Sabotsy15 Novambra 2014 - Asa 15 : 30 - 35

30Dia nalefa ireo iraka mbamin'i Barnabà sy i Paoly ka nidina nankany Antiôkia. Novorîn'izy efa-dahy ny mpino marobe tao an-tanàna ka notolorany an'ilay taratasy. 31Novakîna izany ka samy dibo-kafaliana izy rehetra noho ny fampaherezana nentin'ilay taratasy. 32I Joda sy i Silasy izay samy mpaminany*, dia niteny naharitra tamin'ny havana iray finoana ka nampirisika sy nampahery azy ireo. 33Ary rehefa nitoetra elaela tao Antiôkia izy roa lahy, dia nalefan'ireo hiverina soa aman-tsara any amin'ny naniraka azy. [ 34Kanefa sitrak'i Silasy ny hijanona tao.] 35Nitoetra tany Antiôkia kosa i Paoly sy i Barnabà; ary nampianatra sy nitory ny tenin'ny Tompo izy roa lahy mbamin'ny namany maro.