10Halanareo ny olona mananatra eo amin'ny fitsarana
ary maharikoriko anareo ny vavolombelona milaza ny marina.
11Nohosihosenareo ny malahelo
ka nangalanareo am-paham-bary ny vokatra avy aminy.
Noho izany, dia tsy hitoetra amin'ny trano vato
voapaika nataonareo ianareo,
ary tsy hisotro ny divay avy amin'ny voaloboka tsara nambolenareo.
12Hoy koa ny Tompo hoe:
«Fantatro fa marobe ireo helokareo
ary mahatsiravina ireo fahotanareo;
ianareo no mpandray tsolotra sy mpanenjika ny olo-marina,
ka manodinkodina ny zon'ny mahantra
eo amin'ny fitsarana,»
13Noho izany, dia mangina ny olon-kendry
amin'izao fotoana izao
satria fotoana ratsy izao.
14Ny tsara no tadiavo fa aza ny ratsy,
mba ho velona ianareo;
amin'izay ny TOMPO Andriamanitr'izao rehetra izao
dia hiaraka aminareo araka ny lazainareo.
15Ankahalao ny ratsy, tiavo ny tsara,
ary ampitoero ao amin'ny fitsarana indray ny rariny;
Angamba ny TOMPO Andriamanitr'izao rehetra izao
hamindra fo amin'izay sisa amin'ny taranak'i Jôsefa.
1- Miaina amin'ny faharatsiana ny fiarahamonina
I Amosa dia mpaminany nirahin'ny Tompo hananatra ny zanak'i Israely, noho ny ratsy ataony. Tsy laitra anarina anefa ny vahoaka satria efa rakotry ny faharatsiana ny fiainany manontolo. Ny làlam-pivavahana dia natao tsinontsinona, ary ny làlam-pitondrantena koa dia nohitsakitsahiny tsotra izao. Voalaza eto amin'ny and. 5 hoe izay mananatra eo dia halany ary ireo miteny ny zava- marina toy ny faharatsiam-pitondrantenan'ny olona dia tsy hamavoina. Voalaza manokana ny fanaovana tsinontsinona ny mahantra sy fanaovana tsindry hazolena azy ireny izay tsy araka ny fanambaran'ny làlam- pivavahana amin'ny fitondrana azy ireny. Samy manao izay heveriny fa mahatsara azy sy ny fiainany avy ny olona. Tsy misy mihevitra ny hafa. Fitiavan-tena sy fanatsarana ny fiainany manokana no zava-dehibe tamin' ny rehetra.
2- Hovaliana anefa ny ratsy atao
Ampahafantarin'i Amosa eto fa an'Andriamanitra ny teny farany, Azy ny fahefana sy fanapahana ny fiainan'nv olona ka tsy ho araka izay fandaharam-potoanan'ny olona hanatsara ny fiainanyakory no zavatra hisy. Voalaza eto hoe nanao trano voapaika vato ianareo fa tsy hitoetra amin'izany, nisasatra tokoa hihinam-bokatra ny olona fa tsy hisitraka izany velively noho ny ratsy natao izay tsy nanekena nibebahana. na dia efa notaomina ho amin'izany aza. Koa taomina ny rehetra hiverina amin'nv Tompo, tsy amin'ny endrika ivelany fotsiny fa amin'ny faharesen-dahatra tanteraka, ao anatin'izany koa ny fiheverana ny hafa, fa tsy ny tena ihany.
Fanontaniana:
Araka ny hevitrao, mahakasika ny firenena sy ny fiaraha- monina malagasy ve zavatra ambaran'i Amosa eto?
