny solika fandrehitra;
38–ny alitara* volamena, ny ilomasina fanokanana, ny vovo-javamanitra hodorana;
–ny varavarana lamba eo amin'ny fidirana amin'ny tranolay;
39–ny alitara halimo sy ny makarakarany halimo, ny baony sy ny fitaovana rehetra miaraka aminy;
–ny kovetabe fidiovana sy ny faladiany;
40–ny temitry ny kianja miaraka amin'ny andriny sy ny faladiany, ny varavarana lamba eo amin'ny vavahadin'ny kianja, miaraka amin'ny tadiny sy ny tsîmatra;
–ny fitaovana rehetra fampiasa amin'ny raharaha ao amin'ny fonena-masina na hoe Tranolay fihaonana;
41–ny lamba fandrakofana ny fanaka ao amin'ny Toeramasina ary ny fanamiana voatokana hiakanjoan'i Aharôna sy ny zanany lahy eo am-panaovana ny raharahany.

42Notanterahin'ny Israelita ny asa rehetra araka izay efa nandidian'ny TOMPO an'i Mosesy. 43Koa rehefa hitan'i Mosesy fa vita araka izay nandidian'ny TOMPO avokoa ny zavatra rehetra, dia nitsodrano* ny Israelita izy.

lundi 17 octobre 2016

Alatsinainy 17 Oktobra 2016 - I Tim 1 : 12 - 17

12Velom-pisaorana an'i Kristy* Jesoa Tompontsika aho, fa nomeny hery hahatontosako ny fanompoako. Velom-pisaorana Azy aho fa nataony mahatoky ka notendreny hanompo Azy, 13na dia nanevateva Azy aza taloha sady nanenjika sy nampahory Azy mafy. Kanefa namindran'Andriamanitra fo aho satria tsy mbola nanam-pinoana ka tsy nahalala izay nataoko. 14Naidin'ny Tompontsika be dia be tamiko ny fahasoavany, mbamin'ny finoana sy ny fitiavana ananantsika tafaray amin'i Kristy Jesoa. 15Azo antoka izao teny izao ka mendrika hankatoavin'ny olona rehetra: Tonga tetỳ an-tany i Kristy Jesoa mba hamonjy ny mpanota; ary izaho no faraidiny amin'ireny. 16Kanefa izao no anton'ny namindran'Andriamanitra fo tamiko: tiany hasehon'i Kristy Jesoa ao amiko mpanota faraidiny ny fahari-pony rehetra mba ho ohatra ho an'izay hino Azy ka handray ny fiaina-maharitra mandrakizay. 17Ho an'ilay Mpanjaka mandrakizay, dia Andriamanitra tokana, tsy mety maty sady tsy hita maso, ho Azy anie ny haja sy ny voninahitra mandrakizay mandrakizay! Amen*.

vendredi 14 octobre 2016

Zoma 14 Oktobra 2016 - I Kor 4 : 1 - 5

1Aoka izahay hoheverina ho mpanompon'i Kristy sy ho mpitantana ireo tsiambaratelo momba an'Andriamanitra. 2Ny hany takîna amin'ny mpitantana dia ny ho hita fa olona mahatoky. 3Raha izaho dia tsy mampaninona ahy velively na hotsarainareo, na handia fitsaran'olombelona; fa na ny mitsara ny tenako aza tsy ataoko. 4Tsy manome tsiny ahy velively ny eritreritro, nefa tsy mahamarina ahy izany fa ny Tompo no mpitsara ahy. 5Noho izany, aza mitsara olona alohan'ny fotoana, dia mandra-piavin'ny Tompo: Izy no hampiharihary ireo zavatra afenina anatin'ny maizina sy hampiseho ireo hevitry ny fon'ny olombelona. Ka amin'izay dia samy homen'Andriamanitra ny dera tandrify azy avy ny tsirairay.

jeudi 13 octobre 2016

Alakamisy 13 Oktobra 2016 - Mat 25 : 14 - 30

14Ny Fanjakàn'ny lanitra* dia tahaka ny amin'ny lehilahy handeha any an-tany hafa, ka niantso ny mpanompony ary nametraka ny fananany taminy. 15Koa ny anankiray dia nomeny denàry* 30 000, ny anankiray denàry 12 000 ary ny anankiray denàry 6 000, samy araka izay fahaizany avy. Dia lasa ralehilahy tompom-pananana nandeha any an-tany hafa. 16Avy hatrany ilay nandray denàry 30 000 dia nampiasa izany ka nahazo tombony denàry 30 000. 17Toy izany koa no nataon'ilay nandray ny denàry 12 000 ka nahazo tombony denàry 12 000. 18Fa ilay nandray denàry 6 000 kosa dia lasa nihady tany ka nandevina ny volan'ny tompony.

