2Moa dia ny rariny tokoa ve
no lazainareo, ry manampahefana?
Moa araka ny hitsiny ve
no itsaranareo ny olona?
3Tsy izany, fa minia manao ny ratsy ianareo;
ny herisetra ataonareo no afafinareo amin'ity tany ity.
4Hatrany am-bohòka ny olon-dratsy no mivoana;
hatramin'ny vao teraka ny mpandainga no maniasia.
5Misy poizina tahaka ny menarana izy;
manentsin-tadîny tahaka ny bibilava marenina
6izay tsy mihaino ny mpanao safosiaka azy,
na dia ny mahasondriana indrindra aza.
7Andriamanitra ô, torotoroy ao am-bavany ny nifiny;
TOMPO ô, montsany ny vangin'ireo zary liona ireo.
8Hihanaka toa rano abosasaka anie izy,
hadisadisa toa ahitra voahosihosy;
9ho tahaka ny lelosy anie izy,
ka hiempo eny am-pandehanana;
ho tahaka ny zaza tsy tonga volana
ka tsy hahita masoandro na oviana na oviana!
10Tsy mbola tonga kirihitra akory
ny tsilo novolen'ny olon-dratsy,
dia hongotan'ny tafiotra sahady
na mbola maitso na efa maina.
Ny antom-pifalian'ny marina
1 - Ny fandresen'Andriamanitra ny fahavalony
Andriamanitra no miady ho an'ny mpanompony. Mitsangana handresy ny fahavalo Izy ka mandositra sy miely lavitra ireny (and. 1-2). Miorina amin'ny finoana an'i Jesoa Kristy ny fifalian'ny mpino noho Izy efa nandresy ny fahoriana sy ny fahafatesana ho antsika.
2 - Ny fisinjovin'Andriamanitra ny olona ory
Mitsinjo ny marina Andriamanitra ary koa manome rariny ny kamboty sy ny mpitondratena (and.10). Akaikin'izay zohim-pahoriana hatrany Izy ka mampitoetra fifaliana ao am-pon'ireny (and.5-6). Ny fiderana sy ny fankalazana ny Anarany no entina maneho ny fifaliana eo anatrehan' Andriamanitra izay nitsinjo antsika tamin'ny alalan'i Jesoa Kristy Tompontsika (and.3-4).
3 - Nv fanatrehan'Andriamanitra ny olony
Manatrika ny olony hatranv Andriamanitra. Mihorohoro eo anatrehany ny voahary rehetra (and.8). Tsy manatrika fe-manatrika fotsiny ny vahoakany anefa Izy fa mitondra sy mitantana ny fiainany ary koa mandrotsa-pitahiana ho azy ireo (and.7,9). Tsarovy ny fanatrehan'Andriamanitra antsika amin'ny alalan'ny Fanahy Masina dia hifaly amin'ny fitiavany mandrakariva isika (Gal.5,22).
Fanontaniana:
Afaka ny hifaly ao anatin'ny andro mahaory ve ianao?
