Alakamisy 31 Aogositra 2017 - Sal 91 : 9 - 16

9Ny TOMPO mihitsy no fialofana ho anao
sady ny Avo Indrindra no nataonao fonenana;
10ka tsy hisy loza hianjady aminao
na antambo hanakaiky ny tranonao.
11Fa ny Tompo handidy ny anjeliny* hiahy anao
mba hiaro anao na aiza na aiza alehanao;
12hoentin'ireo eny an-tanany ianao
mba tsy ho tafintohina amin'ny vato ny tongotrao91.12 And 11-12: jereo Mt 4.6; Lk 4.10-11..
13Hodiavinao ny liona sy ny menarana
hohitsahinao ny tigra sy ny dragona91.13 Jereo Lk 10.19..

14Hoy ny Tompo hoe: «Nifikitra tamiko izy, ka hovonjeko;
harovako izy satria miaiky ahy ho Tompo.
15Raha miantso vonjy amiko izy, dia hovaliako;
raha azom-pahoriana izy, dia ho eo anilany Aho;
hafahako izy sy homeko voninahitra.
16Hataoko ela velona tokoa izy
ary hanehoako ny famonjeko.»

Ny vavolombelon’ny Tompo dia:

1-    Manana mpiaro

Na eo aza ireo fahavalo sy ioza manodidina antsika dia indro isika fa mbola mijoro, mandresy ireo fandrimpandrika maro samihafa. Mazava izao fa ny Tompo mihitsy no “mandidy ny anjeliny mba hiaro anao eny amin’izay rehatra halehanao”. Manamafy izay Jesoa araka ny teniny hoe: “Izaho momba anareo mandrakariva ambara-pahatongan’ny fahataperan’izao tontolo izao”. (Mat 28, 20).

2-     Afaka mandresy ny sarotra

Isan’ireo biby masiaka sy atahoran’ny olona ny liona sy ny vipera ary ny menarana. Omen’ny Tompo fahefana hanitsaka sy hanorotoro ireny isika. Ny fandresena ireny dia tafiditra ao amin’ny mason-tsivana ho famantarana ny mino, izay fandresena ny asan’ny devoly sy ny miaramilany izany.

3-     Manana ho avy mamirapiratra

Mazava ny teny fikasana voalaza eto: “Hovokisako fahela-velona izy” (And 16). Miahy ny ankehitriny sy ny ampitsontsika ny Tompo. Fiainana maharitra lavitry ny tebiteby sy ny fanahiana no homaniny ho antsika.

Fanontaniana:

Hatraiza ny fahatsapanao ny fiaraovan’Andriamanitra anao?

Alarobia 30 Aogositra 2017 - Jer 38 : 7 - 16

7Ary ren'ilay Etiôpianina atao hoe Hebeda-Melèka izay lehilahy nahatoky tao an-dapan'ny mpanjaka fa natsipy tao an-dava-drano i Jeremià. Ny mpanjaka kosa tamin'izay dia nipetraka teo am-bavahadin'i Benjamîna; 8koa niainga avy tao an-dapa i Hebeda-Melèka, ary niteny tamin'ny mpanjaka hoe:
9–Ry andriamanjaka ô, zava-dratsy avokoa izay rehetra nataon'ireo lehilahy ireo tamin'i Jeremià mpaminany* fa natsipiny tao an-dava-drano izy ka ho faty mosary ao, satria tsy misy mofo intsony ato an-tanàna.
10Dia nanome baiko an'i Hebeda-Melèka etiôpianina ny mpanjaka hoe:
–Mitondrà telopolo lahy avy eto hiaraka aminao, ka ampiakaro hiala tao an-dava-drano i Jeremià dieny mbola tsy maty.
11Dia naka telopolo lahy hiaraka aminy i Hebeda-Melèka, ka nankao an-dapan'ny mpanjaka tao amin'ny efitrano fitahirizan-javatra; ary naka fitafiana rovitra sy tonta tao izy, ka nampidininy ho eo amin'i Jeremià tao an-dava-drano tamin'ny tady mahazaka. 12Ary hoy i Hebeda-Melèka etiôpianina tamin'i Jeremià hoe:
–Ataovy ao ambany helikao ireo vorodamba ireo ka apetraho eo ambaniny ny tady mahazaka.
Rehefa nataon'i Jeremià izany, 13dia nosintonin'ireo ny tady mahazaka ka nakariny avy tao an-davaka i Jeremià; ary nipetraka tao an-kianjan'ny trano fiambenana izy.
Nanontany an'i Jeremià indray i Tsedekià mpanjaka
14Ary naniraka olona haka an'i Jeremià i Tsedekià mpanjaka ka nandray azy manokana teo amin'ny fidirana fahatelo mankao an-tranon'ny TOMPO, sady nanao taminy hoe:
–Hanontany zavatra aminao aho, ka aza misy afenina amiko.
15Dia hoy i Jeremià tamin'i Tsedekià:
–Raha milaza ny marina aminao aho, dia hovonoinao ho faty. Ary raha manoro hevitra anao aho, dia tsy hohenoinao akory.
16Fa nianiana mangingina tamin'i Jeremià ny mpanjaka, ka nanao hoe:
–Velona ny TOMPO Izay nanome aina antsika, ka mianiana aminao aho fa tsy hamono anao ho faty, ary tsy hanolotra anao amin'ireo olona mifofo ny ainao.

Ny fandresena omen’ny Tompo

Efa nampiomana an’i Jeremia ny Tompo fa maro ireo fíjaliana tsy maintsy atrehany. Nefa hoy Izy hoe: “momba anao Aho, hamonjy anao Aho”. Jer 1, 8. Ny fanafahana sy fiarovana no nasehon'ny Tompo an’i Jeremia.

1-    Fanafahana

Teo anatrehan’ny fanenjehana, fanagadrana, fandahatsahana an-davaka dia naneho ny fahalebiazany ny Tompo. Na eo aza ny fíjaliana tsy maintsy atrehan’ny mpanara-dia ny Tompo dia tsy mitaza- potsiny Izy, fa manafaka amin’ny loza. Ebeda-meleka eto no fitaovana nentiny nanafahana an’i Jeremia. Andriamanitra dia tsy mitsahatra mikaroka ny fomba rehetra hanafahana antsika.Ny Zanany Lahy tokana no antoka tsara indrindra amin’izany.

2-     Fiarovana

Nanome toky Zedekia mpanjaka ary nianiana fa tsy hanome na hanolotra an’i Jeremia eo an-tanan’ireo olona mitady ny ainy ireo. Sady manafaka ao anaty lavaka ny Tompo no miaro ny ain’ny mpanompony. Toky ho antsíka izany fa misy olona efa omanin’ny Tompo izay hitondra vahaolana azo antoka ho antsika, porofon’ny teniny izany manao hoe: “Hamonjy anao Aho”

Fanontaniana:

Tanisao ireo toe-javatra efa niainanao nanehoan’ny Tompo ny fiarovana sy ny fanafahany anao?

Talata 29 Aogositra 2017 - Sal 4 : 1 - 8

1 Tao amin'ny tahirin-kiran'ny ilohan'antoko-mpihira.* Hampiarahina amin'ny valiha. Salamo nataon'i Davida.

2Ry Andriamanitra mpanome rariny ahy ô,
raha miantso vonjy aho, mba valio.
Tao an-katerena aho no efa nafahanao;
iantrao àry aho ka henoy vavaka.
3Mandra-pahoviana, rey olona,
no handotoanareo ny voninahitro?
Ny hanendrikendrika ahy tsy amin'antony
sy ny hamoron-dainga hiampangana ahy:
izany no kendrenareo hatrany hatrany.