19Nony ela, dia niverina ny tompon'ireo mpanompo ireo ka nampamoaka azy telo lahy ny amin'ny petra-bolany. 20Dia nanatona ilay nandray denàry 30 000 ka nanolotra denàry 30 000 hafa koa sady nilaza hoe: «Denàry 30 000, tompoko, no napetrakao tamiko; indro fa nahazo denàry 30 000 hafa tombony aho.» 21Dia hoy ny tompony taminy: «Mahafinaritra izany, ry mpanompo tsara sy mahatoky! Nahatoky tamin'ny zava-madinika ianao ka dia tendreko hiandraikitra zava-dehibe; avia hiombon-kafaliana amiko tomponao!» 22Dia nanatona koa ilay nandray denàry 12 000 ary nilaza hoe: «Denàry 12 000, tompoko, no napetrakao tamiko; indro fa nahazo denàry 12 000 hafa tombony aho.» 23Dia hoy ny tompony taminy: «Mahafinaritra izany, ry mpanompo tsara sy mahatoky! Nahatoky tamin'ny zava-madinika ianao, ka dia tendreko hiandraikitra zava-dehibe; avia hiombon-kafaliana amiko tomponao!» 24Dia nanatona kosa ilay nandray denàry 6 000 ary nilaza hoe: «Fantatro, tompoko, fa lehilahy mila voatsiary ianao, ka mijinja amin'izay tsy namafazanao ary manangona amin'izay tsy nanelezanao. 25Dia natahotra aho ka lasa nandevina ny volanao tao anaty tany; koa indro fa averiko aminao ny fanananao.» 26Dia hoy ny tompony taminy: «Mpanompo ratsy sady kamo raha ianao! Fantatrao fa mijinja amin'izay tsy namafazako aho ary manangona amin'izay tsy nanelezako. 27Noho izany, tokony ho napetrakao tany amin'ny banky ny volako ary ho noraisiko mbamin'ny zana-bola ny fananako rehefa tafaverina aho. 28Koa alao ny denàry 6 000 eny aminy, dia omeo an'ilay manana denàry 60 000. 29Eny, izay rehetra manana no homena hatrany ary hanam-be; fa izay tsy manana kosa, na izay kely ananany aza dia halàna aminy. 30Ary io mpanompo tsy misy ilana azy io, roahy any amin'ny haizina any ivelany; ka any izy no hitomany sy hikitro-nify.»

mercredi 12 octobre 2016

Alarobia 12 Oktobra 2016 - Efe 6 : 14 - 22

14Koa mamahara tsara hatrany ianareo: ny marina no ataovy toy ny etra fehikibonareo; ny rariny no tafio ho toy ny fiarovan-tratra; 15ny fahavononan-kitory ny Vaovao Mahafaly* mampihavana no ataovy toy ny kiraro eny an-tongotrareo; 16tano lalandava ny finoana ho toy ny ampinga hahazoanareo mamono ny zanatsipîka mirehitra rehetra alefan'ilay Ratsy*; 17raiso ny famonjena ho toy ny fiarovan-doha, ary raiso ny tenin'Andriamanitra ho toy ny sabatra omen'ny Fanahy Masina. 18Mivavaha hatrany ary mangataha ny fanampian'Andriamanitra amin'izany; eny, mivavaha mandrakariva araka izay anentanan'ny Fanahy Masina anareo. Miambena sy mazotoa hatrany mba hahatongavana amin'io tanjona io, ary dia mivavaha ho an'ny vahoakan'Andriamanitra* rehetra. 19Mivavaha ho ahy koa mba homen'Andriamanitra ny teny hotononiko rehefa hiloa-bava aho, ka dia ho sahy hampahafantatra ny tsiambaratelo raketin'ny Vaovao Mahafaly. 20Iraka mitondra izany Vaovao Mahafaly izany aho, na dia migadra aza ankehitriny; koa mivavaha ho ahy mba hilazako izany amim-pahasahiana, araka ny tokony hoteneniko.

21I Tisiko, hava-malalantsika sady mpanompo mahatoky eo amin'ny asan'ny Tompo, dia hampahafantatra anareo ny vaovao rehetra, mba hahalalanareo ny mahazo ahy sy izay ataoko. 22Izany indrindra no andefasako azy ho atỳ aminareo, mba hahafantaranareo ny momba anay sy hampahery fo anareo.

