Alarobia 31 Desambra - Sal 14 : 12 - 17

1 Tao amin'ny tahirin-kiran'ny filohan'antoko-mpihira*. Salamo nataon'i Davida. Adala izay miteny anakampo hoe: «Tsy misy Andriamanitra!» Maneho toetra lo sy maharikoriko ireo sady tsy mba misy manao ny tsara. 2Avy eny an-danitra eny ny TOMPO no miondrika hijery ny olombelona, hizaha sao mba misy olon-kendry izay mitady Azy tokoa. 3Fa izy rehetra no mania ka samy tsy valahara avokoa; tsy mba misy manao ny tsara, na dia iray akory aza! 4Hoy kosa ny TOMPO hoe: «Tena tsy mahalala mihitsy ny mpanao ratsy rehetra fa fitsentsefana ny vahoakako no ataony foto-pivelomana, sady Izaho tsy antsoiny akory!» 5Indreo fa matahotra dia matahotra ireny, satria ny mpivavaka iandanian'Andriamanitra. 6«Nataonareo tsinontsinona ny fikasan'ny ory, kanefa ny TOMPO ange no fialofany.» 7Hivoaka avy ao Tsiôna* anie ny famonjena an'i Israely! Ka hifaly sy hiravo ny taranak'i Jakôba, dia ny vahoaka Israely tsivakivolo, rehefa hambinin'ny TOMPO indray izy.

Talata 30 Desambra 2014 - Jer 31 : 15 - 20

15Izao no lazain'ny TOMPO: Nisy fitarainana heno tao Ramà, dia fitomaniana sy fidradradradrana mafy. I Rahely no mitomany ny zanany; ka tsy mety nampiononina izy satria tsy eo intsony ny zanany.» 16Kanefa izao no lazain'ny TOMPO azy: «Atsaharo ny fitarainanao ary fafao ny ranomasonao fa hovaliako soa ny fisasaranao, hoy ny teny hentitra avy amiko TOMPO. Satria ireny zanakao ireny dia hiverina avy any an-tanin'ny fahavalony. 17Koa misy fanantenana ho an'ny taranakao, hoy ny teny hentitra ambarako, hiverina ao an-tanindrazany ny zanakao. 18Reko tsara mihitsy ny olon'i Efraîma nitaraina hoe: ‹TOMPO ô, nofaizinao izahay ary dia manaiky hofaizinao tahaka ny ombilahy tanora tsy tena folaka. Nefa ampodio aminao izahay mba hiverenanay tokoa aminao, satria Ianao, TOMPO ô, no Andriamanitray. 19Eny, niodina taminao izahay nefa anenenanay kosa izany. Nampahafantarinao anay ny fahadisoanay, ka mandondon-tratra izahay ankehitriny. Menatra sady mangaihay ny tenanay; manala baràka anay ny fahatanoranay ka hozakainay ny vokany.› 20I Efraîma no zanakalahy mamiko, hoy ny teny hentitra avy amiko TOMPO, zanaka malalako indrindra izy. Isaky ny manameloka azy Aho, dia mahatsiaro azy hatrany ka manjary mangoraka azy ary dia mamindrafo aminy tokoa.

Alatsinainy 29 Desambra 2014 - Mat 2 : 13 - 18

13Rehefa lasa nody ireo olon-kendry, dia nisehoan'anjelin*'ny Tompo tamin'ny nofy i Jôsefa ka nilazany hoe: –Mifohaza ianao, ka ento mandositra any Ejipta ny zazakely sy ny reniny; ary mitoera any ambara-pilazako aminao indray. Fa efa hotadiavin'i Herôda* ny zazakely mba hamonoany azy. 14Dia nifoha i Jôsefa ka nitondra ny zazakely sy ny reniny nankany Ejipta dieny mbola alina. 15Ary nitoetra tany i Jôsefa telo mianaka ambara-pahafatin'i Herôda; koa tanteraka ilay voalazan'ny Tompo tamin'ny alalan'ny mpaminany* hoe:«Avy any Ejipta no niantsoako ny zanako!» 16Tamin'izay dia tsinjon'i Herôda* fa voafitak'ireo olon-kendry izy ka tena vinitra. Ary naniraka olona izy hamono tsy an-kanavaka ny zazalahikely tao Betlehema sy ny manodidina rehetra, hatramin'ny roa taona no ho midina, araka ilay fotoana nofotopotoriny tsara tamin'ireo olon-kendry. 17Tamin'izay no tanteraka ilay voalazan'ny Tompo tamin'ny alalan'i Jeremià mpaminany* hoe: 18«Injay nisy fitomaniana sy dradradradra tsy anerany heno tao Ramà: I Rahely no nitomany ny zanany, ka tsy nety nampiononina satria tsy eo intsony ireny!»

Alahady 28 Desambra 2014 - Rom 8 : 18 - 25

18Heveriko fa tsy mendrika hohàrina amin'ny voninahitra izay haseho ao amintsika ny fijaliana amin'izao andro izao. 19Fa tsindrian-daona erỳ ny zavaboaary miandry ny hanehoan'Andriamanitra an'ireo zanany*. 20Fa tonga nanaiky ho zavatra tsinontsinona ny zavaboaary, tsy araka ny nahiny anefa, fa noho ilay nampanaiky azy toy izany. Saingy eo ny fanantenana: 21Fa ny zavaboaary koa aza dia hoafahana tsy ho andevon'ny fahasimbana indray andro any ka handray anjara amin'ny fahafahana be voninahitra hananan'ireo zanak'Andriamanitra. 22Saingy fantatsika fa mandraka ankehitriny, ny zavaboaary manontolo dia miara-misento sy mijaly toy ny vehivavy mihetsi-jaza. 23Ary tsy ny zavaboaary ihany; fa isika koa, izay manana ny Fanahy Masina ho santatry ny fanomezan'Andriamanitra, dia misento ao anatintsika ao, miandry ny hanaovan'Andriamanitra antsika ho zanany ka hanavotany tanteraka ny tenantsika. 24Eny, efa voavonjy isika saingy mbola amin'ny fanantenana; ny mahita izay nantenaina dia tsy manantena intsony; satria iza no mbola hanantena izay zavatra efa hitany? 25Fa raha manantena ny tsy hitantsika isika, dia miandry amim-paharetana.

Sabotsy 27 Desambra 2014 - Sal 18 : 1 - 6

1 Tao amin'ny tahirin-kiran'ny filohan'antoko-mpihira*. Hira nataon'i Davida mpanompon'ny TOMPO. Notononiny hanomezam-boninahitra ny TOMPO ireto teny ireto fony izy nafahany tamin'ny fahavalony rehetra, indrindra tamin'i Saoly. 2TOMPO ô, tiako Ianao fa Ianao no heriko! 3Ny TOMPO no harambato fierena azo antoka ho ahy. Izy no Andriamanitro sy vatolampy ialofako, ampinga fiarovana sy mpamonjy mahery ho ahy. 4Hoderaina anie ny TOMPO! Fa niantso Azy aho, dia voavonjy ho afaka amin'ny fahavaloko. 5Toy ny fatotra mangeja ahy ny fahafatesana sady nampitahotra ahy toa riaka mandrava; 6toy ny fatotra ahodidina ahy ny fonenan'ny maty, toa harato amandrihana ahy ny fahafatesana.

Zoma 26 Desambra 2014 - Heb 1 : 1 - 6

1Efa imbetsaka ary tamin'ny fomba samihafa no nitenenan'Andriamanitra fahiny tamin'ny razantsika tamin'ny alalan'ireo mpaminany*; 2fa amin'izao andro farany izao kosa dia tamin'ny alalan'ny Zanany* no nitenenany tamintsika. Io Zanany io no naharian'Andriamanitra izao tontolo izao*, ary notendreny koa ho mpandova ny zavatra rehetra. 3Taratra mamirapiratry ny voninahitr'Andriamanitra sady famantarana velona izay tena toetra amam-pomban'Andriamanitra Izy; ary ny teniny manan-kery no ihazonany ny zavatra rehetra. Nony avy nanadio ny olona ho afaka amin'ny fahotany Izy, dia nipetraka any amin'ny avo indrindra eo ankavanan'ilay Andriamanitra lehibe.

4Tonga ambony lavitra noho ny anjely ny Zanaka*, satria nandova anarana tsara noho ny an'ireo. 5Fa tsy nisy na oviana na oviana anjely nilazan'Andriamanitra hoe:
             «Zanako Ianao,
               Ray niteraka Anao Aho manomboka anio!»
Ary koa hoe:
             «Izaho ho Rainy,
               ary Izy ho Zanako!»
6Rehefa nampiditra ny Zanany lahimatoa ho eto amin'izao tontolo izao* Andriamanitra, dia niteny hoe:
            «Aoka ny anjelin'Andriamanitra rehetra
              hiankohoka eo anatrehany!»

Alakamisy 25 desambra 2014 - Isa 11 : 10 - 16

10Amin'izany andro izany ny solofon'i Jisay
dia hatsangana ho fanevan'ny firenena rehetra;
ka hitady azy ny firenen-kafa,
ary hanjary be voninahitra ny fonenany.

11Amin'izany andro izany ny Tompo
dia haninjitra ny tanany indray
mba hanavotra izay sisa velona amin'ny vahoakany,
dia izay sisa velona avy any Asiria,
avy any Ejipta ambany sy ambony ary avy any Etiôpia,
avy any Helama sy Babilônia ary avy any Hamata
na avy amin'ireo tany amoron-dranomasina.
12Hanangana faneva ny Tompo
mba hahafantaran'ny hafa firenena
fa hamory ireo sesitany tamin'i Israely Izy
ary hanangona ireo niely patrana tamin'i Joda
avy any amin'ny vazan-tany efatra.
13Hitsahatra ny fialonan'i Efraîma
ary ho foana ny fankahalàn'i Joda:
i Efraîma tsy hialona an'i Joda intsony
ary i Joda tsy hankahala an'i Efraîma intsony.
14Dia hiara-kirohotra hiankandrefana
eny amin'ny havoan'ny Filistinina izy roa tonta
ary handeha hiantsinanana
handroba ny foko any an-taniefitra,
ka hanitatra ny fahefàny amin'i Edôma sy i Môaba
ary hametraka ny Hamônita ho eo ambany fifehezany.
15Handritra ny helo-dranomasin'i Ejipta ny TOMPO;
haninji-tanana handrahona ny ony Eofrata Izy,
ka ny rivo-mahery avy aminy no hizaràny azy
hisampantsampana ho sakeli-drano fito
izay ho azo diavin-tongotra tsy miala kapa.
16Hisy lalana ho an'ny sisa velona amin'ny vahoakany,
dia izay sisa velona avy any Asiria,
tahaka izay niseho fahiny tamin'i Israely
fony izy niakatra avy tany Ejipta.

Alarobia 24 Desambra 2014 - Lio 2 : 8 - 14

8Tany amin'izany faritany izany, dia nisy mpiandry* ondry nitoetra tany an-tsaha niambina ny ondriny nandritra ny alina. 9Nisy anjeli*n'ny Tompo niseho tampoka taminy; ary nohodidinin'ny voninahitry ny Tompo ireo mpiandry ondry ka raiki-tahotra izaitsizy. 10Fa hoy ilay anjely taminy:

–Aoka izay ny tahotra, fa vaovao mahafaly no entiko ho anareo, dia fifaliana lehibe ho an'ny vahoaka rehetra: 11Mpamonjy no teraka ho anareo anio ao an-tanànan'i Davida, dia i Kristy Tompo. 12Izao no hahafantaranareo Azy: hahita zazakely anankiray voahodidina lamban-jaza sady mandry eo amina fihinanam-bilona ianareo.

13Ary nisy anjely alikisa avy any an-danitra niseho niaraka tamin'ilay anjely teo ka nidera an'Andriamanitra nanao hoe:

             14«Voninahitra any amin'ny avo indrindra
                   ho an'Andriamanitra;
                   ary fiadanana etỳ an-tany ho an'ny olombelona
                   fa nanehoany fitia!»