4Fantaro kosa fa igagana ny fitiavan'ny TOMPO ahy;
henoiny aho rehefa miantso vonjy aminy.
5Tezera kanefa aza manota ianareo4.5 Jereo Ef 4.26.,
mieritrereta eo am-pandriana kanefa aza manahy.

6Fa manaova kosa sorona* araka ny lalàna
ary dia matokia ny TOMPO.
7Maro ny olona mitaraina hoe:
«Mba te hahita fahasambarana izahay,
ka jereo amin-kamorampo, TOMPO ô.»
8Nasianao fifaliana kosa ato am-poko
mihoatra noho ilay fifalian'ireo,
amin'ny itobahan'ny variny sy ny divainy.

Ny Vavolombelon’ny Tompo 

1-Mahazo valimbavaka

Manome safidy malalaka ny Tompo ho an’ny tsirairay. Tsy tokony hadinontsika anefa ny herin’Andríamanitra fa tena azo ianteherana tokoa, na dia potika sy rava aza ny zavatra rehetra, ary na eo aza ny fíjaliana sy fahoriana, ny Tompo dia eo mandrakariva: “Jehovah hihaino raha miantso Azy aho” (Sal 4, 3), tsy miova omaly sy anio ary mandrakizay Izy ka mamaly vavaka. Mampanantena ny Tompo fa ho avy ny fotoana izay hanavahany ny tsara sy ny ratsy; ary ny tsara izay ankasitrahany dia hiaina amin’ny fiadanana sy fifaliana mandrakizay.

2-Mandresy nv fahotana

Misy ny sasany, izay milaza azy ho mpanompo kanefa miaina ao anaty faharatsiana.Toa zary endrika ivelany ihany ny maha kristiana kanefa manara-po amin’ny fílàna maro samihafa ary miaina aniin’ny tsy fahamarinana, manjary manala baraka an'i Krìsty.Tia zava-poana. Miala amin’izany ny tena mpanompon’ Andriamanitra araka ny baiko hoe: “Tezera fa aza manota” (Sal 4, 4).

Fanontaniana:

Inona avy ireo fepetra sy dingana mba handraisana valim-bavaka?

Alatsinainy 28 Aogositra 2017 - Gen 47 : 23 - 27

23Dia hoy i Jôsefa tamin'ny vahoaka:
–Ankehitriny efa voavidiko ho an'ny Farao ny tenanareo sy ny taninareo, koa homeko masom-boly ianareo hafafinareo any amin'ny taninareo. 24Fa rehefa miakatra ny vokatra, dia haterinareo ho an'ny Farao ny ampahadiminy; ny efatra ampahadiminy kosa dia hotazoninareo mba ho masom-boly ary koa ho sakafonareo sy ny zanakareo mbamin'izay rehetra mipetraka ao an-tranonareo.

25Ka hoy ny navalin'ireo hoe:
–Namonjy ny ainay ianao, tompokolahy. Nahita sitraka teo imasonao izahay, koa ekenay ny ho mpanompon'ny Farao.

26Toy izany no namoahan'i Jôsefa lalàna tany Ejipta, lalàna mbola manan-kery mandraka androany, fa ny ampahadimin'ny vokatra dia aterina ho an'ny Farao. Ny tanin'ny mpisorona irery ihany no tsy mba lasa fananan'ny Farao.

27Nipetraka tany Ejipta, tao amin'ny faritr'i Gôsena, ny Israelita. Nahazo zaratany tao izy, dia niteraka, ka nihamaro fatratra.

Ny fandresena ny fìjaliana

1-    Mila mpamonrv

Ny fijaliana voalaza ato dia ny mosary, i Josefa no nirahin’Andriamanitra hitondra vahaolana manoloana izany. Ny fitsinjovantsika ny ampitso amin’ny aìalan’ny tahiry no vahaolana nentiny. Tandindon’i Kristy i Josefa eto, i Kristy izay nanampy ny olona handresy ny mosary tamin’ny alalan’ny fahagagana nataony; Ao aminy no misy fiainana dia fiainana be dia be (Jao 10, 10), Miditra an-tsehatra amin’ny fiainana andavanandrontsika ny Tompo: manasitrana ny aretina Izy, mamoky ny noana ary manendry olona hitondra vahaolana. Misy vokatra amin’ny fiainantsika andavan’ andro sy ny ankehitrinintsika ny famonjen’ Andriamanitra.

2-     Mila fanolrantena fanoloran-tena

Rehefa voavonjy tamin’ny alalan’ i Josefa ny olona dia nanolo-tena ho mpanompon’ i Farao. Araka izany, izay mahatsiaro ny famonjen’i Kristy dia mila manolo-tena ho Azy. Izy rahateo nilaza fa izay manatona Azy tsy mba holaviny mihitsy (Jao 6, 37). Ny fitia mifamaly mahatsara fihavanana.Midika fitiavan-tena ihany raha toa ka nandray fahasoavana avy amìn’ny Tompo nefa sady tsy mahay mankasitraka no tsy manolo-tena ho Azy.

Fanontaniana:

Inona no valim-pitia omentsika ny Tompo noho ny famonjeny antsika?

Alahady 27 Aogositra 2017 - II Kor 1 : 3 - 7

3Hankalazaina anie ilay Andriamanitra sady Rain'i Jesoa Kristy* Tompontsika, ilay Ray feno hatsaram-po sady Andriamanitra loharanon'ny fampaherezana rehetra1.3 loharanon'ny fampaherezana rehetra: ampit Is 40.1; Sal 94.19.. 4Mampahery anay amin'ny fahoriana isan-karazany manjo anay Andriamanitra, ka ny fampaherezana azonay taminy no entinay mampahery ny olona ianjadian'ny fahoriana isan-karazany. 5Miara-mijaly be dia be amin'i Kristy izahay; ary betsaka araka izany koa ny fampaherezana azonay amin'ny alalan'i Kristy. 6Raha ampahorîna izahay, dia ho fampaherezana anareo sy ho famonjena anareo izany; raha ampaherezina izahay, dia ho fampaherezana anareo koa izany, ka miasa hiaretanareo fijaliana mitovy indrindra amin'izay entinay. 7Ary miorina mafy ny fanantenany ny aminareo, satria fantatray fa toy ny iombonanareo fijaliana aminay no iombonanareo fampaherezana aminay koa.

Ny fampiononana 

1- Ahazakana fahoriana

Raha jerena dia miverina im-balo ny teny hoe: “mampionona na fampiononana” eto. Eo anatrehan’ ireo mitondra fahoriana sy fijaliana dia vao mainka mihamahery ny mpiara-dia amin’ny Tompo. Manampy azy ireo ahazakany fahoriana ny fampiononana azy ireo. Ny teny hoe “mampionona” dia midika hoe mitoetra eo anilan’ny olona anankiray ka mampahery sy manampy azy ao anaty fotoam-pahasahiranana. Andriamanitra no tena mahatanteraka izany andraikitra izany amin’ny fanirahany ny Fanahy Masina hitondra fampiononana hoan’ny zanany.