mardi 11 octobre 2016

Talata 11 Oktobra 2016 - Oha 31 : 10 - 31

ALEFA
                10Iza no mahita vehivavy mahavatra?
                Fa ny hasarobidiny dia mihoatra noho ny perla.
BETA
                11Matoky azy tanteraka ny vadiny,
                satria tsy mandanilany fananana izy.
GIMELA
                12Tsy manao ratsy aminy ravehivavy
                fa manao izay hahasambatra azy kosa
                mandritra ny andro rehetra iainany.
DALETA
                13Mitady volon'ondry sy kiran-drongony izy
                ary miasa araka ny fahakingan'ny tanany.
HE
                14Tahaka ny sambon'ny mpandranto izy
                ka mitondra ny haniny avy lavitra.
VAO
                15Mifoha mbola maizina izy,
                ka mikarakara ny sakafon'ny ankohonany
                sy mitsinjara ny asan'ny mpanompovaviny.
ZAINA
                16Mandinika tsara izy vao mividy saha
                ary mamboly voaloboka amin'ny tombontsoa azony.
PETA
                17Misikina herimpo izy
                fa tsy mba miraviravy tanana.
TETA
                18Tsapany ny fandrosoan'ny raharahany
                ka tsy maty jiro mandritra ny alina izy.
JODA
                19Miasa mamoly volon'ondry ny tanany
                ary manenona lamba ny rantsan-tanany.
KAFA
                20Manatsotra ny tanany amin'ny ory izy
                ary malala-tanana amin'ny mahantra.
LAMEDA
                21Tsy ahiany amin'izay oram-panala ny ankohonany,
                fa voatafy mafana avokoa ny ao an-tranony.
MEMA
                22Manao firakotra ho an'ny tenany izy;
                ny fitafiany dia rongony fotsy sy volomparasy.
NONA
                23Hajaina ny vadiny rehefa mivory eo am-bavahady
                ka miara-midinika amin'ireo loholon'ny tanàna.
SAMEKA
                24Manao akanjo izy ka mivarotra izany;
                mandafo fehikibo amin'ny mpandranto koa izy.
HAINA
                25Hery sy haja no iravahany;
                ary tsy mahataitra azy ny hoavy.
PE
                26Miteny amim-pahendrena izy
                ary manoro hevitra amim-pitiavana.
TSADE
                27Manara-maso izay fizotry ny ankohonany izy
                ka tsy malaina manomana ny sakafo hohaniny.
KÔFA
                28Ny zanany miara-miantso azy hoe sambatra,
                ary ny vadiny midera azy manao hoe:
RESA
                29«Maro ny vehivavy miseho ho mahavatra,
                fa manoatra noho izy rehetra ianao.»
SINA
                30Mamitaka ny bika ary mandalo ny hatsaran-tarehy;
                fa ny vehivavy manaja ny TOMPO ihany no hoderaina.
TAO
                31Hanomezam-pankasitrahana azy anie ny tombontsoa azony
                ary hideran'ny besinimaro azy anie ny zava-bitany!

lundi 10 octobre 2016

Alatsinainy 10 Oktobra 2016 - Rom 2 : 1 - 11

1Noho izany, dia tsy afa-tsiny ianao, ry olona izay manameloka ny hafa, na iza na iza ianao. Eo am-panamelohana ny hafa no anamelohanao ny tenanao, satria izay ataon'ireo melohinao, ataon'ny tenanao koa. 2Fantatsika fa araka ny hitsiny tokoa ny didim-pitsarana navoakan'Andriamanitra ho an'ireo izay manao ny asa toy ireny. 3Sa ianao, ry olona izay manameloka ny manao toy ireny, mihevitra ho afa-mandositra ny didim-pitsarana navoakan'Andriamanitra nefa anie ianao koa mba manao? 4Sa be hamoram-po sy fandeferana ary faharetana Andriamanitra ka tsiratsirainao? Tsy fantatrao angaha fa ny hamoràm-pony dia tokony hitarika anao hiala amin'ny toe-dratsy? 5Maditra ianao ary tsy mety mamerina ny fonao aminy, ka dia fahatezeran'Andriamanitra* no avosanao ho an'ny tenanao. Fa ho avy ny andro hampisehoan'Andriamanitra ny fahatezerany sy hitsarany an-karihary ny olombelona ara-drariny, 6ka hamaliany ny tsirairay araka ny asany avy: 7homeny fiaina-maharitra mandrakizay ireo mitozo manao ny tsara ka mikatsaka ny voninahitra sy ny laza ary ny tsy fahafatesana; 8hiharan'ny fahatezeran'Andriamanitra sy havinirany* kosa ireo mpikomy tsy nanaiky hanao izay hitsiny fa nanaiky hanao ny tsy rariny. 9Eny, fahoriana sy tebiteby no hahazo ny olona rehetra fatra-panao ny ratsy, dia ny Jiosy aloha vao ny hafa firenena*. 10Voninahitra sy laza ary fiadanana kosa no ho anjaran'izay rehetra manao ny tsara, dia ny Jiosy aloha vao ny hafa firenena. 11Fa tsy mba mizaha tavan'olona Andriamanitra.