Talata 23 Desambra 2014 - II Sam 7 : 18 - 24

18Ary nankeo anatrehan'ny TOMPO tao an-tranolay i Davida mpanjaka, ka nipetraka sady nivavaka hoe:

–Ry Tompo ANDRIANANAHARY ô, mba iza moa aho ary mba inona ny fianakaviako, no tonganao amin'ny toerana misy ahy izao? 19Kanefa mbola kely izany eo imasonao, ry Tompo ANDRIANANAHARY ô, ka efa nanaovanao fampanantenana koa hatramin'ny taranako mbola any aoriana lavitra any. Araka ny fomban'olombelona ve izany, ry Tompo ANDRIANANAHARY ô? 20Koa inona indray no mbola holazaiko aminao? Fa Ianao, ry Tompo ANDRIAMANITRA ô, mahalala ahy mpanomponao. 21Noho ny fampanantenànao sy araka ny sitraponao no nanaovanao izao asa lehibe manontolo izao hampahalalainao ahy. 22Lehibe Ianao amin'izany, ry Tompo ANDRIANANAHARY ô: fa tsy misy tahaka Anao ary tsy misy Andriamanitra afa-tsy Ianao, araka izay rehetra ren'ny sofinay. 23Moa misy eto an-tany firenena tahaka an'i Israely vahoakanao? Dia ilay firenena navotanao ho afaka tamin'ireo Ejiptianina sy ireo andriamaniny mba ho tonga vahoakanao ka nomenao laza tamin'ny nanatanterahanao izao asa lehibe izao ho azy ary zava-mahatahotra ho an'ny taninao. 24Nampiorina mafy an'i Israely ho vahoakanao mandrakizay Ianao, TOMPO ô, sady efa tonga Andriamaniny.

Alatsinainy 22 Desambra 2014 - Lio 1 : 39 - 56

39Niainga i Maria tamin'izany andro izany, ka nandeha faingana ho any amin'ny tanàna anankiray anatin'ny faritra be havoana any Joda, 40ary namantana tao an-tranon'i Zakarià ka niarahaba an'i Elizabeta. 41Vantany vao henon'i Elizabeta niarahaba azy i Maria, dia injao nibita-karavoana ilay zaza tao an-kibon'i Elizabeta; ary feno ny Fanahy Masina i Elizabeta 42ka nanandra-peo niantso mafy hoe:

–Nombàn'Andriamanitra fitahiana amin'ny samy vehivavy ianao, ary nombàny fitahiana koa Ilay haterakao! 43Zinona moa aho no mba vangian'ny renin'ny Tompoko? 44Fa indro vantany vao henoko niarahaba ahy ianao, dia nibitaky ny haravoana tokoa ny zaza tao an-kiboko. 45Ary sambatra ianao nino fa ho tanteraka izay nampilazain'ny Tompo taminao!
Midera an'Andriamanitra i Maria

46Ary hoy i Maria:

–Mankalaza ny Tompo ny fanahiko,
47ary ny aiko miravo amin'Andriamanitra Mpamonjy ahy,
48noho Izy nitsinjo ahy mpanompovaviny tsinontsinona!
Eny, hatramin'izao dia hambaran'ny taranaka rehetra
hoe sambatra aho,
49fa zava-dehibe no nataon'ilay Mahery tamiko.
Masina ny anarany!
50Ary hamindra fo hatramin'ny taranaka mifandimby ireo manaja Azy.
51Nanatanterahany asa lehibe ny sandriny mahery;
ka ny mpihevi-tena ho ambony nataony mihahaka.
52Ny mpanjakazaka naongany hiala tamin'ny
sezafiandrianany;
ny tsinontsinona kosa nasandrany.
53Ny noana novokisany zava-tsoa;
ny mpanankarena kosa nalefany nody maina.
54-55Niahy ny vahoaka Israely* mpanompony Andriamanitra,
satria nahatsiaro ny teniny tamin'ny razantsika;
dia ny hamindra fo mandrakizay
amin'i Abrahama sy ny taranany.

56Nitoetra tokony ho telo volana tao amin-dry Elizabeta i Maria vao lasa nody.

Alahady 21 Desambra 2014 - Tit 3 : 3 - 7

3Fa isika koa taloha mba adala, tsy nanaiky, naniasia; efa nandevozin'ny filàna sy fahafinaretana isan-karazany isika, lany andro tamin'ny haratsiam-panahy sy ny fialonana, sady ankahalain'olona no mankahala olona. 4Fa nony efa naneho ny hamoram-pony sy ny fitiavany olona ilay Andriamanitra Mpamonjy antsika, 5dia novonjeny isika, tsy noho ny asa marina vitantsika, fa noho ny famindrampony tamintsika. Ny namonjeny antsika dia tamin'ny alalan'ny rano fampandroana izay nanomezan'ny Fanahy Masina antsika fahateraham-baovao sy fiainam-baovao. 6Fa nandrotsahan'Andriamanitra be dia be ny Fanahy Masina isika tamin'ny alalan'i Kristy* Jesoa Mpamonjy antsika, 7hahatonga antsika ho marina eo anatrehan'Andriamanitra noho ny fahasoavan'i Kristy sy hahatonga antsika hanana anjara amin'ny fiaina-maharitra mandrakizay efa antenaintsika.

Sabotsy 20 Desambra 2014 - Sal 54 : 4 - 7

4Andriamanitra ô, henoy ny fivavako;
mba mampandria sofina amin'ny teniko.

5Fa olona hafa firenena no mitsangan-kamely ahy,
olon-dozabe no mitady hahafaty ahy
tsy miraharaha Anao akory ireo.
Fiatoana*

6Indro kosa Andriamanitra manampy ahy,
ny Tompo no hany mpanohana ahy;

7Izy anie hamaly ny ratsy ataon'ny mpitsikilo ahy!
Aringano ireo satria mahatoky tokoa Ianao.

Zoma 19 Desambra 2014 - II Tes 2 : 13 - 17

13Tsy maintsy velom-pisaorana mandrakariva an'Andriamanitra izahay ny aminareo, ry havana notiavin'ny Tompo. Fa nofidin'Andriamanitra ho toy ny santa-bokatra hatolotra Azy ianareo, ka hahazo famonjena noho ianareo voatokan'ny Fanahy Masina mba ho an'Andriamanitra ary noho ianareo nino ny hafatra marim-pototra. 14Izany no niantsoan'Andriamanitra anareo, tamin'ny alalan'ny Vaovao Mahafaly* notorînay, mba hahazoanareo miombom-boninahitra amin'i Jesoa Kristy* Tompontsika. 15Koa mamahara tsara, ry havana, ary tano ny fampianarana natolotray anareo am-bava na an-taratasy. 16Enga anie i Jesoa Kristy Tompontsika sy ilay Andriamanitra Raintsika Izay efa tia antsika ka nanome antsika fampiononana mandrakizay sy fanantenana tsara tamin'ny alalan'ny fahasoavany 17hampionona ny fonareo ary hampahery anareo hanao izay tsara rehetra na amin'ny asa na amin'ny teny.

Alakamisu 18 Desambra 2014 - Sal 13

1 Tao amin'ny tahirin-kiran'ny filohan'antoko-mpihira*. Salamo nataon'i Davida.

2TOMPO ô, mandra-pahoviana
no mbola hanadinoanao ahy,
ary mandra-pahoviana koa
no tsy hanekenao hijery ahy?
3Mandra-pahoviana aho no hiferinaina
ka halahelo am-po isan'andro izao?
Mandra-pahoviana ny fahavaloko
no mbola hisandratra ho amboniko?

4TOMPO Andriamanitro ô,
mba jereo aho ka valio vavaka.
Avereno tanjaka sy hery aho,
fandrao dia ho renoka tokoa
ho amin-torimasom-pahafatesana,
5fandrao koa ny fahavaloko
no hihambo ho naharesy ahy;
ary dia hibitaka ireo mpanohitra
fa hoe nampilavo lefona ahy.

6Ny fitiavanao kosa no ianteherako,
ny famonjenao no hiravoako.
TOMPO ô, hihira ho voninahitrao aho
noho ny soa nataonao tamiko.

Alarobia 17 Desambra 2014 - Jao 10 : 22 - 30

22Ririnina ny andro tamin'izay ary notontosaina tao Jerosalema ny fankalazana ny Fitokanana*. 23I Jesoa dia nitsangantsangana tao an-kianjan'ny tempoly*, teo amin'ny lala-mitafon*'i Salômôna.

24Koa nitangoronan'ny Jiosy Izy nanontaniany hoe:
–Ambara-pahoviana no hampisalasalanao anay? Raha Ianao tokoa no ilay Mesia*, mba lazao mazava aminay!

25Dia hoy i Jesoa taminy:
–Efa nilaza taminareo Aho, nefa tsy mino ianareo; ny asa izay ataoko amin'ny anaran'ny Raiko dia mijoro ho vavolombelona manambara Ahy, 26nefa ianareo tsy mino satria tsy mba isan'ny ondriko*. 27Ireo ondriko mihaino ny feoko: Izaho mahafantatra ny ondriko, ary izy manaraka Ahy. 28Izaho no manome azy ny aina maharitra mandrakizay ka tsy ho very izy na oviana na oviana, ary tsy hisy haharombaka azy eo an-tanako. 29Ny Raiko Izay nanolotra azy tamiko dia lehibe noho ny rehetra, ka tsy misy olona maharombaka azy eo an-tanan'ny Ray. 30Izaho sy ny Ray dia iray ihany.

Talata 16 Desambra 2014 - Jao 14 : 1 - 3

1Ary hoy i Jesoa tamin'ny mpianany:

–Aoka tsy hangorohoro ny fonareo: minoa an'Andriamanitra ianareo, ary mino Ahy koa. 2Misy fonenana maro ao an-tranon'ny Raiko; raha tsy izany, dia ho nilaza taminareo ve Aho fa handeha hamboatra toerana ho anareo? 3Ary rehefa lasa Aho ka voavoatra ny toerana ho anareo, dia hiverina Aho haka anareo ho eo anilako; ka izay misy Ahy no hisy anareo koa.

Alatsinainy 15 Desambra 2014 - Asa 4 : 8 - 12

8Feno Fanahy Masina i Petera tamin'izay ka nanao hoe:

–Ry mpifehy ny vahoaka sy ry loholona, 9raha adinina izahay anio satria nanasoa lehilahy kilemaina anankiray ary anontaniana ny fomba nahasitranany, 10dia izao no aoka ho fantatrareo rehetra mbamin'ny vahoaka Israely* manontolo: salama tsara io lehilahy manoloana anareo io noho ny anaran'i Jesoa Kristy* avy any Nazareta, Izay nohomboanareo tamin'ny hazofijaliana kanefa natsangan'Andriamanitra ho velona avy any amin'ny maty.

11I Jesoa no Ilay voalazan'ny Soratra Masina* hoe:
     «Ny vato nolavinareo mpanao trano
       no nanjary vato fehizoro!»

12Ao aminy no hany ahazoam-pamonjena; eny, tsy misy eto ambanin'ny lanitra anarana hafa nomen'Andriamanitra ny olona, izay hahazoantsika famonjena!

Alahady 14 Desambra 2014 - Sal 62 : 1 - 8

1 Tao amin'ny tahirin-kiran'i Jedotòna filohan'antoko-mpihira.* Salamo nataon'i Davida.

2Andriamanitra irery no iadanako;
avy aminy ny famonjena ahy.
3Izy irery no Vatolampy ahazoako famonjena,
fiarovana avo ho ahy ka tsy hihontsona aho.

4–Ianareo kosa, mandra-pahoviana
no hifarimbona hamely olona
ka hiara-mioko handrodana azy
ho toa rindrina mirona sy fefy mikoa?
5Ny hany itadiavanareo hanongana azy
dia satria izy manana toerana ambony.
Fitaka no zavatra mba maminareo:
am-bava mirary soa*, fa am-po manozona.

6Andriamanitra irery no iadanako
satria Izy mihitsy no antenaiko.
7Izy irery no Vatolampy ahazoako famonjena,
fiarovana avo ho ahy ka tsy hihontsona aho.
8Miankina amin'Andriamanitra
ny famonjena ahy sy ny voninahitro;
Andriamanitra no Vatolampy
ianteherako mafy sy fialofako.

Sabotsy 13 Desambra 2014 - Lio 18 : 1 - 8

1Nanaovan'i Jesoa fanoharana* avy eo ny mpianany* hanehoana fa tsy maintsy mivavaka lalandava, ka tsy tokony ho kivy na oviana na oviana.