2-Manorina fanantenana

Niainan’i Paoly teo amin’ireo zava-manahirana maro efa nitranga teo amin ny fíainany fa tsy misy fahoriana mihitsy na dia ireo izay tena maharary indrindra aza, afaka hampisaraka ny mpino amin’ny fanantenana sy ny fíkarakaran’ny Tompo. Manomana valim-pitia lehibe ho azy ny Tompo.Toy izany koa isika,arakaraka ny handalovantsika fotoan-tsarotra vao mainka velombelona ny fanantenantsika handresy.

Fanontaniana:

Lazao ireo andinin-tsoratra Masina ho fampaherezana ireo mandalo fjaliana

Sabotsy 26 Aogositra 2017 - Jao 16 : 25 - 33

25–Fanoharana* no nilazako izany taminareo; fa ho avy ny vaninandro izay tsy hanaovako fanoharana aminareo intsony fa hambarako tsotra aminareo ny momba ny Ray. 26Amin'izany andro izany dia hangataka noho ny anarako ianareo; ary Izaho tsy milaza hoe hangataka ho anareo amin'ny Ray, 27satria fatra-pitia anareo Izy. Eny, fatra-pitia anareo ny Ray, satria ianareo efa tia Ahy ary efa nino fa nivoaka avy any amin'ny Ray Aho. 28Nivoaka avy any amin'ny Ray Aho no tonga eto amin'izao tontolo izao*; ary hiala eto amin'izao tontolo izao indray Aho, ka hankany amin'ny Ray.

29Dia hoy ny mpianatr*'i Jesoa taminy:
–Indro milaza tsotra Ianao ankehitriny, fa tsy manana fanoharana akory. 30Fantatray izao fa mahalala ny zavatra rehetra Ianao, ka tsy mila hanontanian'olona: izany no inoanay fa nivoaka avy any amin'Andriamanitra Ianao!

31I Jesoa kosa namaly azy hoe:
–Mino ve ianareo ankehitriny? 32Indro avy ary efa tonga sahady aza ny andro izay hielezanareo samy ho any amin'ny misy anareo avy, ary handaozanareo Ahy ho irery; kanefa tsy irery Aho, fa miaraka amiko ny Ray. 33Izany no voalazako taminareo, dia mba hanananareo fiadanana amin'ny firaisana amiko. Eto amin'izao tontolo izao no ahitanareo fahoriana; nefa mahereza, fa Izaho efa naharesy izao tontolo izao!

Mandresy ny fijaliana ny mpino satria:

1-    Manana mpihaino vavaka

Hoy i Jesoa: “Amin’izany andro izany dia hangataka amin’ny anarako hianareo; ary tsy milaza aminareo aho fa Izaho hangataka amin’ny Ray ho anareo” Jao 16. 26 Mahantra tokoa ny kamboty fa tsy mba manana hitaraina fa mahatsiaro ho manirery. Tsy mbatoy izany isika fa eo i Jesoa sady mihaino vavaka no mitady ny fomba rehetra ahazoantsika valim-bavaka. Tafita any amin’ny faratampony ny hetahetantsika ary vonona hanaporofo hatrany ny fitiavany antsika Izy. (Jao 16, 27). Sady mihaino Izy no vonona hitondra valim- bavaka.

2-     Miaraka amin’ny Mpandresv

Mahafehy tsara ny sehatra sy ny olana misy eo amintsika ny Tompo. Na mosary, na fanenjehana, na fanalam-baràka, na fijaliana, eny ha tramin’ny fasana aza efa resiny. Hamafisiny izany manao hoe: “Aty amin’izao tontolo izao no ahitanareo fahoriana, nefa matokia hoy Izy, Izaho efa naharesy izao tontolo izao”. Toky no omeny antsika, ny hany andrasana amintsika dia ny fanankinana feno Aminy ny fiainantsika.

Fanontaniana:

Hatraiza ny fahavitrihanao manambara ireo valim- bavaka efa azonao tamin’ny Tompo?

Zoma 25 Aogositra 2017 - Asa 22 : 25 - 39

25Efa voafatotra hokapohina i Paoly no niteny tamin'ilay kapiteny nanatrika teo hoe:
–Azonareo kapohina ve ny olona mizaka ny zom-pirenena rômanina, na dia tsy mbola voatsara aza22.25 Jereo 16.37 sy nta.?

26Nony nandre izany teny izany ilay kapiteny, dia nandeha nampandre ny komandy sady nilaza hoe:
–Inona ity hataonao? Olona mizaka ny zom-pirenena rômanina io lehilahy io.

27Nanatona an'i Paoly kosa ny komandy ka nanontany azy hoe:
–Hono ho'aho, mizaka ny zom-pirenena rômanina ve ianao?

Dia novaliany hoe:
–Eny.
28Ary izao no tenin'ny komandy:
–Izaho dia vola be tokoa no naloako hizakako ny zom-pirenena rômanina.

Fa hoy i Paoly:
–Izaho kosa vao teraka dia efa nizaka izany.

29Niaraka tamin'izay dia nihataka ry zareo efa ndeha hikapoka an'i Paoly hanerena azy hiteny; natahotra mbamin'ilay komandy aza nony nahalala fa mizaka zom-pirenena rômanina i Paoly, satria izy komandy no efa nampamatotra azy.

Maro ireo toe-javatra izay mampiavaka ny mpino
amin’izao tontolo izao:

Ny mampiavaka ny vavolombelon’ny Tompo dia:

1-    Manana mpiaro

Ho setrin’ny fijoroan’i Paoly amin’ny fahamarinana, amin’ny fitoriana ny filazantsara, dia nisy Jiosy nampikotaba ny vahoaka (21-27), voasambotra i Paoly (21, 30) ary nitady hamono azy ny olona (21, 31), nofatorana amin’ny kofehy izy (22, 25), fa nisy kapiteny iray izay iraky ny Tompo no niaro an’i Paoly izay nanambara fa tsy mendrika an’i Paoly izao atao aminy izao. Manana mpiaro ny mpino. Ho antsika koa, Jesoa Kristy dia mipetraka eo ankavanan’ny Ray mifona sy mivavaka ho antsika. Eo koa ny Fanahy Masina manolo-tsaina antsika.

2-     Manana sata manokana

Manana ny maha izy azy manokana i Paoly, manana ny zom-pirenena Romana izy: tsy azo atao ny mikapoka Romana izay mbola tsy nohelohina. Lasa natahotra ireo nampamatotra sy nikapoka azy. Toy izany koa isika, manana sata manokana ny zanak’Andriamanitra. Noho ny ran’i Jesoa Kristy, ny fanavotany antsika dia tonga olom-baovao isika, efa lasa ny zavatra taloha. Tsy azon’ny devoly fitahina sy alaim-baràka intsony.

Fanontaniana:

Inona avy ireo fandresena mampiavaka ny mpino amin’ izao tontolo izao?

Alakamisy 24 Aogositra - Eks 17 : 11 - 15

11TOMPO ô, iza moa no andriamanitra tahaka Anao?
Iza no malaza amin'ny fahamasinana tahaka Anao,
mahatahotra, mendri-piderana,
afaka manao zava-mahagaga?
12Nahinjitrao ny tananao ankavanana,
dia natelin'ny tany ireny.
13Tarihinao amin'ny fitiavanao
ny vahoaka izay navotanao.
Amin'ny herinao no itondranao azy
ho amin'ny fonenany masina.
14Mandre izany ny firenena maro ka mihorohoro;
mihoron-koditra ny Filistinina,
15raiki-tahotra ireo lehiben'i Edôma
ary mangovitra ireo andriandahin'i Môaba;
kivy ny mponina rehetra any Kanahàna.