dimanche 9 octobre 2016

Alahady 09 Oktobra 2016 - Mat 24 : 45 - 51

45–Iza moa no mpanompo mahatoky sy mato-tsaina notendren'ny tompony ho mpandraharaha hifehy ireo mpanompony sady hanome azy ny anjara sakafony ara-potoana? 46Sambatra io mpanompo io raha tonga ny tompony ka mahita azy manao raharaha toy izany. 47Lazaiko marina aminareo fa hotendren'ny tompony hiadidy ny fananany rehetra izy. 48Raha ho ratsy fanahy kosa io mpanompo io ka hanao anakampo hoe: «Mbola haharitra ela ny tompoko», 49ary hihetraketraka amin'ireo mpanompo namany sady hanaram-po hihinana sy hisotro miaraka amin'ny mpimamo, 50dia ho tonga ilay tompony amin'ny andro tsy ampoiziny sy amin'ny ora tsy fantany. 51Hosazîny mafy tokoa io mpanompo io ary hataony miombona anjara amin'ny mpihatsaravelatsihy; any izy no hitomany sy hikitro-nify.

samedi 8 octobre 2016

Sabotsy 08 Oktobra 2016 - II Sam 22 : 47 - 51

47Velona ny TOMPO! Isaorana ilay Vatolampiko.
Hasandratra anie Andriamanitra
vatolampy mampandresy ahy.
48Izy no manao ny famaliana ho ahy
ary mampanaiky firenena hofeheziko.
49TOMPO ô, afahanao amin'ny fahavaloko aho;
eny, ataonao resiko ireo mpamely ahy
ary tsy mahazo ahy ny mpanao an-keriny.
50Koa eo anivom-pirenena no hiderako Anao
sady hankalazako Anao amin-kira.
51Ny TOMPO manome fandresena lehibe
ho an'ilay mpanjaka voafidiny;
ary maneho fitia an'ilay voahosony,
dia i Davida sy ireo taranany
hatrany amin'ny mandrakizay.

vendredi 7 octobre 2016

Zoma 07 Oktobra 2016 - Kol 4 : 7 - 18

7I Tisiko hava-malalantsika, mpandraharaha mahatoky sady namana mpiray fanompoana amiko eo amin'ny asan'ny Tompo, dia hampahafantatra anareo ny vaovao rehetra momba ahy. 8Izany indrindra no nandefasako azy atỳ aminareo, mba hahafantaranareo ny momba anay sy hampahery fo anareo. 9Miaraka aminy koa i Ônesimo, ilay hava-malala sy mahatoky avy atỳ aminareo; ka dia izy roa lahy no hampahafantatra anareo ny toe-javatra rehetra atỳ aminay.

10Manao veloma anareo i Aristarka izay miara-voafonja amiko. Manao veloma anareo i Marka (zanak'olo-mpiray tampo izy sy i Barnabà); efa nahazo hafatrafatra momba an'i Marka ianareo, ka raiso tsara izy raha tonga atỳ aminareo. 11Manao veloma anareo koa i Jesoa, ilay atao hoe Josta. Izy telo lahy ireo no Jiosy tonga kristianina izay miara-miasa amiko hampandroso ny Fanjakàn'Andriamanitra*, ka nanjary fampaherezana ho ahy tokoa.

12Manao veloma anareo i Epafrà, izay avy atỳ aminareo; io mpanompon'i Kristy* Jesoa io dia mikely aina mandrakariva mivavaka ho anareo, mba hijoroanareo ho olona matotra ary vonona tanteraka hanao izay rehetra sitrak'Andriamanitra. 13Vavolombelona aho ny aminy fa misahirana fatratra izy ho anareo sy ho an-dry zareo any Laôdisia ary ho an-dry zareo any Hierapôly. 14Manao veloma anareo i Lioka, ilay dokotera hava-malalantsika, sy i Demasy.

15Veloma any amin'ireo havana any Laôdisia; ary veloma any amin'i Nimfà sy ny Fiangonana mivory ao an-tranony. 16Rehefa voavaky eto aminareo ity taratasy ity, dia ataovy izay hamakiana azy koa any amin'ny Fiangonan'i Laôdisia; ary dia mba vakionareo kosa ilay taratasy avy any Laôdisia. 17Lazao amin'i Arkipo fa tsy maintsy hotontosainy tsara ny fandraharahana noraisiny ho fanompoana ny Tompo. 18Soratanako ireto teny ireto: veloma, hoy i Paoly. Tsarovy fa voafonja aho.

Homba anareo anie ny fahasoavan'Andriamanitra!

jeudi 6 octobre 2016

Alakamisy 06 Oktobra 2016 - 3 Jao : 1 - 4

1Avy amiko loholona ity taratasy ity. Mamangy anao aho, ry Gaio, hava-malala izay tiako marina tokoa.

