12Fa izao tokoa no lazain'ny TOMPO:
«Indro hotarihiko hankao Jerosalema
ny fiadanana ka hihanaka toy ny ony;
ny haren'ny firenen-kafa hotarihiko hankao
ka ho tondraka toy ny renirano.
Hikarakara fatratra anareo Aho
toy ny ataon-dreny mampinono ny zanany
ka mitondra azy eo an-trotroany
sy mandrotsirotsy azy eo am-pofoany.
13Eny, ho toy ny reny mampionona ny zanany
no hampiononako anareo koa;
ary ao Jerosalema no hampiononako anareo!
14Dia ho tsapanareo amin'izany
fa ho dibo-kafaliana ny fonareo,
ary ny taolanareo efa maina hahazo hery indray
tahaka ny ahitra mirobona.»