Mandresy ny fijaliana ny Mpino

1-    Miankina amin’Andriamanitra

Ny fanandratan’i Mosesy ny tanany dia mampiharihary ny fiankinany sy ny finoany an’Andriamanitra. Nitondra fandresena lehibe izany. Midika vavaka sy fifonana io tanan’i Mosesy misandratra io. Mifampiankina amin’io vavaka io ny valim-bavaka teo amin’ny vahoaka.Soa ihany fa eo Jesoa araka izay voalaza ao amin’ny Heb 7, 25:”Koa amin’izany dia mahavonjy tokoa izay manatona an’Andriamanitra amin’ny alalany Izy, satria velona mandrakizay hanao fifonana ho azy.”

2-     Miray hina

Ny firaisan-kina teo amin' i Arona sy Hora miaraka an’i Mosesy ,andaniny ary teo amin’i Josoa sy ny vahoaka ankilany dia midika ho finoana arahin’asa mitondra amin’ny fandresena: Nanampy an’i Mosesy, i Arona sy Hora, nanohana ny tànany. I Josoa kosa niatrika mivantana ny ady. Hoy ny bokin’ny Ohabolana hoe: “Ary ny fahaizana mandamina tsara no entinaro miady” (Oha 24, 6).

Fanontaniana:

Inona avy no azo atao ho fampiharana sy hampitombo ny fiankinana amin’Andriamanitra ary ny firaisan-kina eo amin’ny samy mpanompo?

Alarobia 23 Aogositra 2017 - Heb 10 : 32 - 34

32Tsarovy ny nanjo anareo tamin'ny andro fahiny. Fa rehefa nohazavain'Andriamanitra ianareo, dia niharam-pijaliana sy niaritra ady mafy tokoa: 33novetavetaina sy nampahorîna teo imasom-bahoaka ianareo indraindray, na niara-nizaka izay nanjo an'ireo natao toy izany koa indraindray; 34niarahanareo niaritra ny fijalian'izay voafonja; ary nony norobaina ny fanananareo, dia nekenareo tamin-kafaliana izany satria fantatrareo fa manam-pananana tsara lavitra sady maharitra ianareo.

Ny Mampiavaka Ny Vavolombelon’ny Tompo Dia:

1- Manana faharetana

Nira-niaritra tamin’izay nifatotra ny mpino voalaza eto, niharitra ny ady mafy tamin’ny fahoriana. Sady miaina faharetana no miaraka amin’ny hafa miaritra ady mafy. Na teo aza izany dia maivana ny fíjaliana rehefa maneho fíraisan-kina, fiombonana ny mpino, araka ny baiko hoe: “miraisa saina, miray fítiavana, miray fo, miray hevitra” (Fil2, 2).

2-     Manana fifaliana

Vao maika nahafaly ny mpino ny fandrobana ny fananany ho setrin’ny fíkirizany amin'ny fanompoana. Fantany fa tsy foana tsy akorv ny fikelezany aina (I kor 15,58)

3-     Manana fanantenana

Fantany fa manana fanantenana tsara sy maharitra izy. Efa ny harena maharitra mandrakizay no katsahiny fa tsy nampaninona azy intsony izay harena mora simba sy mety lo.

Fanontaniana:

Nahoana ireo vavolombelon’ny Tompo no mbola nahita fífaliana na dia norobaina aza ny fananany?

Talata 22 Aogositra 2017 - Fit 3 : 31 - 33

31Fa tsy hanary mandrakizay ny Tompo.
32Fa raha mampahory Izy, dia mamindrafo
araka ny halehiben'ny fitiavany.
33Fa tsy sitrany ny mampahory
na mampijaly ny olombelona.

Azo antoka ny fandresena satría

1-   Ny fijaliana mandalo

Mazava tsara ny Fit 3, 31-33 izay manambara fa tsy hanary mandrakizay ny Tompo ary tsy sitrany ny mampahory na mampalahelo ny zanak’olombelona. Na dia manadalo fotoan-tsarotra aza ny mpino dia voafetra ihany izany satria ny Tompo miantra sy miasa hoan' ny mpanompony. Hoy izy hoe: Tzaho mahalala izay hevitra hiheverako anareo dia hevitra ahatonga fiadanana fa tsy loza, mba hanome anareo fanatenana ny amin’ny farany".

2-    Nv famindrampon’Andriamanitra mitoetra

“Dia mbola hiantra ihany Izy araka ny haben’ny

famindrampony" (Fit 3,32)

Io famindrampon'Andriamanitra io no manazava ireo fahombiazana sy fandresena samihafa eo amintsika. lo no tsy mahalany ritra antsika. Ny ran’i Jesoa Kristy latsaka teo amin'ny hazo fijaliana no nanova ny fahatezeran’Andrimanitra ho tonga famindrampo tsy mety lany. Hery lehibe hoantsika io haben’ny famimdram-pon’Andriamanitra io. kanefa aoka tsy hararaotina hanantanterahana ireo filàna maro samihafa. Mahaiza manome voninahitra an'ny Tompo mifanaraka amin’izany.

Fanontaníana

Inona avy ireo fomba fiady mifanaraka amin'ny sitrapon’Andriamanitra entina mandresy ny fahakiviana?

Alatsinainy 21 Aogositra 2017 - Asa 7 : 51 - 56

51Olona mafy hatoka, mpikomy sady mpanetsin-tadîny ianareo! Toherinareo lalandava ny Fanahy Masina; dia ny razanareo navela mihitsy ianareo. 52Iza moa no mpaminany tsy nenjehin'ny razanareo? Novonoiny hatramin'ireo mpanambara ny hahatongavan'ilay Marina aza: ary ankehitriny dia ianareo mihitsy no nanjary mpamadika sy mpamono ilay Marina7.52 and 51-52: ampit Is 63.10; 2 Tan 36.16; Mt 23.31.. 53Nandray ny lalànan*'Andriamanitra tamin'ny alalan'ny anjely ianareo, kanefa tsy nitandrina azy7.53 Misy tokoa lovantsofin'ireo rabỳ (na mpampianatra jiosy) milaza fa ny fanambaràna ny lalànan'Andriamanitra tany Sinay dia natao tamin'ny alalan'ireo anjely. Ampit Gal 3.19; Heb 2.2..

54Nony nandre izany teny izany ry zareo tao amin'ny Fitsarana ambony*, dia nisafoaka mafy ary nihidy vazana tamin'i Stefàna. 55Feno Fanahy Masina kosa i Stefàna ka nibanjina ny lanitra, nahita ny voninahitr'Andriamanitra sy i Jesoa teo ankavanan'Andriamanitra, 56ary niteny hoe:
–Indro hitako izao ny lanitra misokatra sy ilay Zanak'olona* mijoro eo ankavanan'Andriamanitra.

Ny mampiavaka ny mpandresy

1- Manana fahasahiana

Tsy nisalasala i Stefana nanambara mivantana ny toetran’ireo nifanatrika taminy: Mafy hatokana, tsy voafora fo sy sofina, manohitra ny Fanahy Masina mandrakariva, mpanenjika ny mpaminany, mpamadika, mpamono. Hita araka izany fa manana fahasahiana feno i Stefana. Ankehitriny dia tsikaritra fa na dia fantatry ny mpitarika sasany aza ny ditran’ny ondriny dia sadaikatra izy hanitsy sy hananatra.Aoka isika hanana fahasahiana hanitsy sy hananatra. I Jesoa ihany koa dia nilaza nivantana ny toetran’ireo fariseo sy mpanora-dalana mpihatsaravelatsihy.