2Mangataka amin'Andriamanitra aho, rahavako, mba hambinina amin'ny zavatra rehetra ianao ary mba ho salama tsara, tahaka izay anambinana anao ara-panahy. 3Faly tokoa aho, fony nisy havana iray finoana tonga ka nijoro ho vavolombelona nanambara tamiko fa mifikitra amin'ny hafatra marim-pototra ianao, araka ny efa iainanao an'izany. 4Tsy misy mahafaly ahy mihoatra noho ny andrenesako fa miaina ny hafatra marim-pototra ireo zanako.

mercredi 5 octobre 2016

Alarobia 05 Oktobra 2016 - Neh 3 : 1 - 3

1Dia nanomboka asa i Eliasiba mpisorombe mbamin'ireo mpisorona namany, ka niara-namboatra ny vavahadin'ny Ondry; dia nanamasina izany ry zareo, vao nandatsaka ny lela-vavahadiny. Ary nohamasininy koa ny manda hatrany amin'ny tilikambon'ny Zatolahy sy ny tilikambo Hananela. 2Teo an-kilan'ireo, ny mponin'i Jerikao no namboatra ny manda, ary nanarakaraka ireto indray i Zakora zanakalahin'i Imry. 3Ny vavahadin'ny Trondro dia namboarin'ny terak'i Senaà: napetany ny sakamandimby, ary nalatsany ny lela-vavahady mbamin'ny hidiny sy barany.

mardi 4 octobre 2016

Talata 04 Oktobra 2016 - Lio 12 : 35 - 40

35–Aoka ho vonona lalandava ka ny lambanareo sikino ary ny jironareo areheto. 36Manaova toy ny mpanompo miandry izay hiverenan'ny tompony avy any amin'ny fanasana; raha vao tonga sy mandondòna izy, dia vohain'ny mpanompony miaraka amin'izay. 37Sambatra ireo mpanompo hitan'ny tompony miari-tory raha tonga izy. Lazaiko marina aminareo fa hisikina lamba ny tompony ka hampipetraka azy hihinana ary handroso sakafo ho azy. 38Na misasakalina na maneno akoho no ahatongavan'ny tompony ka mahita ireo mpanompo miari-tory toy izany, dia sambatra ireo mpanompo ireo! 39Izao no ataovy an-tsaina: raha fantatry ny tompon-trano ny ora iavian'ny mpangalatra, dia tsy havelany hotamîna ny tranony! 40Ianareo koa, aoka ho vonona hatrany, fa ho avy amin'ny ora tsy ampoizinareo ny Zanak'olona*.

lundi 3 octobre 2016

Alatsinainy 03 Oktobra 2016 - Kol 1 : 1 - 8

1Avy amiko Paoly ity taratasy ity, dia izaho apôstôlin'i Kristy* Jesoa noho ny sitrapon'Andriamanitra.
Mamangy anareo atỳ Kôlôsy aho, dia ianareo vahoakan'Andriamanitra* sady havana mpino tafaray amin'i Kristy. Mamangy anareo koa i Timôty havantsika. 2Ho aminareo anie ny fahasoavana sy ny fiadanana avy amin'Andriamanitra Raintsika!

3Velom-pisaorana mandrakariva an'Andriamanitra Rain'i Jesoa Kristy* Tompontsika izahay, rehefa mivavaka ho anareo. 4Eny, velom-pisaorana an'Andriamanitra izahay satria renay laza ny finoanareo an'i Kristy Jesoa sy ny fitiavanareo ny vahoakan'Andriamanitra* rehetra. 5Mby teo aminareo ny Vaovao Mahafaly*, ary ny hafatra marina raketiny no nandrenesanareo ny zavatra antenaina izay voatahiry ho anareo any an-danitra. Ka ny finoanareo sy ny fitiavanareo dia vokatr'izany fanantenana izany. 6Ny Vaovao Mahafaly dia mitondra vokatra sy mitombo eran'izao tontolo izao koa, tahaka ny teo aminareo hatramin'ny andro nandrenesanareo sy nahalalanareo tsara ny fahasoavan'Andriamanitra araka ny marina. 7I Epafrà, hava-malala mpiray fanompoana aminay, no nampianatra anareo momba izany; mpanompo mahatokin'i Kristy izy ho fanasoavana anareo, 8ary dia nampahafantatra anay ny fitiavana izay nomen'ny Fanahy Masina anareo.

dimanche 2 octobre 2016

Alahady 02 Oktobra 2016 - Sal 1 : 1 - 6

1Sambatra ny olona
tsy manaraka ny hevitry ny ratsy fanahy,
na mijanona eo amin'ny lalan'ny mpanota,
na miray toerana amin'ny mpaniratsira!
2Fa ny fampianaran'ny TOMPO no sitrany,
ka dia saintsaininy andro aman'alina.
3Toy ny hazo nambolena eo amoron-drenirano izy,
izay mamoa ara-potoana sady tsy malazo ravina,
ka dia mahomby avokoa
ny asa rehetra ataony.
4Tsy mba toy izany ireo olon-dratsy,
fa tahaka ny akofa aelin-drivotra.
5Noho izany, dia ho voaheloka
eo amin'ny fitsarana ireo;
ary tsy hisy toerana ho azy akory
eo amin'ny fivorian'ny olo-marina.
6Tsimbinin'ny TOMPO tokoa ny fiainan'ny olo-marina,
fa ny an'ny olon-dratsy kosa mankamin'ny fahaverezana.