2Hoy Izy hoe:

–Nisy mpitsara tsy nanan-tahotra an'Andriamanitra na hena-maso olona tao an-tanàna anankiray izay. 3Nisy koa tao amin'io tanàna io vehivavy anankiray mpitondratena, niverimberina tao amin'ilay mpitsara nanao hoe: «Omeo rariny amin'ilay miady amiko aho!» 4Elabe ilay mpitsara tsy niraika; nefa nony farany, dia nanao anakampo hoe: «Marina tokoa fa raha izaho dia tsy manan-tahotra an'Andriamanitra na hena-maso olona. 5Kanefa mandreraka ahy ny ataon-dravehivavy ity, ka homeko rariny izy mba tsy hiverimberina foana hanorisory ahy!»

6Ary hoy ny Tompo:

–Henoy kely ny ambaran'ilay mpitsara ratsy fanahy! 7Ka dia Andriamanitra indray ve no tsy hanome rariny ny olom-boafidiny mitaraina andro aman'alina aminy? Ary hampiandry lava azy ireo ve Izy? 8Lazaiko aminareo fa hanome rariny azy faingana Andriamanitra. Kanefa rahatrizay tonga ny Zanak'olona*, moa hahita finoana eto an-tany ve Izy?

Zoma 12 Desambra 2014 - Isa 12 : 1 - 6

1Amin'izany andro izany,
ry olona voaavotra,
dia hiteny ianao ka hanao hoe:
«Midera Anao aho, TOMPO ô;
fa na tezitra tamiko aza Ianao,
dia afaka ny fahatezeranao
ka nampionona ahy Ianao.

2Indro Andriamanitra namonjy ahy,
matoky Azy aho ka tsy mangovitra intsony.
Ny TOMPO no heriko sy fidèrako,
fa Izy no mpamonjy ahy.»
3Amim-pifaliana no hantsakanareo
eo amin'ny loharanom-pamonjena.

4Amin'izany andro izany
dia hiteny ianareo ka hanao hoe:
«Miderà ny TOMPO, antsoy ny anarany,
ambarao amin'ny vahoaka rehetra ny asany,
ampahatsiarovy azy
fa tsy hay takarina ny anarany.
5Ankalazao an-kira ny TOMPO
fa asa lehibe no nataony;
ary aoka hampahafantarina eran-tany izany!»
6Mifalia sy miravoravoa,
ry mponina ao Tsiôna*,
fa lehibe Ilay eo anivonareo,
dia Ilay Masin'i Israely.

Alakamisy 11 Desambra 2014 - Apo 12 : 7 - 12

 7Dia nisy ady nitranga tany an-danitra: i Mikaela sy ny anjeliny* no niady tamin'ilay dràgona; ary niady ilay dràgona mbamin'ny anjeliny. 8Kanefa resy ilay dràgona, sady tsy nahazo nitoetra tany an-danitra intsony. 9Ary nazera ilay dràgona, dia ilay bibilava fahizay, ilay atao hoe devoly* na hoe Satàna*, izay mamitaka izao tontolo rehetra izao; nazera tamin'ny tany izy ary nazera niaraka taminy koa ireo anjeliny. 10Dia reko nisy feo mahery tany an-danitra nanao hoe: «Tonga izao ny famonjena sy ny hery ary ny fanjakàn'ilay Andriamanitsika, tonga izao ny fahefàn'ilay Mesiany*; satria nazera ilay mpiampanga an'ireo havantsika, dia ilay mpiampanga azy ireo andro aman'alina teo anatrehan'Andriamanitsika. 11Ireo havantsika kosa dia naharesy ilay mpiampanga, ka ny ra nafoin'ny Zanakondry sy ny tenin'Andriamanitra nijoroan'izy ireo ho vavolombelona no nandreseny azy; ary tsy nankamamy ny ainy intsony ireo na dia ho faty aza. 12Noho izany, mifalia, ry lanitra sy ianareo monina ao aminy. Mampalahelo ianareo, ry tany aman-dranomasina, fa nidina any aminareo ny devoly sady misafoaka mafy, satria fantany fa kely sisa ny androny!»

Alarobia 10 Desambra 2014 - Jao 6 : 34 - 40

34Ka hoy ny vahoaka tamin'i Jesoa:
–Tompo ô, omeo anay mandrakariva izany mofo izany!

35Ary hoy i Jesoa taminy:
–Izaho no mofo manome ny aina! Izay manatona Ahy tsy mba ho noana intsony, ary izay mino Ahy tsy mba hangetaheta intsony; 36saingy voalazako taminareo fa efa mahita Ahy ianareo, nefa tsy mino. 37Izay rehetra omen'ny Ray Ahy no hanatona Ahy; ary izay hanatona Ahy dia tsy horoahiko any ivelany, 38satria nidina avy tany an-danitra Aho tsy hoe hanao ny sitrapoko fa hanao ny sitrapon'Ilay naniraka Ahy. 39Izao no sitrapon'Ilay naniraka Ahy: dia ny tsy hamelako hisy very izay rehetra nomeny Ahy, fa ny hananganako azy ho velona amin'ny andro farany. 40Eny, izao no sitrapon'ny Raiko: dia ny hahavelona aina mandrakizay ny olona rehetra mibanjina sy mino ny Zanaka; ary Izaho dia hanangana azy ho velona amin'ny andro farany.

Talata 09 Desambra 2014 - I Tim 4 : 6 - 10

6Raha izany torohevitra izany no arosonao ny havana iray finoana, dia ho mpanompo tsaran'i Kristy Jesoa ianao, ka hiharihary fa mivelona amin'ireo teny momba ny finoana sy ny fampianarana tsara izay efa narahinao ianao. 7Aoka ianao tsy hiraharaha izay angano manazimba fivavahana sady tsy misy fotony. Manazara tena amin'ny toe-panahy araka an'Andriamanitra. 8Ny fampiasan-tena ara-batana dia mba mahasoa ihany, nefa tsy dia manao ahoana loatra; fa ny toe-panahy araka an'Andriamanitra kosa dia mahasoa amin'ny zavatra rehetra, satria mampanantena fiainana na ankehitriny na amin'ny ho avy. 9Azo antoka izany teny izany, ka mendrika hankatoavina tanteraka. 10Eny, izany no ikelezanay aina sy iezahanay, satria ny fanantenanay dia efa napetrakay amin'Andriamanitra velona, Izay Mpamonjy ny olona rehetra, indrindra fa ireo mino.

Alatsinainy 08 Desambra 2014 - Jer 29 : 8 - 15

8«Izao koa no lazain'ny TOMPOn'izao rehetra izao sady ilay Andriamanitr'i Israely: ‹Aza manaiky hofitahin'ireo mpaminany izay eo anivonareo na ireo mpisikidy. Aza mihaino ireo mpilaza nofy izay manazava ny nofinareo. 9Fa mihambo ho maminany amin'ny anarako izy nefa lainga izany, fa tsy naniraka azy akory Aho, hoy ny teny hentitra avy amiko TOMPO.› 10«Izao koa no lazain'ny TOMPO: ‹Rehefa naharitra fitopolo taona ny fanjakan'i Babilôna, dia hirotsaka an-tsehatra Aho noho ny aminareo; ka hotanterahiko ny soa nampantenaiko anareo: haveriko eto Jerosalema ianareo. 11Izaho manko no mahalala ny hevitra omaniko ho anareo, dia hevitra hahatonga fiadanana fa tsy loza. Teny hentitra avy amiko TOMPO izany. Hoavy azo antoka no homeko anareo. 12Amin'izay raha miantso Ahy ianareo ka mivavaka amiko, dia hihaino anareo Aho. 13-14Raha mikatsaka Ahy ianareo, dia hahita Ahy. Izaho TOMPO dia manao teny hentitra aminareo hoe: Raha tadiavinareo amin'ny fonareo manontolo Aho, dia hanaiky ho hitanareo. Hanova izay manjo anareo Aho, ka havoakako avy any amin'ny firenen-kafa ianareo. Hangoniko ianareo ka haveriko eto amin'ny toerana izay nandefasako anareo ho babo, hoy ny teny hentitra avy amiko TOMPO.››

Alahady 07 Desambra 2014 - I Jao 5 : 10 - 15

10Koa izay mino ilay Zanak'Andriamanitra no manana izany zavatra ambara izany ao anatiny; izay tsy mino an'Andriamanitra kosa dia efa nampandainga an'Andriamanitra, satria tsy nino ny zavatra nambarany momba ilay Zanany. 11Ary ny zavatra nambara dia izao: fiaina-maharitra mandrakizay no efa nomen'Andriamanitra antsika ary ao amin'ilay Zanany izany fiainana izany. 12Izay manana ny Zanaka no velona aina; izay tsy manana ny Zanak'Andriamanitra no tsy velona aina.

13Izany no voasoratro ho anareo izay mino ny anaran'ilay Zanak'Andriamanitra*, mba hahafantaranareo fa velona aina mandrakizay ianareo. 14Ary izao no toky ananantsika eo anatrehan'Andriamanitra: raha mangata-javatra araka ny sitrapony isika, dia mihaino antsika Izy; 15ary raha fantatsika fa mihaino antsika Izy na inona na inona angatahintsika, dia fantatsika koa fa azontsika izay angatahintsika aminy.

Sabotsy 06 Desambra 2014 - Dan 3 : 13 - 18

13Tezitra sy nisafoaka mafy i Nebokadnetsara ka nampanalainy i Sadràka sy i Mesàka ary i Habeda-Negao. Rehefa tonga teo anatrehan'ny mpanjaka ireo lehilahy ireo,

14dia nanontany azy i Nebokadnetsara hoe:

–Marina ve ry i Sadràka sy i Mesàka ary i Habeda-Negao fa tsy mety manompo ireo andriamanitro ianareo ary tsy mivavaka amin'ny sarivongana volamena izay natsangako? 15Ankehitriny, mivonòna ianareo, fa amin'ny fotoana izay handrenesanareo ny feon'ny trompetra sy sodina ary kabôsy aman-dokanga mbamin'ny valiha sy farara ary zava-maneno isan-karazany, dia hiankohoka sy hivavaka amin'ny sarivongana izay nataoko ianareo; fa raha tsy mety mivavaka kosa ianareo, dia hatsipy miaraka amin'izay ao anaty lafaoro misy afo mivaivay; ary iza no andriamanitra hahafaka anareo amin'ny fahefàko?

16Dia namaly i Sadràka sy i Mesàka ary i Habeda-Negao ka nanao hoe:

–Ry Nebokadnetsara, tsy misy tokony hamalianay anao akory momba izany. 17Fantaro fa afaka mamonjy anay ny Andriamanitray, dia ilay Andriamanitra izay tompoinay; eny, hanafaka anay amin'ny lafaoro misy afo mivaivay sy amin'ny fahefànao Izy, ry mpanjaka. 18Ary na tsy hataony aza izany, dia aoka ho fantatrao, ry mpanjaka, fa ireo andriamanitrao dia tsy hotompoinay ary ny sarivongana volamena izay natsanganao dia tsy hivavahanay.

Zoma 05 Desambra 2014 - Heb 10 : 32 - 39

32Tsarovy ny nanjo anareo tamin'ny andro fahiny. Fa rehefa nohazavain'Andriamanitra ianareo, dia niharam-pijaliana sy niaritra ady mafy tokoa: 33novetavetaina sy nampahorîna teo imasom-bahoaka ianareo indraindray, na niara-nizaka izay nanjo an'ireo natao toy izany koa indraindray; 34niarahanareo niaritra ny fijalian'izay voafonja; ary nony norobaina ny fanananareo, dia nekenareo tamin-kafaliana izany satria fantatrareo fa manam-pananana tsara lavitra sady maharitra ianareo. 35Koa aza manary ny fahatokianareo fa misy valisoa lehibe izany. 36Ilainareo tokoa ny faharetana mba hanaovanareo ny sitrapon'Andriamanitra ka hahazoanareo izay ampanantenainy. 37Fa hoy ny Soratra Masina*:
            «Kely foana sisa
              dia ho tonga Ilay tsy maintsy ho avy,
              fa tsy hitaredretra.
              38Ary ny olo-marina eo imasoko noho ny finoana dia ho velona;
              fa raha mihemotra izy, dia tsy sitrako.»
39Isika kosa dia tsy mba naman'izay mihemotra ka ho very fa naman'izay mino ka ho voavonjy.