2- Manana fanantenana

Ny olona tsy manana antoka ny fíainana mandrakizay dia mihorohoro eo anatrehan’ny fahafatesana.Tsy mba toy izany i Stefana fa vao maika nanamafy ny fanantenany ny lalan-tsarotra natrehany. Ny voninahitr’ Andriamanitra no hitan’i Stefana ary feno ny Fanahy Masina izy. Mandresy ny fíjaliana ny fanantenana. Toy izany koa isika: Fantaro fa ny anton’ny ady izay atrehantsika dia izay ahatonga antsika ho mpandresy. Aoka tsy ho kivy fa fantaro ny fikasan’ny Tompo izay manomana hoavy mamirapiratra ho anao.

Fanontaniana:

Mba misy manana fahasahiana sy fanantenana tahaka an’i Stefana ve ny ankamaroan’ny mpitory filazantsara ankehitriny?

Alahady 20 Aogositra 2017 - Gen 39 : 19 - 23

19Tezitra mafy ilay tompon'i Jôsefa, rehefa nandre ny fitantaràn'ny vadiny izay nataon'ny mpanompony taminy. 20Koa nasain'i Pôtifara nosamborina i Jôsefa sy nasainy nohidîna tao am-ponja izay nisy ireo mpigadra meloka tamin'ny mpanjaka.

Fa raha tao am-ponja i Jôsefa, 21dia nomba azy kosa ny TOMPO sy naneho hatsaram-po taminy, ka nampahita sitraka azy tamin'ny lehiben'ny fonja. 22Dia natolotr'ilay lehiben'ny fonja teo an-tanan'i Jôsefa avokoa ireo mpigadra rehetra, ka izy no mitarika ny asa rehetra nataon'ireo mpigadra. 23Koa ilay lehiben'ny fonja dia tsy niraharaha na inona na inona tamin'ny zavatra rehetra nankininy tamin'i Jôsefa, satria ny TOMPO nomba azy ka nanambina izay nataony.

Ny tantaran'i Josefa izay natao an-tranomaizina noho ny heloka tsy nataony akory no hita eto. Na eo aza izany dia miharihary fa:

Ny fandresena ny fijaliana dia

1-     Noho nv famindrampon’Andriamanitra
Voalaza ao amin’ny andininy faha 26 “fa Jehovah momba an’i Josefa sy namindra fo taminy ka nampahita fìtia azy teo imason’ny mpitandrina ny trano maizina”. Tsy avelan’ny Tompo hiady irery ny mpanompony. Manomana fandresena miezinezina Izy, miara-dalana amin’ny fanatrehan’ny Tompo mandrakariva ny famindrampony sy ny fitiavany indrindra rehefa mijoro amin’ny fahamarinana isika.

2-      Noho ny fanambinanan’Andriamanitra
Voasoratra fa: “Jehovah nomba an’i Josefa ary izay nataony dia nambininy”. Ilay trano maizina izay natao ahakivy, hampitanondrika nanjary nahatsapana ny fanambinana avy amin’ny Avo indrindra. Izy Tompo no manova ny fotoan-tsarotra ho tonga fandresena araka ny teniny hoe: “Ny zavatra rehetra miara-miasa ahasoa izay tia an’Andriamanitra”.Toy izany koa isika, na eo aza ireo olana maro samihafa dia afaka miandrandra ny fanambinan’Andriamanitra hatrany isika.

Fanontaniana:

Tanisao ireo fotoan-tsarotra nodiavinao izay novan’ny Tompo ho fandresena miezinezina.

Sabotsy 19 Aogositra 2017 - Jer 39 : 11 - 18

11Ary i Nebokadnetsara mpanjakan'i Babilôna nanome baiko an'i Nebozaradàna lehiben'ny mpiambina ny amin'i Jeremià ka nanao hoe: 12«Ndeha alaovy izy, ary tandremo tsara mba tsy hisy hanisy ratsy azy, fa ataovy izay angatahany aminao!» 13Ary i Nebozaradàna lehiben'ny mpiambina nifanaraka tamin'i Nebosazbàny izay lehilahy tena mahatoky ny mpanjaka sy i Nergala-Saretsera lehiben'ny etamazaoro sy ny manamboninahitra sisa rehetran'ny mpanjaka, 14ka nampaniraka haka an'i Jeremià tao an-kianjan'ny trano fiambenana, dia nanolotra azy teo an-tanan'i Gedalià, zanakalahin'i Ahikama sady zafikelin'i Safàna. Ary i Gadalià kosa dia hamela an'i Jeremià hody any aminy. Dia niaina teo anivon'ny vahoaka i Jeremià.

15Fa fony mbola voatana tao an-kianjan'ny trano fiambenana i Jeremià, dia nisy kosa tenin'ny TOMPO taminy nanao hoe: 16«Mandehàna lazao amin'i Hebeda-Melèka39.16 Momba an'i Hebeda-Melèka, jereo 38.7-13. etiôpianina hoe: ‹Izao no lazain'ny TOMPOn'izao rehetra izao sady Andriamanitr'i Israely: Indro efa nambarako tamin'ny mponin'ity tanàna ity ny loza fa tsy ny soa. Noho izany dia hotanterahiko izay nolazaiko ary ho tsapanao tsy ho ela izany. 17Nefa amin'ny andro izay hahatongavan'izany loza izany, hoy ny teny hentitra avy amiko TOMPO, dia hafahako ianao, ka tsy hatolotro eo an-tanan'ireo olona atahoranao. 18Havotako tokoa ianao mba tsy ho faty an'ady, ka ho voavonjy ny ainao, satria natoky Ahy ianao. Teny hentitra avy amiko TOMPO izany.› »

Raha mitopy amin’ity Jeremia ity, dia hita taratra, fa maniraka mpaminany ny Tompo mba hanambara izay hanjo ny tanàna. Araka izany:

Ny fandresena ny fìjaliana dia

1-    Amin’ny alalan’ny fihainoana

Miaro ny olony amin’ny fomba rehetra ny Tompo amin’ny fanomanany azy ireo amin’ny alalan’ ny mpaminany. Tsy mora anefa izany fa mila fikirizana, mila fifantohana tanteraka amin’izay hafatra am- pitaina. Tsy voatery fifaliana foana no re fa aoka koa ny loza (Jer 39, 16^b). Amin’izany dia ny fihainoana,ny fankatoavana no maha voavonjy (and 18).

2-     Amin’nv alalan’nv fahatokiana

Amin’izao vanin'andro izao dia mbola manirika olona ny Tompo mba hananantsika fahatokiana. Andriamanitra velona sy mahery ny Tompontsika, manome toky Izy fa hamonjy antsika. Hoy Izy hoe: “nefa hovonjeko amin'izany andro izany, hoy i Jehovah, fa tsy mba hatolotro eo an-tanan’ny olona izay atahoranao (39, 17), Manamafy izany ny (Rom8, 37) manao hoe: *‘Matokia, Izaho efa naharesy izao tontolo izao”.

Ny ataontsika rehetra hitany sy fantany ary tsy misy miafina Aminy, fa tsy tiany hisy ho very na dia iray aza isika. Meteza “mihaino -mandray-Mankato”. “Jehovah no mandeha eo alohanao”... (Deo 31,8)

Fanotaniana:Inona ireo singa samihafa izay manelingelina ny fihainoana?