samedi 1 octobre 2016

Sabotsy 01 Oktobra 2016 - I Sam 22 : 9 - 27

9Dia hoy i Dôega, ilay Edômita izay nijoro teo akaikin'ireo mpanompon'i Saoly, hoe:
–Izaho nahita ny zanakalahin'i Jisay tonga tany Nôba tao amin'i Ahimelèka zanakalahin'i Ahitoba. 10Ary i Ahimelèka nanontany ny TOMPO ho azy, sady namatsy azy no nanome azy ilay sabatr'i Gôliata Filistinina.

11Koa nampiantsoan'ny mpanjaka i Ahimelèka mpisorona sady zanakalahin'i Ahitoba, mbamin'ny mpisorona rehetra tao amin'ny fianakaviany izay nipetraka tao Nôba; ary tonga niseho teo anatrehan'ny mpanjaka avokoa izy rehetra. 12Dia hoy i Saoly tamin'i Ahimelèka:
–Henoy àry, ry zanakalahin'i Ahitoba.

Ka novaliany hoe:
–Inty aho, tompoko.

13Dia hoy i Saoly taminy:
–Nahoana no nioko hanohitra ahy ianao sy ny zanakalahin'i Jisay. Nomenao mofo sy sabatra izy; ary nanontany ny Tompo ho azy koa ianao, mba hijoroany hanohitra sy hamandrika ahy tahaka izao anio izao.

14Hoy kosa no navalin'i Ahimelèka azy:
–Iza amin'ny mpanomponao rehetra ireo no mba mahatoky indrindra tahaka an'i Davida vinanton'ny mpanjaka, mpiambina ny tenanao ary nohajaina fatratra tao an-dapa? 15Ary moa sambany androany no nanontaniako ho azy tamin'Andriamanitra? Koa sanatriaviko ny hikomy aminao, ry mpanjaka! Aza ahiahînao aho mpanomponao na ny fianakaviako fa tsy mahalala na inona na inona momba izany rehetra izany aho.

16Fa hoy ny mpanjaka hoe:
–Ry Ahimelèka, tsy maintsy matiko ianao sy ny fianakavian-drainao manontolo.

17Avy eo dia hoy ny mpanjaka tamin'ny miaramila mpanotrona azy teo akaikiny:
–Ndeha vonoy ho faty ny mpisoron'ny TOMPO, fa niray tsikombakomba tamin'i Davida izy ireo, satria nahafantatra ny fandosiran'i Davida izy, kanefa tsy nampandre ahy.
Fa ny mpanompon'ny mpanjaka kosa tsy sahy nikasi-tanàna ny mpisoron'ny TOMPO.

vendredi 30 septembre 2016

Zoma 30 Septambra 2016 - I Kor 1 : 23 - 29

23izahay kosa dia i Kristy voahombo teo amin'ny hazofijaliana no torînay: fanafintohinana ho an'ny Jiosy izany ary fahadalana ho an'ny hafa firenena*.

24Kanefa ho an'izay voaantson'Andriamanitra, na Jiosy na hafa firenena, dia i Kristy no herin'Andriamanitra sy fahendren'Andriamanitra; 25satria izay toa fahadalàn'Andriamanitra dia hendry noho ny fahendren'olombelona, ary izay toa fahalemen'Andriamanitra dia mahery noho ny herin'olombelona.

26Mba mijere tena ange ianareo izay voaantson'Andriamanitra, ry havako: araka ny maha olombelona, dia tsy misy firy ianareo no olon-kendry, tsy misy firy no mahery, tsy misy firy no avo razana. 27Kanefa izay noheverin'izao tontolo izao ho adala no voafidin'Andriamanitra hampahamenatra ny hendry; izay noheverin'izao tontolo izao ho osa no voafidin'Andriamanitra hampahamenatra ny matanjaka; 28ary izay noheverin'izao tontolo izao ho ambany sy fanaratsy, dia izay ataony tsy ho zavatra, no voafidin'Andriamanitra hahatsinontsinona izay ataon'izao tontolo izao ho zavatra, 29mba tsy hisy mihitsy olombelona mahazo mirehareha eo anatrehan'Andriamanitra.