Alakamisy 04 Novambra 2014 - Sal 27 : 1 - 3

1 Nataon'i Davida.

Ny TOMPO no mpanazava sy mpamonjy ahy,
ka iza no hatahorako?
Ny TOMPO no toy ny manda miaro ny aiko,
ka iza no hangovitako?
2Raha manatona kosa ny olon-dratsy
toy ny biby masiaka hamely ahy,
dia ireo fahavalo mandrafy ahy ireo
no ho lavo hitsikasina amin'ny tany.
3Raha tafika no tonga hanao fahirano,
dia tsy hanan-tahotra akory aho;
ary na misy ady mihatra amiko aza,
dia handry fahalemana ihany aho.

Alarobia 03 Desambra 2014 - Lio 12 : 32 - 34

32–Aza matahotra, ry andian'ondry vitsy, fa efa sitraky ny Ray homena anareo ny Fanjakany*! 33Amidio ny fanananareo ka ny vola azo, anaovy asa fiantrana. Kitapom-bola tsy mety tontan'ny ela atao ho anareo, dia harena tsy mety lany any an-danitra; any tsy mba misy mpangalatra mihaodihaody na kadradraka manimba. 34Fa izay misy ny harenareo no hisy ny fonareo koa!

Talata 02 Desambra 2014 - I Pet 2 : 1 - 10

1Koa esory ny haratsiam-panahy rehetra sy ny fitaka rehetra mbamin'ny fihatsarambelatsihy sy ny fialonana ary ny fanosoram-potaka isan-karazany. 2Tahaka ny zaza vao teraka ianareo ka irio fatratra ilay ronono madio, izany hoe ny tenin'Andriamanitra, mba hitomboanareo amin'izany ka hahazoanareo famonjena, 3raha tàhiny efa nandramanareo tokoa fa tsara fo ny Tompo.

4Manatòna ny Tompo ianareo, fa Izy no vato velona nolavin'ny olona, kanefa voafidy sady sarobidy eo anatrehan'Andriamanitra. 5Manatòna ny Tompo ianareo mba ho tahaka ny vato velona voarafitra ho trano onenan'ny Fanahy Masina, ka hiara-manao fisoronana amin'ny alalan'i Jesoa Kristy*. 6Fa izao no voalaza ao amin'ny Soratra Masina*:

«Indro Aho mametraka vatofehizoro ao Tsiôna*,
dia vato voafidy sady sarobidy;
ary izay mino Azy tsy mba hangaihay.»

7Ny maha vato sarobidy Azy dia ho anareo izay mino, ka
«ny vato nolavin'ny mpanao trano
no nanjary vato fehizoro»;
ho an'izay tsy mino kosa, 8dia
«vato mahasolafaka
sy vato mampianjera» izany.

Solafaka tamin'io vato io izy ireo satria tsy manaiky ny tenin'Andriamanitra, sady ny ho solafaka rahateo no nanendrena azy ireo.
9Fa ianareo kosa dia taranaka voafidy, fanjaka-mpisorona, firenena masina, vahoaka natao ho fananan'Andriamanitra, mba hitory ireo asa lehibe vitan'Andriamanitra Izay niantso anareo hiala tamin'ny haizina ho any amin'ny fahazavana mahagaga. 10Tsy vahoakan'Andriamanitra ianareo fahiny, fa ankehitriny kosa efa vahoakany; tsy nahazo ny famindrampon'Andriamanitra ianareo fahiny, fa ankehitriny kosa efa nahazo ny famindrampony

Alatsinainy 01 Desambra 2014 - Mik 7 : 7 - 10

7Fa izaho kosa mitodika amin'ny TOMPO
ary manantena an'Andriamanitra mpamonjy ahy,
fa hihaino ahy ilay Andriamanitro.

8Aza mihomehy ny aminay ianareo fahavalonay!
fa na lavo aza izahay, dia mbola hiarina;
ary na mipetraka ao amin'ny maizina aza izahay,
dia ny TOMPO no fahazavana ho anay.
9Satria efa nanota tamin'ny TOMPO izahay,
dia hozakainay ny fahatezerany,
mandra-piarony ny adinay
ka hanomezany rariny anay.
Hamoaka anay ho eo amin'ny mazava Izy
ka ho finaritra izahay hahita ny soa nataony taminay.
10Hahita izany ny fahavalonay
ka ho rakotry ny henatra,
dia ireo niteny taminay hoe:
«Aiza ihany ny TOMPO Andriamanitrareo?»
Ho finaritra izahay hahita azy ireo,
fa amin'izay dia ho tonga fanosy
toy ny fotaka eny an-dàlana izy.

Alahady 30 Novambra 2014 - Zak 9 : 9 - 11

9Mifalia dia mifalia, ry mponin'i Tsiôna*!
Manaova fihobiana, ry vahoakan'i Jerosalema!
Indro ny Mpanjakanareo avy aty aminareo;
marina sady mandresy Izy,
feno halemem-panahy sady mitaingina boriky,
dia boriky tanora zana-borikivavy.
10Hofoanany tsy ho ao Efraîma intsony ny kalesy
ary tsy ho ao Jerosalema ny soavaly fitondra miady
Hopotehiny ny tsipîkan'ady
ary hilaza fiadanana amin'ny firenena Izy.
Ny fifehezany dia hatreo amin'ny ranomasina iray
ka hatrany amin'ny ranomasina iray hafa,
ary hatreo amin'ny onin'i Eofrata
ka hatrany am-paran'ny tany.

11Dia hoy ny Tompo hoe:
«Ny aminareo kosa, ry mponin'i Tsiôna,
noho ianareo nanaovako fanekempihavanana*
izay nohamafisina tamin'ny ran-tsorona*,
no efa namoahako ny mpigadranao
toy ny avy tao an-davaka tsisy rano.

Sabotsy 29 Novambra 2014 - II Kor 13 : 5 - 14

 5Diniho ny tenanareo, ka izahao toetra raha velona amin'ny finoana tokoa ianareo na tsia. Fantatrareo tsara fa ao anatinareo i Jesoa Kristy, afa-tsy raha olona tsy voazaha toetra ianareo! 6Manantena kosa aho fa raha izahay, dia ho fantatrareo fa tsy mba olona tsy voazaha toetra. 7Mangataka am-bavaka amin'Andriamanitra izahay mba tsy hahavita ratsy mihitsy ianareo, tsy hoe mba hisehoanay ho olona voazaha toetra, fa mba hanaovanareo izay tsara, na dia hoheverina ho olona tsy voazaha toetra aza izahay. 8Fa tsy mba mahatohitra ny marina izahay fa ny mampandroso ny marina ihany. 9Eny, mahafaly anay raha malemy izahay fa ianareo kosa mahery; ka ny angatahinay am-bavaka, dia ny hahatanteraka anareo. 10Izany no anoratako ireo zavatra ireo aminareo, dieny mbola lavitra anareo aho; fandrao, rehefa mby eo aminareo aho, dia voatery hanao mafy loatra, araka ny fahefana nomen'ny Tompo ahy, dia fahefana natao hampandrosoana ny Fiangonanareo fa tsy handravana azy. 11Ary farany, ry havako, veloma finaritra ianareo! Miezaha ho tonga lafatra, mifampahereza, miraisa saina, mihavàna, dia homba anareo ilay Andriamanitra loharanon'ny fitiavana sy ny fiadanana. 12Mifanaova veloma amin'ny fanoroham-pihavanana. 13Manao veloma anareo avokoa ny vahoakan'Andriamanitra*. 14Homba anareo rehetra anie ny fahasoavan'i Jesoa Kristy Tompo sy ny fitiavan'Andriamanitra ary ny firaisana avy amin'ny Fanahy Masina!

Zoma 28 Novambra 2014 - Mat 13 : 44 - 46

44–Ny Fanjakàn'ny lanitra* dia tahaka ny harena miafina ao anaty saha. Nisy olona nahita ilay harena ka nafeniny tao ihany aloha; ary noho ny hafaliany dia lasa izy nivarotra ny fananany rehetra, ka nividy izany saha izany. 45–Ary izao koa: ny Fanjakàn'ny lanitra dia tahaka ny amin'ny mpandranto mitady vatosoa. 46Rehefa nahita anankiray sarobidy izy, dia lasa nivarotra ny fananany rehetra, ka nividy izany vatosoa izany.

Alakamisy 27 Novambra 2014 - Zak 2 : 12 - 15

12Fa ny TOMPOn'izao rehetra izao, Ilay naniraka ahy tamim-pahefana, dia miteny amin'ireo firenena izay namabo anareo hoe:

«Na zovy na zovy mikasika anareo,
dia mikasika ny anakandriamasoko.
13Eny, haninjirako tanana ireo firenena ireo
mba ho lasa babon'ireo nandevoziny.»

Amin'izay dia hiaiky ianareo fa ny TOMPOn'izao rehetra izao no naniraka ahy.

14Dia hoy koa ny teny hentitry ny TOMPO hoe:

«Mihobia sy mifalia, ry vahoakan'i Tsiôna,
fa indro avy honina ao afovoanareo Aho.
15Amin'izany andro izany,
firenena maro no hiraiki-po amiko
ka ho tonga vahoakako;
ary honina eo afovoanareo Aho.»

Amin'izay dia hiaiky ianareo fa ny TOMPOn'izao rehetra izao no naniraka ahy ho atỳ aminareo. 16Dia ho fananan'ny TOMPO indray i Joda ao amin'ny tany masina; ary mbola hifidy an'i Jerosalema indray Izy. 17Aoka ny voaary rehetra hangina eo anatrehan'ny TOMPO satria avy ao amin'ny fonena-masiny Izy no hipoitra tampoka

Alarobia 26 Novambra 2014 - I Tes 2 : 17 - 20

17Ary izahay, ry havana, hatramin'ny nahatafasaraka anay vetivety taminareo izay lavitry ny masonay fa tsy lavitry ny fonay, dia maniry mafy mihitsy hahita anareo, ka manao izay azonay atao hahatanteraka izany. 18Indray mandeha na indroa izahay no te hiverina tatỳ aminareo, indrindra fa izaho Paoly, nefa dia voasakan'i Satàna*. 19Satria tsy iza fa ianareo ihany no fanantenanay sy hafalianay ary satroboninahi-pandresena hireharehanay eo anatrehan'i Jesoa Tompontsika, amin'ny andro hiaviany. 20Eny, voninahitray sy hafalianay tokoa ianareo!

Talata 25 Novambra 2014 - Isa 25 : 9 - 12

9Amin'izany andro izany no hilazana hoe:

«Indro ny Andriamanitsika.
Nanantena Azy isika, hany ka novonjeny.
Eny, Izy no TOMPO nantenaintsika,
koa mifalia sy miravoa isika fa novonjeny!
10Fa hipetraka amin'ity tendrombohitra ity
ny tanam-piarovan'ny TOMPO!»

Fa i Môaba kosa hohosihosena eo amin'ny toerany
toy ny fanosihosy mololo ao am-pahitra tondra-drano.

11Ao izy no hitsiparaka tanana
toy ny fanaon'ny mpilomano;
nefa hampietry ny avonavon'i Môaba ny TOMPO
na dia eo aza ny hamailaky ny tanany.

12Ary ny mandanao mafy sy sarotra iakarana, ry Môaba,
dia efa nazeran'ny TOMPO sy narodany
ka nilamaka an-tany hiafara am-bovoka.

Alatsinainy 24 Novambra 2014 - Jao 3 : 25 - 30

25Tamin'izay dia nisy fifandiran'ny mpianatr'i Jôhany tamina Jiosy anankiray ny amin'ny fomba fidiovana; 26ary nankany amin'i Jôhany ireo mpianany ka nilaza taminy hoe:
–Mpampianatra ô, Ilay niaraka taminao teny andafy atsinanan'ny ony Jôrdàna sady nijoroanao ho vavolombelona iny anie ka manao batisa ary hatonin'ny olona rehetra.

27Fa izao kosa no navalin'i Jôhany:
–Tsy misy olona afaka mandray na inona na inona, raha tsy nomen'Andriamanitra azy izany. 28Ianareo mihitsy no vavolombeloko fony aho nilaza hoe: «Tsy izaho no ilay Mesia*, fa nirahina hialoha Azy aho.» 29Izay manana ny ampakarina no mpampakatra; fa ny sakaizan'ny mpampakatra dia mipetraka eo anilan'ny mpampakatra sy mihaino azy ary faly tokoa mandre ny feony. Izany hafaliana izany no efa tanteraka amiko ankehitriny. 30Izy tsy maintsy mitombo, fa izaho kosa tsy maintsy mihena.