Zoma 18 Aogositra 2017 - Asa 14 : 19 - 28

19Nisy Jiosy tonga avy tany Antiôkia any Pisidia sy avy tany Ikôniôma. Nahazo ny fom-bahoaka ry zareo ka nitora-bato hahafaty an'i Paoly, ary nitaritarika azy teo ivelan'ny tanàna satria nampoiziny ho efa maty. 20Kanjo nony voahodidin'ny mpianatra* teo i Paoly, dia nitsangana ka nody tao an-tanàna. Ary lasa nankany Derba izy mbamin'i Barnabà ny ampitson'iny.

21Nitory ny Vaovao Mahafaly* tao an-tanànan'i Derba ry i Paoly sy i Barnabà ka betsaka ny mpianatra* azony tao. Dia niverina indray izy roa lahy nankany Listra sy Ikôniôma ary Antiôkia any Pisidia. 22Nampahery fo ny mpianatra i Paoly sy i Barnabà ary nampirisika azy ireo haharitra amin'ny finoana ka nanao taminy hoe:
–Fahoriana be no tsy maintsy diavintsika mba hidirana ao amin'ny Fanjakàn'Andriamanitra*!
23Isam-Piangonana dia nanendry loholona* ho an'ny mpianatra* izy roa lahy14.23 nanendry loholona ho an'ny mpianatra izy roa lahy: dkt hafa nasain'izy roa lahy nanendrena loholona ho an'ny mpianatra. , ary nony efa nivavaka sy nifady hanina* dia nanankina ny iray Fiangonana tamin'ny Tompo Izay efa ninoan'izy rehetra rahateo.

24Taorian'izany, dia namakivaky ny faritany Pisidia ry i Paoly sy i Barnabà ka tonga tany Pamfilia14.24 Pisidia: jereo 13.14. –Pamfilia: faritanin'i Perga (13.13 sy nta) sy i Atalia (and 25).. 25Nitory ny tenin'Andriamanitra tao Perga izy roa lahy, ary lasa nankany Atalia. 26Avy eo no niondranany an-tsambo ho any Antiôkia, dia ilay tanàna nanankinana azy roa lahy tamin'ny fahasoavan'Andriamanitra ho an'izao asa notontosainy izao.

27Nony tonga tao Antiôkia izy roa lahy, dia namory ny Fiangonana, ka nitantara ny zavatra rehetra nampanaovin'Andriamanitra azy ary koa nitantara ny namohan'Andriamanitra varavarana ho an'ny hafa firenena* mba hahazoany mino. 28Ary elaela ihany no niarahan'i Paoly sy i Barnabà nitoetra tamin'ny mpianatra tao Antiôkia.

Ny vavolombelon’ny Tompo

1-    Mitondra fampaherezana

Anisan’ny iraka omen’ny Tompo antsika vavolombelony ny fampaherezana ny hafa. Tao amin’i Paoly io fisainana io satria rehefa afa-doza izy (tora- bato) dia tsy navelany ireo mpianatra tany Antioka sy Ikonioma fa niverenany nampaherezina, nohamafisiny ny finoan’izy ireo mba hahazoan’izy ireo ny fanjakan’ Andriamanitra. Niova ho fijoroana vavolombeiona ny fijaliana izay nandalovan’i Paoly. Tsy nandositra olana izy fa nanamafy aza fa ny fahoriana dia làlana mitondra antsika amin’ny fahombiazana.

2-     Mampiroborobo ny asa fítoriana

Ireo hetsika rehetra hita ato amin’ity perikopa ity dia manambara fa tena tsy tafandry mandry mihitsy i Paoly sy Bamabasy. Mandeha etsy, mandeha eroa, noho ny fitoriana ny Fiiazan-tsaran’ny Fanjakan'Andriamanitra izay maha-vavolombelona azy ireo (And 22). Tao ny fandaminana mba entina handrindrana izay fitoriana sy fampiroboroboana ny asan’Andriamanitra, fanendrena ireo loholona isam-piangonana, tao ny fiombonam- bavaka sy fifadian-kanina, ary izay tena lehibe dia ny tsy fahalalana vizana satria tsy nitandro hasasarana tamin’ny fivezivezana ireto vavolombelon’ny Tompo ireto

Fanontaniana:

Manaova jeri-todika amin’ny fandaharam-potoananao dia jereo izay ahafahana mampitombo ny fotoana ho an’ny asan’ny Tompo.

Alakamisy 17 Aogositra 2017 - Gen 31 : 36 - 40

36Tezitra i Jakôba ka nifamaly tamin'i Labàna nanao hoe:

–Inona no fahadisoako, ary inona no heloko no dia nilomay nanenjika ahy ianao? 37Nosavanao ny entako rehetra, ka inona no hitanao? Asehoy eo imason'ny havanao sy ireo havako izany hitsarany antsika. 38Roapolo taona izao no efa niarahako taminao, nefa ny ondrivavinao aman'osivavinao tsy mba namotsotra; sady tsy mbola nihinana ondrilahy tamin'ny andian'ondrinao na oviana na oviana aho. 39Tsy mbola nitondra ireo fatim-biby voaviraviran'ny bibidia tany aminao mihitsy aho, fa izaho no nanolo azy; teo am-pelatanako no nitadiavanao izay nangalarin'olona na tamin'ny andro na tamin'ny alina31.39 Ampit Eks 22.12; Ham 3.12. Ny mpiandry ondry, izay afaka mitondra ireo sisa tsy lanin'ny biby, dia tsy mizaka ny fahavoazana teo amin'ny zavatra very.. 40Niaritra ny hafanana amin'ny antoandro aho, ary jihitry ny hatsiaka amin'ny alina ka tsy nopizin-tory akory.

Ny vavolombelon’ny Tompo:

1-     Miaina amin’nv fahamarinana

Nahatezitra fatratra an'i Jakoba ny fanenjehana nataon’i Labana taminy. Nasehon’i Jakoba anefa fa marina izy. Ny fisavana natao tamin’ny tao antranony sy ny entany dia nanamarina izany (31, 37). Nanatontosa ny asany tamim-pahamarinana izy. Ary toy izany ny asa fanompoana nataon’i Jesoa Kristy, tamin-kitsim-po sy fahamarinana. Meteza ho toy izany koa eo amin’ny asa napetraka ho andraikitrao.Mba ho olona tena mahatoky.

2-     Miaina aniin’nv fahatokiana

Nanatsara ireo teo an-tanany, izay fananan’i Labana no nimasoany.Izany hoe tena azo ametrahana fitokisana tanteraka ka amin’izany dia mandry ivohon’ny vato mihitsy ny tompom-pananana, ary araka ny fantantsika teo dia nandritra ny roapolo taona, izany hoe fotoana maharitra no niainan’i Jakoba tamin’izany fiainanam- pitokisana izany fa tsy mandalo fotsiny ihany. Ny hafatra hafa ihany koa anefa dia izao: na dia manao ny mety aza isika dia tsy maintsy misy foana no manenjika antsika. Nefa tsy atao mampivalaketraka izany satria isika dia miara-dalana amin’Ilay Tompo hatrany ka mampandresy antsika Izy.