jeudi 29 septembre 2016

Alakamisy 29 Septambra 2016 - Isa 40 : 9 - 11

9Ry vahoakan'i Tsiôna*
nanankinana vaovao mahafaly ô,
miakara eny an-tendrombohitra avo;
ry vahoakan'i Jerosalema
nanankinana vaovao mahafaly ô,
ingao mafy ny feonao ka aza matahotra.
Lazao amin'ireo ao tanànan'i Joda hoe:
«Indro Andriamanitrareo.
10Indro ny Tompo ANDRIANANAHARY tonga amin-kery
sady manana ny fahefana hanjaka.
Ny vahoaka, hoentiny miaraka aminy, no ho karamany
sady eo anoloany ho valin-kasasarany.
11Tahaka ny mpiandry* ondry
miandry ny andian'ondriny Izy
ka manangona ireny amin'ny baikon-tanany;
trotroiny eo an-tratrany ny zanak'ondry
ary roahiny miadana ny ampianahany.»

mercredi 28 septembre 2016

Alarobia 28 Septambra 2016 - Sal 145 : 1 - 7

              1 Fiderana nataon'i Davida.
ALEFA
                Andriamanitro ô, Ianao no mpanjakako
                ka dia hanandratra Anao aho
                sy hankalaza ny anaranao mandrakizay.
BETA
             2Hankalaza Anao isan'andro aho
               sy hidera ny anaranao mandrakizay.
GIMELA
             3Lehibe ny TOMPO ary mendri-piderana fatratra;
               tsy takatry ny saina ny halehibiazany.
DALETA
             4Ny taranaka rehetra samy hilaza
               amin'izay mandimby azy
               ny fiderana ny zava-bitanao
               sy hanambara ny asanao mahery.
HE
             5Ny fiandriananao malaza sy be voninahitra*
               mbamin'ny asanao mahagaga no hosaintsainiko;
VAO
             6hotenenin'ny olona anie ny herinao mahatahotra,
               fa hotanisaiko kosa ny halehibiazanao!
ZAINA
             7Aoka izy hiventy fahatsiarovana
               ireo asa soa lehibe nataonao
               ary hihoby ny fahamarinanao!

mardi 27 septembre 2016

Talata 27 Septambra 2016 - Jao 9 : 8 - 17

8Tamin'izay ireo mpiara-monina aminy sy ireo olona nahita fa mpangataka izy taloha, dia nanao hoe:
–Tsy ity ve ilay nipetraka nangataka?

Ka hoy ny sasany:
–Izy io!

9Fa hoy ny sasany:
–Tsia, fa olona mitovy aminy!

Ralehilahy kosa nilaza hoe:
–Izaho mihitsy ity!

10Dia hoy ny olona taminy:
–Fomba ahoana àry no nahiratan'ny masonao?
1
1Fa novaliany hoe:
–Ilay Lehilahy atao hoe Jesoa no nanao feta sy nanosotra ny masoko, dia nanao tamiko hoe: «Ndeha ianao mankany amin'ny dobo Silôà, dia misasà maso.» Koa lasa nankany aho, dia nisasa maso ary nahiratra.

12Dia hoy ny olona taminy:
–Aiza moa izany Lehilahy izay?

Fa novaliany hoe:
–Tsy fantatro!

13Dia nentin'ny olona tany amin'ny Farisianina* ilay jamba taloha. 14Andro sabata* no nanaovan'i Jesoa ny feta sy nampahiratany maso azy; 15koa ireo Farisianina indray no nanontany ilay jamba taloha ny amin'ny fomba nahiratany, ary izao no navaliny:
–Nasiany feta ny masoko, dia nisasa maso aho ka nahiratra!

16Tamin'izay ny sasany tamin'ireo Farisianina dia nanao hoe:
–Tsy avy amin'Andriamanitra izany Lehilahy izany, satria tsy mitandrina ny fepetra momba ny sabata!

Ny sasany kosa nanao hoe:
–Fomba ahoana moa no ahafahan'olona mpanota manao famantarana* toy ireny?

Dia nisara-tsaina ry zareo. 17Ary hoy indray ireto Farisianina tamin'ilay jamba:
–Ianao kosa, ahoana no mba ilazanao Azy, raha nampahiratra ny masonao Izy?

Ka novaliany hoe:
–Mpaminany* Izy.

lundi 26 septembre 2016

Alatsinainy 26 Septambra 2016 - Mpi 16 : 28 - 31

 28Koa niantso ny TOMPO i Samsôna nanao hoe:
–Ry Tompo ANDRIANANAHARY ô, mba tsarovy aho! Ka omeo hery aho, Andriamanitra ô, na dia amin'izao indray mandeha izao ihany aza mba hamaliako faty indray maka monja ireo Filistinina noho ny amin'ny voamasoko roa.

29Dia notsapatsapain'i Samsôna ireo andry roa afovoany izay nanohana ny tempoly; ka ny anankiray niankinan'ny tanany havanana, ary ny anankiray niankinan'ny tanany havia. 30Dia nihiaka i Samsôna hoe:
–Aoka aho ho faty miaraka amin'ny Filistinina!