Alahady 23 Novambra 2014 - I Tim 6 : 17 - 19

17Anaro ireo mpanankarena amin'izao fiainana ankehitriny izao mba tsy hiavonavona ary mba tsy hametraka ny fanantenany amin'ny harena tsy mateza, fa amin'Andriamanitra Izay manome antsika ny zavatra rehetra be dia be hifaliantsika. 18Anaro ireo mpanankarena mba hanao soa, mba hanan-karena amin'ny asa tsara, mba halala-tanana ary mba ho vonona hifampizara amin'ny hafa; 19dia hamory raki-tsoa ho an'ny tenany izy hanorenany tsara ny ho avy, ka hahazoany ny tena fiainana.

Sabotsy 22 Novambra 2014 - Sal 96 : 11 - 13

11Aoka hifaly ny lanitra
ary hiravoravo ny tany,
aoka hirohondrohona ny ranomasina
mbamin'izay rehetra ao anatiny,
12aoka hibita-kafaliana ny saha
mbamin'izay rehetra ao aminy,
aoka ny hazo rehetra any an'ala hihoby
13mba hitsena ny TOMPO satria tamy Izy:
eny, tamy Izy mba hifehy ny tany;
dia hifehy ny tontolo araka ny rariny Izy
ary hifehy ny firenena araka ny hitsiny.

Zoma 21 Novambra 2014 - Asa 8 : 1 - 8

Avy nilaza izany izy, dia nodimandry. 1Ary i Saoly nankasitraka ny namonoana an'i Stefàna.

Androtr'iny ihany dia nipoaka ny fanenjehana mahery vaika nihatra tamin'ny Fiangonana tao Jerosalema. Niely patrana eran'ny faritany Jodea sy Samaria ny mpino rehetra, afa-tsy ny apôstôly* ihany. 2Nisy kosa mpivavaka tsara nandevina an'i Stefàna sady nisaona azy fatratra. 3Tamin'izay i Saoly dia nilofo handringana ny Fiangonana. Noteteziny nidirana ny isan-trano, nataony sinto-mahery navoaka ny mpino na lahy na vavy ka nalefany tany am-ponja.

4Koa ireo naelin'ny fanenjehana dia nitety tany nitory ny Vaovao Mahafaly raketin'ny tenin'Andriamanitra. 5Nidina tao an-tanàna Samaria i Filipo ka nanambara ny Mesia* tamin'ny mponina tao. 6Indray babo avokoa ny vahoaka tamin'izay nolazain'i Filipo, raha nandre laza sy nahita maso ny famantarana* vitany. 7Fa maro ny olona nandroahana fanahy maloto* ary nikiakiaka ireny fanahy maloto ireny rehefa niala; maro koa ny malemy sy ny mandringa no sitrana. 8Dia nisy hafaliana be tao amin'izany tanàna izany.

Alakamisy 20 Novambra - II Sam 22 : 47 : 51

47Velona ny TOMPO! Isaorana ilay Vatolampiko.
Hasandratra anie Andriamanitra
vatolampy mampandresy ahy.
48Izy no manao ny famaliana ho ahy
ary mampanaiky firenena hofeheziko.
49TOMPO ô, afahanao amin'ny fahavaloko aho;
eny, ataonao resiko ireo mpamely ahy
ary tsy mahazo ahy ny mpanao an-keriny.
50Koa eo anivom-pirenena no hiderako Anao
sady hankalazako Anao amin-kira.
51Ny TOMPO manome fandresena lehibe
ho an'ilay mpanjaka voafidiny;
ary maneho fitia an'ilay voahosony,
dia i Davida sy ireo taranany
hatrany amin'ny mandrakizay.

Alarobia 19 Novambra 2014 - I Pet 4 : 12 - 16

12Ry hava-malala, aza gaga amin'ny fanenjehana mivaivay miseho teo aminareo sady mihatra aminareo mba ho fizahan-toetra, ka hihevitra izany ho zava-tsy fahita midona aminareo. 13Fa mifalia araka ny iombonanareo fijaliana amin'i Kristy*, mba ho heni-kafaliana aman-karavoana koa ianareo amin'ny andro hisehoan'ny voninahiny. 14Sambatra ianareo raha haratsîna amin'ny maha mpianatr'i Kristy anareo; fa ny Fanahy Masina be voninahitra, dia ny Fanahin'Andriamanitra, no mitoetra eo aminareo. 15Eny, aoka aminareo tsy hisy hijaly satria mpamono olona, na mpangalatra, na mpanao ratsy, na mpitsabaka amin'ny raharahan'olona; 16fa raha amin'ny maha kristianina azy no ijaliany, dia aoka izy tsy ho menatra fa hanome voninahitra an'Andriamanitra noho izany anarana entiny izany.

Talata 18 Novambra 2014 - Lio 15 : 1 - 10

1Fatra-panatona an'i Jesoa avokoa ny mpamory hetra* sy ny mpanota mba hihaino Azy. 2Hany ka nimonomonona nyFarisianina* sy ny mpahay lalàna* nanao hoe:
–Rangahy io ny mpanota no ifandraisany sy iarahany misakafo!

3Koa ho azy Farisianina sy mpahay lalàna no nanaovan'i Jesoa ity fanoharana ity:
4–Lehilahy iza moa, araka ny hevitrareo, no manana ondry zato nahaverezana anankiray, ka tsy hamela eny an-kijàna ny 99 ary hiezaka hitady ilay tokana very mandra-pahitany azy? 5Ary rehefa hitany, dia entiny eo an-tsoroka an-kafaliana. 6Dia lasa izy mody any an-trano ary vorîny ireo sakaiza sy mpiara-monina ka ilazany hoe: «Miaraha mifaly amiko fa ilay ondriko very dia hitako indray!» 7Toy izany koa, hoy Aho aminareo, hisy hafaliana any an-danitra amin'ny mpanota anankiray monja miala amin'ny toe-dratsiny fa tsy amin'ny olo-marina 99 tsy mila fialana amin'ny toe-dratsy.

8–Sa vehivavy iza moa no manana vola firavaka folo nahaverezana anankiray, ka tsy hampirehitra jiro sy hamafa trano ary hikaroka tsara mandra-pahitany azy? 9Ary rehefa hitany, dia vorîny ireo sakaiza sy mpiara-monina ka ilazany hoe: «Miaraha mifaly amiko fa ilay vola firavako very dia hitako indray!» 10Toy izany koa, hoy Aho aminareo, hisy hafaliana ho an'ny anjelin'Andriamanitra* amin'ny mpanota anankiray monja miala amin'ny toetra ratsiny.

Alatsinainy 17 Novambra 2014 - Sal 51 : 6 - 12

6Ianao irery tokoa no nanotako,
ny ratsy eo imasonao no nataoko;
hany ka ara-drariny Ianao raha miteny,
ary tsy omen-tsiny raha manadidy.
7Jereo fa meloka aho no teraka,
mpanota raha notorontoronina;
8nefa ny hahitsy ao anaty no sitrakao,
koa ny fahendrena am-po no atoroy ahy.

9Ataovy afa-pahotana tokoa aho, dia hadio*;
sasao aho, dia ho fotsy mangatsakatsaka.
10Ataovy reko ny famelanao,
dia hifaly sy hiravo indray aho;
ary aoka hibitaka ny taolako
izay efa voamontsamontsanao.
11Hadinoy tanteraka ny fahotako
ary koseho avokoa ny heloka vitako.
12Amorony fo madio aho, Andriamanitra ô,
fanahy mahatoky no aoreno ato anatiko.

Alahady 16 Novambra 2014 - Mik 7 : 7 - 10

7Fa izaho kosa mitodika amin'ny TOMPO
ary manantena an'Andriamanitra mpamonjy ahy,
fa hihaino ahy ilay Andriamanitro.

8Aza mihomehy ny aminay ianareo fahavalonay!
fa na lavo aza izahay, dia mbola hiarina;
ary na mipetraka ao amin'ny maizina aza izahay,
dia ny TOMPO no fahazavana ho anay.
9Satria efa nanota tamin'ny TOMPO izahay,
dia hozakainay ny fahatezerany,
mandra-piarony ny adinay
ka hanomezany rariny anay.
Hamoaka anay ho eo amin'ny mazava Izy
ka ho finaritra izahay hahita ny soa nataony taminay.
10Hahita izany ny fahavalonay
ka ho rakotry ny henatra,
dia ireo niteny taminay hoe:
«Aiza ihany ny TOMPO Andriamanitrareo?»
Ho finaritra izahay hahita azy ireo,
fa amin'izay dia ho tonga fanosy
toy ny fotaka eny an-dàlana izy.

Sabotsy15 Novambra 2014 - Asa 15 : 30 - 35

30Dia nalefa ireo iraka mbamin'i Barnabà sy i Paoly ka nidina nankany Antiôkia. Novorîn'izy efa-dahy ny mpino marobe tao an-tanàna ka notolorany an'ilay taratasy. 31Novakîna izany ka samy dibo-kafaliana izy rehetra noho ny fampaherezana nentin'ilay taratasy. 32I Joda sy i Silasy izay samy mpaminany*, dia niteny naharitra tamin'ny havana iray finoana ka nampirisika sy nampahery azy ireo. 33Ary rehefa nitoetra elaela tao Antiôkia izy roa lahy, dia nalefan'ireo hiverina soa aman-tsara any amin'ny naniraka azy. [ 34Kanefa sitrak'i Silasy ny hijanona tao.] 35Nitoetra tany Antiôkia kosa i Paoly sy i Barnabà; ary nampianatra sy nitory ny tenin'ny Tompo izy roa lahy mbamin'ny namany maro.

Zoma 14 Novambra 2014 - Sal 9 - 1 - 14

1 Tao amin'ny tahirin-kiran'ny filohan'antoko-mpihira*. Hohiraina araka ny feon'ny hoe «Ny fahafatesan-janaka.» Salamo nataon'i Davida.

  ALEFA
2Hidera Anao amin'ny foko manontolo aho, TOMPO ô,
ka hitantara ny zava-mahagaga rehetra nataonao.
3Ho faly sy ravo aminao aho, ry Avo Indrindra ô,
ary hankalaza ny anaranao amin'ny zava-maneno.
  BETA
4Miverina ilalana ireo fahavaloko;
lavo izy ka ringana teo anoloanao.
5Eo ambonin'ilay sezafiandriananao
no ipetrahanao ho Mpitsara marina;
ka niaro ny zoko Ianao
ary nanome rariny ahy.
  GIMELA
6Norahonanao ny hafa firenena
ary naringanao ny olon-dratsy;
nokosehinao ny fahatsiarovana azy
mba ho levona mandrakizay.
7Nifarana hatreo ny amin'ny fahavalonay,
satria rava tanteraka izy;
efa narodanao ireo tanànany,
ka tsy hotsarovana intsony.
  HE
8Injay ny TOMPO Izay maharitra mandrakizay:
mametraka ny sezafiandrianana hitsarany Izy,
9ka hitsara izao tontolo izao araka ny rariny
sy hanapaka ny firenena araka ny hitsiny.
  VAO
10Ny TOMPO no fialofana ho an'ny ampahorîna,
eny, fialofana amin'ny andro mahory.
11Aoka hiantehitra aminao
ireo mahalala tsara Anao,
satria Ianao tsy mba mandao
izay mitady Anao, TOMPO ô!
  ZAINA
12Ankalazao amin'ny zava-maneno
ny TOMPO Izay monina ao Tsiôna*,
ary ambarao amin'ireo firenena
ny zava-mahatalanjona nataony;
13satria mikaroka ny mpamono olona Izy
sady mahatsiaro ireo voavono ho faty
sy ny fitarainan'ireo mahantra.
  HETA
14Iantrao aho, TOMPO ô, ka jereo ny fahoriako,
noho ny afitsoky ny mpankahala ahy;
Ianao no misintona ahy ho afaka
amin'ny hasomparan'ny fahafatesana.
15Amin'izay dia hotanisaiko avokoa
ireo anton-javatra iderako Anao;
ao an-tanànan'i Tsiôna no hiravoako,
satria Mpamonjy ahy tokoa Ianao.