Eanontaniana:

Hatraiza ny fiainanao amin’ny fahamarinana sy ny fahatokiana eo amin’ny fanompoana an’Andriamanitra

Alarobia 16 Aogositra 2017 - Rom 8 : 14 - 17

14Eny, izay rehetra tarihin'ny Fanahin'Andriamanitra no zanak'Andriamanitra*. 15Satria tsy fanahy maha mpanompo no voarainareo ka hahatonga anareo hatahotra indray; fa ny Fanahy Masina maha zanak'Andriamanitra no voarainareo, ka ahafahantsika miantso an'Andriamanitra hoe: «Raiko ô8.15 Raiko ô: eto ny rijan-teny grika fototra dia mampiasa ihany koa ny teny aramianina hoe Abbà. Jereo Mk 14.36 sy nta.!» 16Ny Fanahy Masina mihitsy no manambara amin'ny fanahintsika fa zanak'Andriamanitra isika. 17Ary raha zanaka, dia mpandova koa; ka sady mpandova ny soa nampanantenain'Andriamanitra no mpiara-mandova izany amin'i Kristy: satria raha miara-mijaly amin'i Kristy isika, dia hiara-komem-boninahitra8.17 Ampit 2Kôr 4.17; 1Pt 4.13. aminy koa.

Famantarana ny maha-zanak’Andriamanitra

1" Tarihin’nv Fanahin’Andriamanitra 
Eto dia misy karazana fanahy roa izay mandrirotra ny olombelona. Ny iray fanahim-pahandevozana ho amin’ ny tahotra (andl5a), ny iray kosa fanahin’ny zanaka natsangana (andl5b). Tamin’ny alalan’io fanahy io dia voatsangana ho zanany izay nandray Azy. Amin’izay ataony rehetra dia mametraka mandrakariva ny Fanahy Masina ho mpitari-dalana.

2- Mpirav lova ao amin’ i Kristv

Eo amin’ny fianakaviana dia tsy afaka handova amin’ny olona iray ny zanaky ny mpiray tampo aminy, saingy raha voatsangana kosa aty aoriana dia mahazo anjara amin’izany lova izany. I Kristy dia zanak’ Andriamanitra Lahitokana. Nanolotra ny ainy Izy mba hamonjy izao tontolo izao .Nanome hery ho an’izay rehetra nandray Azy mba ho tonga zanak’ Andriamanitra. Rehefa tonga zanak’Andriamanitra, dia mpandova amin’izay manomboka eo, ka afaka miara- manjaka amin’i Kristy ao amin’ny Fanjakan’ Andriamanitra.

Raha te-ho zanak’Andriamanitra ary, dia tsarovy, fa tsy maintsy manaiky ny Fitarihin’ny Fanahy Masina, ary manantena fa handray ny lova izay nampanantenanan’ Andriamanitra homeny izay tia Azy rahatrizay.

Fanontaniana:

Hatraiza ny fahatsapanao izany hasarobidin’ny hoe mpiray lova amin’ i Kristy izany?

Talata 15 Aogositra 2017 - Mat 10 : 21 -23

21Hisy olona hanolotra ny iray tampo aminy hovonoina; hisy raim-pianakaviana hanolotra ny zanany hovonoina; ary hisy zanaka hanohitra ray aman-dreny ka hampanameloka azy ho faty. 22Ho halan'ny olona rehetra ianareo satria miandany amiko; fa izay haharitra hatramin'ny farany dia ho voavonjy. 23Raha enjehina amin'ny tanàna anankiray ianareo, dia mandosira any amin'ny tanàna hafa; eny, lazaiko marina aminareo fa tsy ho tapitra voatetinareo akory ny tanàna eto Israely, dia ho avy ny Zanak'olona*.

Efa nampionona antsika ny Tompo mba hanantsika faharetana eo anatrehan’ny disadisa, lonilony izay taratry ny korontana eo anivon’ny ankohonana sy ny mpianakavy. Eo anatrehan’ireo:

Ny vavolombelon’ ny Tompo dia

1-Mandresv manoloana ny adv atrehany

Efa voasoratra fa “ny rahalahy hanolotra ny rahalahiny mba ho faty, ary ny ray hanolotra ny zanany ary nyzanaka hitsangana hanohitra ny rainy sy ny reniny ka hahafaty azy” (Mat 10,21). Hita taratra ny  fahatanterahan’ ireo eo amin’ny fiaraha-monina. Ny ankohonana Kristiana kosa dia mahatsiaro fa azo atao tsara ny miaina amim-pirahalahina, mandresy ny fifankahalana noho ny fanatrehan’ i Kristy.

2- Manana faharetana

Fifankatiavana, fandeferana, faharetana no toromarika omen’ny Tompo hiatrehana ny fijaliana .Tsy sitraky ny Tompo ny herisetra sy ny valifaty fa fifankatiavana no asetriny ireo.Tsy noteneniny fotsiny fa niainany mihitsy ny hoe: “Izay maharitra hatramin’ny farany no hovonjena” (Mat 10, 22)

Fanontaniana

Hatraiza ny faharetanao manoloana ireo ankohonana na fianankaviana izay tsy mitovy hevitra aminao?

Alatsinainy 14 Aogositra 2017 - Sal 118 : 5 - 18

5Tao an-katerena aho no niantso ny TOMPO,
ka novaliany aho, nomeny halalahana.
6Miandany amiko IZY ka tsy hatahotra aho;
hahavita inona amiko ny olombelona118.6 Voatsiahy ao amin'ny Heb 13.6 ity and ity.?
7Miandany amiko ny TOMPO ka manampy ahy;
ireo mpankahala ahy hitako fa resiny.
8Aleo mialoka amin'ny TOMPO
toy izay mialoka amin'ny olombelona;
9aleo mitoky amin'ny TOMPO
toy izay mitoky amin'ny mpifehy.

10Nanodidina ahy avokoa ireo hafa firenena,
fa ny anaran'ny TOMPO no nandringanako azy.
11Nitangorona tamiko ireo, indray nanarona ahy,
fa ny anaran'ny TOMPO no nandringanako azy.
12Nanodidina ahy toa renitantely ireo,
kanjo nalaky maty toy ny afo-mololo,
fa ny anaran'ny TOMPO no nandringanako azy.

13Natosik'ireo aho mba ho lavo,
fa ny TOMPO no nanampy ahy.
14Ny TOMPO no heriko sy reharehako,
satria Izy no mampandresy ahy118.14 Jereo Eks 15.2; Is 12.2..

15Feo fihobiana sy horakora-pandresena
no ao an-dain'ny olona afaka:
«Naneho hery ny tanan'ny TOMPO,
16nanandratra anay ny tanan'ny TOMPO,
naneho hery ny tanan'ny TOMPO.»

17Tsy ho faty aho fa ho velona
mba hitanisa ny asan'ny TOMPO.
18Nofaizin'ny TOMPO tokoa aho,
kanefa tsy nafoiny ho faty118.18 Jereo 2Kôr 6.9..

Alahady 13 Aogositra 2017 - Dan 3 : 19 - 30

19Dia feno fahatezerana i Nebokadnetsara ka niova endrika tamin'i Sadràka sy i Mesàka ary i Habeda-Negao. Nasainy nafanaina impito mihoatra noho ny famana azy ny lafaoro. 20Ary ireo lehilahy matanjaka indrindra tamin'ny miaramilany no nasainy namatotra an'i Sadràka sy i Mesàka ary i Habeda-Negao sy nanipy azy tao anaty lafaoro misy afo mivaivay. 21Avy hatrany dia nafatotra niaraka tamin'ny lobany sy patalohany ary akanjony sy satrony ireo lehilahy ireo, ka natsipy tao amin'ny lafaoro misy afo mivaivay3.21 Tsy azo antoka ny famantarana ny anaran'ireo karazam-pitafiana voalaza eto.. 22Ary satria hentitra ny tenin'ny mpanjaka dia voafana izaitsizy ny lafaoro, ka matin'ny lelafo mbamin'ny miaramila izay nanipy an'i Sadràka sy i Mesàka ary i Habeda-Negao. 23Fa izy telo lahy ireto kosa dia voatsipy am-patorana tao amin'ny lafaoro misy afo mivaivay3.23 Ny dkt tranainy grika eto dia manampy ny vavak'i Hazarià (and 24-45) sy ny hiran'ny sakaizan'i Daniela telo lahy (and 46-90)..