Dia naronjiny mafy ny andry ka nianjeran'ny tempoly ireo mpanjaka sy izay rehetra tao. Koa betsaka lavitra ny olona matiny tamin'ny fahafatesany noho izay matiny tamin'ny androm-piainany.
31Ary nidina ireo rahalahin'i Samsôna sy ny fianakavian-drainy mba haka ny fatiny. Dia nentiny niakatra izy ka naleviny tao am-pasan'i Manôà rainy, teo anelanelan'i Tsôrehà sy i Estaôla.

I Samsôna no nitondra ny Israelita nandritra ny roapolo taona.

dimanche 25 septembre 2016

Alahady 25 Septambra 2016 - Efe 3 : 1 - 13

1Noho izany izaho Paoly, izay migadra noho ny amin'i Kristy* Jesoa hanasoavana anareo hafa firenena, dia mangataka amin'Andriamanitra ho anareo. 2Matoky aho fa efa renareo ny andraikitra tontosaiko aminareo, noho ny tombon-tsoa nomen'Andriamanitra ahy. 3Fanambarana avy tamin'Andriamanitra no nahalalako ny tsiambaratelony. (Efa nisy voasoratro fohifohy ihany momba izany tetsy aloha, 4ka raha mamaky ianareo, dia ho hainareo fantarina ny fahalalàko ilay tsiambaratelo momba an'i Kristy.) 5Tsy mbola nampahafantarina ny olombelona izany tsiambaratelo izany tamin'ny andro lasa; fa ireo apôstôly* sy mpaminany* voatokana ho an'Andriamanitra kosa no nanambarana azy ankehitriny noho ny asan'ny Fanahy Masina. 6Izao àry izany tsiambaratelo izany: amin'ny alalan'ny Vaovao Mahafaly*, ny hafa firenena dia natao hitambatra amin'ny Jiosy ka hiara-mandova ny zava-tsoa natokan'Andriamanitra ho an'ny vahoakany*, sy ho tena iray ihany ary hiombona anjara amin'ny fampanantenàn'Andriamanitra ao amin'i Kristy Jesoa.

7Tonga mpanompon'ny Vaovao Mahafaly aho noho ny tombon-tsoa nomen'Andriamanitra ahy maimaimpoana, araka ny fiàsan'ny heriny. 8Kely noho izay bitika indrindra amin'ny vahoakan'Andriamanitra rehetra aho, kanefa nomen'Andriamanitra izany tombon-tsoa izany: dia ny hitory amin'ny hafa firenena ny Vaovao Mahafaly momba ny haren'i Kristy tsy hita lany, 9ary ny hampahazava amin'ny olona rehetra ny fomba hanatanterahan'Andriamanitra ny tsiambaratelony. Hatrizay hatrizay dia voaafina tao amin'Andriamanitra Mpahary ny zavatra rehetra, izany tsiambaratelo izany; 10fa ankehitriny kosa naseho tamin'ny alalan'ny Fiangonana izany, ka tonga fantatr'ireo fanapahana sy ny fahefana eny ana habakabaka ny fahendren'Andriamanitra, dia fahendrena mahefa zavatra tsy tambo isaina. 11Izany rahateo no fandaharana hatrizay hatrizay ka notanterahin'Andriamanitra tamin'ny alalan'i Kristy Jesoa Tompontsika. 12Ary isika efa tafaray amin'i Kristy dia manana ny fahasahiana manatona an'Andriamanitra amim-pahatokiana, noho ny finoana niainan'i Kristy. 13Koa izany no angatahako anareo mba tsy ho ketraka amin'ny fahoriana manjo ahy hanasoavana anareo, fa misy vokany be voninahitra ho anareo izany.

samedi 24 septembre 2016

Sabotsy 24 Septambra 2016 - Lio 19 : 5 - 10

5Nony tonga teo i Jesoa, dia nitraka ary niteny tamin'i Zakeo hoe:
–Ry Zakeo, midîna faingana fa any aminao Aho anio no tsy maintsy miantrano.

6Nidina faingana i Zakeo ary nandray an'i Jesoa tamin-kafaliana. 7Nimonomonona ny olona rehetra nanatrika teo ka nanao hoe:
–Any amin'ny mpanota indray re no amantanany!

8Niato kosa i Zakeo ka niteny tamin'ny Tompo hoe:
–Indro, Tompoko, ny antsasaky ny fananako afoiko ho an'ny mahantra; ary izay zavatr'olona azoko am-pitaka, dia honerako inefatra heny!

9Ary hoy i Jesoa taminy:
–Anio ny famonjena dia tafiditra amin'ity trano ity; noho izany ity lehilahy ity koa dia zanak'i Abrahama! 10Fa ny hitady sy hamonjy izay very no nahatongavan'ny Zanak'olona*!

Talata 11 Aprily 2023 - Isa 52 : 7 - 12