Alakamisy 13 Novambra 2014 - Fil 4 : 1 - 7

1Toy izany àry, ry hava-malala, no aoka hitomoeranareo tsara miray amin'ny Tompo. Fa tiako tokoa ianareo, ry havako, sady manina anareo fatratra aho; ianareo no fifaliako sy toy ny satroboninahi-pandresena ho ahy. 2Ry i Eodia sy i Sintîka, miangavy mafy anareo aho mba hifanaraka, noho ianareo mpirahavavy ao amin'ny Tompo. 3Ary ianao koa, ry ilay mpiara-miasa akaiky tamiko, mangataka anao aho mba hanampy azy roa vavy, fa niara-nikatroka nanao izay hielezan'ny Vaovao Mahafaly* izahay mbamin'i Klemanta koa sy ny hafa rehetra mpiara-miasa amiko izay samy voasoratra anarana ao amin'ilay horonamboky mirakitra ny lisitr'ireo hanana ny fiaina-maharitra mandrakizay. 4Mifalia mandrakariva noho ianareo tafaray amin'ny Tompo. Mbola antitranteriko indray: mifalia! Manehoa fandeferana amin'ny olona rehetra. 5Tsy ho ela, dia ho tonga ny Tompo! 6Aza manahy na inona na inona fa ambarao amin'Andriamanitra isaka izay mivavaka ny zavatra ilainareo, ary angataho amin'ny fo feno fankasitrahana. 7Ary ilay fiadanana avy amin'Andriamanitra sady mihoatra noho ny zavatra rehetra takatry ny fieritreretan'olombelona, dia hiaro ny fonareo sy ny sainareo, satria efa tafaray amin'i Kristy* Jesoa ianareo.

Alarobia 12 Novambra 2014 - I Pet 1 : 1 - 12

1Avy amiko Petera ity taratasy ity, dia izaho apôstôlin'i Jesoa Kristy*.
Mamangy anareo olom-boafidin'Andriamanitra aho, dia ianareo mpivahiny miely patrana any amin'ny faritany Pônto, Galatia, Kapadôsia, Azia sy Bitinia. 2Voafidy araka ny efa voatendrin'Andriamanitra Ray ianareo ary voatokana ho Azy noho ny asan'ny Fanahy Masina, mba hanaiky an'i Jesoa Kristy sy hanana anjara amin'ny famafazana ny rany.Hampitomboina ao aminareo anie ny fahasoavana sy ny fiadanana!

3Hankalazaina anie ilay Andriamanitra sady Rain'i Jesoa Kristy* Tompontsika! Be famindrampo tokoa Andriamanitra, ka niteraka antsika indray tamin'ny alalan'i Jesoa Kristy Izay natsangany ho velona avy any amin'ny maty. Izany no ananantsika fanantenana mivaivay 4fa hahazo ny lova tsy mety simba sady tsy azon-doto no tsy mety levona. Voatahiry any an-danitra io lova io mba ho anareo, 5dia ianareo izay arovan'ny herin'Andriamanitra amin'ny alalan'ny finoana mba handray ny famonjena efa vonona haseho amin'ny andro farany. 6Izany koa no iravoravoanareo na dia mbola tsy maintsy hampahorîna vetivety amin'ny fitsapana samy hafa aza ianareo. 7Ny volamena dia sedraina amin'ny alalan'ny afo na dia zavatra mety simba aza; ary ny finoanareo, izay sarobidy lavitra noho ny volamena, dia sedraina amin'ny alalan'ireny fitsapana ireny ka ho hita fa hahazoan'Andriamanitra dera sy voninahitra ary haja izany, amin'ny andro hisehoan'i Jesoa Kristy. 8Manam-pitiavana an'i Jesoa Kristy ianareo, na dia tsy nahita Azy aza; mino Azy ianareo, na dia tsy mahita Azy aza ankehitriny: izany no iravoravoanareo amin'ny hafaliana tsy hay lazaina sady be voninahitra, 9satria azonareo ilay zava-kendren'ny finoanareo, dia ny famonjena ny fanahinareo. 10Ny amin'izany famonjena izany dia nanaovan'ireo mpaminany* famotopotorana sy fikarohana fatratra, satria ireo no efa nilaza mialoha ny fahasoavana voatendrin'Andriamanitra ho anareo. 11Nokarohin'ny mpaminany tokoa izay vaninandro sy toe-javatra notondroin'ny Fanahin'i Kristy; fa tao anatin'izy ireo ny Fanahin'i Kristy ka nanambara mialoha ny fijaliana hanjo an'i Kristy sy ny voninahitra hanaraka izany. 12Nasehon'Andriamanitra tamin'ireo mpaminany fa ny zavatra nomena horaharahainy dia tsy natao ho azy ireo fa natao ho anareo; ary izany zavatra izany dia nampandrenesina anareo ankehitriny, tamin'ny alalan'ireo olona izay nombàn'ny Fanahy Masina nirahina avy tany an-danitra ka nitory ny Vaovao Mahafaly* taminareo. Eny, izany zavatra izany aza dia irîn'ireo anjely* hodinihina.

Talata 11 Novambra 2014 - Neh 8 : 9 - 12

9Nitomany ny vahoaka rehetra teo, raha nandre ny tenin'ny lalàna.
Noho izany i Nehemià governora sy i Hezrà mpisorona sady mpahay lalàna ary ny levita izay nampianatra ny olona dia niteny tamin'izy rehetra hoe:
–Voatokana ho an'ny TOMPO Andriamanitrareo ity andro ity; koa aza malahelo na mitomany!

10Dia hoy indray i Hezrà tamin'ny vahoaka:
–Ndeha mody ka manaova sakafo tsara sy misotroa zava-pisotro mamy, ary mba anatero anjara izay tsy nahavoatra; satria voatokana ho an'ny Tompontsika ity andro ity. Koa aza malahelo, fa ny hafaliana avy amin'ny TOMPO no herinareo.

11Nampangina ny vahoaka rehetra koa ny levita ka nanao hoe:
–Mangina ianareo fa voatokana ho an'Andriamanitra ity andro ity!

12Dia nody izy rehetra mba hihinana sy hisotro ary hanatitra anjara ho an'ny sasany tsy manana ka nanao fifaliana lehibe. Azony tsara manko ny teny izay nampianarina azy.

Alatsinainy 10 Novambra 2014 - Asa 2 : 43 - 47

43Dia raiki-tahotra avokoa ny olona noho ny zava-mahagaga sy famantarana* maro vitan'ny apôstôly*. 44Niray toerana ny mpino rehetra ary niombom-pananana; 45namidiny ny taniny sy ny fananany ka ny vola azo dia nifampizaràny araka izay nilain'ny tsirairay. 46Nazoto nihaona isan'andro izy rehetra: nivory tao an-kianjan'ny tempoly*, niara-nisakafo tany an-tranony avy, nihinan-kanina tamin-karavoana sy fahatsoram-po, 47ary nidera an'Andriamanitra, hany ka mamy hoditra tamin'ny vahoaka rehetra. Ary ny olona izay notarihin'ny Tompo ho amin'ny famonjena dia nataony nanatevin-daharana an-dry zareo isan'andro vaky.

Alahady 09 Novambra 2014 - Lio 10 : 17 - 20

17Faly tokoa ny 72 lahy raha niverina sady nanao hoe:
–Tompo ô, nanaiky anay na dia ireo demony* aza rehefa nodidianay tamin'ny anaranao!

18Fa hoy i Jesoa taminy:
–Hitako tokoa i Satàna* nilatsaka tahaka ny tselatra avy any an-danitra. 19Indro ianareo efa nomeko fahefana hanitsaka bibilava sy maingoka sady hanamontsana ny hery rehetra ananan'ny fahavalo, ka tsy hisy hampaninona anareo akory. 20Kanefa aza dia ianareo eken'ny fanahy ratsy no ifaliana; fa mifalia noho ianareo efa voasoratra anarana any an-danitra.

Sabotsy 08 Novambra 2014 - Ezr 3 : 10 - 13

10Nony nandatsaka ny fototr'ilay tempolin'ny TOMPO ireo mpiasa, dia nasaina nanatrika teo ny mpisorona nanao fanamiana sy nitondra trômpetra ary koa ny levita terak'i Asafa nitondra kipantsona, mba hidera ny TOMPO araka ny nandidian'i Davida mpanjakan'i Israely. 11Dia nidera sy nisaotra ny TOMPO ireto terak'i Asafa ka nanao hira nifamalivaly hoe: «Tsara ny Tompo, ary maharitra mandrakizay ny fitiavany an'i Israely!» Nihoby mafy koa ny vahoaka rehetra raha nidera ny TOMPO, satria vita ny fototry ny tranon'ny TOMPO. 12Maro ny mpisorona sy ny levita ary ny loham-pianakaviana, dia ireo antitra efa nahita ilay trano taloha, no nitomany mafy dia mafy nony nalatsaka teo imasony ny fototr'izany trano vaovao izany; nefa maro koa no nanandra-peo nihoby sy nifaly. 13Ka dia tsy hay navahany ny hobin-kafalian'ny andaniny sy ny feo fitomanian'ny ankilany, satria samy nanao horakoraka mafy sy re lavitra tokoa ny olona.

Zoma 07 Novambra 2014 - Jao 16 : 19 - 24

19Fantatr'i Jesoa fa te hanontany Azy ny mpianany, ka hoy Izy taminy:

–Mifanontany ve ianareo ny amin'ny teniko hoe: «Rehefa afaka kelikely, dia tsy hahita Ahy intsony ianareo; ary rehefa afaka kelikely indray, dia hahita Ahy ianareo»? 20Lazaiko marina dia marina aminareo fa hitomany sy hisaona ianareo, ary izao tontolo izao* kosa hifaly; halahelo ianareo, fa hody hafaliana ny alahelonareo. 21Ory ny vehivavy, rehefa hiteraka, satria tonga ny fotoam-panaintainany; saingy rehefa velon-jaza izy, dia tsy tsaroany intsony izay fahoriany, noho izy faly fa hoe misy olona teraka eo amin'izao tontolo izao. 22Ianareo koa dia manana alahelo ankehitriny; fa hahita anareo indray Aho ka ho faly ny fonareo, ary tsy hisy olona hanaisotra ny hafalianareo.

23Amin'izany andro izany, dia tsy hanontany Ahy na inona na inona intsony ianareo. Lazaiko marina dia marina aminareo fa na inona na inona hangatahinareo amin'ny Ray dia homeny anareo noho ny anarako izany. 24Mandraka ankehitriny dia tsy mbola nangataka na inona na inona noho ny anarako ianareo; mangataha, dia hahazo ianareo, mba ho feno ny hafalianareo.

Alakamisy 06 Novambra 2014 - Lio 13 : 14 - 17

14Tezitra ny lehiben'ny sinagôga satria andro sabata no nanaovan'i Jesoa fanasitranana. Nandray fitenenana ny lehiben'ny sinagôga ary nilaza tamin'ny vahoaka hoe:
–Andro enina no tokony hiasana; ka mandritra ireo andro ireo ianareo no tongava hositranina, fa tsy amin'ny andro sabata!

15Fa hoy ny navalin'ny Tompo azy:
–Mpihatsaravelatsihy raha ianareo! Amin'ny andro sabata, moa tsy samy mamaha ny ombiny na ny borikiny hiala amin'ny fihinanam-bilona avy ianareo ka mitondra azy hisotro rano? 16Koa ity vehivavy taranak'i Abrahama ity, 18 taona ngarangidina no voafatotr'i Satàna*, moa tsy tokony ho amin'ny andro sabata indrindra ve no hamahàna fatorana azy?

17Nangaihay izay rehetra mpanohitra an'i Jesoa noho izany valin-teniny izany, fa ny vahoaka manontolo kosa niravoravo noho ny zavatra malaza rehetra nataony.

Alarobia 05 Novambra 2014 - I Sam 2 : 1 - 3

1Ary i Hanà nanao tonom-bavaka toy izao:
Feno hafaliana ny foko noho ny amin'ny TOMPO;
mitraka koa ny lohako noho ny aminy.
ary ihomehezako ny fahavaloko.
Faly aho satria novonjen'ny TOMPO;
2tsy misy masina tahaka AZY,
ary tsy misy vatolampy
tahaka an'Andriamanitsika.
Eny, Izy irery ihany no TOMPO.
3Atsaharo ny teny an'avona
sy ny vava tsy ambina rehetra,
fa Andriamanitra mahalala
ny zava-drehetra ny TOMPO;
Izy no mitsara ny ataon'ny olona.