24Talanjona anefa i Nebokadnetsara ka nitsangana faingana, ary nanontany ireo mpanolotsainy hoe:
–Moa tsy lehilahy telo mifatotra va no natsipintsika tao anaty afo?

Dia hoy ny navalin'ireo3.24 Amin'ny dkt sasany, ny and 24-33 dia mitondra ny laharana 90-100 (jereo ny naoty eo aloha).:
–Izany tokoa, ry mpanjaka!

25Ary hoy indray ny mpanjaka:
–Koa nahoana àry aho no mahita lehilahy efatra tsy mifatotra, mandehandeha ao anaty afo, nefa tsy misy maratra akory; sady ilay fahefatra dia mitovy endrika amin'ny zanak'ireo andriamanitra?

26Dia nanatona ny varavaran'ny lafaoro misy afo mivaivay i Nebokadnetsara ka niantso hoe:
–Ry i Sadràka sy i Mesàka ary i Habeda-Negao mpanompon'Andriamanitra Avo Indrindra ô, mivoaha tao ianareo ka avia atỳ!

Niaraka tamin'izay dia nivoaka avy tao anaty afo i Sadràka sy i Mesàka ary i Habeda-Negao. 27Dia nitangorona ireo solotenan'andriamanjaka sy ny mpifehy faritany ary ny governora sy ireo mpanolotsain'ny mpanjaka mba hijery ireo lehilahy ireo; ka hitany fa tsy nampaninona ny tenan'izy ireo akory ny afo, tsy may ny volon-dohany, tsy simba ny fitafiany sady tsy maimbo afo akory.

28Dia loa-bolana i Nebokadnetsara ka nanao hoe:
–Hisaorana anie Andriamanitr'i Sadràka sy i Mesàka ary i Habeda-Negao; naniraka ny anjeliny* manko Izy mba hamonjy ny mpanompony izay natoky Azy, ka nandika ny baiko nataoko. Fa naleon'ireo kosa nanolo-tena hampijalina toy izay hanompo sy hitsaoka andriamani-kafa ankoatra ilay Andriamaniny. 29Noho izany dia mamoaka izao didy izao ho an'ny foko sy firenena ary samy hafa fiteny rehetra aho hoe: «Izay manao teny tsy voahevitra ny amin'ny Andriamanitr'i Sadràka sy i Mesàka ary i Habeda-Negao dia hotetitetehina ary hatao fanariam-pako ny tranony; fa tsy misy andriamani-kafa mahavonjy tahaka izao.»

30Dia nasandratry ny mpanjaka i Sadràka sy i Mesàka ary i Habeda-Negao ho amin'ny toerana ambony noho ny teo aloha3.30 Dkt hafa Taorian'izany dia naverin'ny mpanjaka tamin'ny toerany teo aloha i Sadràka sy i Mesàka ary i Habeda-Negao. tao amin'ny faritanin'i Babilôna.

Sabotsy 12 Aogositra 2017 - Job 42 : 10 - 17

10Rehefa avy nivavaka ho an'ireo namany i Jôba, dia naverin'ny TOMPO hanan-karena indray42.10 hanan-karena indray: jereo Jôb 1.1-3. ary nomeny indroan'izay rehetra nananany fahiny aza. 11Dia tonga namangy an'i Jôba avokoa ny rahalahiny sy ny anabaviny mbamin'ny olom-pantany fahiny, ka niara-nihinana taminy tao an-tranony. Naneho fiombonana taminy koa ireo sady nampionona azy noho ny loza rehetra nalefan'ny TOMPO taminy. Ary samy nanolotra fanomezana vola kesita42.11 kesita iray: ny teny ampiasaina eto (sy ao amin'ny Gen 33.19; Jos 24.32) dia manondro fa ny teti-bidin'io vola io dia mitovy amin'ny vidin'ny ondrivavy iray. iray sy rojo volamena iray avy ho azy izy rehetra.

12Nandritra ny taona sisa niainan'i Jôba, dia heniky ny fitahian'ny TOMPO mihoatra noho ny taloha izy, fa nanana ondry 14000, rameva enina arivo, omby miasa roa arivo ary borikivavy arivo izy. 13Nanan-janakalahy fito ary zanakavavy telo koa izy, 14ka ny vavimatoa nataony hoe Jemimà, ny vaviaivo Ketsihà ary ny faravavy Kerena-Hapòka42.14 Izany hoe domohina, vonin-kanelina ary manja-maso.. 15Tao amin'ny tany iray manontolo dia tsy nisy vehivavy tsara tarehy tahaka ireo zanakavavin'i Jôba. Ary samy nomen-drainy ny anjara lovany tahaka ireo anadahiny avy izy.

16Taorian'izany dia mbola velona efapolo amby zato taona i Jôba ka nahita ireo zanany sy zafikeliny hatramin'ny zafindohaliny. 17Dia maty i Jôba rehefa ela niainana ka tratrantitra.

Zoma 11 Aogositra 2017 - II Tim 2 : 8 - 13

8Tsarovy i Jesoa Kristy, Izay nipoitra avy amin'ny taranak'i Davida sady efa nitsangana velona avy tany amin'ny maty, araka ny Vaovao Mahafaly* torîko. 9Noho ny fitoriako izany Vaovao Mahafaly izany no ijaliako, ary igadrako toy ny mpanao ratsy aza. Kanefa ny tenin'Andriamanitra tsy mba voagadra. 10Izany no iaretako ny mafy rehetra ho fanasoavana ireo olomboafidin'Andriamanitra, mba hahazoan'ireo koa famonjena, dia ilay ao amin'i Kristy Jesoa, mbamin'ny voninahitra maharitra mandrakizay. 11Azo antoka izao teny izao:

«Raha niara-maty tamin'i Kristy isika,
dia hiara-belona aminy koa;
12raha miaritra ny mafy isika,
dia hiara-manjaka aminy koa;
fa raha lavintsika Izy,
dia mba holaviny koa isika;
13raha mivadika aminy isika,
Izy dia mahatoky hatrany
satria tsy afa-mandà ny tenany»

Alakamisy 10 Aogositra 2017 - Jos 21 : 41 - 45

41Ny tanàna rehetra azon'ny Levita teo anivon'ny tanin'ny Israelita hafa dia 48 no isany. 42Ireo tanàna rehetra ireo dia samy manana ny kijàna manodidina azy avy.

43Nomen'ny TOMPO ho an'ny Israelita ny tany manontolo, izay efa nianianany homena ny razambeny: dia azony ho fananany tokoa izany ka nonenany. 44Nampisy fandriam-pahalemana ho azy koa ny TOMPO tamin'ny sisin-tany manodidina azy, araka ny fianianana rehetra efa nataony tamin'ny razambeny. Nampandresen'ny TOMPO ireo fahavalony rehetra izy ka tsy nisy nahatohitra azy mihitsy ireny na iray aza. 45Tanteraka avokoa ny zava-tsoa rehetra nambaran'ny TOMPO tamin'ny Israelita fa tsy nisy latsaka.