Talata 04 Novambra 2014 - Sal 81 : 1 - 10

1 Tao amin'ny tahirin-kiran'ny filohan'antoko-mpihira*. Hampiarahina amin'ny jejilava. Salamo nataon'i Asafa.

2Manaova hobim-pifaliana
ho an'Andriamanitra herintsika,
ankalazao ny Andriamanitr'i Jakôba.
3Ingao ny hira, velezo ny amponga,
tendreo ny lokanga tsara feo mbamin'ny valiha.
4Amin'ny tsinam-bolana sy volam-penomanana,
tsofy ny trômpetra ho an'ny andro fetintsika,
5satria lalàna ho an'ny Israelita izany,
didin'ny Andriamanitr'i Jakôba,
6fitsipika nataony ho an'ny taranak'i Jôsefa
fony Izy namely an'i Ejipta.

–Feo tsy fantatro no reko nanao hoe:

7«Nesoriko teo an-tsorokareo ny entana;
ny tananareo afa-namela ny sobika mavesatra.
8Fony noporetina ianareo,
dia niantso Ahy ka nafahako;
novaliako tao anaty kotrokorana ianareo
ary nozahako toetra teo amin'ny ranon'i Meribà.

Fiatoana*

9Ry vahoakako, mihainoa fa mampitandrina Aho;
satriko hihaino Ahy ianareo, ry Israelita:
10Aoka tsy hisy andriamani-kafa eo aminareo,
aoka ny andriamanitra vahiny tsy hivavahanareo,

Alatsinainy 03 Novambra 2014 - I Sam 18 : 5 - 7

5Fa isaky ny misy fanafihana ampanaovin'i Saoly azy, dia fahombiazana hatrany no azon'i Davida, koa dia izy no nataon'i Saoly ho kômandin'ny miaramila mpanafika; ary nahafaly tokoa ny tafika manontolo sy ny manamboninahitry ny mpanjaka izany.

6Tamin'ny fiverenan-dry Davida avy nahafaty an'ilay Filistinina, dia nivoaka hitsena an'i Saoly mpanjaka ny vehivavy avy tamin'ny tanàna israelita rehetra; nihira sy nandihy tamin'ny feon'ampongatapaka sy ny zava-maneno hafa izy ireo, ary velona hobim-pifaliana. 7Dia nibitaka ireo vehivavy sady nifamaly niredona hoe:
           «I Saoly nahafaty an'arivoarivo.
             fa i Davida kosa nahafaty an'alinalina.»

Alahady 02 Novambra 2014 - Fil 1 : 12 - 18

12Ry havana, tiako ny hahafantaranareo fa izay nihatra tamiko dia vao mainka nanjary fampandrosoana ny Vaovao Mahafaly*; 13ka ny ato an-dapa manontolo sy ny olon-kafa rehetra dia samy mahalala fa voafonja noho ny amin'i Kristy aho. 14Nony nahita ahy voafonja ny ankamaroan'ireo havana iray finoana, dia vao mainka nataon'ny Tompo feno fahatokiana ka mihasahisahy kokoa mitory ny tenin'Andriamanitra tsy amin-tahotra. 15Eny, fialonana ahy sy fitia te hifanditra no itorian'ny sasany an'i Kristy, fa hitsim-po kosa no manentana ny sasany. 16Ireto dia asesiky ny fitiavana, satria fantany fa voatendrin'Andriamanitra hampandresy lahatra ny Vaovao Mahafaly aho; 17irerỳ kosa asesiky ny fifampiandaniana, ka tsy manambara an'i Kristy amin-kitsim-po, fa mihevitra hanampy trotraka ny fijaliako amin'izao maha voafonja ahy izao. 18Kanefa mampaninona moa izany? Amin'ny atao rehetra, na asesiky ny fihatsarambelatsihy na asesiky ny hevitra mahitsy, dia i Kristy no torîna, ka ifaliako izany; eny, hifaliako hatrany izany

Sabotsy 01 Novambra 2014 - Hab 3 : 17 - 19

17Fa na dia tsy mamontsina aza ny aviavy
ary tsy manome voa ny voaloboka,
na dia tsy mahavanona aza ny ôliva
ary tsy mahavokatra hanina ny saha,
na dia voapaoka aza ny ondry ao am-pahitra
ary tsy misy omby intsony ao am-bala,
18dia mbola ho faly sy ravo ihany aho
satria ny TOMPO Andriamanitra no Mpamonjy ahy.
19Ny TOMPO Andriamanitra no heriko;
mampalady ahy toy ny dieravavy Izy
ka mampiriaria ahy eny an-kavoana.

Zoma 31 Oktobra 2014 - Rom 15 : 5 - 13

5Ary Andriamanitra loharanon'ny faharetana sy ny fampaherezana anie hampiray hina anareo, hanaraka ny ohatra nomen'i Kristy Jesoa. 6Ka mba hiray feo ianareo hiara-manome voninahitra an'Andriamanitra, Rain'i Jesoa Kristy Tompontsika.
Ho an'ny firenen-drehetra ny Vaovao Mahafaly*
7Koa mifandraisa tsara ianareo, tahaka ny nandraisan'i Kristy* anareo koa ho voninahitr'Andriamanitra. 8Fa izao no ambarako aminareo: Tonga mpanompon'ny Jiosy i Kristy mba hahatanteraka ny fampanantenana natao tamin'ny razan'izy ireo ka anehoana fa azo antoka Andriamanitra. 9Ary izany koa dia mba hahazoan'ny hafa firenena* manome voninahitra an'Andriamanitra noho ny famindrampony, araka izay voalazan'ny Soratra Masina* hoe:
      «Izany no hiderako Anao any amin'ny hafa firenena
        sy hihirako ho voninahitry ny anaranao.»
10Ary hoy indray ny Soratra Masina hoe:
     «Miaraha miravo amin'ny vahoakan'ny Tompo,
       ry hafa firenena!»
11Ary koa hoe:
     «Derao ny Tompo, ry firenena rehetra;
       ankalazao Izy, ry vahoaka rehetra!»
12Ary hoy indray i Isaià hoe:
     «Ho avy ilay solofon'i Jisay,
       dia ilay hitsangana hifehy ny firenena:
       Izy no hitokian'ireo firenena!»
13Ilay Andriamanitra loharanon'ny fanantenana anie hameno fifaliana sy fiadanana tanteraka anareo noho ny finoanareo, mba hampitomboina be dia be ao aminareo ny fanantenana noho ny herin'ny Fanahy Masina!

Alakamisy 30 Oktobra 2014 - Jod 1 : 17 - 23

17Ianareo kosa, ry hava-malala, tsarovy ny teny efa nolazain'ireo apôstôlin'i Jesoa Kristy* Tompontsika; 18satria izao no voalazany taminareo: «Amin'ny andro farany dia hisy mpaniratsira, hiaina araka ny filàn'ny haratsiam-panahiny.» 19Ireo mpampianatra sandoka ireo no mahatonga fisaratsarahana, satria entin'ny maha olombelona ihany fa tsy mba manana ny Fanahin'Andriamanitra. 20Ianareo kosa, ry hava-malala, ataovy izay handrosoanareo amin'ny finoana masina indrindra efa anananareo, ka mivavaha ombàn'ny herin'ny Fanahy Masina; 21mitahiriza tena ao amin'ny fitiavan'Andriamanitra, ka mahandrasa ny famindrampon'i Jesoa Kristy Tompontsika hahazoanareo fiaina-maharitra mandrakizay. 22Reseo lahatra ny sasany izay miahanahana; 23ny sasany indray, sariho ho afaka amin'ny afo no famonjy azy; ary ny sasany kosa amindrao fo, saingy mitandrema tsara ka ankahalao na dia ny akanjo voaloton'ny maha olona mpanota azy aza.

Alarobia 29 Oktobra 2014 - Mar 13 : 12 - 13

12Hisy olona hanolotra ny iray tampo aminy hovonoina; hisy ray hanolotra ny zanany hovonoina; ary hisy zanaka hitsangana hanohitra ny ray aman-dreniny ka hampanameloka azy ho faty. 13Hankahalain'ny olona rehetra ianareo satria miandany amiko; kanefa izay maharitra hatramin'ny farany no ho voavonjy.

Talata 28 Oktobra 2014 - Gal 5 : 2 - 6

2Indro fa izaho Paoly no miteny aminareo: raha manaiky hoforana ianareo, dia tsy hahasoa anareo na dia kely akory aza i Kristy. 3Ary ambarako indray amin'ny olona rehetra manaiky hoforana fa manana adidy hahatanteraka ny lalàna* manontolo izy. 4Tafasaraka amin'i Kristy ianareo miezaka ho marina eo imason'Andriamanitra amin'ny fanoavana ny lalàna; miendaka amin'ny fahasoavan'Andriamanitra ianareo. 5Isika kosa dia matoky fa Andriamanitra no mahatonga antsika ho marina eo imasony; izany no andrasantsika ho vokatry ny finoantsika noho ny asan'ny Fanahy Masina. 6Fa ho an'izay tafaray amin'i Kristy Jesoa, tsy dia ny hoe maha voafora na tsy maha voafora no tena zavatra fa ny finoana izay miasa amin'ny fitiavana.

Alatsinainy 27 Oktobra 2014 - I Jao 2 : 15 - 17

15Aza mankamamy an'izao tontolo izao*, na ny zavatra izay ao amin'izao tontolo izao. Raha misy olona mankamamy an'izao tontolo izao, dia tsy ao anatin'izany olona izany ny fitiavana ny Ray. 16Satria ny zavatra rehetra izay ao amin'izao tontolo izao, izany hoe ny filàndratsin'ny maha olona mpanota sy ny fitsiriritan-javatra hitan'ny maso ary ny rehaka momba izao fiainana izao, dia tsy avy amin'ny Ray, fa avy amin'izao tontolo izao. 17Mandalo izao tontolo izao sy ny filàndratsy itaomany, fa izay manao ny sitrapon'Andriamanitra no maharitra mandrakizay.

Alahady 26 Oktobra 2014 - Sal 33 : 18 - 22

18Tsinjovin'ny TOMPO kosa ireo mpanaja Azy,
dia ireo olona miantehitra amin'ny fitiavany,
19mba hanafaka ny ainy amin'ny fahafatesana
sy hamelona azy na dia misy mosary aza.
20Miandry ny TOMPO tokoa isika:
famonjena sy fiarovana ho antsika Izy.
21Eny, Izy Tompo no ifalian'ny fontsika;
masina ny anarany ka itokiantsika.
22TOMPO ô, ho aminay anie ny fitiavanao
araka ny ianteheranay aminao!

Sabotsy 25 Oktobra 2014 - Lio 21 : 12 - 19

12Kanefa alohan'izany rehetra izany, dia hosamborina sy hoenjehina ianareo, hatolotra hotsaraina any amin'ny sinagôga* ary hatao am-ponja, hoentina eo anatrehan'ireo mpanjaka sy mpifehy noho ianareo miandany amiko. 13Ho tonga aminareo izany mba hijoroanareo ho vavolombelona manambara Ahy. 14Koa ataovy latsaka ao am-ponareo fa tsy tokony hihevitra mialoha izay hiarovanareo tena ianareo; 15satria Izaho ihany no hampiteny anareo sy hanome fahendrena anareo, ka tsy hahatohitra sady tsy haharesy lahatra anareo izay rehetra miampanga anareo. 16Hanolotra anareo na dia ny ray aman-dreny sy ny mpiray tampo ary ny havana aman-tsakaiza aza, ka hovonoin'olona ny sasany aminareo. 17Ho halan'ny olon-drehetra ianareo satria miandany amiko,18nefa tsy hisy very na dia singam-bolo iray amin'ny lohanareo aza. 19Aoka ho amim-paharetana no hahazoanareo famonjena ny ainareo.

Zoma 24 Oktobra 2014 - Jer 20 : 7 - 13

7TOMPO ô, notaominao aho ka voataona;

ary nahery tamiko Ianao ka resy aho.

Fihomehezana aho isan'andro

sady fanebaky ny olona rehetra.

8Fa isaky ny tsy maintsy miteny aho,

dia voatery miantso vonjy

ary mihorakoraka hoe:

Herisetra sy famoretana e!

Satria ny fampitako ny teninao, TOMPO ô,

no anakorana sy ihomehezana ahy isan'andro.

9Ary raha hoy aho anakampoko hoe:

«Tsy hisaintsaina izany intsony aho

na hiteny amin'ny anaran'ny Tompo intsony»,

dia misy toy ny afo mandoro ato am-poko,

toy ny afo mihanaka ato anatin'ny tenako.

Reraka mamono azy aho fa tsy vitako.

10Reko ny besinimaro miteny ratsy ahy

ka manome anaram-bosotra hoe:

«Fihorohoroana hatraiza hatraiza.»

«Torio izy», hoy ny sasany;

«Eny, hotorintsika izy», hoy ny hafa.

Ireo sakaiza tiako indrindra aza

dia miandry kendry tohina hahavoa ahy:

«Izay angamba no hahavoafitaka azy

sy haharesentsika azy, hoy ireo,

ka hisamborantsika azy hanaovana valifaty

11Kanefa Ianao, TOMPO ô,

dia miaraka amiko hatrany

toy ny mpiady ikoizana.

Koa ireo mpanenjika ahy no ho lavo

fa tsy haharesy ahy.

Ho menatra izy satria tsy hahomby;

fahafaham-baràka mandrakizay

tsy hohadinoina izany.

Alakamisy 23 Oktobra 2014 - Apo 3 : 7 - 13

7–Manorata ho an'ny anjelin'ny Fiangonana any Filadelfia:

«Izao no lazain'ilay Masina, ilay Mahatoky, Ilay manana ny fanalahidin'i Davida mpanjaka, Ilay mamoha ka tsy hisy hanidy ary manidy ka tsy hisy hamoha. 8Fantatro ny asanao. Indro eo anatrehanao efa nasiako varavarana mivoha tsy misy mahahidy; satria kely hery ianao, kanefa nitandrina ny teniko ary tsy mba nandà Ahy. 9Indro atolotro anao ny sasany avy amin'ireo olona mivavaka amin'iSatàna*: milaza ny tenany ho Jiosy ireo, kanjo tsiizy fa mandainga; indro hataoko tonga hiankohoka eo anoloanao ireo, ka ho fantany fa tiako ianao. 10Ary noho ianao nitandrina ny teniko ny amin'ny faharetana, izaho kosa hiaro anao ho afaka amin'ilay andro fizahan-toetra, izay efa hihatra amin'izao tontolo izao mba hitsapana ny mponina eto ambonin'ny tany. 11Ho avy faingana Aho; tano mafy izay anananao, mba tsy hisy haka ny satroboninahitrao. 

12«Izay maharesy dia hataoko andry ao amin'ny tempoli*n'Andriamanitra, sady tsy hiala ao intsony; hosoratako eo aminy ny anaran'Andriamanitro sy ny anaran'ilay tanànan'Andriamanitro, dia i Jerosalema vaovao, izay midina avy any an-danitra avy amin'Andriamanitra; ary hosoratako eo aminy koa ilay anarako vaovao.

 13«Izay manan-tsofina, aoka hihaino izay lazain'ny Fanahy Masina amin'ireo Fiangonana.»

Alarobia 22 Oktobra 2014 - Jak 5 : 7 - 11

7Koa mahareta tsara àry, ry havana, mandra-piavin'ny Tompo. Jereo ny mpamboly miandry amim-paharetana izay vokatra sarobidy havoakan'ny tany, ka maharitra mandra-pahazony ny oram-pararano sy ny oran-dohataona. 8Mahareta koa ianareo; aoka ho feno herimpo, fa efa mby akaiky ny fiavian'ny Tompo. 9Aza mifampimonomonona ianareo, ry havana, mba tsy hanamelohan'Andriamanitra anareo. Indro ny mpitsara efa mijoro eo am-baravarana. 10Ry havana, aoka ireo mpaminany* izay niteny tamin'ny anaran'ny Tompo no hataonareo filamatry ny fifandeferana sy faharetana. 11Indro ataontsika hoe sambatra izay manam-paharetana. Efa renareo ny faharetan'i Jôba, ary fantatrareo izay nataon'ny Tompo ho azy tamin'ny farany, satria be fiantra sy be indrafo ny Tompo.

Talata 21 Oktobra 2014 - Kol 1 : 21 - 23

21Ianareo koa dia lavitra an'Andriamanitra fahiny sady fahavalony, noho ny ratsy nosaininareo sy nataonareo. 22Fa ankehitriny kosa, noho i Kristy niharan'ny fahafatesana tao amin'ny vatany mety maty, dia namitram-pihavanana taminareo Andriamanitra mba hahatonga anareo ho masina sady tsy hanan-tsiny amam-pondro eo anatrehany. 23Kanefa tsy maintsy maharitra amin'ny finoana ianareo, ka miorina sy mitombina tsara, ary tsy mety hafindra hiala amin'ny fanantenana vokatry ny Vaovao Mahafaly* efa renareo. Izaho Paoly dia efa tonga mpanompon'izany Vaovao Mahafaly izany, dia ilay notorîna tamin'ny olona rehetra eto ambanin'ny lanitra.

Alatsinainy 20 Oktobra 2014 - I Mpa 11 : 29 - 39

29Indray andro raha nivoaka an'i Jerosalema i Jerôbohama, dia tafahaona tamin'i Ahià mpaminany* avy any Silao teny an-dalana. Nitafy lamba vaovao i Ahià, ary izy roa lahy ihany no tany an-tsaha. 30Dia noraisin'i Ahià ny lamba vaovao teny aminy ka notriatriariny ho tonga tapany 12;

31ary hoy izy tamin'i Jerôbohama:
–Raiso ho anao ny tapany folo, fa izao no lazain'ny TOMPO Andriamanitr'i Israely: Indro efa hoendahako eo an-tanan'i Salômôna ny fanjakana ka homeko anao ny foko folo, 32fa ny foko iray ihany sisa no havelako ho azy noho ny amin'i Davida mpanompoko sy i Jerosalema tanàna nofidiko tamin'ny foko israelita rehetra. 33Hataoko izany satria efa nandao Ahy ireo ka niankohoka teo anatrehan'i Hastôreta* andriamani-bavin'ny Tsidônianina, sy teo anatrehan'i Kemôsy andriamanitry ny Môabita, ary teo anatrehan'i Milkôma andriamanitry ny Hamônita; fa tsy mba ny sori-dalako no nizorany hanaovana izay mahitsy eo imasoko ary hitandremana ny lalàna amam-pitsipiko tahaka ny nataon'i Davida rain'i Salômôna. 34Nefa tsy hoesoriko eo an-tanan'i Salômôna izany fanjakana manontolo izany fa efa nataoko ho filohan'ny vahoakako amin'ny andro rehetra iainany izy noho ny amin'i Davida mpanompoko izay nofidiko sady nitandrina ny didy aman-dalànako. 35Saingy hoesoriko eo an-tanan-janany kosa ny fanjakana, ka homeko anao ny foko folo. 36Homeko foko iray ihany ny zanakalahiny mba hisy mandrakariva, ho an'i Davida mpanompoko, taranaka iray hanjaka eo anatrehako any Jerosalema izay tanàna nofidiko hampitoerako ny voninahitro.

37«Ianao kosa, ry Jerôbohama, no halaiko hanjaka amin'izay sehatra rehetra irinao ka ho mpanjaka amin'i Israely. 38Raha henoinao izay rehetra andidiako anao ka izoranao ny sori-dalako ary ataonao izay mahitsy eo imasoko sady tandremanao ny lalànako sy ny didiko tahaka ny nataon'i Davida mpanompoko, dia hiaraka aminao Aho ka hampiorina taranaka maharitra ho anao tahaka izay nataoko tamin'i Davida; ary dia homeko anao i Israely, 39mba hampietreko ny taranak'i Davida –nefa tsy ho mandrakizay akory izany.»

Alahady 19 Oktobra 2014 - Mat 25 : 1 - 3

1Amin'izay ny Fanjakàn'ny lanitra* dia ho tahaka ny amin'ny tovovavy folo izay nitondra ny fanàlany ka lasa hitsena ny mpampakatra. 2Ny dimy tamin'ireo tovovavy ireo dia adala; fa ny dimy kosa hendry. 3Ireo adala dia nitondra ny fanalany, kanefa tsy nitondra solika;

Sabotsy 18 Oktobra 2014 - Tit 2 : 11 - 14

11Fa Andriamanitra efa naneho ny fahasoavany, izay loharanom-pamonjena ho an'ny olona rehetra. 12Izany fahasoavana izany dia mitaiza antsika handà ny toetra tsy miraharaha an'Andriamanitra sy handà ny filàn'izao tontolo izao*, fa ho velona mahafehy tena sy mandala ny rariny ary tia vavaka mandritra izao fiainana ankehitriny izao. 13Toy izany no tokony hiandrasantsika ny hasambarana antenaintsika sy ny andro hisehoan'ny voninahitr'i Jesoa Kristy*, ilay Andriamanitra lehibe sady Mpamonjy antsika. 14I Jesoa Kristy dia nanolo-tena ho antsika mba hanavotra antsika ho afaka amin'ny ratsy rehetra ka hahatonga antsika ho vahoaka voadio, natao ho Azy tokoa sy hazoto hanatontosa asa tsara.

Zoma 17 Oktobra 2014 - Dan 3 : 19 - 30

19Dia feno fahatezerana i Nebokadnetsara ka niova endrika tamin'i Sadràka sy i Mesàka ary i Habeda-Negao. Nasainy nafanaina impito mihoatra noho ny famana azy ny lafaoro.20Ary ireo lehilahy matanjaka indrindra tamin'ny miaramilany no nasainy namatotra an'i Sadràka sy i Mesàka ary i Habeda-Negao sy nanipy azy tao anaty lafaoro misy afo mivaivay. 21Avy hatrany dia nafatotra niaraka tamin'ny lobany sy patalohany ary akanjony sy satrony ireo lehilahy ireo, ka natsipy tao amin'ny lafaoro misy afo mivaivay.22Ary satria hentitra ny tenin'ny mpanjaka dia voafana izaitsizy ny lafaoro, ka matin'ny lelafo mbamin'ny miaramila izay nanipy an'i Sadràka sy i Mesàka ary i Habeda-Negao.23Fa izy telo lahy ireto kosa dia voatsipy am-patorana tao amin'ny lafaoro misy afo 

24Talanjona anefa i Nebokadnetsara ka nitsangana faingana, ary nanontany ireo mpanolotsainy hoe:

–Moa tsy lehilahy telo mifatotra va no natsipintsika tao anaty afo?

Dia hoy ny navalin'ireo:

–Izany tokoa, ry mpanjaka!

25Ary hoy indray ny mpanjaka:

–Koa nahoana àry aho no mahita lehilahy efatra tsy mifatotra, mandehandeha ao anaty afo, nefa tsy misy maratra akory; sady ilay fahefatra dia mitovy endrika amin'ny zanak'ireo andriamanitra?

26Dia nanatona ny varavaran'ny lafaoro misy afo mivaivay i Nebokadnetsara ka niantso hoe:

–Ry i Sadràka sy i Mesàka ary i Habeda-Negao mpanompon'Andriamanitra Avo Indrindra ô, mivoaha tao ianareo ka avia atỳ!

Niaraka tamin'izay dia nivoaka avy tao anaty afo i Sadràka sy i Mesàka ary i Habeda-Negao. 27Dia nitangorona ireo solotenan'andriamanjaka sy ny mpifehy faritany ary ny governora sy ireo mpanolotsain'ny mpanjaka mba hijery ireo lehilahy ireo; ka hitany fa tsy nampaninona ny tenan'izy ireo akory ny afo, tsy may ny volon-dohany, tsy simba ny fitafiany sady tsy maimbo afo akory. 28Dia loa-bolana i Nebokadnetsara ka nanao hoe:

–Hisaorana anie Andriamanitr'i Sadràka sy i Mesàka ary i Habeda-Negao; naniraka ny anjeliny* manko Izy mba hamonjy ny mpanompony izay natoky Azy, ka nandika ny baiko nataoko. Fa naleon'ireo kosa nanolo-tena hampijalina toy izay hanompo sy hitsaoka andriamani-kafa ankoatra ilay Andriamaniny. 29Noho izany dia mamoaka izao didy izao ho an'ny foko sy firenena ary samy hafa fiteny rehetra aho hoe: «Izay manao teny tsy voahevitra ny amin'ny Andriamanitr'i Sadràka sy i Mesàka ary i Habeda-Negao dia hotetitetehina ary hatao fanariam-pako ny tranony; fa tsy misy andriamani-kafa mahavonjy tahaka izao.»

30Dia nasandratry ny mpanjaka i Sadràka sy i Mesàka ary i Habeda-Negao ho amin'ny toerana ambony noho ny teo aloha tao amin'ny faritanin'i Babilôna.